Yehova—Ni Lesa Walinga Ukwishiba

BUSHE mulepusulwa icintu cimo icacindama mu bumi? Nga ca kuti finono mwaishiba pali Lesa, ninshi cine cine mulepusulwa. Mulandu nshi? Pantu ukulingana ne fyo imintapendwa ya bantu basanga, ukwishiba Lesa walandwapo mu Baibolo kulanonsha apakalamba mu bumi. Uku kunonkelamo kutendeka ilyo line kabili kulabelelela mpaka fye na ku nshita ya ku ntanshi.

Yehova Lesa, Katendeka wa Baibolo, afwaya ifwe ukumwishiba. Kemba wa malumbo alembele ati: “Ku kuleka beshibe ukuti imwe mweka, ishina lyenu Yehova, mwapulamo pano isonde ponse.” Alishiba ukuti cilatuwamina ukumwishiba. Atile: “Ine ndi Yehova Lesa obe, uukusambilisho kuti ucenjele.” Tunonkelamo shani mu kwishiba Yehova Lesa, Uwapulamo pano isonde ponse?—Amalumbo 83:18; Esaya 48:17.

Ubunonshi bwine bwine bumo bwa kuti tulatungululwa ku fya kupikulula amafya ya cila kasuba, tulaba ne subilo lyakosa ilya ku ntanshi, kabili tatusakamikwa. Kabinge, ukwishiba bwino Yehova kutulenga ukulundulula ifyo tushaishibe pa milandu yacindamisha iyakuma abantu icalo conse pali lelo. Milandu nshi iyo?

Bushe Ubumi Bwenu Bwalikwata Ubufwayo?

Te mulandu ne fyo abantu balunduluka mu fya kupangapanga fyakupapusha, abantu pali lelo bacili balepusha amepusho yacindama yamo yene aya kuti: ‘Mulandu nshi nabela pano? Ni kwi ndeya? Cinshi twabelako?’ Nga ca kuti umuntu teshibe ifyasuko fisuma, takeshibe ubufwayo bwine bwine ubwa bumi. Bushe abantu abengi balishiba uku kupelebela? Ukufwailisha kwacitilwe mu Germany mu myaka ya kulekelesha iya ba1990 kwasokolwele ukuti hafu ya baipushiwe libili libili nelyo inshita shimo baletila ubumi bumoneka kwati tabwakwata bufwayo. Nalimo uko mwikala e fyo ababako nabo basosa.

Umuntu nga teshibe ifyo afwaya ukucita ku ntanshi, teshiba apakwambila ukucite fyo. Abantu abengi besha ukupyanikisha pali uku kubulwa pa kukonkelela incito sha pa muulu nelyo ukunonka ifyuma. Na lyo line, ukukanaba ne mifwaile mu bumi kuti kwalenga umuntu ukufulunganishiwa. Ukukanaba ne mifwaile mu bumi kulafulunganya bamo ica kuti bafika fye na kukufwaya ukuipaya. Ici e cacitile umwanakashi wayemba uyo, ukulingana ne fisosa icitabo ca International Herald Tribune akushiwe “mu lupwa lwa cuma nga nshi kabili ulwali lwa bwanalale.” Nangula aleikala ubwanalale, alitalalilwe kabili aleti ubumi tabwali na mifwaile. Anwene amapilushi ya tulo kabili bamusangile nafwa. Nalimo mwalishibako bambi abatalalilwe abo abafwile imfwa yabipisha.

