Jehová, juntiquil Dios yom bʌ mi laj cʌn

¿AMBA chuqui ñuc bʌ anto yom ti laj cuxtʌlel? Añʌch mi mach lac wen cʌñʌyic Dios. ¿Chucoch? Cheʼ bajcheʼ cʼotem i cʌn yonlel quixtañujob, cheʼ mi laj cʌn jiñi Dios muʼ bʌ i yʌl jiñi Biblia mi lac taj cabʌl lac wenlel, wenlel muʼ bʌ laj qʼuel ili ora yicʼot ti talto bʌ qʼuin.

Jehová, tsaʼ bʌ i yʌcʼʌ ti tsʼijbuntel jiñi Biblia, yom chaʼan mi laj cʌn. Jiñi salmista tiʼ tsʼijbu: «Laʼ i cʌñob chaʼan a cʼabaʼ jiñʌch Jehová, come jatet jach jiñi Cʼax ñuquet bʌ tiʼ pejtelel Pañimil». Dios yujilʌch chaʼan cheʼ mi laj cʌn jiñʌch ñumen wem bʌ ti lac tojlel. «A Dioson muʼ bʌ j cʌntesañet chaʼan maʼ taj chuqui wen». ¿Bajcheʼ miʼ coltañonla cheʼ mi laj cʌn Jehová? (Salmo 83:18, TNM; Isaías 48:17.)

Jumpʼejl wenlel muʼ bʌ lac taj laj qʼuel jiñʌch cheʼ miʼ coltañonla lac lʌtʼ wocol tac, miʼ yʌqʼueñonla jumpʼejl lac pijtaya yicʼot lac ñʌchʼtʌlel. Cheʼ jaʼel, miʼ coltañonla chaʼan mi lac tajben i jacʼbal jiñi cʼajtiya tac am bʌ ili ora. ¿Baqui tac bʌ cʼajtiya miʼ melbeñob i bʌ jiñi lac piʼʌlob?

¿Am ba i sujmlel jiñi laj cuxtʌlel?

Jiñi tecnología cabʌlʌch chuqui miʼ mejlel i mel, pero jiñi quixtañujob bej woliʼ melbeñob i bʌ ili cʼajtiya tac: ¿Chucoch wʌʼañonla ila ti pañimil? ¿Baqui mi caj lac majlel? ¿Am ba i sujmlel jiñi laj cuxtʌlel? Mi maʼañic miʼ tajbentel wem bʌ i jacʼbal, jiñi laj cuxtʌlel mach ñoj añic i sujmlel yubil. ¿Am ba muʼ bʌ i cʌñob chaʼan i sujmʌch jiñi? Jumpʼejl encuesta tsaʼ bʌ mejli yaʼ ti Alemania, tiʼ yujtibal majlel jiñi jabil 1990, lamital tsiʼ yʌlʌyob chaʼan añʌch muʼ bʌ i ñaʼtañob chaʼan maʼañic i sujmlel jiñi laj cuxtʌlel. Tajol yaʼ baqui chumulet añʌch cheʼ bʌ miʼ ñaʼtañob jaʼel bajcheʼ jiñi.

Mi maʼañic i sujmlel mi la cubin jiñi laj cuxtʌlel, maʼañic mi caj lac ñaʼtan chaʼan añʌxto chuqui miʼ mejlel lac mel ti talto bʌ qʼuin. Jin chaʼan, yonlel lac piʼʌlob miʼ sʌclañob cabʌl chuqui tac an chaʼan miʼ poj aqʼueñob i sujmlel i cuxtʌlel, pero maʼañic miʼ tajob. Cheʼ maʼañic miʼ tajbeñob i sujmlel i cuxtʌlel, miʼ tajob wocol i jin chaʼan mach yomic bej cuxulob. Ili jiñʌch tsaʼ bʌ ujti tiʼ tojlel juntiquil xchʼoc wen utsʼatax bʌ, tsaʼ bʌ i yʌlʌ jiñi periódico International Herald Tribune, jiñi i tatob wen cabʌl chuqui an i chaʼañob, i maʼañic tsiʼ yila wocol. Anquese wen cabʌlʌch chuqui an i chaʼan jiñi xchʼoc, i bajñel tsiʼ yubi i bʌ yicʼot maʼan tsiʼ tajbe i sujmlel i cuxtʌlel, jin chaʼan tsiʼ japʌ tsʼac i tiʼ tsʌnsa i bʌ. Tajol an wubi jaʼel chaʼan an cheʼ bʌ tsiʼ yubiyob i bʌ bajcheʼ jiñi xchʼoc i wocol bajcheʼ tsaʼ ujtiyob.

