Yeehoowa — Te Kot woos weyert is khëne lërne

MEECHT etwas wichtiches in tayn leepe feele? Wëns tuu weenich weest iwich Kot, tan is ti antwort — yaa. Warom? Wayl soo wii milyoone layt raus kriit hon, te Kot fon te Piipel khëne lërne is aarich nutslich im leepe. Tas is nutslich hayt un aach fer te tsukhunft.

Yeehoowa Kot, te Autoer fon te Piipel, wil tas mer iim khëne sole. Te psalmist hot kexrip: “Tas ti layt wise tas tuu, woo Yeehoowa heest, ploos tuu pist te Ale Heechste iwer ti kans eyert.” Tee wees tas es aarich kuut is fer uns iim khëne. “Ich, Yeehoowa, sin tayn Kot, tee woo tich in lërnt was peser fer tich is.” Wii is tas nutslich fer uns Yeehoowa Kot, te Ale Heechste, khëne? — Psalm 83:18; Isaiias 48:17.

Een woere nuts is tas mer khene oryentiirung fine fer propleeme woo mer taach tsu taach hon, een xtark hofnung fer te tsukhunft un inerlich friit. Un noch, Yeehoowa kuut khëne macht tas mer een anert atituut hon iwich wichtiche frooche woo ti mënxe in te kans welt hayt se taach hon. Was fer frooche sin tas?

Hot tayn leepe tswek?

Ale tëm ti mënxe wunerliche foer xrite kep hon in teknoloxii, mache se sich noch ti selwiche frooche: ‘Warom tuun ich eksistiire? Was is im tsukhunft fer mich? Was fer tswek hot tas leepe?’ Wën te mënx net ti antwort fint woo iim tsufriite lost, tan hot sayn leepe khee woere tswek. Meecht tas mit fiil pasiire? Een xtuutyum woo in Taytxlant kemacht woer is, am ën fon ti yoore 90, hot ketsaycht tas ti heleft fon tëne woo ap keheert sin woer, hon kesaat — als mool orer oft — tas es aus teet siin tas tas leepe khee tswek hët. Fiilaycht pasiirt tas aach woos tuu woonst.

Oone een opjetiiw im leepe, hot te mënx khee xtarke funtament fer persoonliche tsiile xtele. Fiil hale sich aan een aarwayt woo aansiinlich susës pringt orer raychtum samer mache. Awer noch soo, xpiire se sich leyer inwënich. Khee opjetiiw im leepe hon, macht tas etliche ti lust ferliire fer leepe. Tas is pasiirt mit een xeen fraa, soo wii ti International Herald Tribune tsaytung kexrip hot, tii is kroos kewakst in een “mechtich raych familye un mit fiile priwilëje”. Ale tëm woo se een leepe mit fiil lux hat, hat se sich aleen kexpiirt un hat kement tas iire leepe khee opjetiiw hat. Tii hat phile fer xloofe ketrunk un nochter hon se se toot kefun. Ferlaycht wees tuu aach iwich anere woo sich aleen kexpiirt hon un woo tas leepe in een unkliiklich aat am ën kang is.

Awer, host tuu xon keheert etliche saan tas ti syens khan uns ales iwich tas leepe saan? Ti Taytx tsaytung Die Woche hot kesaat: “Opwool ti syens sich aan fakte halt, heleft se net fer ti spiritualiteet. Ti ewolutsyoon siit aus wii etwas woo net kenau kemacht woer is, un soo kaar ti kwantik fisik, mit sayn fiile wariatsyoone woo net foer kesiin khene wëre, khan khee troost un sicherheet kepe.” Ti aus finunge fon ti syens hon fiil keholef aus leye iwich tas leepe in sayn fiile aate, ti sikle un naturaale prosëse woo tas leepe hale. Awer, ti syens khan net saan warom mer eksistiire un aach net was im tsukhunft pasiirt. Wën mer ploos ti syens noo keen, wëre unser frooche iwich ti opjetiiw fom leepe khee antwort kriin. Te resultaat is was in ti tsaytung Süddeutsche Zeitung xteet: “een kroos neetichkheet fon oryentiirung”.

Nimant khan peser tiise oryentiirung kepe wii te Kriatoer. Wayl tee ti mënxe uf ti Eyert ketuun hot, wees tee sicher warom mer hiir sin. Ti Piipel leet aus tas Yeehoowa ti mënxe kemacht hot tas se khente ti Eyert pewoone un se uf phase, wii atministratoere. Ti mënxe, in sayn kanse aktiwiteete, miste Kot sayn kwaliteete pewayse, wii kerechtichkheet, kluucheet un ti liip. Wën mer ferxteen warom Yeehoowa uns kemacht hot, ferxteen mer warom mer too sin. — Xeenesis 1:26-28.

Was khanst tuu mache?

