Si Jehova—Sarong Dios na Maninigong Mamidbid

POSIBLE daw na nalilipasan nindo an sarong bagay na mahalaga sa buhay? Kun kakadikit an aram nindo manongod sa Dios, kun siring tunay nanggad na iyo. Taano man? Huli ta, arog kan naaraman kan minilyon na tawo, an pakamidbid sa Dios kan Biblia nagtatao nin dakulang mga pakinabang sa buhay. An mga pakinabang na ini minapoon tolos-tolos asin nagpapadagos sagkod sa ngapit.

Gusto ni Jehova Dios, an Autor kan Biblia, na mamidbid niato sia. Isinurat kan salmista: “Tanganing an mga tawo makaaram na ika, na an ngaran Jehova, ika sana an Kaharohalangkawe sa bilog na daga.” Rinerekonoser nia na para sa ikararahay niato mismo an mamidbid niato sia. “Ako, si Jehova, an saimong Dios, an Saro na nagtotokdo sa saimo na pakinabangon an saimong sadiri.” Paano kita nakikinabang sa pakamidbid ki Jehova Dios, an Kaharohalangkawe?​—Salmo 83:18; Isaias 48:17.

An sarong totoong pakinabang iyo na nakakukua kita nin paggiya kun napapaatubang kita sa pangaroaldaw na mga problema, nin marigon na paglaom sa ngapit, asin nin katoninongan nin isip. Apuera kaini, an pakamidbid na marhay ki Jehova nagpapahiro sa sato na magkaigwa nin laen na aktitud sa pinakamahalagang mga isyu na inaatubang kan mga tawo sa bilog na kinaban ngonyan. Ano an mga isyung iyan?

May Katuyohan daw an Saindong Buhay?

Sa ibong kan makangangalas na pag-oswag sa teknolohiya kan katawohan, ihinahapot pa man giraray nin mga indibiduwal ngonyan an iyo man sanang pundamental na mga hapot: ‘Taano ta yaon ako digdi? Saen ako maduman? Ano an katuyohan nin buhay?’ Kun dai makua nin saro an nakakokontentong mga simbag, mayo nin tunay na katuyohan an saiyang buhay. Namamatean daw nin dakol na tawo an kawaran na ini? An sarong surbey na ginibo sa Alemania sa pagtatapos kan mga taon nin 1990 naghayag na an kabanga kan mga hinapot sa parate o kun beses nagsasaboot na an buhay garo baga mayo nin katuyohan. Tibaad kaagid kaiyan an situwasyon sa lugar nindo.

Kun mayo nin katuyohan an buhay, an saro mayong gayo nin mapapasikadan kan saiyang personal na mga pasohan. An dakol hinihingoa na hipnoan an kakulangan na ini paagi sa pagmamaigot na kamtan an sarong maasensong karera o paagi sa pagtipon nin kayamanan. Pero, an pakamate na dai nang halaga an buhay puedeng magin nakapupurisaw. An kawaran nin katuyohan sa buhay nakapupurisaw ngani sa nagkapira sagkod na habo na nindang mabuhay pa. Arog kaiyan an eksperyensia nin sarong magayon na hoben pang babae na, oyon sa International Herald Tribune, nagdakula “sa tahaw nin pambihirang kayamanan asin daing limiteng mga bentaha.” Maski nabubuhay sia sa luho, sia mapungaw asin nagsasaboot na an saiyang buhay daing direksion. Nagtomar sia nin mga tabletang pampatorog asin nakuang gadan. Tibaad may midbid kamong iba pang mapungaw na natapos an buhay sa makaturotristeng paagi.