¿Am baʼ wubi ti alol chaʼan jiñi ciencia miʼ mejlel i tsictesan tiʼ pejtelel chaʼan jiñi laj cuxtʌlel? Jiñi semanario alemán Die Woche miʼ yʌl: «Anquese añʌch chuqui tsʼʌcʌl miʼ yʌl jiñi ciencia, maʼañic miʼ coltañonla tiʼ chaʼan bʌ Dios. Jiñi evolución yicʼot jiñi yan tac bʌ investigación muʼ bʌ i melob jiñi científicojob, wocol ti chʼʌmbentel i sujm, maʼañic miʼ ñuqʼuesan lac pusicʼal yicʼot maʼañic miʼ coltañonla». Wocolix i yʌlʌ jiñi am bʌ i meleyob jiñi científicojob an cʼotem laj cʌn bajcheʼ tac cuxul chuqui an yicʼot bajcheʼ miʼ mel i yeʼtel jujunchajp. Pero jiñi ciencia mach mejlic i tsictesan chucoch tsaʼ tiliyonla ila ti pañimil i baqui mi lac majlel. Cheʼ yaʼic jach chuculonla ti jiñi ciencia, jiñi laj cʼajtiya chaʼan mi an i sujmlel jiñi laj cuxtʌlel maʼañic mi caj lac tajben i jacʼbal. Jin chaʼan, jiñi periódico Süddeut­sche Zeitung miʼ yʌl chaʼan añʌch «majqui yom miʼ cʌntesañonla».

Muʼ bʌ i mejlel i cʌntesañonla jiñʌch tsaʼ bʌ i meleyonla. Yujilʌch chucoch wʌʼ añonla ila ti Lum come jiñʌch tsaʼ bʌ i yʌcʼʌyonla ilayi. Jiñi Biblia miʼ yʌl chaʼan Jehová tsiʼ meleyonla chaʼan miʼ bujtʼel ili lum ti quixtañujob yicʼot chaʼan mi laj cʌntan. Jiñi quixtañujob yom miʼ pʌsob ti chuqui miʼ melob jiñi melbalʌl tac am bʌ i chaʼan Dios, cheʼ bajcheʼ jiñi tojel, ñaʼtʌbal yicʼot cʼuxbiya. Cheʼ bʌ mi lac ñaʼtan chucoch Dios tsiʼ meleyonla, mi lac ñaʼtan chucoch wʌʼañonla ila ti lum (Génesis 1:26-28).

¿Chuqui miʼ mejlel a mel jatet?

Mi ti wajali maʼan ti a taja wen tac bʌ i jacʼbal ili a cʼajtiya tac, ¿chucoch wʌʼañonla ila pañimil? ¿Baqui mi caj lac majlel? ¿Am ba i sujmlel jiñi laj cuxtʌlel?, jiñi Biblia miʼ subeñonla chaʼan yom mi lac wen cʌn Jehová. Jesús tsiʼ yʌlʌ: «Ili yom i yʌl cuxtʌlel mach bʌ añic miʼ jilel: Cheʼ miʼ cʼotel i cʌñetob, jatet jiñi cojach bʌ i sujm bʌ Dios, yicʼot jiñi tsaʼ bʌ a choco tilel, Jesucristo». Cheʼ jaʼel, yomʌch maʼ sʌclan utsʼatax bʌ a melbal cheʼ bajcheʼ jiñi cʼuxbiya, i chaʼlen wersa chaʼan maʼ mejlel ti chumtʌl cheʼ bʌ wolix ti eʼtel jiñi i Yumʌntel Dios. Cheʼ bajcheʼ jiñi, mi caj a tajben i sujmlel a cuxtʌlel, a pijtaya yicʼot wen mi caj a wajñel. Jiñi cʼajtiya tac tsaʼ bʌ a wen cʼojoʼta mi caj a tajben i jacʼbal tac (Juan 17:3; Eclesiastés 12:13).