Wëns tuu noch net ti antworte fer tiise frooche kefun host: ‘Warom tuun ich eksistiire? Was is im tsukhunft fer mich? Was fer tswek hot tas leepe?’ Ti Piipel tuut aan reete tas tuu Yeehoowa kuut khëne lërne solst. Soo wii Yeesus saat: “Tas petayt tas eewiche leepe: tas se tich khëne tuun, te eensiche woere Kot, un tee woos tuu kexikt host, Yeesus Kristus.” Tuu pist aach uf kemuut fer kaystliche kwaliteete ëntwikele, haupstseechlich ti liip, un te opjetiiw hon fer leepe unich Kot sayn Raych woo hatich khomt. Tan, kriist tuu een opjetiiw im leepe un een xeen hofnung fer te tsukhunft. Un ti wichtiche frooche woos tuu host wëre keantwort. — Yoohan 17:3; Eklesyastes 12:13.

Was fer unerxiit khan tas mache? Hans wees kans kenau ti antwort fer tiise frooch. * Phaar yoore tsurik, hot tee soo unkefeer aan Kot keklaapt, awer sayne klaape hot khee kroos unerxiit in sayn leepe kemacht. Hans hot kërn trooke, motosikle, imoraalixe fraae un hat aach kleene tinge woo keeche ti kesetse sin kemacht. “Awer tas leepe hot khee tswek, hot mich net tsufriite kelos”, hot tee kesaat. Wii Hans 25 yoer waar, hot tee sich foer kenom aus sich selepst Kot khëne lërne torich ti Piipel kenau leese. Noo eyer Kot kuut kekhënt hot un te opjetiiw fom leepe ferxtan, hot tee sayn leepe keënert un is ketaaft woer wii Yeehoowa sayn Tsayer. Te tiint Yeehoowa in fol tsayt ti letste tseen yoore. Te saat: “Yeehoowa tiine is tas peste leepe. Niks khan sich too mit ferklayche. Yeehoowa khëne lërne hot mich een opjetiiw fer tas leepe kep.”

Natiirlich, te opjetiiw fom leepe is net te eensiche sache woo ti layt sich ketanke triwer mache. Taach tsu taach wërt ti situatsyoon fon ti welt xlechte, tes weeche is noch een anere sache woo imer mee layt xteert.

Warom is tas pasiirt?

Wën etwas xlimes pasiirt, ti meyerst tsayt tenkt tee woo petroft kewoer is: Warom is tas pasiirt? Fer wise wii in emotsyonaal aat mit ti xwiirichkheete um keen hëngt ap aan ti richtich antwort wise fer tiise frooch. Wëns khee antwort kept woo te mënx tsufriite lost, tuut tee foran layte un khan piterlich wëre. Tsum payxpiil, kuk Bruni sayn kexicht.

“Phaar yoore tsurik, is mayn meetche kextorep”, saat Bruni, woo yets xon elter is. “Ich hon aan Kot keklaapt, tes weeche ich sin in mayn khërich kang fer ketreest wëre. Tat hon se mich kesaat tas Kot hët Susanne tsum himel kenom, un yets weyer se een ëngel. Tas waar net ploos weeche iire toot tas mayn leepe xlecht un traurich kewoer is, awer aach wayl ich Kot kehast hon wayl eyer se mich wech kehool hot.” Bruni sayn xmërtse un layte hon yoore lang aan kehal. “Tan hot een fon Yeehoowa sayn Tsayer mich in te Piipel ketsaycht tas ich hët khee motiiw fer Kot hase. Yeehoowa hot net Susanne tsum himel kenom un tii is khee ëngel kewoer. Tëne iire krankheet is weeche ti mënxlich imperfektsyoon. Susanne xlooft im toot, un waart tas Yeehoowa se uf ruuft. Ich hon aach kelërnt tas tee ti mënxe kemacht hot fer tas tii fer imer uf ti Eyert im paratiis leepe sole, un tas es wërt hatich pasiire. Wii ich aan kefang hon tsu ferxteen was fer sort persoon Yeehoowa wërklich is, sin ich tichte tsu iim khom un mayn xmërts is lamsam ferkang.” — Psalm 37:29; Aphostele sayn Kexicht 24:15; Romaaner 5:12.

Milyoone mënxe mache uf een orer anert aat xwiirichkheete mit, wii persoonliche unklik, kriich, hungernoot orer naturaale katastroofe. Bruni hot sich laychte kexpiirt wii se kelërnt hot in te Piipel tas ti xwiirichkheete net Yeehoowa sayn xult sin, tas tee wolt nii tas ti layt eelent mit mache solte, un tas tee hatich tas ales xlechtes tsum ën pringt. Wayl ti xlechtichkheet imer kreeser wërt, is een tsayche tas mer “in ti letste taache” fon tiise sisteem leepe. Tas ti tsayt, woo mer truf waarte, wën ales fiil peser wërt, is kans ticht. — 2 Timoteus 3:1-5; Matheus 24:7, 8.