Pero, may nadangog na daw kamong mga tawo na naghihingako na puedeng sabihon sato kan siensia an gabos manongod sa buhay? An semanal na publikasyon sa Alemania na Die Woche nagsasabi: “Dawa ngani an siensia tibaad totoo, iyan kulang sa espirituwal na paagi. An ebolusyon garo baga rudimentaryo, asin dawa an quantum physics,  kaiba an gabos na dai mahulaan na pagbabarobago kaiyan, dai nagtatao nin ano man na karangahan asin seguridad.” Dakula an nagibo kan mga diskobremiento sa siensia tanganing sabihon kun ano an manlaenlaen na klase nin buhay asin ipaliwanag an natural na mga siklo asin proseso na nagpapadanay sa buhay. Pero, dai kayang sabihon sato kan siensia kun taano ta yaon kita digdi asin kun saen kita maduman. Kun madepende sana kita sa siensia, an satong mga hapot manongod sa katuyohan nin buhay dai nasisimbag. An resulta, arog kan ibinareta kan peryodikong Süddeutsche Zeitung, “sarong lakop na pangangaipo nin paggiya.”

Siisay pa baga an nasa mas marahay na posisyon na magtao kan siring na paggiya kundi an Kaglalang? Mantang sa kapoonpooni sia an nagbugtak kan mga tawo digdi sa daga, seguradong aram nia kun taano ta yaon sinda digdi. Ipinaliliwanag kan Biblia na linalang ni Jehova an mga tawo tanganing, bilang pinaniwalaan kan daga, istaran ninda asin asikasohon iyan. Sa gabos nindang aktibidad, kaipuhan na ipabanaag kan mga tawo an saiyang mga kualidad, siring kan hustisya, kadonongan, asin pagkamoot. Oras na masabotan niato an dahelan kun taano ta linalang kita ni Jehova, aram na niato kun taano ta yaon kita digdi.​—Genesis 1:26-28.

Ano an Puede Nindong Gibohon?

Paano kun dai nindo nakua kan nakaagi an nakakokontentong mga simbag sa mga hapot na: ‘Taano ta yaon ako digdi? Saen ako maduman? Ano an kahulogan nin buhay?’ Irinerekomendar kan Biblia na maingat nindong midbidon si Jehova. Sa katunayan, si Jesus nagsabi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” Ineenkaminar man kamong pataluboon an diosnon na mga kualidad, partikularmente an pagkamoot, asin gibohon na personal na pasohan na mabuhay sakop kan madatong na Mesiyanikong Kahadean nin Dios. Kun siring magkakaigwa kamo nin katuyohan sa buhay asin sarong marahayon, seguradong paglaom sa ngapit. Posibleng marhay na masimbag an pundamental na mga hapot na nakariribaraw sa saindo sagkod ngonyan.—Juan 17:3; Eclesiastes 12:13.

Gurano kadakula kan magigin epekto kaiyan? Si Hans an saro na nakaaaram kaiyan. * Kaidtong dakol nang taon an nakaagi sia may malibog na paniniwala sa Dios, alagad an pagtubod ni Hans dai nakaimpluwensia sa buhay nia. Naogma si Hans sa pagdodroga, inmoral na mga babae, saradit na krimen, asin mga motorsiklo. “Alagad an buhay ko kaidto mayong kahulogan, talagang dai nakakokontento,” an paliwanag nia. Kan sia mga 25 anyos na, nagdesisyon si Hans na mamidbid nin personal an Dios paagi sa maingat na pagbasa kan Biblia. Kan mamidbid nia nin dayupot si Jehova asin masabotan kun ano an kahulogan nin buhay, binago ni Hans an saiyang estilo nin pamumuhay asin nabautismohan sia bilang saro sa Mga Saksi ni Jehova. Sia sampulong taon nang nasa bilog na panahon na ministeryo. Prangka niang sinasabi: “An paglilingkod ki Jehova an pinakamarahay na paagi nin pamumuhay. Mayo nang iba na makapapantay pa. An pakamidbid ki Jehova nagtao sako nin katuyohan sa buhay.”

Siempre, an katuyohan sa buhay bako sana an isyu na ikinahahadit nin dakol. Mantang nagrururo an kamugtakan sa kinaban, nagdadakol an mga tawong pinupurisaw nin saro pang mahalagang marhay na isyu.

Taano ta Nangyari Iyan?

