Dyé Jéhova—Méwité Pou Moun Konnèt Li

ÈS i posib ou ka mantjé an bagay enpòtan an lavi’w? Ében, si’w pa ni djè nòlaj konsèné Bondyé, ou sa asiwé ou ka mantjé an bagay ki byen enpòtan an lavi’w. Pou ki wézon nou sa di sa? Sé paski, lè’w vini konnèt Dyé vwé-a Bib-la ka palé konsèné-a, sa ka pòté’w an chay bennéfis. An chay moun ja wéyalizé sa. Anfen, sé bennéfis-la ou kay èspéyansé-a kay koumansé la menm, èvèk yo kay kontiné pou tout tan.

Sé Dyé Jéhova ki annékòz nonm pou ékwi lévanjil-la, konsa Bib-la sé pawòl Bondyé. Èk Jéhova vlé nou apwann konsèné’y. Yonn an sé moun-lan ki té ékwi sé samz-la té di Bondyé: “Sé pou moun konnèt ou, non’w sé Jéhova, sé ou sèlman ki Pli Ho-a asou tout latè-a.” Èk Jéhova konnèt i bon pou nou vini konnèt li. I di: “Mwen menm, Jéhova, mwen sé Bondyé’w, Moun-lan ki ka enstwi’w pou bennéfis ou-a.” Mé, ki bennéfis nou ka twapé lè nou vini konnèt Dyé Jéhova, Yonn-lan Ki Pli Ho-a?​—Sam 83:18; Izaya 48:17.

Ében lè nou vini konnèt Dyé Jéhova, anpanmi sé bèl bennéfis-la nou kay èspéyansé sé sa, nou kay twapé bon djid pou édé nou aji épi sé difikilté-a nou ka èspéyansé touléjou. Osi, nou kay ni on bèl èspwa pou tan ki ka vini, èvèk nou kay ni lapé an tjè nou épi an lidé nou. An plis di sa, la ni an chay kwèstyon konsèné lavi ki ka twakasé lidé an pil moun jòdi jou. Mé, lè nou vwéman konnèt Jéhova, sé kwèstyon sala pa ka twakasé lidé nou twòp. Alò, ki diféwan kwèstyon ki ka twakasé lidé moun?

Pou Ki Wézon Ou Asou Latè-a?

Magwé lézòm ja fè pwogwé ki èstòdinè lè’y vini pou tèknòlòji, moun jòdi jou ka katjilé konsèné kwèstyon ki enpòtan tèl kon: ‘Pou ki wézon mwen asou latè-a? Ki koté mwen ka alé? Ki sans lavi sala ni?’ Si on moun pa twapé bon wépons pou sé kwèstyon sala, lavi’y pa kay vwéman ni sans. Mé, ès la ni an chay moun ki ka santi akwèdi lavi yo pa ni sans? Ében, an lanné mil nèf san katwiven disèt (1997), yo mandé an chay moun an péyi Germany kwèstyon sala: ‘Souvan, ès ou ka santi akwèdi lavi pa ka fè sans?’ Èvèk apipwé senkant (50) pousan an sé moun-lan ki wéponn kwèstyon sala di, délè ében jis souvan, yo ka santi akwèdi lavi pa ka fè pyès sans. Pitèt la ni moun an péyi’w ki ni menm katjil sala.

