Kelala Meh Petara Jehovah

MAYUH orang ngasaika pengidup tu nadai reti. Kati tu ketegal sida bedau entu ngelala penempa sida? Bejuta iku orang udah bulih mayuh penguntung pengudah sida ngelala Apai kitai ti di serega. Berekat tu udah nulung sida ngembuan pengidup ti lantang sereta bisi reti.

Dalam Bup Kudus, Petara bisi nyebut sapa Iya ngagai kitai. Masmur 83:18 Salin Dunya Baru madahka “Awakka sida nemu Nuan seiku aja ti Jehovah, Raja ti Pemadu Tinggi ke serata dunya.” Jehovah nemu kitai deka bulih mayuh penguntung enti kitai ngelala Iya. Ku iya madahka: ‘Aku tu Jehovah Petara kita, ti deka ngajar kita utai ke penguntung kita.’ Nama penguntung ke deka diulih kitai?—Isaiah 48:17.

Kitai deka bulih iring ti manah kena napi penanggul ba pengidup, semaya ke tentu deka nyadi jemah ila, sereta pengelantang ba runding. Kelimpah ari nya, kitai deka bulih saut ngagai tanya ti beguna ba pengidup. Enggau nya, kitai ulih ngembuan runding ti betul pasal penanggul ke ditapi kitai kemayaharitu. Nama sekeda tanya ke diperundingka orang kemayaharitu?

Nama Tuju Pengidup?

Taja pan dunya kitai majak moden kemayaharitu, tang bisi mayuh tanya pasal pengidup ke agi bedau disaut. Ambika chunto: ‘Nama kebuah kitai bisi? Nama tuju pengidup kitai? Nama deka nyadi ngagai kitai jemah ila?’ Enti tanya tu nadai saut, pengidup kitai nadai reti, lalu kitai deka berasai puang. Ba ujung taun 1990-an, siti pansik digaga ba menua Jerman. Ba pansik nya, setengah ari chalun ke enggau ngasaika pengidup sida puang sereta nadai tuju.

Enti pengidup kitai nadai tuju ti betul, kitai engka nitihka jalai pengidup ti salah. Sekeda orang bebendar deka ngiga pengaya sereta betumpu ba kereja sida. Tang semua utai tu nadai reti sereta enda ulih meri pengidup ti ngemuaska ati. Ketegal nya, sekeda orang ngasaika pengidup sida nadai tuju lalu sida enggai idup agi. Tu meh utai ke nyadi ngagai seiku indu ti biak. Taja pan iya kaya, bajik sereta tebilang, iya ngasaika pengidup iya nadai tuju sereta amat puang. Tang sayau amat, iya munuh diri. Pia mega mayuh orang kemayaharitu ngasaika utai ti sama baka iya, lalu sida mega udah munuh diri.

Sekeda orang bepanggai ba sains. Tang kati nya ulih nulung sida? Amat, sains endang udah mayuh nulung pengidup mensia. Sains nulung kitai mereti pasal proses utai ke nyadi ba dunya sereta pengidup. Taja pia, kati sains ulih nulung kitai meretika tuju pengidup? Surat kabar Jerman Die Woche madahka: “Sains enda ulih meri utai ti diguna mensia ba pengarap. Ukai nya aja, teori evolusi enggau fizik kuantum enda ulih nulung mensia bulih pengelantang ba ati tauka meretika tuju pengidup.” Ketegal nya surat kabar Süddeutsche Zeitung madahka: “Mensia di serata endur amat begunaka iring ba pengidup sida.”

Nyadi, sapa ke ulih nulung kitai? Petara Jehovah, Iya udah nempa semua mensia. Iya deka kitai nyaga dunya, beranak betelesak sereta ngemenuhka dunya tu. Iya mega dekaka mensia ngemansangka kualiti baka pengerindu, pengelurus, sereta ngembuan penemu dalam. Enti kitai bepanggai ba Penempa kitai, kitai deka nemu kebuah kitai bisi sereta ngembuan pengidup ti bisi reti.—Pemungkal 1:26-28.

Nama Utai ke Patut Digaga Nuan?