Kun minaabot an mga kasakitan, parateng minasentro an isip kan biktima sa sarong hapot: Taano ta nangyari iyan? An abilidad na makaya nin boot an kasakitan minadependeng marhay sa pakakua nin tamang simbag sa hapot na iyan. Kun mayo nin makuang nakakokontentong simbag, an pagdusa nagpapadagos asin an biktima tibaad magin mapait an boot. Kuanon tang halimbawa an eksperyensia ni Bruni.

“Mga pirang taon na an nakaagi nagadan an omboy kong babae,” an paliwanag ni Bruni, na  sarong medyo may edad nang ina ngonyan. “Nagtutubod ako sa Dios, kaya duminolok ako sa lokal na padi para sa karangahan. Sinabi nia sako na dinara nin Dios si Susanne sa langit, na duman saro na siang anghel. Bako sanang garo sinakloban ako kan langit asin daga kan sia magadan kundi naongis ako sa Dios huli ta kinua nia si Susanne.” Nagpadagos an kakologan nin boot asin pagdusa ni Bruni sa laog nin nagkapirang taon. “Dangan ipinaheling sa sako kan saro sa Mga Saksi ni Jehova sa Biblia na mayong dahelan na maongis ako sa Dios. Dai dinara ni Jehova si Susanne sa langit, asin sia bakong anghel. An saiyang helang resulta kan pagkabakong sangkap nin tawo. Si Susanne natotorog sa kagadanan, na naghahalat ki Jehova na buhayon sia liwat. Naaraman ko man na ginibo nia an tawo tanganing mag-istar sagkod lamang sa sarong paraisong daga, asin dai mahahaloy maootob ini. Kan nasasabotan ko na kun ano talagang klaseng persona si Jehova, nagin dayupot ako saiya, asin an sakong mga kakologan nin boot nagpoon na magkulpa.”—Salmo 37:29; Gibo 24:15; Roma 5:12.

Kadakoldakol na tawo an naaapektaran nin kasakitan sa manlaenlaen na porma kaiyan: personal na trahedya, guerra, makuring kakulangan nin kakanon, o natural na kalamidad. Naeksperyensiahan ni Bruni an pakaginhawa kan maheling nia sa Biblia na bakong si Jehova an dapat basolon kun may kasakitan, na nungka niang katuyohan na magdusa an katawohan, asin na madali na niang taposon an karatan. An mismong bagay na an karatan naggagrabe sarong senyal na nabubuhay na kita ngonyan sa “huring mga aldaw” kan sistemang ini nin mga bagay. An hinihidaw niato gabos na pambihirang pagbabago na maresulta sa ikakarahay harani na.—2 Timoteo 3:1-5; Mateo 24:​7, 8.

An Pakamidbid sa Dios

Si Hans asin Bruni dating igwa nin pankagabsan na ideya manongod sa Dios. Sinda nagtutubod sa saiya pero daing gayo ninda sia midbid. Kan nagtao sinda nin panahon tanganing mamidbid si Jehova nin tama, an saindang paghihingoa binalosan. Nakua ninda an tamang mga simbag sa pinakaimportanteng mga hapot sa satong aldaw. Nagtao ini sainda nin katoninongan nin isip asin nin seguradong paglaom sa ngapit. Minilyon na lingkod ni Jehova an nagkaigwa nin kaagid na eksperyensia.

An pakamidbid ki Jehova nagpopoon paagi sa maingat na pagsiyasat sa Biblia, na nagtatao sato nin impormasyon manongod sa saiya asin sa hinahagad nia sa sato. Iyan an ginibo kan nagkapira kan enot na siglo. An historyador asin doktor na si Lucas nagbabareta na “inako [kan mga miembro kan Judiong kongregasyon nin Berea, sa Grecia] an tataramon [hale ki Pablo asin Silas] na igwa nin dakulang pagkagalaga sa isip, na maingat na sinisiyasat an Kasuratan aroaldaw kun baga an mga bagay na ini iyo man nanggad.”​—Gibo 17:​10, 11.

