Quimfilmi ta Chau Jehová, rumel cümelcangeaimi

¿CHEM duamfali tami doi ayühun-ngechi mongen nierpual? Fentren che quimürpufilu ta Ngünechen doi ayühun-ngechi mongen nierpui, eimi ca cümelcangeafuimi famülque meu ca cüpalechi antü mu.

Jehová, tati deumalu ti Biblia, ayüniei taiñ quimafiel. Ti salmista huirintucui: “Com che tañi quimal eimi müten tami Alüpüralen itrocom Mapu mu, Jehová pingei tami üi”. Jehová quimniei doi quimfiliyiñ, doi cümelcayaiñmu. Feimu feipi: “Iñche, ta Jehová, tami Ngünechen, Tami Quimeltuqueteu eimi tami cümelcaleal” (Salmo 83:18; Isaías 48:17). Quimfiel mu ta Jehová, ¿chumngechi cümelcaqueiñmu?

Quimfiel mu ta Chau Dios, adnieiñmu taiñ chaftual chem dungu rume rupamequele. Tüngduamcüleiñ taiñ piuque mu ca eluqueiñmu quiñe rüf maneluhun cüpalechi antü mu. Iñchiñ quimnieiñ falinque dungu fentren pu che ñi ramtuuquen. ¿Chem ramtuuquei am pu che?

¿Falingelu troquifimi tami mongen?

Mülefule rume fentren tecnologia, pu che petu ramtuuquei: “¿Chumngelu elngei che Mapu mu? ¿Chumlerpuai taiñ mongen? ¿Chumal mongeleiñ?”. Pu che quimnole ti lloudungun tüfachi cüla ramtun, rüf ayüucülelayafui. Fentren che ca femngechi duamquei. 1997 tripantu mu, Alemania mapu meu, femngei quiñe encuesta. Fei fentren che ramtungelu feipi ñi huesa duamcülen, ca falinolu ñi mongen troquiucüleingün. Ca femngechi duamcülepelai pu che cheu tami mülen.

Quimnoliyiñ chem duam niei taiñ mongen, quimlayaiñ chem femal taiñ mongen mu. Feimu fentren che quintuquei tañi ricungerpual, ñi nieal fentren chemcün ca cüme rupaleal. Huelu femngefule rume, rüf ayühun-ngelaingün. Huellilei reque tañi piuque engün. Fentren che femngechi ñi rupan mu, huesa duamcülei. Fei pihuelai tañi mongeleal. Quiñeque langümuuquei cütu. Femngechi dungu mu rupai quiñe üllcha domo. Quiñe diario feipi tüfachi üllcha domo cüme adngefui, fentren plata niefui. Tañi familia ricungefui, fentren chemcün niefui. Huelu cüme duamel-laeyu com tati chemcün ñi niefel. Quisulelu troquiuquefui. Feimu fente ñi huesa duamcülen, langümuhui. ¿Eimi ca quimniepelaimi quiñeque che ñi rupan femngechi dungu mu?

Quiñeque che raquiduamquei tati ciencia quimeltuafeiñmu tati falinque dungu mongen mu. Quiñe diario Alemania mapu mu feipi tati ciencia quimeltuafeiñmu fentren falinque dungu. Huelu tati ciencia quelluquelaeiñmu taiñ cüme duamcüleal ca cüme yenieal taiñ mongen. Tati teoria de la evolucion ca caquelu dungu ñi ngüneduamqueel pu cientifico elulayafeiñmu taiñ tüngduamcüleal, taiñ yafüluhual ca elulayafeiñmu maneluhun cüpalechi antü meu. Pu cientifico estudiaqueingün müleyechi mongen, fei fentren dungu quimeltuafeiñmu. Huelu quimeltulayafui chumngelu müleiñ fau ca chumal mongeleiñ. Feimu quiñe diario Alemania mapu mu feipi: “Fentren che duamniei chem tañi quelluaeteu ñi cüme yenieal tañi mongen”.

Iñchiñ quimnieiñ inei taiñ doi cüme adnieñmayaeteu taiñ mongen: taiñ Deumaeteu llemai, Chau Dios. Quisu müten quimniei chumal mongeleiñ. Tati Biblia feipi Jehová elcünueiñmu Mapu meu ñi apolafiel che meu, ca ñi cüdahuafiel. Cafei adcünueiñmu taiñ inayentuñmayafiel quisu tañi chumngen, taiñ nieal ta quimün, piuqueyechen ca nor raquiduamnieal. Quimürpuliyiñ chumngelu deumaeiñmu Jehová quimtucuaiñ chumal mongeleiñ (Génesis 1:26-28).