Kot khëne lërne

Hans un Bruni wuste net fiil iwich Kot, awer hon toch aan tëm keklaapt. Tas waar een kroos weyert fer tëne sich aan xtrenge un tsayt nëme fer Yeehoowa, wii een persoon, khëne lërne. Tii hon antworte kefun woo se tsufriite kelos hon iwich ti wichtiche frooche fon unser taache. Tas hot tëne friit kep un een sicher hofnung iwich te tsukhunft. Milyoone fon Yeehoowa sayn tiiner hon tas aach kexpiirt.

Fer Yeehoowa khëne lërne mise mer kenau ti Piipel uner suuche, woo xprecht iwich iim un was eyer fon uns ferlangt. Im eyerste yoer hunert hon etliche tas kemacht. Te kexicht unersuucher un tokter Lukas saat tas ti mitkliiter fon ti yuutix kemaynt fon Perëye, in Kreesya, hon “tas wort [fom Phaul un Silas] kërn aan kenom hon; un yeete taach, hon se ti Xrifte uner suucht fer se siin ep tiise tinge kraat soo waare wii se tëne kesaat hon”. — Aphostele sayn Kexicht 17:10, 11.

Ti kriste fon eyerste yoer hunert hon sich aach kesamelt in kemaynte. (Aphostele sayn Kexicht 2:41, 42, 46; 1 Korinter 1:1, 2; Kalater 1:1, 2; 2 Thesalooniker 1:1) Soo is tas aach hayt se taache. Ti kemaynte fon Yeehoowa sayn Tsayer hon fersamlunge woo ekstra kemacht sin fer yeete eene helfe tichter tsu Yeehoowa khome un iim mit frayt tiine. Mit Yeehoowa sayn Tsayer sich samele is nutslich in noch een anert aat. Wayl ti mënxe sich imer mee aan xtrenge fer iire Kot noo mache, tuun Yeehoowa sayn Tsayer sich aan xtrenge fer kwaliteete tsayche woo Yeehoowa hot. Tes weeche, mit tëne uns samele heleft uns Yeehoowa peser khëne lërne. — Hepreeyer 10:24, 25.

Meecht tas tsu fiil aanxtrenung sin fer ploos eene Persoon khëne lërne? Sicher, mus ma sich aan xtrenge. Awer, is tas aach net soo mit anere tinge woos tuu in leepe hon wilst? Tenk aan wii een famoos atlet sich aanxtrengt in sayn iipung. Tsum payxpiil, Jean-Claude Killy, in Frankraych, woo hot tas eyerste plats in esqui in een Olimpiata kriit, saat iwich was neetich is fer kuut foran khome in een kompetitsyoon fon internatsyonaal sport: “Ma mus aan fange sich foer perayte 10 yoore in foer raus un yeete taach too traan tenke.  . . . Tas is een aarwayt fer 365 taache im yoer, woo mit khërper un ketanke tsu tuun hot.” Tiise kans tsayt un aanxtrenung wërt aan kewënt in een xpringe woo im xtant ploos tseen minute aan halt! Kans sicher, Yeehoowa khëne pringt peloonunge woo kreeser sin un plaype fer imer.

Een tich ferhaltung

Weer teet kërn etwas wichtiches im leepe ferliire? Nimant. Tan, wëns tuu xpiirst tas tayn leepe khee woere tswek hot, orer teest kërn ferxteen warom tas soo fiil xwiirichkheete kept, tan mach ti ëntxlus fer Yeehoowa, te Kot fon te Piipel, khëne lërne. Iwich tëm lërne khan tayn leepe ferënere fer peser un fer imer.

Meecht een taach khome woo niks mee is fer iwer Yeehoowa lërne? Tii woo tee xon yoore lang tiine, tuun sich noch wunere iwich was se xon kelërnt hon un ti naye tinge woo se noch lërne iwich Kot. Iwich tas lërne kept uns frayt un nëmt uns tichter pay iim. Tan, khene mer aach soo tenke wii te aphostel Phaul, woo kexrip hot: “Wii tiif is Kot sayn raychtum un kluucheet un khëntnis! Sayn kerichte khene net ferxtan wëre, un sayn weeche khene net uner suucht wëre! Wayl, “weer khan Yeehoowa sayn ketanke khëne, orer weer khan tëm aanreete kepe”?” — Romaaner 11:33, 34.

[Noote]

[Hooch phunkt]

Ti layt mache sich imer noch ti selwiche frooche: ‘Warom tuun ich eksistiire? Was is im tsukhunft fer mich? Was fer tswek hot tas leepe?’

[Hooch phunkt]

“Wii ich aan kefang hon tsu ferxteen was fer sort persoon Yeehoowa wërklich is, sin ich tichter tsu iim khom.”

[Hooch phunkt]

“Yeehoowa tiine is tas peste leepe. Niks khan sich too mit ferklayche. Yeehoowa khëne lërne hot mich een opjetiiw fer tas leepe kep.”