Si Jehova—Usa ka Diyos nga Angay Natong Mailhan

MAHIMO kaha nga nasipyat ka pagpahimulos sa usa ka hinungdanong butang sa kinabuhi? Kon diyutay ra ang imong nahibaloan bahin sa Diyos, nan lagmit nga ikaw nasipyat. Ngano? Tungod kay sama sa nasayran sa milyonmilyong tawo, ang pagkaila sa Diyos sa Bibliya magdalag dagkong mga kaayohan sa kinabuhi. Kini nga mga kaayohan mapahimuslan dihadiha ug molungtad hangtod sa kahangtoran.

Si Jehova nga Diyos, ang Awtor sa Bibliya, buot nga kita makaila kaniya. Ang salmista misulat: “Aron ang katawhan makaila nga ikaw, kansang ngalan mao si Jehova, ikaw lamang ang Labing Hataas ibabaw sa tibuok nga yuta.” Nasayod siya nga alang sa atong kaayohan ang pagkaila kaniya. “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan.” Sa unsang paagi kita makabaton ug kaayohan sa pagkaila kang Jehova nga Diyos, ang Labing Hataas?—Salmo 83:18; Isaias 48:17.

Ang usa ka tinuod nga kaayohan mao nga atong mabatonan ang giya aron masagubang ang adlaw-adlaw nga mga suliran, usa ka malig-ong paglaom sa umaabot, ug kalinaw sa hunahuna. Dugang pa, kay kita nakaila na kang Jehova kita madasig sa pag-ugmad ug lahi nga tinamdan bahin sa labing hinungdanong mga isyu nga giatubang sa mga tawo sa tibuok kalibotan karon. Unsa ang maong mga isyu?

May Katuyoan ba ang Imong Kinabuhi?

Bisan pa sa talagsaong pag-uswag sa teknolohiya sa tawo, ang mga tawo karon nangutana gihapon sa samang paninugdang mga pangutana: ‘Nganong ako ania dinhi? Asa ako padulong? Unsay kahulogan sa kinabuhi?’ Kon ang usa ka tawo dili makabaton sa makapatagbawng mga tubag, ang iyang kinabuhi walay tinuod nga kahulogan. Namatikdan ba kini sa daghang tawo? Usa ka pagtuon nga gipahigayon sa Alemanya sa ulahing katuigan sa 1990 nagbutyag nga katunga sa mga gipangutana sagad o usahay mibati nga ang kinabuhi daw walay katuyoan. Lagmit nga ang samang kahimtang naglungtad sa inyong lugar.

Kon walay katuyoan ang kinabuhi, mahuyang ang patukoranan sa usa ka tawo sa iyang mga tumong. Daghan ang naningkamot nga hulipan ang pagkawalay-katuyoan sa kinabuhi pinaagi sa pagpangagpas sa usa ka malamposong karera o sa pagtigom ug bahandi. Sa gihapon, ang kahaw-ang makapabalaka. Ang pagkawalay-katuyoan sa kinabuhi nakapalibog na gani sa pipila hangtod sa punto nga sila dili na buot mabuhi. Ingon niana ang nasinati sa usa ka maanyag nga dalaga kinsa, sumala sa International Herald Tribune, gipadako “taliwala sa tumang kabahandianon ug walay-limite nga kabulahanan.” Bisan tuod nagkinabuhi siya sa kaluho, siya nagmasulub-on ug mibati nga ang iyang kinabuhi walay tumong. Miinom siyag pildoras nga pangkatulog ug nakaplagang patay. May nailhan ka tingaling masulub-ong mga tawo kansang mga kinabuhi natapos sa trahedya.