Kena nemu saut pasal tuju pengidup, kitai patut ngelala Petara Jehovah enggau manah agi. Jesus madahka: ‘Tu pengidup ti meruan belama iya, ngambika sida ngelala Nuan, Petara ti bendar, enggau Jesus Kristus, ke dikirumka Nuan.’ Kelimpah ari nya, bebendar meh ngemansangka kualiti ti manah kelebih agi pengerindu. Nuan mega patut keran idup nitihka prinsip Petara. Enggau nya, nuan deka ngembuan pengidup ti manah jemah ila ba baruh Perintah Petara.—John 17:3; Pengajar 12:13.

Aram kitai meda siti chunto ke nunjukka baka ni pengidup seiku lalaki berubah pengudah iya ngelala Petara. Taja pan Hans pechaya Petara nya bisi, tang iya enda nejuka jaku Petara ngiring iya ba pengidup. * Ketegal nya, iya ngereja utai nitihka peneka ati iya lalu suah ngereja utai ti jai. Iya mega ngiga pengaya lalu makai dadah. Kati gaya pengidup iya ngasuh iya berasai puas sereta meri pengelantang ti bendar? Hans madahka, iya berasai puang sereta pengidup iya nadai reti. Lebuh Hans beumur kira-kira 25 taun, iya ngaga pemutus deka mansik Bup Kudus enggau dalam agi. Pengudah iya ngelala sapa Jehovah ke bendar, iya nemu pasal tuju pengidup iya. Hans ngubah chara pengidup iya, lalu pengujung iya, dibaptisa nyadi seiku ari Saksi-Saksi Jehovah. Nama asai ati Hans pengudah ngaga ubah ti besai ba pengidup iya? Pengudah gawa penuh jam ngagai Jehovah pengelama 10 taun, Hans madahka: “Nyembah Jehovah nya chara pengidup ti pemadu manah. Nadai utai lebih agi ngemuaska ati ari tu. Diatu, pengidup aku bisi tuju.”

Kebendar iya, orang ukai semina berunding pasal tuju pengidup aja. Seraya gaya ba dunya majak jai, bisi siti agi tanya ke ngasuh runding orang charut.

Nama Kebuah Kitai Merinsa?

Lebuh orang napi penanggul, sida suah nanya: Nama kebuah utai tu nyadi ba aku? Nambahka nya, enti sida nadai bulih saut ti betul ke tanya nya, tu deka ngasuh pengidup sida merinsa agi. Sida engka berasai asa, ringat, sereta nadai tuju. Ambika chunto, aram kitai beratika peneleba Bruni.

Bruni madahka: “Anak indu aku, Susanne, udah nadai beberapa taun ti udah.” Bruni pechayaka pasal Petara. Nyadi kena ngiga pengelantang ba ari, iya betemu enggau paderi iya. Ku Bruni: “Paderi nya madahka Petara udah ngambi anak aku ke serega nyadi melikat. Pengudah ninga pasal utai tu, aku berasai asa agi. Aku begedika Petara laban Iya udah ngambi anak aku.” Betaun-taun Bruni berasai balat pedis ati sereta ringat. “Udah nya, aku betemu enggau seiku ari Saksi-Saksi Jehovah. Iya nunjukka ayat Bup Kudus ke madahka Jehovah enda ngambi Susanne ke serega nyadi melikat. Anak aku nadai ketegal mensia enda sempurna sereta sakit. Susanne benung tinduk dalam pemati. Lalu iya benung nganti maya Jehovah deka ngangkatka iya baru. Aku mega belajar, enda lama agi, dunya tu deka nyadi Paradais. Pengudah aku ngelala Jehovah enggau dalam agi sereta majak semak enggau iya, pemedis ba ati aku belubah-lubah lenyau.”—Masmur 37:29; Surat Kereja Rasul 24:15; Rome 5:12.

Kemayaharitu, bejuta iku orang benung merinsa. Bisi sekeda merinsa ketegal penanggul ba pengidup diri empu, perang ke nyadi, pemakai ti enda chukup, tauka pengerusak alam. Bruni bulih pengelantang ba ati pengudah iya meda saut ari Bup Kudus ke madahka Jehovah enda patut disalahka ketegal penanggul ke nyadi ba iya. Kebendar iya, semua penanggul ke ditapi kitai nunjukka kitai benung idup ba “hari ti penudi.” Enda lama agi, Petara deka muai semua penusah kitai lalu ngasuh pengidup kitai jemah ila manah agi.—2 Timoti 3:1-5; Matthew 24:7, 8.

