Yehowa Gaw Chye Chyang Ging Ai Karai Re

NA A prat hta ahkyak ai lama ma hpe sum nga ai kun? Lama na nang gaw, Karai Kasang a lam kachyi mi sha chye ai nga yang, nang teng sha sum nga ai. Hpa majaw kun? Wan hku law ai masha ni chye wa sai hte maren, Chyum Laika a Madu Karai Kasang hpe chye chyang ai gaw grai akyu nga ai majaw re. Dai akyu ni hpe ya jang pyi hkamsha lu nna, htawm hpang du hkra matut na hkam la lu na re.

Chyum Laika a madu Yehowa Karai Kasang gaw, anhte hpe shi hte chye chyang shangun mayu ai. Shakawn Kungdawn sara gaw ndai hku ka wa ai: “Yehowa e, nang hte na a amying chyu sha, Ga ting hta e Tsaw Htum nga ai, shanhte chye mu ga.” Shi hpe chye chyang ai lam gaw anhte a matu akyu grai nga ai lam Yehowa chye ai. “Ngai gaw, na a akyu matu nang hpe sharin achyin ya nna, nang mai hkan ai lam hta nang hpe lakawn wa ai, na a Karai Kasang Yehowa rai nga nngai.” Tsaw htum Karai Yehowa hpe chye chyang ai kaw na anhte hpa akyu ni lu na kun?​—Shakawn 83:17; Esaia 48:17.

Grai hkrak ai akyu langai gaw, shani shagu hkrum nga ai manghkang ni hpe hparan na matu lam matsun lu la ai re. Htawm hpang a matu ngangkang ai myit mada lam hte myit simsa lam anhte lu la ai. Dai sha n-ga, Karai Kasang hpe hku hkau chye chyang wa ai majaw, dai ni mungkan masha ni san mayu nga ai ahkyak ai ga san ni hte seng nna, ningmu galai shai mat ai. Dai ga san ni gaw hpa ni kun?

Na A Prat Hta Yaw Shada Lam Nga Ai Kun?

Jak hpaji gaw mau na daram rawt jat nga tim, ahkyak ai ndai ga san ni hpe naw san nga ma ai: “Ngai ndai kaw hpa majaw du taw nga ai kun? Ngai gara lam de hkawm nga ai kun? Prat a yaw shada lam gaw hpa kun?” Myit dik lam lu shangun ai mahtai hpe n lu ai ni a prat hta jet ai yaw shada lam nga na n re. Dai ra kadawn nga ai lam hpe masha ni chye na ma ai kun? 1990 ning htum wa mahka hta, Jamani mungdan hta galaw wa ai sawk sagawn lam langai kaw san hkrum ai masha chyen mi gaw, chyahkring hkring (sh) kalang marang shanhte a prat hta yaw shada lam n nga ai ngu hkamsha ai ngu tsun dan ma ai. Nang nga ai shara hta mung dai zawn masa nga chye ai.

Prat hta yaw shada lam n nga ai wa gaw, bandung tawn na lam mung n nga ai. Masha law law gaw awng dang ai hpaga lam galaw ai, ja sut gan mahkawng ai hku na dai ra kadawn nga ai shara hta malai bang na matu shakut ma ai. Raitim, ra ra naw nga taw ai. Prat hta yaw shada lam n nga ai majaw, masha n kau gaw asak pyi n kam hkrung mat ai. Grai tsawm nna asak naw kaji ai num kasha langai dai zawn byin wa ai. International Herald Tribune shiga laika hku nga yang, dai num kasha gaw “grai lusu nna ahkaw ahkang law law lu” da ai prat hte nga kaba wa ai. Zing hkam sut rai ni hte nga wa tim, garen nna prat hta yaw shada lam n nga wa ai. Dai majaw yup tsi lu nna sat si mat ai. Dai zawn yawn hpa mabyin ni hte prat hpe jahtum kau ai kaga garen gari ai ni hpe mung nang chye yang chye na re.

Raitim, hpung tang hpaji gaw prat a lam hkum hkum tsup tsup chye shangun ai ngu, masha nkau tsun ai hpe nang na ga ai kun? German weekly Die Woche gaw ndai hku tsun ai: “Hpung tang hpaji gaw teng nga ai raitim, wenyi lam hta gaw ra kadawn ai. Sinda masa gaw tup hkrak n lu tsun ai sha, galai shai lam law ai kuntan hkrang jasat hpaji (quantum physics) pyi shalan shabran lam hte shimlum lam tsep kawp n lu jaw ai.” Hpung tang hpaji hte seng ai tam mu wa ai lam ni gaw, hkrang amyu myu nga ai hkrung mahkrung ni a lam law law tsun dan wa nna, asak matut hkrung lu shangun ai shingra tara shing wang masa hte byin masa ni hpe mung sanglang dan wa sai. Raitim, anhte ndai kaw hpa majaw du taw nga ai, gara lam de hkawm nga ai ngu ai hpe hpung tang hpaji du ni n sanglang dan lu ai. Hpung tang hpaji hpe sha tsep kawp kamhpa na nga yang, prat a yaw shada lam hte seng ai ga san ni a mahtai hpe lu la na n re. Süddeutsche Zeitung shi laika hta tsun da ai hte maren, akyu hku na gaw “lam matsun ni grai naw ra nga na re.”