¿Am ba chuqui miʼ qʼuextʌyel cheʼ bʌ tsaʼix lac tajbe i jacʼbal laj cʼajtiya tac? Hans miʼ mejlel i subeñonla iliyi. * Anquese ti wajali tsʼitaʼ yujilʌch i chaʼan bʌ Dios, maʼañic tsiʼ colta tiʼ cuxtʌlel, come miʼ wen cʼʌn droga, miʼ wen mulan xʼixicob yicʼot jiñi moto tac. Jin chaʼan tsiʼ yʌlʌ: «Maʼañic i cʼʌjñibal j cuxtʌlel tsaʼ cubi». Cheʼ bʌ 25 i jabilel, tsiʼ bajñel ñaʼta chaʼan yom i cʌn Dios i tsaʼ caji i pejcan jiñi Biblia. Cheʼ bʌ wen lʌcʼʌlix an yicʼot Dios yicʼot cheʼ tsaʼix i ñaʼta chucoch wʌʼan ti pañimil, tiʼ qʼuexta i melbal i tsiʼ chaʼle chʼʌmjaʼ chaʼan miʼ yochel bajcheʼ Testigo. Ili 10 jab ñumen bʌ tilel an i yʌcʼʌ i cuxtʌlel chaʼan miʼ melben i yeʼtel Jehová. Miʼ jamʌ al: «Ñumen wem bʌ ti laj cuxtʌlel jiñʌch cheʼ mi lac melben i yeʼtel Jehová. Maʼañic yambʌ muʼ bʌ i lajin. Cheʼ tsaʼ j cʌñʌ Jehová tsaʼ yʌqʼue i sujmlel j cuxtʌlel».

Pero jiñi cʼajtiya chaʼan mi añʌch i sujmlel laj cuxtʌlel mach jiñic jach muʼ bʌ i pensalin jiñi quixtañujob. Cheʼ bʌ woli i bej asiyel majlel ili pañimil, an yan tac bʌ cʼajtiya muʼ bʌ i ñaʼtañob.

¿Chucoch cheʼ tsaʼ ujti ili?

Cheʼ bʌ juntiquil miʼ ñusan wocol miʼ cʼajtiben i bʌ, ¿chucoch cheʼ tsaʼ ujti bajcheʼ jiñi? Chaʼan miʼ mejlel i lʌtʼ ili wocol tac i cʼʌjñibalʌch chaʼan miʼ tajben wem bʌ i jacʼbal jiñi i cʼajtiya. Miʼ maʼañic miʼ tajben i jacʼbal i bej anto i wocol, tajol jiñi lac piʼʌl maʼañix chuqui miʼ mejlel i mel miʼ yubin. Laʼ laj qʼuel chuqui tsaʼ ujti tiʼ tojlel Bruni, juntiquil ñaʼʌl maxto bʌ wen añic i jabilel.

«Maxto cabʌlic jab jiñi calʌ chʼoc tsaʼ chʌmi, i cʼabaʼ Susanne. Come mucʼʌch c ñop chaʼan an Dios, tsaʼ majli c pejcan jiñi sacerdote chaʼan miʼ subeñon tʼan tac muʼ bʌ i yʌqʼueñon c ñʌchʼtʌlel. Pero tsaʼ bʌ i subeyon jiñʌch chaʼan Dios tsiʼ pʌyʌ majlel jiñi calʌ chʼoc chaʼan miʼ sujtesan ti juntiquil ángel. Cheʼ tsaʼ chʌmi jiñi calʌ chʼoc maʼañix chuqui com tsaʼ cubi, cheʼ jaʼel tic tsʼaʼ qʼuele Dios chaʼan tsiʼ pʌyʌ majlel jiñi calobil». Cabʌl jab tsiʼ wen ubi i chʼijyemlel Bruni. Tsiʼ chaʼ alʌ: «Juntiquil Testigo tsiʼ pʌsbeyon yicʼot jiñi Biblia chaʼan maʼañic chucoch yom mic tsʼaʼ qʼuel jiñi Dios. Jehová mach jiñic tsiʼ pʌyʌ majlel Susanne, mi tsaʼic i sujtesa ti juntiquil ángel. Tsaʼ cʼamʼa come luʼ xmulilonla. Jiñi calʌ chʼoc wʌyʌl jach come woliʼ pijtan chaʼan miʼ chaʼ chʼojyesan Jehová. Tsaʼ j cʌñʌ jaʼel chaʼan Dios tsiʼ mele jiñi quixtañujob chaʼan miʼ chumtʌlob tiʼ pejtelel ora ti jumpʼejl Paraíso, ili mach jalix yom chaʼan miʼ tsʼʌctiyel. Cheʼ bʌ tsaʼ caji c ñumen cʌn majlel Jehová, ñumen lʌcʼʌl añon tsaʼ cubi tiʼ tojlel i jiñi c chʼijyemlel xucʼul xucʼul tsaʼ caji ti lajmel majlel» (Salmo 37:29; Hechos 24:15; Romanos 5:12).

