Eikuaáramo Jehovápe ni mbaʼevéicharõ nerembyasymoʼãi

¿REÑANDÚPA ofaltaha ndéve álgo nde rekovépe revyʼa hag̃ua? Hetaiterei hénte ningo ovyʼave oikuaa rire Ñandejárape. Ha upéva ikatu avei nepytyvõ ndéve koʼág̃a ha amo gotyove.

Ñandejára Jehová ningo oskrivika vaʼekue la Biblia, ha upépe haʼe omombeʼu ñandéve oipotaha jaikuaa chupe. Upévare peteĩ salmísta oskrivi vaʼekue: “Umi hénte oikuaáta, nde nderérava Jehová, nde añoite hína haʼeha Ñandejára Ndaijojaháiva ko yvy ape ári” (Salmo 83:18). Ha ótro lugárpe oñemombeʼu ñandéve mbaʼe iporãvapa jahupytýta jaikuaáramo Ñandejárape. Isaías 48:17 heʼi: “Che hína nde Jára Jehová. Umi mbaʼe che romboʼéva ningo ideprovéchota ndéve”. ¿Mbaʼe iporãvapa jahupytyvéta jaikuaáramo Ñandejára Jehovápe?

Jaikuaáramo Ñandejárape ñaaprende mbaʼéichapa ikatu ñasolusiona ñane provlemakuéra káda diagua, avei ikatu jareko peteĩ esperánsa iporãva ha umíva ñanembopyʼaguapy. Ha ndahaʼéi voi upévante, jaikuaáramo Jehovápe ikatúta oñekontesta ñandéve umi porandu iñimportantevéva. ¿Mbaʼépa hína koʼã pregúnta?

¿Maʼerãpa jaikove?

Koʼág̃arupi ningo pe teknolohía tuichaiterei oavansa. Upéicharamo jepe oĩ gueteri heta porandu neʼĩrava oñekontesta ñandéve. Por ehémplo: “¿Maʼerãpa ñaime koʼápe? ¿Mbaʼépa oikopáta ñandehegui? ¿Maʼerãpa Ñandejára ñandekrea?”. Nañakontestáiramo koʼã pregúnta ndaikatumoʼãi javyʼa añetehápe. Ha ñambyasýramo jepe heta hénte upévare ou ndovyʼavéi. Áño 1997-pe Alemániape unos kuánto persónape oñeporandu oikuaápa mbaʼerãpa jaikove, ha mas de la mita heʼi sapyʼánte oñanduha naisentidoiha la hekove. Ha heta hénte koʼág̃a oiméne oñeñandu avei upéicha.

Ndajaikuaáiramo maʼerãpa jaikove, ikatu ñapensa mbaʼeve ndorekoiha sentído, ha amo ipahápe ikatu nañaneinteresavéi la ñande futúro. Ponove oñeñandu upéicha heta ostudia universidápe ikatu hag̃uáicha oreko traváho porã ha ogana hag̃ua heta pláta. Péro amo ipahápe lomímonte oñeñandu haʼeño ha ndovyʼái jey. Upévare algúno ou oñedeprimiete ha oñentregaséntema voi. Peteĩ rrevísta omombeʼu mbaʼépa oiko vaʼekue peteĩ mitãkuñáre orekóva 31 áño. Haʼe ningo siémpre oiko porãva pórke ifamília ipláta heta, upéicharamo jepe haʼe oñeñandu vaʼekue haʼeño ha naisentídoi chupe la hekove. Ha upéi de tántoma ke ndovyʼái ou ojesuisida. Oiméne nde rehendúma hetáre oikoha avei upéicha.

Oĩ opensáva umi sientífiko orresponde vaʼerãha ñandéve umi porandu jahecháma vaʼekue. Péro peteĩ rrevísta alemana heʼi umi sientífiko odeskuvríramo jepe hetaiterei mbaʼe, haʼekuéra ndaikatuiha ñanepytyvõ ñañemoag̃ui hag̃ua Ñandejárare ni heʼívo ñandéve mbaʼépa iporã térã ivai. Ha añetehápe pe teoría de la evolusión ha umi ótro teoría ikomplikadovéva ñantende hag̃ua nomeʼẽi ñandéve konsuélo ni esperánsa. Ñarrekonose vaʼerã pe siénsia rupive ojedeskuvrimaha heta mbaʼe, upéicharamo jepe ndaikatúi oexplika ñandéve maʼerãpa jaikove ni mbaʼépa oikóta ñandehegui amo gotyove. Upéicharõ ñadependétarõ pe siénsiarente noñekontestamoʼãi ñandéve umi porandu. Peteĩ diário osẽva Alemániape heʼi koʼág̃a umi hénte mas ke núnka oikotevẽha ojegia chupekuéra.

