Kʼãrẽa yibia Jeowa ũdukʼawuaira

DAYI bebʉra kʼãrẽ ẽ kĩrãkʼabʉ, maʉ̃ra mawũãbʉ Daizeze ʉ̃rʉ wiña kʼawuabʉ baera mawũã ẽ bʉrʉ jipade kʼawua ẽ baera. Awuarabʉrʉ idi ewade dayirãba Daizezeta ũdukʼawuara nebiata ũduseabʉ atia akʉza ʉ̃ra zeidebida.

Jeowaba osi iyi Bedʼeara kãgabʉ baera iyita ũdukʼawuadamarẽã. Salmone jarabʉ: «Ẽbẽrarãba kʼawuadamarẽã bʉ trʉ̃arãra Jeowata akʉza bʉtrʉ abapai yi zroma naʉ̃ ẽjũa jõma ʉ̃rʉ». Jeowabara kʼawuabʉ dayirãba iyita ũdukʼawuadara audre bia bʼaita. Iya jarabʉ: «Mʉ̃ra Jeowa, bʉ Zeze, Jari jaradiabʉ bʉyikʉza bia bamarẽã». ¿Sãwũã kʼarebaseabʉ dayirãra Daizeze ũdukʼawuabʉrʉdera? (Salmo 83:18; Isaías 48:17).

Dayirãba maʉ̃ta ora ũduseabʉ nebiata, bari jaraira, ũrãgʼa biata, bedʼea zroma ũdubʉrʉde ara oita, ʉ̃ra zebʉrʉde bia bʼaita akʉza aduʼa bʼaita. Daizeze ũdukʼawuabʉrʉde dayirã awuara krĩchaseabʉ nekʼãrẽ audre yibia ʉ̃rʉ, ẽbẽraba krĩchabʉira. ¿Sãwũã mawũãra?

¿Bʉka naʉ̃ drʉade kʼãrẽa bʼaira?

Ẽbẽrarãba nekʼãrẽ mejãcha kʼawua wãmina, ãya idibasidu widipanʉ naʉ̃ bedʼeata: ¿Kʼãrẽa namabʉ mʉ̃ra? ¿Ʉ̃ra zeidera kʼãrẽta berabari mʉ̃ bebʉra? ¿Bʉka naʉ̃ drʉade kʼãrẽa bʼaira? Maʉ̃ bedʼea ãya widibʉta aripepanʉna ẽ bʉrʉ masẽseabʉ, ẽbẽrarã mejãchaʉba mawũã krĩchabʉ. Alemaniane poaga 1990 jõbodoare ẽbẽrarã mejãchaʉʼa widisida kʼãrẽa ãyira bʉta naʉ̃ drʉade, mejãchaʉba panʉsi neẽãta ãyira kʼãrẽa bʼaira naʉ̃ drʉadera. Mõbemata bʉ bʉmae ẽbẽrarã mejãchaʉta mawũã krĩchabʉ bʼaibara.

Daya kʼawua ẽ bʉrʉ naʉ̃ drʉade kʼãrẽa bʉta, mawũãra kʼawuada ẽ bayi bebʉdebida kʼãrẽ oita, maʉ̃ba sopʉabʉ. Maʉ̃ kʼarea ãyi sobia bʼaita wãbʉ unibersidaeda trajo bia erbaita akʉza plata mejãcha erbaita, maʉ̃ ũdubʉidu ãyi sopʉabʉra taʉ ẽ. Mawũã ẽbẽrarãra mejãchaʉta sopʉapanʉ baera ãyikʉza beipanʉ. Mawũã berabarisi ẽbẽra wẽrã zake biʼiakiruta. Periodiko International Herald Tribune jarasi maʉ̃ra eda warisita «yibarira plata mejãcha erbʉde». Iya nekʼãrẽ iyi audu mejãcha erbasimina iyi bebʉra kʼãwũã ẽ basi kʼãrẽa bʉta, maʉ̃ba iyira kʼãrẽ oi neẽ baera beisi iyikʉza beneno dokarape. Bʉara ũrĩbarikĩrã ẽbẽrarã mawũã beipanʉra.

