Si Jehova—I Dios nga Mepangngo nga Ammuattam

EGGA kari ira i gannug nga importante nga napalampas mu ta pattolem? Siguradu nga egga nu baddi laman i ammum meyannung ta Dios. Ngatta? Megafu ta minillion ngana nga totolay i nabenefisiowan ta pattoleda ta pakannammuda ta Dios nga mabibbig ta Biblia. Insigida nga malawa yatun ira nga benefisio anna mannanayun yatun.

Ikaya na Autor na Biblia nga si Jehova nga Dios nga makilala tam yayya. Nitura na salmista: “Mammuan nakuan na totolay nga sikaw, nga mangngagan tu Jehova, sikaw laman i Katannangan ta interu nga davvun.” Ammu ni Jehova nga para ta pammakapianattam lagapa i pakannammu tam nisa. “Sakan si Jehova nga Dios mu, i manuttuddu nikaw tapenu mabenefisiowakka.” Kunnasi ittam nga mabenefisiowan ta pakannammu ta Katannangan nga Dios nga si Jehova?​—Salmo 83:18, NW; Isaias 48:17.

I tadday nga benefisio ay igiyana ittam ta pangarubang ta inaggaw ira nga problema, mangiyawa tu makasta nga iddanama ta mappange, anna memammo nga nono. Nu ammammu tam paga tu mapia si Jehova, mapaguyu ittam nga ulian i pagimamma tam ta importante ira nga pakkiavu nga meparubang ta totolay ta interu mundo. Anni ira yatun nga pakkiavu?

Egga Kari i Gakkag na Pattolem?

Maski nu dakal i napprogresowan na teknolohia, iyavu lagapa na totolay ta tiempo tam i importante ira nga pakkiavu: ‘Ngatta naparatu i totolay? Anni i mesimmu ta mappange? Anni i gakkag na pattolay?’ Nu ari nga malegan na tadday i fustu nga tabbag, arianna nga ammu i gakkag na pattolena. Aru kari nga totolay i makatageno tu kunnatun? Segun ta survey nga nakua ta Germany turi ta ultimu na dekada 1990, gaddua ta nakkiavutan ira i nakkagi nga gittana awan tu gakkag na pattoleda. Awayyana nga kunnatun gapa i situasion ta diannu.

Nu awan tu gakkag na pattolay, ari nga mappursigi i tadday nga maggawa tu personal nga addetan. Gafu ta awan tu gakkag na pattolay na aru, nattrabahu ira tu mapia anna nappariku. Ngem gittana egga lagapa i kurang ta pattoleda. Megafu ta awan tu gakkag na pattoleda, kayàda ngana i matay. Kunnatun i nesimmu ta tadday nga mabbing nga babay nga segun ta International Herald Tribune, “napadakal yayya nga mariku anna ma-influwensia.” Maski nu egga ngana nisa i ngamin, maraddam lagapa yayya anna matagenona nga gittana awan tu gakkag na pattolena. Nattuma yayya tu aru nga sleeping pills yatutta natay. Baka egga i ammammum nga kunnatun gapa i nesimmu nisa.

Naginnam kari ngana nga kakkagian na totolay nga ammu na siensia i ngamin meyannung ta pattolay? Kunnaw i kagian na linigguan nga pabbibbigan nga Die Woche na German: “Maski nu kurug i siensia, awan tu meyawana tu espiritual nga gannug. Ari nga klaro i teoria na ebolusion, anna ari gapa nga siguradu i pakanawag na quantum physics. Yaw ira nga pakanawag ay ari tu makeyawa tu banna-bannay anna seguridad.” Aru i nadiskubre ira ta siensia meyannung ta inango anna ta natural ira nga siklo anna proseso nga mammentena ta inango. Ngem maski nu kunnatun, ariadda makagi nu ngatta naparatu ittam anna nu anni i mesimmu ta mappange. Nu maddepende ittam laman ta siensia, ari nga matabbag i pakkiavu tam ira meyannung ta gakkag na pattolay. Megafu tatun, kinagi na diariu nga Süddeutsche Zeitung, “dakal i pakawagan para ta pangigiya.”

Egga paga kari i mas mepangngo nga mangigiya anne ta Namaratu? Megafu ta pinaratuna i totolay ta davvun, siguradu nga ammuna i gakkag na pattolay. Nipakanawag na Biblia nga pinaratu ni Jehova i totolay ira tapenu umaru ira anna tangngalladda i davvun. Ta ngamin nga kuadda, masingan nakuan nira i kualidad ira na Dios gittana hustisia, sirib, anna aya. Nu ammu tam i rason nu ngatta pinaratu ittam ni Jehova, ammu tam gapa i gakkag na pattoletam.​—Genesis 1:26-28.

Anni i Makuam?