Eimi ¿chem chumafuimi?

Biblia ngülamtueimu tami quimafiel ta Chau Dios, femngechi quimaimi chumngelu elngeiñ Mapu mu, chumlerpuai taiñ mongen ca chumal mongeleiñ. Feimu Jesús feipi: “Fei tüfa lle tati rumel mongen: tami quimngeal eimi, tami quiñen rüfngechi Ngünechen-ngen ca Jesucristo, eimi tami huercüelchi Fotüm” (Juan 17:3; Eclesiastés 12:13). Biblia ca ngülamtueimu tami piuqueyecheal ca pengelal tami eluucülen ñi ngünenieaeteu Chau Dios. Femngechi rüf falintuafimi ta mongen, ayühun nieaimi ca cüme maneluhun nierpuaimi. Femngechi quimaimi tami ramtuuquefel cuifi mu.

¿Chumngechi quelluafeimu ñi quimal tüfachi ramtun? Cüme elcünutuafuimi tami mongen, chumngechi ñi femün quiñe huentru Hans pingelu.⁠ * Quisu quimniefui ñi mülen ta Ngünechen, huelu inaquefui quisu tañi ayünieel müten. Drogaquefui, huesa pod mongen yeniefui, hueñequefui. Huelu “rüf ayühun nielafun” pi. 25 tripantu nielu, Hans eluhui ñi quimafiel ta Ngünechen, feimu estudiafi ta Biblia. Hueniyerpufilu ta Jehová, quimnierpui chem duam niei ta mongen, fei cüme elcünutui tañi mongen ca fautizahui. Feula yeniei 10 tripantu ñi cüdahuelquefiel fill antü ta Chau Ngünechen. “Cüdahuelafiel ta Jehová trürümfal-lai chem cüdau mu no rume. Feula doi cüme mongen yenietun ca rüf ayühun nien” pi.

Fentren che ramtuuquei chem duam niei ta mongen ca chumal mongeleiñ. Huelu fei müten ramtuuquelai pu che. Mülei fentren huesaque dungu, feimu ca ramtuuquei pu che: ¿Chumngelu rupaquei fentren huesaque dungu?

¿Chumngelu rupaquei fentren huesaque dungu?

Rupan mu quiñe huesa dungu, pu che ramtuuquei “¿Chumngelu rupaquei huesaque dungu?”. Quimülmi tüfachi dungu, feita quelluaimu. Fei chaftuafimi tami huesa rupan ca doi cüme duamcüleaimi, chumngechi ñi rupan quiñe domo Bruni pingelu.

Quisu feipi: “Mufüque tripantu rupai ñi lan tañi püñeñ, Susan pingequefui. Iñche feyentulefun Dios, fei amun tañi yafülaeteu ti sacerdote. ‘Chau Dios yeñmatueimu tami püñeñ huenu mu’ pieneu ti sacerdote, ‘angelcületui’ pieneu. Tañi feipin mu rume huesa duamnagün, illcutufiñ ta Ngünechen. Fentren tripantu cutrantupiuquelen lan tañi püñeñ mu. Huelu quiñe antü, quiñe Dunguquelu Inei Ngen Jehová pengeleneu Biblia mu, ‘Chau Dios yeñmalaeimu tami püñeñ huenu mu, ca angelngelai rume. Feimu ngelai tami üdeafiel ta Chau Dios’ pieneu. Tañi püñeñ lai cutrancülen mu. Umaucülei reque, huelu Chau Dios huiño mongeltuayu. Ca quimürpun Chau Dios deumafi pu che tañi nieal afnoachi mongen quiñe cüme Mapu mu. Fei pichiñma mu müten, femtripayai tañi feipicünuel. Com tañi quimürpuel Chau Dios mu quellueneu ñi doi cüme duamcületual ca doi fülconcüleal Chau Dios mu” (Salmo 37:29; Hechos 24:15; Romanos 5:12).

Millonque che rupaquei huesaque dungu mu, cutran, lan, hueichan, cürüftucu mahun ca nüyün, ca caquelu femngechi dungu. Huelu Chau Jehová ayüquelafui pu che ñi cutrancaucüleal, doi mai pichiñma mu müten apümafi com huesaque dungu. Quimlu tüfa ta Bruni, doi cüme duamcületui. Pequeiñ fentren huesaque dungu, fei pengeleiñmu taiñ mülen ti afchi antü mu. Feimu pichilehuei Chau Dios ñi cüme elcünutual com dungu (2 Timoteo 3:1-5; Mateo 24:7, 8).