Apan, nakadungog ka na ba sa mga tawo nga nag-ingon nga ang siyensiya makatug-an kanato sa tanan bahin sa kinabuhi? Ang senemana nga  mantalaang Aleman nga Die Woche nag-ingon: “Bisan pag ang siyensiya tinuod tingali, kini kulang sa espirituwal. Ang ebolusyon wala kapamatud-i, ug bisan pa ang komplikadong matematika, tungod sa di-matagnang mga kausaban niini, dili makataganag kahupayan ug kasegurohan.” Ang siyentipikanhong mga kaplag dakog nahimo sa paghubit sa kinabuhi diha sa nagkalainlaing porma niini ug sa pagpatin-aw sa kinaiyanhong mga siklo ug mga proseso nga nagsuportar sa kinabuhi. Bisan pa niana, ang siyensiya dili makasulti kanato kon nganong kita ania dinhi ug kon asa kita padulong. Kon siyensiya ra ang atong saligan, ang atong mga pangutana bahin sa katuyoan sa kinabuhi dili matubag. Ang resulta mao “ang nagkaylap nga panginahanglan sa pagtultol,” sumala sa gitaho sa mantalaang Süddeutsche Zeitung.

Kinsay mas makaarang sa paghatag sa maong pagtultol gawas lamang sa Maglalalang? Sanglit iyang gibutang ang mga tawo sa yuta sa sinugdanan, nasayod gayod siya kon nganong sila ania dinhi. Ang Bibliya nagsaysay nga gilalang ni Jehova ang mga tawo aron ilang puy-an ang yuta ug atimanon kini, isip mga tig-atiman niini. Sa tanan nilang kalihokan, ang mga tawo kinahanglang magbanaag sa iyang mga hiyas, sama sa hustisya, kaalam, ug gugma. Sa dihang atong masabtan ang rason kon nganong gilalang kita ni Jehova, masabtan usab nato kon nganong kita ania dinhi.—Genesis 1:26-28.

Unsay Imong Mahimo?

Komosta kon sa miagi ikaw wala makakaplag ug makapatagbawng mga tubag sa mga pangutana: ‘Nganong ako ania dinhi? Asa ako padulong? Unsay kahulogan sa kinabuhi?’ Ang Bibliya nagrekomendar nga ikaw makaila kang Jehova sa personal. Ngani, si Jesus nag-ingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” Ikaw gidasig usab nga ugmaron ang diyosnong mga hiyas, ilabina ang gugma, ug himoon nimong tumong nga mahimong sakop sa umaabot nga Mesiyanikong Gingharian sa Diyos. Sa ingon mabatonan nimo ang katuyoan sa kinabuhi ug ang usa ka kahibulongan, seguradong paglaom sa umaabot. Ang paninugdang mga pangutana nga nakapalibog kanimo hangtod karon matubag ra gayod.—Juan 17:3; Ecclesiastes 12:13.

Sa unsang paagi makaapektar kanimo ang tubag niining mga pangutanaha? Si Hans nahibalo kon sa unsang paagi makaapektar kini sa usa ka tawo. * Katuigan kanhi siya may diyutay nga pagtuo sa Diyos, apan ang pagtuo ni Hans wala makaapektar sa iyang kinabuhi. Si Hans nagpahutak sa mga droga, imoral nga mga babaye, ginagmayng krimen, ug mga motorsiklo. “Apan haw-ang ang akong kinabuhi, dili gayod makapatagbaw,” siya misaysay. Sa dihang hapit na siya mag-25 anyos, nakadesidir si Hans sa pag-ila sa Diyos sa personal pinaagi sa maampingong pagbasa sa Bibliya. Sa dihang nailhan na niya pag-ayo si Jehova ug nasabtan niya ang katuyoan sa kinabuhi, gibag-o ni Hans ang iyang estilo sa kinabuhi ug nagpabawtismo ingong usa sa mga Saksi ni Jehova. Sa miaging napulo ka tuig siya nakigbahin sa bug-os-panahong ministeryo. Siya prangka nga miingon: “Ang pag-alagad kang Jehova mao ang labing maayong paagi sa kinabuhi. Walay ikatandi niini. Ang pagkaila kang Jehova naghatag kanako ug katuyoan sa kinabuhi.”

Siyempre, ang katuyoan sa kinabuhi dili lamang mao ang isyu nga nakapabalaka sa daghan. Samtang nagkadaot ang kahimtang sa kalibotan, nagkadaghan usab ang mga tawo nga nalibog sa lain pang hinungdanong isyu.

Nganong Nahitabo Kini?