Kunnasi nu ari paga natabbag i pakkiavu mu ira nga: ‘Ngatta naparatu i totolay? Anni i mesimmu ta mappange? Anni i gakkag na pattolay?’ Pagaramman naka na Biblia nga ammuan tu mapia si Jehova. Kinagi ni Jesus: “Yaw i inango nga adde ta ngangangay: i pakannammu da tu sikaw i tattadday nga kurug nga Dios, anna i pakannammu da gapa kani Jesu-Cristo nga zinog mu.” Mepagaram gapa nikaw nga kultibammu i nadiosan ira nga kualidad, mas ngana i aya, anna gakkag mu nakuan i mappasakup ta mappapange nga Mesianiko nga Pappatulan na Dios. Nu kunnatun i kuammu, mapeggakka tu gakkag ta pattolay, anna makakkasta nga iddanama ta mappange. Awayya gapa nga matabbag i importante ira nga pakkiavu mu.​—Juan 17:3; Eclesiastes 12:13.

Anni i efektona nu matabbag i importante ira nga pakkiavu mu? Kunnaw i kinagi ni Hans. * Ta nappasa, egga gapa i pangurug ni Hans ta Dios, ngem awan tu efektona yatun ta pattolena. Kakayàna i maddroga, imoral nga babbay, magangngua tu krimen, anna mammotorsiklo. Ngem kunna, “Awan tu kwenta na pattolay, anna ari nga makapagayayya.” Turi ta ma-25 i dagunna, naddesision yayya nga ammuan tu personal i Dios gukaban na paggigiammu tu Biblia. Turi ta nammammuna tu mapia si Jehova anna nalippawana i gakkag na pattolay, inulina i pattolena anna nabawtisowan yayya bilang tadday nga Saksi ni Jehova. Mafulu ragun ngana yayya nga egga ta ngamin-tiempo nga ministerio. Kinagina: “I passerbi kani Jehova i kapianan nga pattolay. Awan ngana tu mas mapia anne tatun. Napeggan tu gakkag i pattolè megafu ta pakannammù kani Jehova.”

Siempre, ari laman tu i gakkag na pattolay i pakavurungan na aru. Durante nga mas maggrabe i situasion na mundo, aru nga totolay i mavuru-vurung ta tadday paga nga importante nga pakkiavu.

Ngatta Nesimmu Yaw?

Nu egga i nesimmu nga marake, maruddu nga iyavu na biktima: Ngatta nesimmu yaw? Makoffun i fustu nga tabbag tatun nga pakkiavu tapenu maattamman i daddam. Nu awan tu malegan nga fustu nga tabbag, mattulu-tuloy nga makatageno tu daddam i biktima anna awayyana nga makkafi i nonona. Innattam i ekspiriensa ni Bruni.

“Piga ragun ngana i nappasa turi ta natay i ana ku nga babay,” kinagi na tadday nga yena nga si Bruni. “Mangurug ngà ta Dios, yatutta nappoffun ngà ta tadday nga pari. Kinagina niakan nga ina na Dios ta langi si Susanne tapenu mabbalin tu tadday nga anghel. Ari laman nga awan ngana tu sesserbi na pattolè megafu ta patay na ana ku, ngem ikalussaw ku gapa i Dios megafu ta inana yayya.” Piga ragun ngana i nappasa ngem matageno lagapa ni Bruni i taki anna daddam. “Tadday nga Saksi ni Jehova i nangipakanawag niakan gukaban na Biblia nga awan tu rason tapenu ikalussaw ku i Dios. Ari nga ina ni Jehova si Susanne ta langi, anna ari yayya nabbalin tu anghel. Megafu ta kina-imperfekto yatutta nattaki yayya. Kagittana nakkatrug laman si Susanne, anna iinnagganna nga paginnolayan yayya ni Jehova. Nagigiammù gapa nga naparatu i tolay tapenu mannanayun nga mattolay ta paraiso nga davvun, anna aranni ngana nga mesimmu yatun. Turi ta mas nakilalà si Jehova, mas naddukko ngà nisa, anna sisinu nga nawawan i taki nga mataga-tageno ku.”​—Salmo 37:29; Kingngua 24:15; Roma 5:12.

Aru i ara-arubangan na minillion nga totolay ira: trahedia, gerra, bisin, onu kalamidad ira. Nabanna-bannayan si Bruni turi ta nammuanna ta Biblia nga ari tu si Jehova i makalliwa ta marake ira nga mesissimmu. Ari nga ginakkag na Dios nga mazziga-riga i totolay ira, anna alsanna ta mappange i kinamarake. I umara-aru nga kinamarake i mangipasingan nga mattolay ittam ngana ta “pangurianan ira nga aggaw.” Aranni ngana duttal i iinnaggattam nga makasta ira nga mesimmu.​—2 Timoteo 3:1-5; Mateo 24:7, 8.