Kelala Meh Petara

Suba, Hans enggau Bruni semina nemu Petara nya bisi. Tang sida enda entu ngelala iya. Pengudah sida bebendar deka ngelala Jehovah, sida bulih saut ngagai tanya ke kala ngasuh runding sida charut. Lalu tu meri sida pengelantang ba runding, sereta bisi utai ti manah ke dianti sida jemah ila. Bejuta iku orang bukai mega bisi peneleba ti sama.

Kena ngelala Jehovah enggau peneka Iya, nuan patut belajarka Bup Kudus. Orang Kristian abad keterubah mega ngereja utai ti sama. Luke nulis pasal eklisia Beria ba Gerika. Ku iya madahka: “Sida ransing amat nerima pesan Tuhan, sereta mansik Bup Kudus tiap hari keran deka nemu enti jaku nya amat tauka enda.”—Surat Kereja Rasul 17:10, 11.

Orang Kristian abad keterubah mega begulai nyembah Petara. (Surat Kereja Rasul 2:41, 42, 46; 1 Korint 1:1, 2; Galatia 1:1, 2; 2 Tesalonika 1:1) Kemayaharitu, Saksi-Saksi Jehovah mega ngereja utai ti sama. Nengah gempuru, nuan ulih majak semak ngagai Jehovah sereta bulih pengaga ba ati. Kelimpah ari nya, Saksi-Saksi Jehovah mega bebendar deka ngayanka kualiti Petara. Lebuh nuan begulai enggau sida, nuan deka ngelala agi kualiti manah Jehovah.—Hebrew 10:24, 25.

Endang amat mayuh pengawa patut dikereja ngambika ulih majak semak ngagai Petara. Tang enti kitai deka bulih asil ti manah ba pengidup kitai, kitai patut bebendar ngereja utai nya. Ambika chunto, ahli sukan mega patut bebendar belatih ngambika ulih menang. Atlit Prancis, Jean-Claude Killy ke kala menang pingat emas ba sukan Olympik madahka: “Nuan patut ngena 10 taun ngaga pelan sereta belatih. Nuan mega patut bebendar belatih ninting hari ba tubuh sereta ba runding.” Ketegal deka bulih siti pingat, mensia sanggup ngereja mayuh utai, anang agi enti kitai deka bulih pengidup ti meruan ba jemah ila! Pengawa kitai kena ngelala Jehovah tentu meri penguntung ti besai.

Tegapka Meh Kaul Nuan Enggau Petara

Kati nuan ngasaika pengidup nuan puang sereta nadai reti? Kati nuan bisi mayuh tanya ke enda ulih disaut mensia? Enti pia, bebendar meh ngelala Jehovah sereta belajarka Bup Kudus. Asil iya pengidup nuan deka nyadi manah sereta gaga agi belama iya.

Kebendar iya, proses ngelala Jehovah nadai pengujung. Enda ngira pengelama kitai udah ngelala Jehovah, tang bisi mayuh agi utai ke ulih dipelajarka kitai pasal iya. Enggau nya, kaul kitai enggau Petara deka nyadi majak semak lalu kitai tentu deka setuju enggau jaku rasul Paul: “Naka meh pemesai pengaya Petara! Naka meh pemintar enggau penalam penemu Iya! Nadai orang tetemuka atur enggau jalai Iya! ‘Laban sapa nemu runding Jehovah? Sapa ulih ngajar Iya?’ ”—Rome 11:33, 34.

[Nota Kaki]

[Blurb]

Bisi mayuh tanya pasal pengidup ke bedau agi disaut. Ambika chunto: ‘Nama kebuah kitai bisi? Nama tuju pengidup kitai? Nama deka nyadi ngagai kitai jemah ila?’

[Blurb]

“Pengudah aku ngelala Jehovah enggau dalam agi, sereta majak semak enggau Iya, pemedis ba ati aku belubah-lubah lenyau”

[Blurb]

“Nyembah Jehovah nya chara pengidup ti pemadu manah. Nadai utai lebih agi ngemuaska ati ari tu. Diatu pengidup aku bisi tuju”