Yonlel lac piʼʌlob miʼ ñusañob wocol mach bʌ pijtʌbilobic i chaʼan, yaʼ ochem jiñi guerra, wiʼñal yicʼot tsʌts bʌ icʼ jaʼal. Bruni tijicña tsiʼ yubi cheʼ bʌ tsiʼ cʌñʌ chaʼan jiñi Biblia miʼ yʌl chaʼan mach i mulic Jehová cheʼ an wocol tac, i chaʼan maʼañic tsiʼ mele jiñi quixtañujob chaʼan miʼ yilañob wocol i tsiʼ cʌñʌ jaʼel chaʼan mach jalix yom miʼ jisʌntel jiñi jontolil. Cheʼ bʌ woliʼ bej pʼojlel majlel jiñi jontolil miʼ pʌs chaʼan chumuloñixla ti «jiñi cojix tac bʌ qʼuin». Pero mach jalix yom chaʼan miʼ jisʌntel jiñi wocol tac (2 Timoteo 3:1-5; Mateo 24:7, 8).

¿Bajcheʼ miʼ mejlel laj cʌn Dios?

Hans yicʼot Bruni maʼañic chuqui wen yujilob tiʼ tojlel Dios. Mucʼʌch i ñopob, pero mach i wen cʌñʌyobic. Cheʼ bʌ tsiʼ yʌqʼueyob i yorajlel chaʼan miʼ cʌñob Jehová, tsaʼʌch i tajayob cabʌl i wenlel. Tsiʼ tajbeyob wem bʌ i jacʼbal jiñi i cʼajtiya tac, i jiñi tsiʼ yʌqʼueyob i ñʌchʼtʌlel yicʼot jumpʼejl i pijtaya ti talto bʌ qʼuin. Cabʌl Testigojob cheʼʌch bʌ tsiʼ ñusayob jaʼel.

Chaʼan mi laj cʌn Jehová, yom mi lac ñaxan wen qʼuel muʼ bʌ i yʌl jiñi Biblia, come jiñi libro jiñʌch baqui miʼ subeñonla tiʼ tojlel yicʼot yaʼʌch mi laj cʌn chuqui yom bʌ mi lac mel. Jiñʌch tsaʼ bʌ i meleyob cheʼ ti ñaxam bʌ siglo. Lucas juntiquil historiador yicʼot doctor tsiʼ yʌlʌ chaʼan jiñi congregación chaʼan judíojob ti Berea (Grecia) «ti jumpʼejlob i pusicʼal tsiʼ chʼʌmʌyob jiñi i tʼan Dios, [tsaʼ bʌ i yʌlʌ Pablo yicʼot Silas] i ti jujumpʼejl qʼuin miʼ wen tsajiñob jiñi Tsʼijbujel tac chaʼan miʼ qʼuelob mi cheʼʌch bajcheʼ woliʼ subentelob» (Hechos 17:10, 11).

Cheʼ jaʼel, jiñi xñoptʼañob ti ñaxam bʌ siglo miʼ tempañob i bʌ ti congregación tac (Hechos 2:41, 42, 46; 1 Corintios 1:1, 2; Gálatas 1:1, 2; 2 Tesalonicenses 1:1). Cheʼʌch miʼ bej mejlel jaʼel ili ora. Jiñi Testigojob miʼ tempañob i bʌ baqui miʼ cʌntesʌntelob chaʼan bajcheʼ yom miʼ coltañob jiñi quixtañujob chaʼan miʼ lʌcʼtesañob i bʌ ti Jehová yicʼot chaʼan miʼ melbeñob i yeʼtel tiʼ tijicñʌyel. Cheʼ mi lac tempan lac bʌ la quicʼot jiñi Testigojob an yambʌ chuqui mi lac taj. Jiñi quixtañujob woliʼ lajiñob jiñi dios muʼ bʌ i chʼujutesañob, jiñi Testigojob miʼ chaʼleñob wersa chaʼan miʼ lajibeñob i melbal Jehová. Jin chaʼan, cheʼ mi lac tempan lac bʌ la quicʼotob mi lac ñumen cʌn Jehová (Hebreos 10:24, 25).