Ʉ̃kʉrʉ ẽbẽraba krĩchapanʉ siensiaba jara ũrĩbiseabʉta dayirã bebʉ ʉ̃rʉ. Periodiko Alemanianebemaba, Die Woche jarabʉ: «Siensiabara kʼareba ẽ ẽbẽrarãba Daizeze ũdukʼawuaita mia panʉna ẽ kʼãrẽa bʉta naʉ̃ drʉade akʉza kʼãrẽ ʉ̃ra zeita. Sientipikorabara jarabʉ dayirãra zesita yerredeba mawũã ẽ bʉrʉ doba zesita, maʉ̃ba dayirã sopʉabʉra taʉbi ẽ adewara aduʼa babi ẽ». Kʼãwũã sientipikoraba obʉdeba nekʼãrẽ bio ũdukʼaupanʉ ne u ura ʉ̃rʉ, nedʉwʉrʉra ʉ̃rʉ akʉza naʉ̃ drʉa sãwũãbʉ ʉ̃rʉ, mamina siensiabara jara ũrĩbi ẽ dayirãra kʼãrẽa naʉ̃ drʉade bʉta akʉza ʉ̃ra zeide kʼãrẽ berabarita. Periodiko Süddeut­sche Zeitung, jarabʉ: «Dayirã jõmaʉ̃ba nesidabʉ jaradiamarẽã sãwũã bia bʼaita».

Dayi parãnabʉrʉ jaradiaseabʉ sãwũã bia bʼaita, iya dayirãra parãsi baera kʼawuabʉ kʼãrẽa namabʉta. Daizeze Bedʼeabara jara ũrĩbibʉ kʼãrẽa Jeowabara ẽbẽrarãra parãnara, Jeowabara parãsi ẽbẽrarãba naʉ̃ drʉata akʉmarẽã akʉza maʉ̃ne eda eaba wãmarẽã adewara ẽbẽrarãbara ãya nekʼãrẽ obʉde ũdubibarabasi Daizeze nebiata, kãgata akʉza daucha obʉta. Mõbemata dayirãba kʼawuabʉrʉde Daizezeba dayirã kʼãrẽa parãnata, mawũãtrʉ kʼawuapanʉ kʼãrẽa naʉ̃ drʉade panʉta (Génesis 1:26-28).

¿Bʉara kʼãrẽta oseabʉ?

¿Kʼãrẽa namabʉ mʉ̃ra?, ¿ʉ̃ra zeidera kʼãrẽta berabari mʉ̃ bebʉra?, naʉ̃ra bedʼeara widibʉta ũdu ẽ bʉrʉ, Daizeze Bedʼeaba jarabʉ audre Jeowata bia ũdukʼawua wãmarẽã. Jesuba jarasi: «Ewari jõmaʉ̃nẽ bʼaira, bʉta ũdukʼawuadaibara Daizeze wãrĩnuara, abapai bʉta akʉza bʉa wũãwũã Jesukristo zokʼadata». Yibia nekʼãrẽ bara wãita, bari jaradaita, kãgata akʉza krĩchaita Daizeze Nokʼo juwa edre sãwũã bʼaita. Maʉ̃ta ora kʼawuayi kʼãrẽa naʉ̃ drʉadebʉta akʉza ʉ̃ra zeide jʉ̃ãbayi nebiata, bʉara kʼawuayi naweda bedʼea widibadara (Juan 17:3; Eclesiastés 12:13).

Daizeze ũdukʼawuabʉrʉdera dayi krĩchara awurabida, maʉ̃ kĩrãkʼa berabarisi Hansta. * Iya Daizeze ʉ̃rʉ wika ũdukʼawua basimina, nekayiruata obasi, wẽrãra mejãcha erbaita akʉza motode barita mejãcha kãgabasi. Iya jarasi: «Sobia ẽ basi mʉ̃ra, kʼawua ẽ basi baera naʉ̃ drʉade kʼãrẽa bʉta». Hans 25 poaga baside Daizeze Bedʼeata le jʉ̃drʉsi mawũã Daizeze ʉ̃rʉ audre kʼawuaita, iyara kʼawuasi sãwũã Daizeze neũdukʼawua bʼaita akʉza mawũã Daizeze neũdukʼawua ba zesi adewara kʼawuasi kʼãrẽa bʉta iyira naʉ̃ drʉade, mawũã Jeowa ʉ̃rʉ Kʼawuabi panʉrãne eda buru kʼoe zesi. 10 poagaba iya Daizeze ʉ̃rʉ audre jaradia jʉ̃drʉdata, maʉ̃ba iya jarabʉ: «Neẽ jãpera kʼãwũã Daizeze ode bʼai kĩrãkʼara, iyi odebʉtrʉ yibia, Jeowa kʼãwũã ũdukʼawuadaba sobiabibʉ mʉ̃ra».