Si on moun pa konnèt pou ki wézon i asou latè-a, i kay byen difisil pou moun sala désidé kisa i vlé fè épi lavi’y. Adan moun ka kwè, si yo ni on bon twavay ében yo ka fè an chay lajan, sa kay ba lavi yo sans. Mé, yo ka wéyalizé sé pa lajan épi wichès ki ka bay lavi on moun sans. Èk vwéman, lè on moun ka santi akwèdi lavi’y pa ni pyès sans, sa sé on bagay ki byen danjéwé. Kalité katjil sala ka distwé adan moun si tèlman, yo ka jis vlé tjwé kò yo. Yon papyé nouvèl yo ka kwiyé International Herald Tribune té ni yon èspéyans ki ka moutwé sa. Yo palé konsèné on bèl jenn fi ki té ni twantenyen (31) lanné. Fi-a lévé adan on fanmi ki té ni “an chay wichès, èk i té ka twapé tout sa’y té vlé.” Mé, magwé i té ni tout sa, i té ka santi i pa kò’y, èk i té ka santi lavi’y pa té ni pyès sans. Konsa, fi-a tjwé kò’y. I pwan an chay tablèt pou dòmi, èk yo jwenn li mò. Pitèt ou ja tann lòt èspéyans kon sa.

Ès ou ja tann moun di, siyans sa enstwi nou tout bagay nou bizwen konnèt konsèné lavi? Yon papyé nouvèl hòd Germany yo ka kwiyé Die Woche di: “Menm si siyans sé lavéwité, lè’y vini pou bagay spiwityouèl, siyans fèb.” Èk i di ankò: “Évolousyon ka sanm on bagay ki agòspyès. Èk bagay kon “quantum physics” ka toujou chanjé, konsa “quantum physics” pa sa soulajé moun èk ba yo sikyòrité nonpli.” Vwéman, sa yo ja dékouvè an siyans ja édé yo an chay pou konpwann bagay tèl kon, sé diféwan kalité lavi-a nou ka wè an kwéyasyon. Èk siyans ja osi édé yo pou èspliké an chay lòt bagay. Mé, siyans pa sa di nou pou ki wézon nou asou latè-a, ében ki koté nou ka alé. Konsa, si nou dépan sèlman asou siyans, nou pa kay jwenn sé wépons-lan pou sé kwèstyon sala. Non, siyans pa sa enstwi nou tout sa nou bizwen konnèt konsèné lavi. Kon papyé nouvèl-la Süddeutsche Zeitung di, “moun toupatou bizwen djid.”

Asiwé, pli mèyè Moun-lan pou djidé nou, sé Kwéyatè nou. Sé li ki mété nou asou latè-a, konsa i oblijé sav pou ki wézon i mété nou la. Èvèk i ka di nou sa, paskè Bib-la ka moutwé, Jéhova fè lézòm pou pléplé latè-a, èk pou otjipé’y. Osi, Bib-la ka moutwé, Jéhova fè lézòm adan an mannyè pou yo sa imité sé menm bèl kawaktè-a i ni-an an tout sa yo ka fè. Kawaktè tèl kon jistis, lasajès, épi lanmityé. Lè nou byen konpwann wézon-an pouki Jéhova fè nou, sa ka édé nou pou konpwann, pou ki wézon nou asou latè-a.​—Jennésis 1:​26-​28.

Kisa Ou Sa Fè?

Bon, kisa ou sa fè si’w p’òkò jwenn wépons pou kwèstyon tèl kon: ‘Pou ki wézon mwen asou latè-a? Ki koté mwen ka alé? Ki sans lavi sala ni?’ Ében, Bib-la ka ankouwajé’w pou vini konnèt Jéhova. Anfen, Jézi té di Papa’y an lapwiyè: “Lè moun konnèt ou, sèl Bondyé ki ni pou vwé, èk yo konnèt Jézi Kwi, moun-an ou voyé-a, sé lè sala ou ka ba yo lavi étonnèl.” Nou osi ka ankouwajé’w pou dévlopé sé bèl kawaktè-a Bondyé ni-an, sitou lanmityé. Èk fè’y détèminasyon’w pou’w viv anba kondwit Wéyòm Bondyé. Sa sé Wéyòm-lan ki kay kondwi latè-a touswit. Si’w fè sa, lavi’w kay ni an chay sans. Ou kay ni on bèl èspwa ki asiwé pou tan ki ka vini, èk ou kay jwenn wépons pou tout sé kwèstyon-an ki ka twakasé lidé’w.​—Jan 17:3; Ékléziyastis 12:13.