Ra kadawn nga ai lam matsun ni hpe jaw na matu Hpan Da Madu htan grau htap htuk ai wa kadai naw nga na? Shi gaw shawng ningpawt kaw nna, shinggyim masha ni hpe ndai mungkan ntsa hta shara jahkrat da ya ai wa re ai majaw, shinggyim masha ni hpa majaw ndai shara hta nga taw ai hpe shi chye ai. Yehowa gaw masha hpe hpan nna ginding ga ntsa nga shangun nna, dai hpe lanu lahku shangun mayu ai lam Chyum Laika hta sanglang da ai. Shinggyim masha ni galaw ai lam yawng hta tara rap ra ai lam, nyan hpaji hte tsawra myit zawn re ai Karai Kasang a atsam ningja ni hpe madun na matu re. Anhte hpe Yehowa hpa majaw hpan da ai lam chye sai nga yang, anhte hpa majaw ndai shara hta nga taw ai hpe chye na re.​—Ningpawt 1:26-28.

Nang Hpa Galaw Lu Ai Kun?

‘Ngai ndai kaw hpa majaw du taw nga ai kun? Ngai gara lam de hkawm nga ai kun? Prat a yaw shada lam gaw hpa kun?’ ngu ai ga san ni a matu, myit dik shangun ai mahtai hpe n lu ga wa ai nga yang gaw gara hku kun? Rai yang, Yehowa hpe chye chyang wa hkra shakut na matu Chyum Laika hta hpaji jaw da ai. Yesu ndai hku tsun wa ai: “Htani htana asak ngu ai chyawm gaw, langai sha rai nga ai hte teng man re ai nang Karai Kasang hpe mung, nang shangun dat ai wa Yesu Hkristu hpe mung, shanhte chye chyang lu ai hpe, ngu ai, rai nga ai.” Dai hpang, Karai hte seng ai atsam ningja ni, grau nna gaw tsawra myit hpe shalat na matu hte du wa sana re ai Karai Kasang a Meshia Mungdan hta nga lu na matu, bandung tawn na matu n-gun jaw da ai. Rai yang, na a prat gaw lachyum nga wa na, htawm hpang hta mung grai kaja nna kam mai ai myit mada lam nga wa na re. Ya aten du hkra nang hpe myit shuk shangun ai ga san ni a mahtai hpe mung lu la shangun na re.​—Yawhan 17:3; Hpaji 12:13.

Dai gaw nang hpe kade daram akyu shabyin ya lu ai kun? Han gaw dai hte seng nna atsawm tsun dan lu ai wa re. * Han gaw lai wa sai shaning loi mi daram kaw nna Karai nga ai hpe kachyi mi gaw kam wa tim, dai makam masham gaw shi prat hkrun lam ntsa shingkang n ka-up wa ai. Shi gaw nanghpam tsi lang ai, akyang hten ai num ni hte kanawn ai, tara tawt lai ai lam ni galaw ai, mawdaw sengke hpung hte kanawn nna pyaw sha hkawm ai. “Raitim, nye prat gaw lachyum n rawng taw ai. Hpa myit dik ai lam mung n lu wa ai” ngu shi tsun dan ai. Asak 20 ning jan wa ai shaloi, Han gaw Karai Kasang hpe chye chyang wa na matu, Chyum Laika atsawm hti na ngu dawdan kau ai. Yehowa hpe atsawm chye wa nna prat a yaw shada lam hpe chye wa ai hte kalang ta, shi a prat hkrun lam hpe galai shai nna, Yehowa Sakse langai hku hkalup hkam la ai. Ya, shi aten hpring magam gun nga ai 10 ning hpring sai. “Yehowa a magam gun ai gaw kaja htum prat hkrun lam re. Hpa hte mung n lu shingdaw ai. Yehowa hpe chye chyang wa ai majaw, prat hta yaw shada lam nga sai” ngu shi asan sha tsun dan ai.

Masha law law myit lawm nga ma ai gaw prat a yaw shada lam langai sha n re. Mungkan a masa lam ni grau sawng wa ai hte maren, masha ni gaw kaga lam langai a majaw grau nna myit shuk nga ma ai.

