Jeova Wan God We Yumi Mas Savegud

?MAET yu stap mestem wan impoten samting long laef blong yu? Sipos yu gat smol save nomo long God, ating yes, yu stap mestem wan impoten samting ya. ?From wanem? From we, olsem plante milian man oli luksave finis, fasin blong savegud God blong Baebol i karem plante blesing long laef. Ol blesing ya oli stat naoia mo oli stap olwe.

Jeova God, we i Stamba Blong Baebol, i wantem we yumi savegud hem. Man blong raetem Sam i raetem se: “Plis yu mekem olgeta oli save we yu nomo yu [“Jeova,” NW ], yu nao yu hae king blong olgeta ples long wol.” God i luksave se sipos yumi savegud hem bambae yumi mekem i gud long yumi wan bakegen, hem i se: “Mi, Jeova, mi mi God blong yufala, God ya we i stap tijim yufala blong karem gudfala frut long laef blong yufala.” ?Olsem wanem yumi save haremgud sipos yumi savegud Jeova God we i Hae King?—Ol Sam 83:18; Aesea 48:17, NW.

Taem yumi savegud Jeova, yumi kasem ol nambawan blesing olsem ol gudfala advaes blong winim ol problem blong evri dei, wan strong hop long fiuja, mo pis long tingting. Mo samting we i impoten moa se, fasin blong savegud Jeova i givhan long yumi blong gat stret tingting long sam impoten kwestin we i stap long tingting blong evri man raon long wol. ?Wanem ol kwestin ya?

?Laef Blong Yu i Gat Mining?

Nating se ol man oli kam moa gud long saed blong teknoloji, be evri man tede oli stap askem ol stamba kwestin ya yet long olgeta wanwan se: ‘?From wanem mi laef? ?Wanem bambae i hapen long mi? ?Wanem mining blong laef?’ Sipos wan i no faenem ol gudfala ansa long ol kwestin ya, ating bambae laef blong hem i nating nomo. ?Olsem wanem? ?Plante man oli harem se oli no gat mining blong laef blong olgeta? Wan ripot we oli mekem long Jemani long en blong ol yia 1990 i soem we haf blong olgeta man we oli bin kwestinim olgeta oli ansa se yes, plante taem oli harem se laef blong olgeta i no gat mining. Maet ol man long ples blong yu tu oli harem olsem.

Sipos laef blong wan man i no gat mining, man ya bambae i no save putum sam mak blong kasem long laef blong hem. Plante man oli traem faenem wan mining long laef ale oli wokhad blong kasem wan hae posisen no oli hivimap plante mane. Nating se i olsem, laef blong olgeta i no gat mining yet, mo oli harem nogud from. Sam man oli harem nogud gogo oli no moa wantem laef. Hemia nao samting we i hapen long wan naes yangfala woman. International Herald Tribune i tokbaot hem i se yangfala woman ya i gruap we “i gat plante tumas mane mo i kasem ol beswan samting we ol rijman nomo oli save kasem.” Nating se woman ya i gat plante samting long saed blong bodi, be hem i no gat fren mo i harem se laef blong hem i no gat mining. Hem i solemdaon plante tablet blong slip, mo biaen ol man oli faenem hem we i ded finis. Maet yu tu yu save sam man we oli harem nogud from we oli no gat fren, nao oli kilim i ded olgeta wan.

?Maet yu bin harem sam man we oli talem se sayens nao i save ansarem olgeta kwestin long laef? Wan niuspepa blong Jemani Die Woche i talem se: “Nating se sayens i tru, be hem i no save ansarem ol kwestin long saed blong bilif mo laef. Tijing blong evolusen i isi tumas, mo ol tijing olsem quantum  physics we i dipen long plante tumas smosmol samting, i no save mekem man i haremgud mo i sef.” Sayens i bin naf blong eksplenem plante samting long saed blong ol defren kaen laef wetem ol plan we oli stap finis blong sapotem laef ya. Be sayens i no save talem long yumi from wanem yumi laef i stap mo wanem bambae i hapen long yumi biaen. Sipos yumi dipen long sayens nomo, bambae yumi no kasem ansa long ol kwestin blong yumi long saed blong mining blong laef. ?Wanem risal blong samting ya? Niuspepa ya Süddeutsche Zeitung i talem se, “plante moa man oli nidim wan man blong lidim olgeta.”

Ating Man We i Wokem Yumi i beswan man we i save lidim yumi. Hem nao i bin putum ol man oli stap long wol fastaem, taswe hem nomo i save from wanem oli stap long wol ya. Baebol i eksplenem we Jeova i wokem ol man blong oli fulumap mo oli lukaotem wol. Long olgeta samting we oli stap mekem, ol man oli mas folem eksampol blong God, oli mas gat stret fasin, waes, mo lav. Taem yumi save from wanem Jeova i wokem yumi, nao yumi save tu from wanem yumi stap long wol ya.—Jenesis 1:26-28.

?Yu Save Mekem Wanem?