Mé, ki éfé sa kay ni asou lavi’w? Hans sé on nonm ki sipozé konnèt wépons-lan pou kèstyon sala. a Plizyè lanné ki pasé, Hans té ni on ti lafwa an Bondyé, mé ti lafwa sala pa té ni pyès enflouwans asou lavi’y. Hans té kontan sèvi dwòg, i té ka kouwi fanm, i té ka fè ti kwim, èk i té kontan kouwi motobayk. Mi sé sa i di: “Pou mwen, lavi pa té ni pyès sans, èk mwen pa té ni lakontantman an lavi mwen.” Mé lè Hans té ni apipwé venn senk (25) lanné, i désidé pou pwan tan’y èk li Bib-la, pou’y sa vini konnèt Bondyé byen. Lè’y vini konnèt Jéhova pli mèyè, èk i vini konpwann ki sans lavi’y té ni, i chanjé lavi’y toubonnman, èk i batizé kon on Tèmwen Jéhova. Èvèk pou sé dis (10) lanné-a ki pasé-a, i ka wann sèvis an plen. Mi sé sa Hans di épi tout tjè’y: “Pli mèyè bagay-la on moun sa fè épi lavi’y, sé pou sèvi Jéhova. La pa ni anyen ki sa konpawé épi sa. Apwézan lavi mwen ni sans, paskè mwen vini konnèt Jéhova.”

San dout ou kay dakò, kwèstyon-an konsèné wézon-an nou asou latè-a, sé pa sèl kwèstyon-an ki ka twakasé lidé moun. Kon sitiwasyon-an an latè-a ka vini pli mové, la ni on lòt bagay enpòtan ki ka distwé an pil moun.

Pou Ki Wézon Tèl Bagay Fèt?

Lè on mové bagay wivé on moun, souvan, kwèstyon-an ki asou lidé moun-lan sé: ‘pou ki wézon tèl bagay fèt?’ Si on moun ka byen konpwann wépons-lan pou kèstyon sala, i kay pli ézé pou’y sa aji épi sé pwoblenm-lan i ka èspéyansé-a. Mé, si’y pa sa twapé on bon wépons pou kwèstyon sala, soufwans li pé diwé pou pli tan, èk i pé jis pèd dézi-a pou viv. Annou pwan èspéyans yon manman yo ka kwiyé Bruni, pou ègzanp.

Bruni di: “Tjèk tan ki pasé, ti bébé mwen Susanne mò. Mwen té ka kwè an Bondyé, konsa mwen alé oti pwèt-la pou mwen jwenn konsolasyon. Pwèt-la di mwen, sé Bondyé ki pwan tifi mwen-an, èk apwézan Susanne ka viv an syèl kon yon nanj. Akòz di lanmò Susanne mwen té an tèlman lapenn, pou mwen anyen an lavi pa té ni enpòtans. Mé an plis di sa, mwen té hayi Bondyé paskè i té pwan tifi mwen-an.” Lapenn-lan Bruni té ni-an kontiné pou plizyè lanné. Mé i di: “Yon jou, on Tèmwen Jéhova sèvi Bib-la pou moutwé mwen, la pa té ni pyès wézon pou mwen hayi Bondyé. Jéhova pa té pwan Susanne pou mennen an syèl, èk Susanne pa té yon nanj nonplis. Susanne tonbé malad paskè i pa té pawfé. Apwézan tifi mwen-an ka dòmi an lanmò. I ka èspéyé pou jou-a lè Jéhova kay wésisité’y. Mwen osi apwann, Jéhova té fè lézòm pou yo sa viv pou tout tan an pawadi asou latè-a, èk touswit i kay akonpli sa. Dépi mwen koumansé konpwann kalité Moun-lan Jéhova vwéman yé, mwen vansé pli pwé’y, èvèk lapenn-lan mwen té ka santi-a koumansé bésé.”—Sam 37:29; Twav. 24:15; Ronm 5:​12.