Inighampak sa kalisdanan, ang hunahuna sa biktima sagad masentro sa usa ka pangutana: Nganong nahitabo kini? Ang katakos nga masagubang ang kalisdanan sa emosyonal nga paagi nag-agad ug dako sa pagbaton ug hustong tubag sa maong pangutana. Kon walay makapatagbawng tubag, ang pag-antos magpadayon ug ang biktima mayugot. Pananglitan, matikdi ang kasinatian ni Bruni.

“Pila ka tuig kanhi ang akong batang babaye  namatay,” saysay pa ni Bruni, nga karon usa na ka hamtong nga inahan. “Nagtuo ako sa Diyos, mao nga ako nangitag kahupayan gikan sa lokal nga pari. Iya akong giingnan nga si Susanne gidala sa Diyos ngadto sa langit, diin siya karon usa na ka manulonda. Dili lang nahugno ang tanan sa akong kinabuhi tungod sa iyang kamatayon kondili ako pa gayong gidumtan ang Diyos kay gikuha niya ang akong anak.” Ang kasakit ug pag-antos ni Bruni nagpadayon sa daghang tuig. “Dayon gipakita kanako diha sa Bibliya sa usa sa mga Saksi ni Jehova nga ako walay rason nga magdumot sa Diyos. Si Jehova wala magdala kang Susanne ngadto sa langit, ug siya dili usa ka manulonda. Ang iyang sakit maoy sangpotanan sa pagkadili-hingpit sa tawo. Si Susanne natulog sa kamatayon, nga naghulat kang Jehova aron siya banhawon. Nakat-onan ko usab nga iyang gibuhat ang mga tawo aron mabuhi sa walay kataposan sa usa ka paraisong yuta, ug kini matuman sa di madugay. Sa dihang akong nasabtan kon unsang matanga sa persona si Jehova, ako nasuod kaniya, ug ang akong kasakit nagsugod sa pagkaalim.”—Salmo 37:29; Buhat 24:15; Roma 5:12.

Minilyong tawo ang naapektohan sa nagkalainlaing kalisdanan: personal nga trahedya, gubat, gutom, o natural nga katalagman. Nahupayan si Bruni sa dihang iyang nasabtan sa Bibliya nga si Jehova dili mabasol sa kalisdanan, nga dili gayod niya katuyoan nga mag-antos ang tawo, ug sa dili madugay iyang taposon ang pagkadaotan. Ang kamatuoran mismo nga ang pagkadaotan nag-uswag maoy ilhanan nga kita nagkinabuhi karon sa “kataposang mga adlaw” niining sistema sa mga butang. Ang talagsaong kausaban nga mosangpot sa kaayohan nga dugay na natong gipangandoy haduol na.—2 Timoteo 3:1-5; Mateo 24:7, 8.

Ang Pagkaila sa Diyos

Kaniadto ang ideya ni Hans ug Bruni bahin sa Diyos dili tin-aw. Nagtuo sila sa Diyos apan diyutay ra silag nahibaloan bahin kaniya. Sa dihang gigahinan nilag panahon nga mailhan si Jehova sa tukmang paagi, gigantihan ang ilang mga paningkamot. Nadawat nila ang makapatagbawng mga tubag sa labing hinungdanong mga pangutana sa atong adlaw. Nakahatag kini kanila ug kalinaw sa hunahuna ug seguradong paglaom sa umaabot. Minilyong alagad ni Jehova ang nakasinati sa samang paagi.

Ang pag-ila kang Jehova magsugod diha sa maampingong pagsusi sa Bibliya, nga maoy motug-an kanato bahin kaniya ug kon unsay iyang gikinahanglan kanato. Mao kanay gihimo sa ubang mga alagad ni Jehova sa unang siglo. Ang historyano ug mananambal nga si Lucas nagtaho nga ang mga membro sa Hudiyohanong kongregasyon sa Berea, Gresya, ‘midawat sa pulong [gikan kang Pablo ug Silas] uban ang tumang kaikag sa hunahuna, nga sa adlaw-adlaw maampingong nagasusi sa Kasulatan kon tinuod ba kining mga butanga.’—Buhat 17:10, 11.