Olsem wanem sipos yu no faenem yet, ol gudfala ansa long ol kwestin ya: ‘?From wanem mi laef? ?Wanem bambae i hapen long mi? ?Wanem mining blong laef?’ Baebol i talem se yu mas traem savegud Jeova. Jisas i bin talem se: “Mo laef ya [“we i no save finis,” NW ], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” Mo tu Baebol i leftemap tingting blong yu se yu mas wokem ol fasin blong God long laef blong yu, speseli fasin lav, mo yu mas putum mak se bambae yu laef aninit long rul blong Kingdom Blong God We Mesaea i King Blong Hem. Sipos yu mekem samting ya, nao bambae laef blong yu i gat mining mo tu, yu gat wan nambawan hop blong fiuja. Mo ol kwestin we oli mekem yu yu wari bifo, naoia oli kasem ansa blong olgeta.—Jon 17:3; Prija 12:13.

?Taem yu kasem ol ansa we yu wantem, samting ya i save gat paoa long laef blong yu? Ating Hans i save ansa long kwestin ya. * Sam yia bifo, Hans i bilif se God i stap, be bilif ya i no gat paoa long laef blong hem. Hans i laekem ol drag, ol rabis woman, fasin blong agensem loa, mo ol moto. Hem i eksplenem se: “Be laef blong mi i emti, mi no haremgud from laef ya.” Taem Hans i gat raonabaot 25 yia blong hem, hem i tekem disisen blong traem savegud God, tru long Baebol riding. Taem Hans i gat gudfala save long God mo i kasem save wanem mining blong laef, hem i jenisim fasin blong laef blong hem mo i tekem baptaes i kam wan Witnes Blong Jeova. Long ol ten yia we oli jes pas, hem i joen long fultaem wok blong prij. Hem i talem stret se: “Taem yu yusum laef blong yu long wok blong Jeova hem i beswan laef we yu save gat. I no gat wan samting we i moa gud i bitim hemia. Mi savegud Jeova mo save ya i givim mining long laef blong mi.”

Be ol man oli no wari long mining blong laef nomo. Wol i stap kam nogud moa, taswe plante moa man oli wari long wan narafala stamba kwestin.

?From Wanem Samting Ya i Hapen?

Taem wan trabol i kamaot, tingting blong man i stap nomo long kwestin ya: ?From wanem samting ya i hapen? Hem i mas faenem wan ansa long kwestin ya fastaem, blong i save dil wetem ol filing blong hem biaen. Sipos man ya i no faenem wan ansa we i stret, bambae hem i harem nogud yet, mo safa blong hem i save kam bigwan moa. Traem tingbaot eksampol blong Bruni.

Bruni i wan mama we i gat bitim 40 yia blong hem. Hem i eksplenem se: “Sam yia bifo, bebi gel blong mi i ded. Mi bilif long God, taswe mi go luk pris long ples blong mi blong i leftemap tingting blong mi. Pris ya i talem long mi se God i bin tekem Susanne i go long heven, mo naoia hem i wan enjel. Taem Susanne i ded, mi harem se laef blong mi i finis, taswe ansa ya i ademap soa long soa  blong mi mo mi no moa laekem God nating from we hem i bin tekem Susanne.” Blong plante yia, Bruni i stap harem nogud mo i safa. “Biaen wan Witnes blong Jeova i yusum Baebol blong soem long mi se mi no gat risen blong no laekem God. Jeova i no bin tekem Susanne i go long heven mo hem i no wan enjel. Sik we Susanne i kasem i kamaot from we yumi evriwan i sinman. Susanne i stap slip long beregraon, mo hem i stap wet gogo kasem taem we bambae Jeova i mekem hem i laef bakegen. Mo tu, mi lanem we God i wokem ol man blong oli laef long wan paradaes wol foreva, mo bambae i no longtaem samting ya i kamtru. Taem mi stat blong kasem save tru, se Jeova hem i hu, mi kam klosap moa long hem mo safa blong mi i stat godaon.”—Ol Sam 37:29; Ol Wok 24:15; Rom 5:12.

Plante milian man oli stap fesem ol defren kaen hadtaem. Maet hadtaem i kamaot from wan bigfala trabol long laef blong olgeta wan, no maet from faet, kakae i sot, no wan disasta. Bruni i harem moagud taem hem i luk long Baebol se Jeova i no stamba blong ol hadtaem we yumi fesem, God i neva plan blong mekem ol man oli safa, mo i no longtaem bambae hem i finisim ol nogud fasin. Taem yumi luk we ol nogud fasin oli kam antap bigwan, hemia nao i wan saen we i soem se yumi stap laef long ol “lasdei” blong wol ya. Ol bigfala jenis we yumi evriwan i stap wet long olgeta bambae oli kamtru i no longtaem.—2 Timoti 3:1-5; Matiu 24:7, 8.

Savegud Se God Hem i Hu

Bifo, Hans mo Bruni tufala i gat smol save nomo long God. Tufala i bilif se God i stap be tufala i no gat plante save long saed blong hem. Taem tufala i tekem taem blong savegud Jeova, nao traehad blong tufala i karem blesing. Tufala i kasem ol stret ansa long ol kwestin we oli rili impoten long taem blong yumi. From samting ya, tufala i gat pis long tingting mo wan strongfala hop long fiuja. Plante milian man blong Jeova oli gotru long semfala ekspiriens.