Ñande Apohare añoite ikatu ñandegia porã pórke haʼe ñandekrea ha oikuaa maʼerãpa ñaime koʼápe. La Biblia ñanemboʼe Jehová ñandeapo hague jaiko hag̃ua ko yvy ape ári ha jakuida hag̃ua opaite mbaʼe oĩvare ñane planétape. Ñandejára ñandeapo rupi ijoguaháramo, ñande ikatu jareko umi kualida porã haʼe oguerekóva. Por ehémplo ñandehústo, ñanearandu ha japorohayhu. Ñantendévo koʼã mbaʼe Jehová oexplikáva ñandéve la Biblia rupive ñantende avei maʼerãpa ñaime koʼápe (Génesis 1:26-28).

¿Mbaʼépa rejapo vaʼerã?

Oiméramo neʼĩra gueteri retopa la rrespuésta koʼã porandúpe: “¿Maʼerãpa ñaime koʼápe? ¿Mbaʼépa oikopáta ñandehegui? ¿Maʼerãpa Ñandejára ñandekrea?”, upéicharõ iporãta reikuaavéramo Jehovápe ha esegi ko invitasión omeʼẽ vaʼekue Jesús: “Umi hénte oikove hag̃ua pára siémpre tekotevẽ ndekuaa ndéve, nde hína Ñandejára teete ha peteĩetéva. Oikuaa vaʼerã avei Jesucrístope, upe nde rembou vaʼekue”. Iporãta avei reñehaʼãramo reporohayhu Ñandejára ojapoháicha ha rehechauka reiko lájare reimeseha Ñandejára Rréino poguýpe. Rejapóramo koʼã mbaʼe rehecháta mbaʼéichapa isentído nde rekove, erekóta esperánsa iporãva ha revyʼaitereíta. Ha avei rehecháta mbaʼéichapa umi porandu iñimportantetéva reikuaase vaʼekue oñerrespondétama ndéve (Juan 17:3; Eclesiastés 12:13).

¿Mbaʼéichapa ikatu ideprovécho ndéve koʼã mbaʼe? Jahechamína mbaʼéichapa la Biblia oipytyvõ vaʼekue peteĩ karai héravape Hans. * Haʼe oguerovia vaʼekue Ñandejára oexistiha péro ndahaʼéi vaʼekue la iñimportantetereíva chupe g̃uarã. Haʼe ningo kriminál vaʼekue ha ogusta chupe oiko móto ári, avei oipuru vaʼekue dróga ha oreko heta kuña. Upéicharamo jepe haʼe orrekonose: “Legálmente ndavyʼaieterei vaʼekue”. Upéi Hans orekórõ guare 25 áñorupi odesidi ostudia la Biblia oikuaa porãve hag̃ua Ñandejárape. Haʼe oikuaa rire Jehovápe ontende maʼerãpa jaikove ha okambiaite la oiko lája. Haʼe odesidi ojevautisa ha oiko chugui testígo de Jehová. Koʼág̃a ojapóma 10 áño oservi hague de tiémpo kompléto Jehovápe, ha omombeʼu ñandéve mbaʼéichapa oñeñandu: “Jaservi Jehovápe ningo haʼe la mehór desisión, ndaipóri ótra kósa iporãvéva upévagui. Aikuaa rupi Jehovápe añandu koʼág̃a che rekove isentidoha”.

Péro ndahaʼéi ningo umi hénte oikuaasénteva maʼerãpa jaikove. Koʼág̃arupi opa mbaʼénte ijetuʼuve upévare oĩ hetave mbaʼe oipyʼapýva chupekuéra. Jahechamína peteĩ ehémplo.