Milyon di moun owon latè-a ka soufè akòz di pwoblenm tèl kon ladjè, lafen, dézas natiwèl, ében lòt difikilté yo ka èspéyansé an lavi yo. Bib-la ka moutwé, sé pa Jéhova ki ka fè moun soufè. Anfen, i pa té janmen vlé nou soufè, èk touswit i kay mennen on bout pou tout movèzté épi soufwans. Lè Bruni apwann sé bèl bagay sala, sa soulajé’y. Jòdi jou, movèzté ka ògmanté asou latè-a, mé tout sé mové bagay-la ki ka fèt-la sé pwèv ki, nou ka viv an “dènyé tan-an.” Sa vlé di, nou tou pwé tan-an lè Bondyé kay détwi vyé sistenm sala, èk mennen tout sé bèl chanjman-an nou ka èspéwé-a.​—2 Timòfi 3:​1-5; Mafyou 24:​7, 8.

Mannyè Ou Sa Vini Konnèt Bondyé

Hans épi Bruni té ni on ti lidé konsèné Bondyé èk yo té ka kwè an li, mé yo pa té ni nòlaj ki aplon konsèné’y. Lè yo pwan tan épi yo fè éfò-a pou apwann nòlaj ki kòrèk konsèné Jéhova, i benni éfò yo. Pou ègzanp, yo twapé bon wépons pou sé kwèstyon-an ki pli enpòtan jòdi jou. Èk sa ba yo lapé an tjè yo épi an lidé yo. Osi, i ba yo on bèl èspwa ki asiwé pou tan ki ka vini. Plizyè milyon Tèmwen Jéhova ja èspéyansé menm bagay sala.

Si ou vlé konnèt Jéhova pli mèyè, pwèmyé bagay-la ou ni pou fè, sé pwan tan pou ègzanminé Bib-la épi pokosyon. Paskè sé Bib-la ki ka di nou konsèné Jéhova, èk tout sa i vlé nou fè. Adan sé moun-lan ki té ka viv an pwèmyé syèk-la té fè sa. Louk sété on dòktè, èk i osi sété on moun ki té ka étidyé listwa. Mi sé sa Louk di konsèné sé Jwif-la ki té ka viv adan yon vil an péyi Gris yo ka kwiyé Bèriya. I di, sé Jwif sala “wisivwè konmisyon-an konsèné Jézi Kwi [hòd Pòl épi Saylas] byen vit, épi toulé jou yo té ka li lévanjil-la pou yo wè si sa Pòl té ka di-a té vwé.”​—Twav. 17:10, 11.

On lòt bagay sé Kwityen-an an pwèmyé syèk-la té ka fè sé sa, yo té ka asanmblé ansanm an sé kongwigasyon-an. (Twav. 2:​41, 42, 46; 1 Kòrint 1:​1, 2; Galécha 1:​1, 2; 2 Tèsalonnika 1:1) Jòdi jou, Tèmwen Jéhova ka fè menm bagay-la. Yo ka vini ansanm an sé kongwigasyon-an pou atandé mitin. Sé mitin sala ka édé chak moun an kongwigasyon-an pou vansé pli pwé Jéhova, épi pou sèvi’y épi tjè kontan. Mé, la ni lòt bennéfis nou ka twapé lè nou asosiyé épi Tèmwen Jéhova. Lavéwité-a sé sa, piti an piti, lézòm ka vini menm kon Dyé-a yo ka sèvi-a. Ében, Tèmwen Jéhova pa pawfé, mé yo ka fé tout sa yo pé pou imité sé bèl kawaktè-a Dyé Jéhova ni-an. Konsa, kon nou asosiyé épi Tèmwen Jéhova, sa ka édé nou pou konnèt Dyé Jéhova pli mèyè.​—Hibrou 10:24, 25.