Ẽbẽrarãbara bari kʼawuakĩrãpanʉ ẽ ãyi kʼãrẽa zedatrʉ awuarabʉrʉ ẽbẽrarãra mejãcha krĩcha zroma opanʉ idi ewade kʼãwũã bedʼea zroma ũdupanʉ kʼarea.

¿Kʼãrẽa mawũã berabarisi?

Ẽbẽra yi zʉbʉriabʉbara naʉ̃ta widiseabʉ: ¿Kʼãrẽa mawũã berabarisi? Dayi sopʉabʉ taʉmarẽãra nesidapanʉ naʉ̃ bedʼea widibʉ panʉita, mawũã panʉna ẽ bʉrʉ iyira audre sopʉaseabʉ. Akʉdayi kʼãrẽta berabarisita Brunita.

«Mʉ̃ wũãwũã Susannera beisi, maʉ̃ta mʉ̃a ewari aba widisi saserdoteʼa, iya jarasi mʉ̃ wũãwũãra edesita Daizezeba ʉ̃ta, mawũã angel zake babita, maʉ̃ba mejãcha sopʉasi akʉza mʉ̃ara Daizezeta mejãcha jʉrasi mawũã mʉ̃ wũãwũãta edesi baera». Maʉ̃ba iyira mejãcha zʉbʉriasi poaga bio bayeda. Iya jarabʉ: «Maʉ̃ berabarida tẽã Jeowa ʉ̃rʉ Kʼawuabibariba jaradiasi Daizeze Bedʼeadeba, kʼãrẽa Daizeze jʉraira neẽãta, iya jarasi mʉ̃ wũãwũãra Daizezeba ede ẽ basita ʉ̃ta angel zake babita, awuarabʉrʉ jarasi nekayiruadeba zebʉ baera kaya kʼarape beisita. Mʉ̃a kʼawuasi iyira kʼãĩbʉ kĩrãkʼabʉta akʉza kʼawuasi Daizezeba aranʉ piradrʉbita, adewara mʉ̃a kʼawuasi Daizezeba ẽbẽrarãra parãsita ẽjũã kĩrãwãreãnẽ ewari jõmaʉ̃nẽ bamarẽã, maʉ̃ra aranʉ wãrĩnu berabariyi. Mʉ̃a kʼawuaside Jeowa sãwũãbʉta audre iyi kʼawa bakĩrãsi akʉza mʉ̃ sopʉabadara taʉ wãsi» (Salmo 37:29; Hechos 24:15; Romanos 5:12).

Ẽbẽrarã mejãchaʉta zʉbʉriapanʉ naʉ̃ drʉade, nemitia berabaribʉ kʼarea, jarraba kʼarea akʉza drʉa ure kʼarea. Brunibara kʼawuasi Daizezebara ẽbẽrarãra zʉbʉriabi ẽãta, awuarabʉrʉ mejãcha kãgabʉ ẽbẽrarãra bia panamarẽã, maʉ̃ kʼawuaside Brunira sobiasi. Kʼãwũã nemitia audre ũdu wãba kʼawuapanʉ Daizeze ewarira audre arakʼaitabʉta, dayirãba nebia aranʉ ũduira zebodo (2 Timoteo 3:1-5; Mateo 24:7, 8).

Daizeze sãwũã ũdukʼawuaita

Hans akʉza Bruniʉ̃meba Daizeze wiña ũdukʼawuapanasi adewara aripe kʼawuada ẽ basi. Ãya ewarita jʉrʉsi baera Daizeze ʉ̃rʉ audre kʼawuaita sobiasida akʉza ãya bedʼea widibadata panʉsida adewara ʉ̃ra zeide kʼawuabʉ kʼãrẽ nebia ũduita. Jeowa ʉ̃rʉ Kʼawuabipanʉrã mejãchaʉta maʉ̃ra kĩrãkʼa berabarisi.

Jeowa ũdukʼawuaira bia akʉibara iyi Bedʼata, maʉ̃ba jarabʉ baera iyi sãwũãbʉ ʉ̃rʉ akʉza iya dayirãba kʼãrẽta omarẽã jʉ̃ãbʉta. Mediko Lucasʼra mebẽrã kongregasion Bereadebema ʉ̃rʉ bedʼeasi. Iya jarasi Pabloba akʉza Silaʉ̃meba jaradiasidade kongregasion Bereadebema (Grecia), ãya «Jesudebema ũrĩkĩrã panasi baera. Akʉza ewariza Daizeze Bedʼeata jʉra kʼawua akʉpanasi mama jarabʉra wãrĩnu kʼawuaita» (Hechos 17:10, 11).