¿Mbaʼére oiko umi mbaʼe vai?

Umi hénte osufri jave katuete oñeporandu jepi: ¿Mbaʼére oiko cherehe koʼã mbaʼe? Ha añetehápe jaikuaáramo mbaʼérepa jahasa asy upéva ñanepytyvõta ñaaguanta hag̃ua ha ani hag̃ua jaju ñañamarga. Jahechamína mbaʼépa oiko vaʼekue peteĩ kuñakarai héravare Bruni.

Haʼe heʼi: “Ojapo ningo unos kuánto áño omano hague chehegui che membykuñaʼi. Che ningo ajerovia Ñandejárare upévare aha pe paʼi rendápe chekonsola hag̃ua. Pe paʼi heʼi chéve Ñandejára ogueraha hague che membykuñaʼípe yvágape pórke oikotevẽ iñanhelitorã. Che ningo añeñandu vaietereíma voi kuri la oikóvare, péro upéva chereja yvýre ha chepochyeterei Ñandejárare”. Pe kuñakarai osufri ha oñeñandu vaieterei heta áñore. Upéi omombeʼu ñandéve la oikóva: “Umi testígo de Jehová ohechauka chéve la Biblia rupive ndarekoiha motívo chepochy hag̃ua Ñandejárare, oexplika chéve Jehová ndoguerahái hague chehegui che membykuñaʼípe yvágape, ha avei haʼe ndahaʼeiha peteĩ anhelíto. Upépe antende avei che memby hasy hague pe imperfeksión káusare, ha koʼág̃a haʼe opytuʼunteha hína ohaʼarõvo Jehová omoingove jey chupe. La Biblia rupive aaprende avei Jehová ñandeapo hague jaiko hag̃ua pára siémpre ko yvy ape ári peteĩ hardín iporãitereívape, ha upe promésa porãite koʼẽrõite oñekumplitaha. Aikuaávo mbaʼeichagua persónapa Jehová upéva añetehápe chemoag̃uive hese ha koʼág̃a añeñandu porãvéma” (Salmo 37:29; Hechos 24:15; Romanos 5:12).

Oĩ heta avei osufríva ohasa haguére peteĩ trahédia, pe gérra, ñembyahýi térã peteĩ desástre naturál káusare. Bruni ningo oñeñandu porãiterei oikuaa rire Jehová ndorekoiha la kúlpa jasufri haguére, avei haʼe ndojapói hague yvyporakuérape osufri hag̃uánte, ha koʼẽrõitéma ohunditaha umi mbaʼe vai oikóva koʼág̃a. La Biblia heʼi avei ñandéve koʼág̃a umi mbaʼe vai oikóva ohechaukaha hína ñaimeha “umi ára pahápe” ha saʼietereíma ofaltaha entéro mbaʼe vai oĩva ko múndope opa hag̃ua. Enterovévape ningo hiʼãitereíma okambia ko situasión, ha koʼẽrõitéma oikóta upéva (2 Timoteo 3:1-5; Mateo 24:7, 8).

¿Mbaʼéichapa ikatu jaikuaa Ñandejárape?

Hans ha Bruni ojeroviáramo jepe Ñandejárare añetehápe ndoikuaaporãi kuri chupe. Péro upéi haʼekuéra oñehaʼã rire oikuaa porãve Jehovápe, oñerresponde chupekuéra umi porandu hetaite tiémporema oipyʼapy vaʼekue chupekuéra. Ha ndahaʼéi voi upévante, koʼág̃a haʼekuéra oiko trankílo ha oreko peteĩ esperánsa isegúrova. Hetaiterei testígo de Jehovápema oipytyvõ avei la Biblia oñeñandu hag̃ua upéicha.

Jaikuaa hag̃ua Jehovápe primeroite jastudia vaʼerã la Biblia, pórke upépe oñemombeʼu ñandéve mbaʼeichagua persónapa haʼe ha mbaʼépa oipota ñande jajapo. Upéicha ojapo vaʼekue umi kristiáno Bereagua ojapo amo 2.000 áñorupi. Lucas heʼi: “Haʼekuéra oasepta Ñandejára ñeʼẽ ipyʼaite guive, ha káda día ohesaʼỹijo porã Ñandejára Ñeʼẽ ohecha hag̃ua siértopa umi mbaʼe ojeʼéva chupekuéra” (Hechos 17:10, 11).