Ang unang siglong mga Kristohanon nagtigom usab diha sa mga kongregasyon. (Buhat 2:41, 42, 46; 1 Corinto 1:1, 2; Galacia 1:1, 2; 2 Tesalonica 1:1) Ingon usab niana karon. Ang mga kongregasyon sa mga Saksi ni Jehova motambong sa mga tigom nga gidisenyo ilabina sa pagtabang sa mga tawo nga masuod kang Jehova ug malipay sa pag-alagad kaniya. Ang pagpakig-uban sa lokal nga mga Saksi adunay dugang kaayohan. Sanglit ang mga tawo inanay nga mahisama sa Diyos nga ilang gisimba, ang mga Saksi ni Jehova nagpasundayag sa mga hiyas—bisan sa limitadong paagi—nga gipakita ni Jehova. Busa ang pagpakigtigom uban sa mga Saksi motabang kanato nga mas makaila kang Jehova.—Hebreohanon 10:24, 25.

Nagpasabot ba kana nga nagkinahanglag dakong paningkamot aron lamang mailhan ang usa ka Persona? Nagkinahanglan gayod ug paningkamot. Apan dili ba matuod kana sa daghang butang sa kinabuhi nga buot nimong kab-oton? Palandonga ang paningkamot sa pagbansay nga himoon sa usa ka hawod nga atleta. Pananglitan, mao kini ang gisulti sa taga-Pransiya nga gold medalist sa pag-ski sa dulang Olympic nga si Jean-Claude Killy kon unsay gikinahanglan aron mahimong malamposong magdudula diha sa internasyonal nga esports: “Kinahanglang magsugod kag 10 ka tuig nga abante ug magplano niana sa daghang  tuig ug maghunahuna niana kada adlaw . . . Kini maoy tibuok tuig nga trabaho, sa mental ug pisikal nga paagi.” Kanang tanang panahon ug paningkamot gihimo aron makigtigi sulod lamang tingali sa diyes minutos! Unsa pa gayod ka labaw —ug mas dumalayon—nga kaayohan ang maangkon diha sa pagkaila kang Jehova.

Relasyon nga Mahimong Mas Suod

Kinsay gustong masipyat pagpahimulos sa usa ka hinungdanong butang sa kinabuhi? Walay mausa. Busa, kon mamatikdan nimo nga walay tinuod nga katuyoan ang imong kinabuhi o kon gusto nimong matin-awan kon nganong mohampak ang kalisdanan, nan paneguroa ang pagkaila kang Jehova, ang Diyos sa Bibliya. Ang pagkakat-on bahin kaniya makapausab sa imong kinabuhi ngadto sa ikaayo, sa dumalayong paagi.

Mohunong ba kita sa pagkat-on bahin kang Jehova? Kadtong nag-alagad kaniya sa daghang tuig matingala gihapon sa ilang makat-onan bahin kaniya ug sa bag-ong mga butang nga padayon nilang makat-onan bahin kaniya. Ang pagkakat-on sa maong mga butang makapalipay kanato ug makapasuod pa gayod kanato ngadto kaniya. Hinaot nga mouyon kita sa panghunahuna ni apostol Pablo, kinsa misulat: “Oh pagkalawom sa bahandi ug sa kaalam ug sa kahibalo sa Diyos! Pagkadili-matukib sa iyang mga paghukom ug pagkadili-masubay sa iyang mga dalan! Kay ‘kinsa bay nakasabot sa hunahuna ni Jehova, o kinsa bay nahimo niyang magtatambag?’”—Roma 11:33, 34.

[Footnote]

[Blurb sa panid 5]

Ang mga tawo nangutana gihapon sa samang paninugdang mga pangutana: ‘Nganong ako ania dinhi? Asa ako padulong? Unsay kahulogan sa kinabuhi?’

[Blurb sa panid 6]

“Sa dihang akong nasabtan kon unsang matanga sa persona si Jehova, ako nasuod kaniya”

[Blurb sa panid 7]

“Ang pag-alagad kang Jehova mao ang labing maayong paagi sa kinabuhi. Walay ikatandi niini. Ang pagkaila kang Jehova naghatag kanako ug katuyoan sa kinabuhi”