¿Chumngechi quimürpuafuimi ta Chau Dios?

Hans ca Bruni quimfuingu ñi mülen ta Ngünechen, huelu cüme quimlafingu ta Chau Dios. Eluulu engu ñi cüme quimafiel ta Jehová, cümelcangeingu. Quimurpuingu falinque dungu ñi ramtuuqueel pu che, feimu tüngduamcüleingu ca niei quiñe rüf maneluhun cüpalechi antü mu. Ca femngechi rupaqueingün millonque pu Dunguquelu Inei Ngen Jehová.

Taiñ cüme quimafiel ta Jehová, hunelu mu mülei taiñ cüme estudiayal Biblia, femngechi cüme quimafiyiñ ca chem taiñ chumal ñi ayühulafiel ta Jehová. Hunen siglo mu, ca femngechi femingün quiñeque che Berea mapu mu. Biblia meu nütramcangei ñi femün engün pu cristiano Berea trahunche meu. Fei engün “ayühun-ngechi lloufi engün ti cüme dungu. Fill antü chillcatuquefuingün ti huirin dungu femngechi tañi quimal ñi rüfngen tañi femngechi feipiquen ta Pablo” (Hechos 17:10, 11).

Cafei pu cristiano hunen siglo meu trahuluuquefuingün (Hechos 2:41, 42, 46; 1 Corintios 1:1, 2; Gálatas 1:1, 2; 2 Tesalonicenses 1:1). Famülque mu ca femngechi trahuluuqueiñ. Taiñ trahun quelluqueiñmu taiñ doi fülconal Jehová mu ca taiñ ayühunquechi serfiafiel (Hebreos 10:24, 25). Pu Dunguquelu Inei Ngen Jehová eluuqueingün ñi inayentuafiel ñi chumngen ta Jehová, feimu trahuluhulmi fei engün mu doi cüme quimafimi ta Chau Dios ca inayentuafimi.

“Müna cüdautuafun ñi quimafiel ta Chau Dios, ¿cümepeafui mai tañi quimafiel?”, piafuimi chi. Cüdautuafuimi chi, huelu com dungu taiñ mongen mu mülei taiñ yafüluucüleal. Raquiduamnge fente ñi yafüluuquen pu deportista ñi cüme pepicaucüleal. Quiñe tüfa Jean Claude Killy pingei. Quisu huehui quiñe falin medalla, fei feipi: “Ñi huehual quiñe deporte mu duamfali fill antü ñi cüme pepicahual, fentren tripantu mu”. Pu deportista fentren tiempo pepicauqueingün, fei ti cuden mari minuto müten puhuafui chi. Huelu doi falin-ngei taiñ cüme quimafiel ta Jehová, femngechi rumel cümelcangeaiñ.

Doi cüme hueniyeafimi ta Jehová

Com ayünieiñ ñi falintungeal taiñ mongen. Feimu ayüucülenolmi tami mongen mu ca ayülmi tami quimal chumngelu ruparupangei huesaque dungu, yafüluhuaimi tami quimafiel ta Chau Dios. Femngechi femülmi, nietuaimi cüme mongen feula ca rumel.

Turpu fentecünulayaiñ taiñ quimürpuafiel ta Chau Dios. Pu serfiquefilu ta Jehová fentren tripantu mu cütu petu amulei ñi quimürpufiel ta Chau Dios. Doi quimürpufiliyiñ ta Chau Dios, doi fülconcüleaiñ quisu mu ca doi ayühun nieaiñ. Tati apostol Pablo reque raquiduampelayaimi, quisu feipi: “¡Rume fentrei Ngünechen tañi fütra quimün, ca ñi pepilniefiel itrofill dungu! ¡Inei no rume ta pepi adümlayafui quisu ñi ngünenieelchi dungu! ¡Ca quimüñmangelayafui rume quisu ñi raquiduam! Fei ‘¿inei am adümafui Ñidol Ngünechen tañi nieelchi quimün? ¿Inei am quimafui ñi ngülamaeteu?’” (Romanos 11:33, 34).

[Quimngeal dungu]

[Feipin]

Pu che petu ramtuuquei: “¿Chumngelu elngei che Mapu mu? ¿Chumlerpuai taiñ mongen? ¿Chumal mongeleiñ?”.

[Feipin]

“Com tañi quimürpuel Chau Dios mu quellueneu ñi doi cüme duamcületual ca doi fülconcüleal Chau Dios mu”.

[Feipin]

“Cüdahuelafiel ta Jehová trürümfal-lai chem cüdau mu no rume. Feula doi cüme mongen yenietun ca rüf ayühun nien”.