Hpa Majaw Ndai Zawn Byin Taw Ai Kun?

Yakhkak jamjau ai lam ni ndum shami hkrum wa ai shaloi, ‘hpa majaw ndai zawn byin nga ai kun?’ ngu na hkrum sha nga ai wa chye mayu ai. Yakhkak jamjau ai lam hpe myit masa hku na hparan lu na matu, dai ga san a htap htuk ai mahtai nga da ra ai. Myit dik lam lu shangun ai mahtai n lu da yang, myit ru nga nna grau myit hkra machyi mat na re. Ga shadawn, Baru-ni a mahkrum madup hpe myit yu ga.

“Lai wa sai shaning loi mi hta, nye a kasha num kasha n nga mat ai. Karai Kasang hpe ngai kam ai majaw, anhte a ginra hta nga ai hpung up sara kaw sa nna shalan shabran lam sa tam ai. Zuzen-na hpe Karai Kasang gaw sumsing lamu de shaga mat nna, ya lamu kasa langai byin nga sai ngu shi tsun ai. Nye kasha n nga mat ai majaw, prat hten mat ai zawn hkamsha ai sha n-ga, Karai Kasang hpe mung grai n ju mat ai” ngu asak nau n kaba shi ai ma kanu langai re ai Baru-ni tsun dan ai. Baru-ni gaw shaning grai na hkra myit machyi nga nna jamjau hkrum wa ai. “Dai zawn hkamsha nga ai shaloi, Yehowa Sakse langai gaw Yehowa hpe ngai n ju na lam tsep kawp n nga ai lam Chyum Laika kaw na madun dan wa ai. Yehowa gaw Zuzen-na hpe sumsing lamu de shaga mat ai n re, lamu kasa byin nga ai mung n re ngu ai hpe chye wa ai. Shi hkamja lam n kaja ai gaw masha ni a n hkum tsup ai lam a majaw she re. Ya, si ai hta Zuzen-na yup pyaw nga nna shi hpe Yehowa jahkrung sharawt ya na aten hpe la nga ai re. Yehowa gaw masha hpe mungkan hparadisu hta htani htana nga na matu hpan wa ai rai nna, kade n na yang dai zawn byin wa sana ngu ai hpe ngai chye wa ai. Yehowa gaw kaning re ai Karai re ai hpe chye wa ai hte kalang ta shi hpang de sit sa wa ai majaw, nye a hkamsha lam ni mung angwi ngwi hkyem sa wa ai.”​—Shakawn 37:29; Kasa 24:15; Roma 5:12.

Tinang nan hkrum nga ai yawn hkyen lam, majan, lusha n grung ai, shingra tara tsin-yam zawn re ai yakhkak jamjau lam amyu myu hpe hkamsha nga ra ai masha ni wan hku nga ai. Yakhkak jamjau hkrum ai gaw Yehowa a majaw n re ai lam, shinggyim masha ni hpe hkra machyi shangun mayu ai wa n re ai lam hte kade n na yang, n hkru n kaja ai lam ni hpe jahtum kau ya sana lam Chyum Laika hta sanglang da ya ai lam ni hpe Baru-ni chye wa ai hte kalang ta myit hkyem sa wa ai. Nhkru n kaja ai lam ni grau nna law wa ai lam nan, ndai mungkan a ‘hpang jahtum na nhtoi ni’ hta anhte asak hkrung nga ai namik kumla langai re. Anhte yawng myit mada nga ai grai kaja ai hku galai shai wa na aten ni nga sai.​—2 Timohti 3:1-5; Mahte 24:7, 8.

Karai Kasang Hpe Chye Chyang Wa Ai Lam

Han hte Baru-ni gaw Karai Kasang a lam kachyi mi sha chye da ma ai. Karai Kasang a lam law law n chye da tim, shi hpe kam ai. Yehowa hpe tup hkrak tengman ai hku chye chyang wa na matu aten jaw nna hkaja ai shaloi, shanhte akyu hkamsha lu wa ai. Anhte a prat hte seng ai ahkyak ai ga san ni a htap htuk ai mahtai hpe shanhte lu wa ma ai. Dai majaw myit simsa lam lu la nna htawm hpang myit mada lam mung nga wa ai. Dai zawn mahkrum madup hpe wan hku law ai Yehowa a masha ni mung hkrum wa ma sai.