Blong savegud Jeova, fastaem yumi mas ridimgud Baebol, we i tijim yumi long God mo long ol samting we hem i wantem yumi blong mekem. Hemia nao samting we sam man oli bin mekem long ol faswan handred yia. Luk, we hem i man blong raetem histri mo wan dokta tu, i talem se ol memba blong kongregesen blong Berea long Gris, we i gat ol man Jiu long hem, “oli wantem tumas blong harem tok blong tufala [Pol mo Saelas], mo evri dei, oli stap ridimgud ol tok blong Baebol, blong faenemaot se ol tok blong tufala i tru no i no tru.”—Ol Wok 17:10, 11.

Ol Kristin blong faswan handred yia oli joen tugeta long ol kongregesen tu. (Ol Wok 2:41, 42, 46; 1 Korin 1:1, 2; Galesia 1:1, 2; 2 Tesalonaeka 1:1) Ol trufala Kristin tede oli mekem sem mak. Ol kongregesen blong ol Witnes Blong Jeova oli joen tugeta long ol miting we i blong givhan long olgeta man wanwan blong kam klosap moa long Jeova mo haremgud blong mekem wok blong hem. Wan narafala blesing i save kamaot sipos yu joen wetem ol Witnes long ples blong yu. Ol man oli folem fasin blong God we oli stap wosipim, taswe ol Witnes Blong Jeova oli soem ol gudfala fasin we Jeova hem wan i soemaot—nating se oli no stretgud olgeta. Taswe fasin blong joen wetem ol Witnes i givhan blong savegud Jeova moa.—Hibrus 10:24, 25.

?Yu ting se blong savegud wan Man nomo hemia wan bigfala wok? Yes i tru, yumi mas wokhad. Be samting ya i tru long plante samting long laef, plante taem yu mas wokhad blong kasem ol mak we yu bin putum. Tingbaot ol traehad we wan top man blong spot i mas mekem taem hem i folem wan trening. Eksampol, Jean-Claude Killy, wan man Franis we i winim gol medol blong ski long Olympik, i eksplenem ol traehad we man i mas mekem blong winim wan kompetisin blong spot i se: “Yu mas statem trening blong yu 10 yia bifo Olympik, mo yu mas plan blong kasem mak ya plante yia bifo, mo yu mas tingbaot medol ya evri dei . . . Yu mas traehad blong rerem tingting mo bodi blong yu 365 dei long wan yia.” !Traem tingbaot hamas taem mo paoa we hem i spenem blong rere from wan resis we maet bambae i las ten menet nomo! ?Olsem wanem long ol traehad we yumi mas mekem blong savegud Jeova? Ol blesing we  yumi kasem biaen oli moagud i bitim wan medol—mo oli las longtaem moa tu.

Bambae Yu Kam Klosap Moa Long God

?Hu nao i wantem mestem wan impoten samting long laef blong hem? Ating i no gat man i wantem mestem wan impoten samting. Taswe, sipos yu harem se laef blong yu i no gat mining no sipos yu wantem tumas blong save from wanem trabol i kasem man, i gud we yu gat strong tingting blong savegud Jeova, God ya we Baebol i tokbaot. Fasin blong kasem save long God i save mekem laef blong yu i kam moagud, mo ol blesing we bambae oli kamaot from oli save stap longtaem.

?Wan dei bambae yumi save evri samting long saed blong Jeova? Ol man we oli bin mekem wok blong hem blong plante yia oli stap sapraes yet from ol nambawan samting we oli bin lanem, mo oli stap gohed blong lanem plante moa samting. Save we yumi kasem long saed blong God i mekem yumi hapi mo yumi kam klosap moa long hem. Yumi save gat semfala tingting olsem aposol Pol we i talem se: “!Olgeta! !Fasin blong God blong givhan long ol man, i gud tumas! !Waes blong hem, mo save blong hem i bigfala tumas, i bitim mak! Yumi no save talemaot olsem wanem hem i jusumaot ol rod blong hem. Yumi no naf blong save ol plan blong hem, se bambae oli kamtru olsem wanem. Hemia i olsem tok blong Baebol we i talem se, ‘I no gat man we i save ol samting we i stap long tingting blong Hae God. I no gat man we i save givim tingting long hem.’ ”—Rom 11:33, 34.

[Futnot]

[Tok blong makem poen long pej 5]

Evri man i stap askem yet ol stamba kwestin olsem: ‘?From wanem mi laef? ?Wanem bambae i hapen long mi? ?Wanem mining blong laef?’

[Tok blong makem poen long pej 6]

“Taem mi stat blong kasem save tru, se Jeova hem i hu, mi kam klosap moa long hem”

[Tok blong makem poen long pej 7]

“Taem yu yusum laef blong yu long wok blong Jeova hem i beswan laef we yu save gat. I no gat wan samting we i moa gud i bitim hemia. Mi savegud Jeova mo save ya i givim mining long laef blong mi”