¿Cabʌl ba chuqui yom mi lac mel cheʼ an majqui la com laj cʌn? Tajol cheʼʌchi, yom mi lac chaʼlen wersa. ¿Pero mach ba cheʼic miʼ yujtel jaʼel cheʼ bʌ an chuqui la com lac taj ti laj cuxtʌlel? Laʼcu lac ñaʼtan bajcheʼ cʼamel miʼ chaʼlen wersa juntiquil atleta cheʼ bʌ miʼ cajel ti alas. Jumpʼejl ejemplo, jiñi francés Jean-Claude Killy, tsaʼ bʌ i taja medalla melbil bʌ ti oro ti jiñi olimpiada chaʼan esquí, miʼ yʌl chaʼan mi com lac chaʼlen ganar ti jumpʼejl alas «yom mi laj cʼun tech lac chajpan lac bʌ cheʼ anto yom 10 jab chaʼan miʼ cajel yicʼot jiñʌch yom mi lac chʌn ñaʼtan ti jujumpʼejl qʼuin [...]. Jumpʼejlʌch eʼtel jin jach bʌ an ti lac jol ti jumpʼejl jab». ¡Anquese tsaʼ la cʌqʼue cabʌl i yorajlel chaʼan mi lac wen ñaʼtan yicʼot chaʼan mi lac chajpan lac bʌ, tajol ya 10 minuto miʼ jalʼan jiñi alas! Laʼcu lac wen ñaʼtan chuqui ochem cheʼ mi laj cʌn Jehová yicʼot chuqui bʌ wenlel mach bʌ yujilic jilel mi caj lac taj.

Ñumen lʌcʼʌlix la quicʼot Dios

¿Am ba juntiquil muʼ bʌ i mulan cheʼ maʼañic i chaʼan jiñi ñumen ñuc bʌ i cʼʌjñibal? Maʼañic. Jin chaʼan, mi anto chuqui yom an a chaʼan maʼ wubin ti a cuxtʌlel, mi a wom a ñaʼtan chucoch miʼ yujtel jiñi wocol tac, cʌñʌ Jehová, jiñi Dios tsaʼ bʌ i yʌcʼʌ ti melol jiñi Biblia. Mi tsaʼ cʌñʌ, mi caj i qʼuextʌyel a cuxtʌlel chaʼan wen maʼ wajñel tiʼ pejtelel ora.

¿Muʼ ba caj laj cʌy laj cʌn Jehová? Jiñi añix bʌ ora caj i melbeñob i yeʼtel muʼto i toj sajtelob i pusicʼal cheʼ anto cabʌl chuqui woliʼ bej cʌñob tiʼ tojlel. Cheʼ bʌ mi lac bej cʌn majlel, tijicña mi caj la cubin yicʼot ñumen lʌcʼʌl mi caj la cajñel tiʼ tojlel. Laʼ lac wen ñaʼtan tsaʼ bʌ i yʌlʌ jiñi apóstol Pablo: «¡Wen ñuc jax jiñi i bendición tac Dios, maʼañic i pʼisol jiñi i ñaʼtʌbal yicʼot chuqui tac yujil! ¡Maʼañic miʼ mejlel ti laj chʼʌmbentel i sujm bajcheʼ miʼ chaʼlen meloñel yicʼot maʼañic miʼ mejlel lac laj cʌmben jiñi i bijlel! Come ‹¿majqui tsaʼix cʼoti i cʌmben i ñaʼtʌbal Jehová? ¿O majqui tsaʼ sujti tiʼ yaj ticʼojel?›» (Romanos 11:33, 34).

[Nota]

[Comentario]

Jiñi quixtañujob bej woliʼ melbeñob i bʌ ili cʼajtiya tac: ¿Chucoch wʌʼañonla ila pañimil? ¿Baqui mi caj lac majlel? ¿Am ba i sujmlel jiñi laj cuxtʌlel?

[Comentario]

«Cheʼ bʌ tsaʼ caji c ñumen cʌn majlel Jehová, ñumen lʌcʼʌl añon tsaʼ cubi tiʼ tojlel»

[Comentario]

«Ñumen wem bʌ ti laj cuxtʌlel jiñʌch cheʼ mi lac melben i yeʼtel Jehová. Maʼañic yambʌ muʼ bʌ i lajin. Cheʼ tsaʼ j cʌñʌ Jehová tsiʼ yʌqʼue i sujmlel j cuxtʌlel»