Nããbema kristianorara Daizeze ʉ̃rʉ kʼawuaita ãba yi jʉrepanasi (Hechos 2:41, 42, 46; 1 Corintios 1:1, 2; Gálatas 1:1, 2; 2 Tesalonicenses 1:1). Idi ewadebida Jeowa ʉ̃rʉ Kʼawuabipanʉrãra ãba yi jʉrepanʉ nããbemara kristianoraba oda kĩrãkʼa Daizeze ʉ̃rʉ kʼawuaita, mama kʼawuapanʉba audre Daizeze kʼawa babibʉ. Jeowa ʉ̃rʉ Kʼawuabipanʉrãba Daizeze nebiata mejãcha ũdukʼawua wã baera ãyabida maʉ̃ nebiara opanʉ, Daizezeba kãgabʉ kĩrãkʼa, maʉ̃ba ãyi bawara ãba yi jʉrebʉrʉdera audre Daizeze kʼawa babiseabʉ (Hebreos 10:24, 25).

¿Ẽbẽra ũdukʼawuaira mejãcha zerea oibaraka? Wiña zarea oibara, daya nekʼãrẽ badu obʉrʉde zarea oi kĩrãkʼa. Bari jaraita, jari ẽbẽrarã jemenepanʉraba opanʉ kĩrãkʼa. Jean-Claude Killy franciadebema medaya olinpika gananaba jarasi, kʼãrẽta oibarata mawũã ganaira: «Daya maʉ̃ jemene ganaira, 10 poaga wẽbʉeda mejãcha jemene jʉdrʉibara ewariza, maʉ̃ra mawũã mejãcha jemenebʉ, 10 minuto wẽibai baera mawũã ganaita». Mamina Daizeze ũdukʼawuaita audre yibia nekʼãrẽ baduira jameneira.

Audre Daizeze neũdukʼawua bʼaita

¿Kʼãĩta sobia bakĩrãbʉ ẽ? Miõta. Bʉta wãrĩnu sobia bakĩrãbʉbʉrʉ akʉza kʼawua kĩrãpanʉbʉrʉ kʼãrẽa zʉbʉria panʉta, Daizeze Jeowata nãã bia ũdukʼawaibara. Bʉa iyi ʉ̃rʉ ũdukʼawuara nebiata mejãcha ũduyi.

¿Jeowa ʉ̃rʉ jõma ũdukʼawuaseapanʉka? Ẽbẽrarãra Daizeze ode dããrabadarabida idibasidu Daizeze ũdukʼawua wãna. Mõbemata Daizeze audre ũdukʼawua wãne dayirãsida audre sobia baseabʉ. Dayirãra krĩchaseabʉ apostol Pabloba krĩchada kĩrãkʼa: «Daizezera biodʼe kʼãrẽ kʼawua bʼʉa, krĩcha kʼawua bʼʉa! ¡Miõba kʼawua ẽã izha oita krĩcha bʼʉra, dazha kʼawua ẽã izha obʼʉra ¿Kʼaiba kʼawuaipe Daizeze krĩchara? ¿O izhira kʼaiba ũrãgʼaipe?» (Romanos 11:33, 34).

[Nota]

[Bedʼea jarabʉta]

Ãya idibasidu widipanʉ naʉ̃ bedʼeata: ¿Kʼãrẽa namabʉ mʉ̃ra? ¿Ʉ̃ra zeidera kʼãrẽta berabari mʉ̃ bebʉra? ¿Bʉka naʉ̃ drʉade kʼãrẽa bʼaira?

[Bedʼea jarabʉta]

«Mʉ̃a kʼawuaside Jeowa sãwũãbʉta audre iyi kʼawa bakĩrãsi akʉza mʉ̃ sopʉabadara taʉ wãsi»

[Bedʼea jarabʉta]

«Neẽ jãpera kʼãwũã Daizeze ode bʼai kĩrãkʼara, iyi odebʉtrʉ yibia, Jeowa kʼãwũã ũdukʼawuadaba sobiabibʉ mʉ̃ra»