Avei umi kristiáno ypykue oñembyaty vaʼekue umi kongregasiónpe oadora hag̃ua Ñandejárape (Hechos 2:41, 42, 46; 1 Corintios 1:1, 2; Gálatas 1:1, 2; 2 Tesalonicenses 1:1). Koʼág̃arupi avei umi testígo de Jehová oñembyaty káda semána umi kongregasiónpe, ikatu hag̃uáicha oipytyvõ umi héntepe oiko hag̃ua chuguikuéra Ñandejára amígo ha oservi hag̃ua chupe vyʼápe. Koʼã rreunión ningo katuete nepytyvõta avei ndéve. Umi testígo de Jehová oñehaʼã osegi Jehová ehémplo ha nde avei reñehaʼãramo reñembyaty hendivekuéra ikatúta reikuaa porãve Jehovápe ha rejoguavéta avei chupe (Hebreos 10:24, 25).

¿Ovale piko la péna peichaite ñañehaʼã jaikuaa hag̃ua Ñandejárape? Siérto ningo la ñañehaʼã vaʼerãha jaikuaa hag̃ua Ñandejárape, péro jahupyty hag̃ua umi mbaʼe ovaléva la péna, jajesforsánte vaʼerã voi. Por ehémplo, epensamíntena mbaʼépa ojapo peteĩ atléta profesionál ogana hag̃ua peteĩ kompeténsia. Peteĩ atléta heʼi: “Reganaséramo peteĩ kompeténsia reñepyrũma vaʼerã 10 áño ántes ha káda día eñentrena kariaʼy vaʼerã”. Upéva heʼise koʼã atléta ojepreparaha 10 áñorupi voi opartisipa hag̃ua peteĩ kompeténsia odurátavape 10 minútorupinte. Ha umi mbaʼe porã ñakonsegíva jaikuaa rupi Jehovápe tuichaiteve mbaʼe upévagui.

Eñemoag̃uivékena káda día Ñandejárare

Enterovéva ningo javyʼase ñande rekovépe. Oiméramo reñandu ofaltaha ndéve álgo revyʼa hag̃ua térã reikuaaséramo mbaʼérepa oiko umi mbaʼe vai, upéicharõ eñehaʼãmbaitékena eikuaa hag̃ua Jehovápe. Ikatu reime segúro rejapóramo upéva isentidotaha nde rekove koʼág̃ama voi, ha pára siémpre.

Siémpre ikatúta jasegi ñaaprende Jehovágui. Umi oservíva Jehovápe heta áñorema jepe, siémpre osegi oaprende álgo ipyahúva chugui. Umi mbaʼe ñaaprendéva Ñandejáragui ñanembovyʼa ha ñanemoag̃uive hese. Katuete reiméta de akuérdo apóstol Pablo oskrivi vaʼekue ndive. Haʼe heʼi: “Ajépa tuichaite umi vendisión Ñandejára omeʼẽva. Haʼe ningo iñarandueterei ha oikuaa entéro mbaʼe. Ñande ndaikatúi jaikuaapa umi mbaʼe haʼe odesidíva ha umi mbaʼe haʼe ojapóva. Ñandejára Ñeʼẽme heʼi voi: ‘¿Máva piko oikuaa Jehová opensáva, térã máva piko ikatu omeʼẽ chupe konsého?’” (Romanos 11:33, 34).

[Nóta]

[Komentário]

Oĩ gueteri heta porandu neʼĩrava oñekontesta ñandéve: “¿Maʼerãpa ñaime koʼápe? ¿Mbaʼépa oikopáta ñandehegui? ¿Maʼerãpa Ñandejára ñandekrea?”

[Komentário]

“Aikuaávo mbaʼeichagua persónapa Jehová upéva añetehápe chemoag̃uive hese”

[Komentário]

“Jaservi Jehovápe ningo haʼe la mehór desisión, ndaipóri ótra kósa iporãvéva upévagui. Aikuaa rupi Jehovápe añandu koʼág̃a che rekove isentidoha”