An mga Kristiano kan enot na siglo nagtorotiripon man sa mga kongregasyon. (Gibo 2:41, 42, 46; 1 Corinto 1:1, 2; Galacia 1:​1, 2; 2 Tesalonica 1:1) Totoo man iyan ngonyan. An mga kongregasyon kan Mga Saksi ni Jehova nagtitiripon para sa mga pagtiripon na an espesyal na katuyohan tabangan an mga indibiduwal na magin mas dayupot ki Jehova asin magkaigwa nin kagayagayahan sa paglilingkod sa saiya. An pakikiasosyar sa lokal na mga Saksi igwa nin dugang pang pakinabang. Mantang an mga tawo luway-luway na nagigin mas kasugad kan Dios na sinasamba ninda, an Mga Saksi ni Jehova nagpapaheling nin mga kualidad​—minsan ngani sa limitadong sentido—na ipinaheheling mismo ni Jehova. Kaya an pakipagtipon sa mga Saksi makatatabang sato na mamidbid nin orog pa si Jehova.​—Hebreo 10:24, 25.

Garo daw iyan dakulaon na paghihingoa tangani sanang mamidbid an sarong Persona? Kaipuhan nanggad an paghihingoa. Alagad bako daw na totoo iyan sa dakol na bagay sa buhay na gusto nindong makua? Isipon an paghihingoa na ginigibo nin sarong sikat na atleta sa pagsasanay. Halimbawa, ini an sinabi kan Pranses na nanggana sa Olimpik nin bulawan na medalya sa skiing na si Jean-Claude Killy manongod sa kun ano an kaipuhan tanganing magin mapangganang nakikipagdaogan sa internasyonal na isport: “Kaipuhan na pumoon ka nin 10 taon antes pa asin planohon iyan sa dakol na taon patin isipon iyan aroaldaw . . . Iyan trabahong 365 aldaw kada taon, mental asin pisikal.” Inuubos an gabos na panahon asin paghihingoang iyan tangani sanang makipagdaogan sa sarong  paorumbasan na tibaad maglawig sana nin dies minutos! Labi pa dian—asin mas nagdadanay—an nakataya sa pakamidbid ki Jehova.

Sarong Relasyon na Paorog Pang Paorog na Nagigin Dayupot

Siisay an magugustong malipasan an sarong bagay na importante sa buhay? Mayo nanggad. Huli kaini, kun namamatean nindo na an saindong buhay mayo nin tunay na katuyohan o kun hinihidaw nindo an paliwanag manongod sa kun taano ta minaabot an mga kasakitan, kun siring marigon na magdesidir na mamidbid si Jehova, an Dios kan Biblia. An pag-adal manongod saiya puedeng bagohon talaga an saindong buhay sa ikakarahay, na daing katapusan.

Matatapos daw an pag-adal niato manongod ki Jehova? An mga naglilingkod sa saiya sa laog na nin mga dekada nagngangalas pa man giraray sa mga nanonodan ninda manongod saiya asin sa bagong mga bagay na padagos nindang napag-aadalan manongod saiya. An pag-adal sa siring na mga bagay nakapaoogma sa sato asin orog kitang pinadadayupot saiya. Logod na an kaisipan niato makapareho kan ki apostol Pablo, na nagsurat: “O an rarom kan mga kayamanan asin kadonongan patin kaaraman nin Dios! Dai nanggad marorop an saiyang mga paghokom asin dai nanggad masusog an saiyang mga dalan! Huli ta ‘siisay an nakaaram kan kaisipan ni Jehova, o siisay an nagin saiyang parahatol?’”—Roma 11:33, 34.

[Nota sa Ibaba]

[Blurb sa pahina 5]

Ihinahapot pa man giraray nin mga indibiduwal an iyo man sanang pundamental na mga hapot: ‘Taano ta yaon ako digdi? Saen ako maduman? Ano an katuyohan nin buhay?’

[Blurb sa pahina 6]

“Kan nasasabotan ko na kun ano talagang klaseng persona si Jehova, nagin dayupot ako saiya”

[Blurb sa pahina 7]

“An paglilingkod ki Jehova an pinakamarahay na paagi nin pamumuhay. Mayo nang iba na makapapantay pa. An pakamidbid ki Jehova nagtao sako nin katuyohan sa buhay”