Ès ou ka di an lidé’w, sa sé twòp éfò on moun ni pou fè, senpliman pou konnèt Bondyé? Ében vwéman, nou ni pou fè éfò pou konnèt Bondyé. Mé, ès ou pa ni pou fè éfò pou’w akonpli an pil lòt bagay ou vlé fè an lavi’w? Katjilé asou éfò-a yon “athlete” ni pou fè pou’y entwennen kò’y adan on spò. Pou ègzanp, an lanné mil nèf san swasant ywit (1968), yo té tjenn “Olympic-la” an péyi Fwans. Jean-Claude Killy sé yonn an sé “athlete-la” ki té pwan pa an “Olympic” sala. I té ganyen on méday lò pou chak an sé twa (3) konpitisyon-an yo té ni pou spò-a yo ka kwiyé “skiing.” Èk mi sé sa i di konsèné éfò-a on moun ni pou fè, pou’y vini yon “athlete” entònasyonnal. I di: “Ou ni pou koumansé pwépawé kò’w dis (10) lanné andavans. Ou bizwen an pil lanné pou’w fè plan’w, èvèk ou ni pou katjilé asou sa chak jou. . . . Twa san swasant senk (365) jou pa lanné, ou ni pou twavay pou pwépawé lidé’w èk kò’w.” Imajiné sa, on moun ni pou fè tout éfò sala pou’y pwan pa adan an konpitisyon ki pé diwé pou dis (10) minit sèlman, èk moun-lan pa menm asiwé si’y kay ganyen konpitisyon-an! Mé, si’w fè éfò-a pou konnèt Jéhova, sé bennéfis-la ou kay twapé kay otan pli mèyè, èk yo kay diwé pou pli tan tou.

Yon Wilasyon Ki Ka Vini Pli Fò Jou Apwé Jou

Asiwé, pyèsonn pa kay vlé mantjé on bagay ki enpòtan an lavi yo. Alò, si’w wéyalizé lavi’w pa ka vwéman fè sans, ében si’w anvi konnèt pouki mové bagay ka fèt, fè’y détèminasyon’w pou’w vini konnèt Jéhova, Dyé vwé-a Bib-la ka palé konsèné-a. Èvèk lè’w apwann konsèné Jéhova, sa kay chanjé lavi’w toubonnman. Ou kay ni on pli mèyè lavi pou tout tan.

Ès jou-a kay wivé lè nou kay doubout apwann konsèné Jéhova? Non. Anfen, moun ki ja sèvi Jéhova pou plizyè lanné ka étonnen toujou, lè yo katjilé asou sa yo ja apwann, èk sa yo ka kontiné apwann konsèné Jéhova. Kon nou ka apwann konsèné Jéhova, sa ka ban nou tjè kontan, èvèk i ka édé nou pou vansé pli pwé Dyé nou. Alò, menm kon zapòt Pòl, nou ka di: “Wichès épi lasajès Bondyé gwan tèlman! I konnèt tout bagay! Ki moun ki sa èspliké jijman’y? Pyèsonn pa sa konpwann mannyè’y. Kon i ékwi an lévanjil-la, ‘Ki moun ki konnèt mannyè Bondyé ka katjilé? Ében ki moun ki ka édé’y fè disizyon?’”—Ronm 11:33, 34.

[Footnote]

[Blurb]

Moun ka kontiné mandé sé menm kwèstyon enpòtan sala: ‘Pou ki wézon mwen asou latè-a? Ki koté mwen ka alé? Ki sans lavi sala ni?’

[Blurb]

“Dépi mwen koumansé konpwann kalité Moun-lan Jéhova vwéman yé, mwen vansé pli pwé’y”

[Blurb]

“Pli mèyè bagay-la on moun sa fè épi lavi’y, sé pou sèvi Jéhova. La pa ni anyen ki sa konpawé épi sa. Apwézan lavi mwen ni sans, paskè mwen vini konnèt Jéhova”