Nangu cibe fyo, bushe mwalyumfwako abantu abatunga ukuti sayansi kuti yatulondolwela fyonse pa lwa bumi? Inyunshipepala ya ku Germany iifuma cila mulungu iya Die Woche isosa ati: “Nangu ca kuti sayansi kuti yaba ya cine, lwa ku mupashi yalipelebela. Ukusanguka kumoneka  ukwapikana, kabili nangu fye ni physics umwaba sana insamushi, pamo pene no kwalukaaluka kwa iko ukushaishibikwa, takutupeela nangu cimo lelo kutupeela fye icisansamushi no mutelelwe.” Ukufwailisha kwa sayansi kwalicita ifingi ku kulondololo bumi mu misango yonse iyalekanalekana iya buko no kulondolola imiceele ne mibombele iitungilila ubumi. Lelo, sayansi teti itulondolwele ico twabela pano calo no ko tuleya. Nga twacetekela sana sayansi, amepusho yesu pa co twabelako tayakatale ayasukwa. Ukulingana ne fyashimike inyunshipepala ya Süddeutsche Zeitung, icifumamo ca kuti “abantu abengi bakabila ubutungulushi.”

Nani uwalinga ukupeela ubutungulushi bwa musango yo ukucila pali Kabumba? Apo e wabumbile abantunse pe sonde, afwile alishiba umulandu babela pano. Baibolo ilondolola ukuti Yehova abumbile abantu pa kuti basandane mwi sonde no kulisakamana, ukuba aba kulilinda. Muli fyonse ifyo bali no kulacita, abantu baali no kulapashanya imibele yakwe, pamo ngo bulungi, amano, no kutemwa. Ilyo twaumfwikisha umulandu Yehova atubumbile, tuleshiba umulandu twabela pano.—Ukutendeka 1:26-28.

Cinshi Mwingacita?

Nga ca kuti tamwasanga ifyasuko fisuma kuli aya mepusho: ‘Mulandu nshi nabela pano? Ni kwi ndeya? Cinshi twabelako?’ Baibolo itukoselesha ukwishiba Yehova bwino. Na kuba Yesu atile: “Awe ubu e bumi bwa muyayaya, ukuti baleishiba imwe, mwe Lesa wa cine mweka, no yo mwatumine, Yesu Kristu.” Na kabili mulekoseleshiwa ukulundulula imibele ya bukapepa, maka maka ukutemwa, kabili ukupanga ubuyo bwenu ubwa kwisaba umwikashi mu Bufumu bwa kwa Lesa ubuleisa ubwa buMesia. Lyena mukeshiba ubufwayo bwa bumi kabili mukaba ne subilo lyawamisha, ilyacingililwa ilya nshita ya ku ntanshi. Ifipusho fyacindama ifyalemusakamika ukufika pali iyi nshita pambi fikaba nafyasukwa.—Yohane 17:3; Lukala Milandu 12:13.

Bushe ifyasuko kuli fi fipusho fyacindama fikamukuma shani? Hans mwaume uufwile ukwishiba ifyo fikamukuma. * Imyaka yapita tasumine sana muli Lesa, lelo icitetekelo ca kwa Hans tacakumine imikalile yakwe. Hans aleebomfya sana imiti ikola, ali mulalelale, alecita bumpulamafunde, no kwensha sana bampumpumpu. Alondolola ati: “Takwete ubuyo mu bumi, ubumi tabwalemuletela insansa.” Ilyo ali mupepi ne myaka 25, Hans apingwilepo ukwishiba Lesa bwino ukupitila mu kulabelenga Baibolo lyonse. Ilyo aishibe Yehova bwino no kumfwikisha ico abela pano, Hans ayalwile imikalile yakwe no kubatishiwa ukuba umo uwa Nte sha kwa Yehova. Aliba mu butumikishi bwa nshita yonse pa myaka 10 iyapita. Ukulanda fye cishinka asosa ati: “Ukubombela Yehova e mikalile yawamisha. Tapali icingalinganishiwako. Ukwishiba Yehova kwanenga naishiba ico nabela pano.”

Kwena, ukwishiba ico twabela pano te mulandu weka uusakamika abantu abengi. Ilyo ifintu mu calo fileya filebipilako, abantu abengi balecushiwa no mulandu wacindama na umbi.

Mulandu Nshi Akayofi Kacitikile?