Ammuan i Dios

Dati, baddi laman i ammu ni Hans anna ni Bruni meyannung ta Dios. Mangurug ira nisa maski nu ariadda kuruga yayya nga ammammu. Nabenefisiowan ira ta pappursigida nga kilalan si Jehova. Naleradda i tabbag ta importante ira nga pakkiavu. Nabbalin tu memammo i nonoda anna napeggan ira tu makakkasta nga iddanama ta mappange. Kunnatun gapa i naekspiriensa na minillion ira nga massesserbi kani Jehova.

I paggigiammu ta Biblia i makoffun nittam nga makilala si Jehova, anna mammuan nu anni i ikiddona nittam. Kunnatun gapa i kiningngua na karuan ta ollu siglo. Kinagi na historiador anna doktor nga si Lucas meyannung ta Judio nga kongregasion ta Berea, Grecia, “nikakaya da i naggigginna ta uvovug na Dios. Gigiammuad-da ta kaggaggaw i Masanto nga Tura tapenu innad-da nu kurug” i kinagi ni Pablo anni Silas.​—Kingngua 17:10, 11.

Nattaradday i ollu-siglo Cristiano ira ta kongregasion ira. (Kingngua 2:41, 42, 46; 1 Corinto 1:1, 2; Galacia 1:1, 2; 2 Tesalonica 1:1) Kunnatun gapa ta kaggawattam. Mattaradday i kongregasion na Saksi ira ni Jehova ta study ira nga makoffun tapenu mas maddukko kani Jehova anna magayayya nga passerbian yayya. Aru paga i benefisio na pakikavulu ta Saksi ira ni Jehova. Megafu ta ikaguman nga parigan na totolay i Dios nga dayawadda, parigan gapa na Saksi ira ni Jehova i kualidad ira ni Jehova maski nu limitadu laman i makuada. I pakikavulu gafu ta Saksi ira ni Jehova i makoffun nittam tapenu mas makilala si Jehova.​—Hebreo 10:24, 25.

Ari kari tu gittana napakaru i mawag mu kuan tapenu mabbalin laman tu madukko ta tadday nga Persona? Talaga kawagan i pappursigi. Ari kari tu kunnatun gapa i mawag tam nga kuan nu egga i kayà tam nga addetan? Nonopammu ngana laman i pappursigi nga mawag nga kuan na tadday nga malalaki nga atleta tapenu massanay. Angngariganna, kinagi na taga-France nga si Jean-Claude Killy nga tadday nga gold medalist ta Olympic skiing meyannung ta nu kunnasi mabbalin tu malalaki ta kompetision ta internasional nga isport: “Mawag tu mapprepara tu 10 nga ragun nige natun anna mapplano tu piga ragun anna pannonopan yatun kada aggaw . . . Tanga-ragun nga usammu i nono anna i sikammu.” Kuadda ngamin yatun para ta kompetision nga awayyana magadde ta mafulu minuto laman! Mas ngana gafu i pappursigi tam nga kilalan si Jehova megafu ta mas dakal anna mas mabbayag i benefisiona nittam.

I Pakikkofun nga Mas Maddukko

Egga kari i maya nga mapalampasna i importante nga gannug ta pattolena? Awan. Yatutta nu matageno mu nga gittana awan tu gakkag na pattolem onu ikaya mu nga mammuan nu ngatta mesimmu i marake ira, determinadu ka nakuan nga ammuan si Jehova, i Dios nga nakagi ta Biblia. I paggigiammu meyannung nisa i mamakasta ta pattolem adde ta mannanayun.

Egga kari i pagaddetan na paggigiammu meyannung kani Jehova? Mappabbaw danuri nabayag ngana nga massesserbi nisa megafu ta nagigiammuda nisa dati, anna ta bagu ira nga magiggigiammuda meyannung nisa. I paggigiammu tatun ira i mamagayayya anna mas mamaddukko nittam nisa. Makagi tam nakuan gapa i kinagi ni apostol Pablo: “Ari nga matuku-tukug i inaggallallo na Dios! Ari nga magawa-gawa na tolay i appana-panono na, anna awan tu adde na pakannammu na! Sinni i makepakanawag ta appana-panono na? Sinni i makalippawa ta kuan na ira? Kunna kagian na Masanto nga Tura, ‘Sinni i makannammu ta nono na Yafu? Sinni i makawayya nga manabarang sa?’”—Roma 11:33, 34.

[Footnote]

[Blurb]

Iyavu lagapa na totolay i importante ira nga pakkiavu: ‘Ngatta naparatu i totolay? Anni i mesimmu ta mappange? Anni i gakkag na pattolay?’

[Blurb]

“Turi ta mas nakilalà si Jehova, mas naddukko ngà nisa”

[Blurb]

“I passerbi kani Jehova i kapianan nga pattolay. Awan ngana tu mas mapia anne tatun. Napeggan tu gakkag i pattolè megafu ta pakannammù kani Jehova”