Ilyo muntu aponenwa na kayofi, ilingi line atontonkanya pa cipusho cimo ica kuti: Mulandu nshi kacitikile? Pa kuba na maka ya kushipikisha akayofi maka maka cashintilila pa kwishiba icasuko calungama kuli ico cipusho. Nga teshibe casuko bwino, kuti atwalilila ukucushiwa kabili kuti nalimo abipilwa. Ku ca kumwenako, moneni icacitikile Bruni.

Bruni, nomba uuli ni nyina wa mushinku wa pa kati alondolola ati: “Imyaka yapita umwana  wandi umukashana alifwile. Nalisumine muli Lesa, e co naile kuli shimapepo uwali uko naleikala ukuti ansansamushe. Anjebele ukuti Lesa ansendele Susanne ku muulu, uko nomba aali ni malaika. Ifintu fyonse fyalibipile mu mikalile yandi pa mulandu wa mfwa yakwe kabili napatile na Lesa pa kumusenda.” Ukucululuka kwa kwa Bruni kwalitwalilile pa myaka iingi. Atila: “Lyena umo uwa Nte sha kwa Yehova anangile muli Baibolo ukuti tapali umulandu wa kupatila Lesa. Yehova tasendele Susanne ku muulu, kabili taali ni malaika. Icalengele ukuti alwale ni co abantunse tabapwililika. Susanne alaala mu tulo twa mfwa, alelolela Yehova ukumubuusha. Nasambilile no kuti apangile abantu ukwikala ku ciyayaya muli paradise wa pe sonde, kabili ici nomba line cili no kufikilishiwa. Ilyo natendeke ukumfwikisha umusango wa muntu Yehova aba icine cine, napaleme kuli wene, kabili ukucululuka kwandi kwalipwile.”—Amalumbo 37:29; Imilimo 24:15; Abena Roma 5:12.

Imintapendwa ya bantu balaponenwa na kayofi mu nshila shalekanalekana: ubusanso, inkondo, ifipowe, nelyo akayofi kaicitikila. Bruni aalipembesulwa lintu asambilile muli Baibolo ukuti Yehova teulenga utuyofi, tafwaile abantu ukulacula, no kuti nomba line akapwisha ububi. Icishinka ca kuti ububifi nabufula cishibilo ca kuti pali ndakai tuleikala mu “nshiku sha kulekelesha” isha buno bwikashi. Ukwaluka kukalamba ukwa kuba mu bwikashi busuma uko ifwe bonse tufuluka nakupalama.—2 Timote 3:1-5; Mateo 24:7, 8.

Ukwishiba Lesa

Hans na Bruni baishibe Lesa mu cinkumbawile. Basumine muli wene ukwabula ukwishibe fingi pali wene. Ilyo bapatwileko inshita ya kwishiba Yehova bwino, ukubombesha kwabo kwalengelwe mwafuma ifisuma. Baishibe ifyasuko fisuma ku mepusho yacindamisha aya mu nshiku shesu. Ici capwishishe amasakamika yabo kabili bali ne subilo lisuma ilya ku nshita ya ku ntanshi. Ababomfi ba kwa Yehova abengi nga nshi balicita fimo fine.

Tutendeka ukwishiba Yehova lintu tulepoosako amano ukusambilila Baibolo, iitweba pa lwa wene ne fyo afwaya kuli ifwe. Ici e co bamo bacitile mu myaka ya kutendeka kwa buKristu. Kalemba wa lyashi lya kale kabili shing’anga Luka ashimika ukuti abaali mu cilonganino ca ciYuda mu Berea mu Grisi “bapokelele icebo [ukufuma kuli Paulo na Sila] ne mitima yaswatuka, balebebeta Amalembo cila bushiku beshibe ifi fintu nga e fyo fyali.”—Imilimo 17:10, 11.

Abena Kristu ba kubalilapo na kabili balelonganina pamo mu filonganino. (Imilimo 2:41, 42, 46; 1 Abena Korinti 1:1, 2; Abena Galatia 1:1, 2; 2 Abena Tesalonika 1:1) E fyo caba na lelo. Ifilonganino fya Nte sha kwa Yehova bakumana capamo ku kulongana ukwabelako maka maka ku kwafwa abantu ukupalama kuli Yehova kabili ukuba no kusekelela pa kumubombela. Ukubishanya ne Nte shaba kuntu mwikala na ko kulanonsha. Apo abantu panono panono balaya balepashanya Lesa bapepa, Inte sha kwa Yehova baba ne mibele Yehova umwine akwata—nangu ca kuti tabafikapo ukwishiba fyonse. E co ukulongana na baNte na ko kulatwafwa ukwishiba bwino Yehova.—AbaHebere 10:24, 25.

Bushe ico cileumfwika kwati tulekabila ukubombesha sana pa kwishiba fye Umuntu umo? Cine cine ukubombesha e kufwaikwa. Na kuba bushe te fyo ciba na ku fintu ifingi mu mikalile ifyo mufwaya ukucita? Tontonkanyeni pa fyo kalapashi mu mangalo abombesha pa kuti fye aikanshe. Ku ca kumwenako, uwapokele imendulo sha golde ku bwangalo bwa kushelela pa menshi makaasa mu mangalo ya Olympic ayabelele ku France Jean-Claude Killy alanda ukuti ifilenga ukutunguluka mu kucimfyanya pa kati ka fyalo mu mangalo ni fi: “Mufwile ukutendeka lintu kucili imyaka 10 kabili mufwile ukupekanishisha kabela pa myaka iingi no kulatontonkanyapo cila bushiku . . . Mulimo wa kubomba pa nshiku 365 mu  mwaka.” Iyo nshita yonse no kubombesha pa kuti fye acimfyanyeko mu cangalo ico nalimo cingasenda amaminiti 10! Icacilanapo kabili icacindama caba fintu fingatumbuka mu kwishiba Yehova.

Icibusa Ciya Cilekoselako Fye

Nani uufwaya ukupusulwa icintu cimo icacindama mu bumi? Tapali nangu umo. E ico, nga ca kuti mutontonkanya ukuti ubumi bwenu bwalipusulwa ubufwayo bwine bwine nelyo mulefwaisha ukwishiba umulandu akayofi kaponena, lyena pampamineni pa kwishiba Yehova, Lesa walumbulwa mu Baibolo. Ukusambilila pa lwa wene kuti kwawamya imikalile yenu ku ciyayaya.

Bushe tukatala atuleka ukusambilila pa lwa kwa Yehova? Abamubombela pa myaka iingi bacili balapapa pa fyo basambilila pa lwa wene ne fintu fipya batwalilila ukusambilila pali wena. Ukusambilila ifintu fya musango yo kutulenga twaba ne nsansa kabili kutupalamika kuli wene. Shi natuleibukisha amashiwi ya mutumwa Paulo, uwalembele ati: “We kushika kwa bucindami bwa kwa Lesa na mano yakwe no kwishiba kwakwe! Mwandini ifya bupingushi fyakwe tafingelulwa ne mibele yakwe taingelukwa! Pantu “nani aisaishiba ukutontonkanya kwa kwa Yehova, atemwa nani aisaba impanda mano yakwe?””—Abena Roma 11:33, 34.

[Futunoti]

[Amashiwi pe bula 5]

Abantu bacili balepusha amepusho yacindama yamo yene aya kuti:

‘Mulandu nshi nabela pano? Ni kwi ndeya? Cinshi twabelako?’

[Amashiwi pe bula 6]

“Ilyo natendeke ukumfwikisha umusango wa muntu Yehova aba icine cine, napaleme kuli wene”

[Amashiwi pe bula 7]

“Ukubombela Yehova e mikalile yawamisha. Tapali icingalinganishiwako. Ukwishiba Yehova kwanenga naishiba ico nabela pano”