Yehowa hpe chye chyang wa na matu, Chyum Laika hpe atsawm hti sumru ai hku nna galaw hpang mai ai. Chyum Laika hta Yehowa a lam, anhte kaw na shi hpa hpyi shawn da ai lam tsun dan da ai. Tsa ban langai na masha nkau dai zawn galaw wa ma ai. Greece mundan, Beria mare hta nga ai Yuda nawku hpung masha ni gaw “dai mungga hta myit shawn loi ai hte, dai lam ni teng ai n teng ai chye lu hkra, Chyum laika hpe shani shagu a yu nga ma ai” ngu labau hpaji du hte tsi sara langai re ai Luka tsun wa ai.​—Kasa 17:10, 11.

Tsa ban langai na Hkristan ni gaw nawku hpung hta arau zuphpawng ai lam ni hpe mung galaw wa ma ai. (Kasa 2:41, 42, 46; 1 Korinhtu 1:1, 2; Galati 1:1, 2; 2 Htesaloni 1:1) Dai ni aten hta mung dai zawn sha re. Yehowa Sakse ni gaw Yehowa hpang sit sa na matu hte shi a magam gun ai kaw na kabu gara lam lu na matu laksan hku na lajang da ai zuphpawng ni hta nawku hpung ting hku nna arau zuphpawng ma ai. Buga hpung hta nga ai Sakse Hkam ni hte kanawn mazum ai lam kaw na kaga akyu langai mung naw lu ai. Masha ni gaw tinang nawku ai Karai hte angwi ngwi grau grau bung wa ai majaw, Yehowa Sakse ni mung Yehowa nan madun ai atsam ningja ni hpe, shadawn sharam sha raitim madun ma ai. Dai majaw Sakse Hkam ni hte rau zuphpawng ai gaw Yehowa hte grau chye chyang wa shangun ai.​—Hebre 10:24, 25.

Karai langai a lam hpe chye chyang wa na matu n-gun grau shadat ra na zawn rai taw ai kun? Kaja wa n-gun shadat ra na re. Raitim, nang galaw awng dang mayu ai lam ni yawng hpe dai zawn sha galaw ra na n re i! Mying gumhkawng ai ginsup ninghkrin langai byin na matu, n-gun shadat nna shaman shakyang wa ai lam hpe myit yu u. Ga shadawn, Pyintit mungdan Olampik hkyen bum ntsa skate jawn ninghkrin rai nna ja dazit lu da ai wa Zen-Kalawt Kili gaw, awng dang lam lu ai mundan ga daga ginsup shingjawng ai wa langai byin na matu shi galaw wa ai lam yawng hpe ndai hku tsun dan ai: “Shing jawng poi garai n shang shi yang 10 ning tau hkrau nna shaning hku, shani shagu dai hpe sha myit nna lajang nga ra ai . . . laning mi na 365 ya ting, myit hte hkumhkrang mahkra galaw ra ai bungli re.” Minit 10 sha na ai shingjawng poi langai hta shang shingjawng na matu, nga manga aten hte n-gun atsam jaw kau ra ai. Yehowa hpe chye wa ai majaw lu la na awng dang lam gaw grau nna pyi agrin nga na re.

Grau Nna Chye Chyang Wa Ai Hku Hkau Lam

Prat hta grau ahkyak ai lama ma hpe kadai asum hkam mayu ai kun? Kadai nga na n re. Rai yang, na a prat hta jet ai yaw shada lam n nga ai ngu hkamsha na re. Shing n rai, yakhkak jamjau ai lam ni hpe hpa majaw n dum shami du wa ai ngu ai hpe chye mayu yang Chyum Laika a Madu Karai Kasang Yehowa hpe chye chyang wa na matu dawdan u. Shi hpe nang chye chyang yang na a prat grau grau nna kaja wa na re.

Yehowa a lam n sharin la ra sana aten nga na kun? Yehowa a magam hpe shaning hku gun hpai wa ai ni gaw, Yehowa a lam shanhte chye wa ai lam ni hte matut nna naw chye wa ai lam nnan ni a majaw naw mau nga ma ai. Dai zawn chye wa ai lam ni gaw anhte hpe ngwi pyaw shangun nna, shi hte grau nna nihtep wa shangun ai. “Karai Kasang a n taw n tsang ai hpaji byeng-ya hte chye chyang ai myit gaw, gade wa sung nga a hka! kadai n sawk ya lu ai shi a jeyang ai hku, kadai n gawn ya lu ai shi a ningsang magam lam ni gaw, mau n ma rai nga ai. Kaning rai nme law, dai Madu Du a myit hpe kadai dang chye a ta? shi hte bawng ai baw mung kadai wa rai nga a ta?” ngu ka wa ai kasa Pawlu a myit jasat hpe anhte mung myit hkrum na re.​—Roma 11:33, 34.

[Lawu Matsing]

[Kadun dawk]

Masha ni gaw, ‘Ngai ndai kaw hpa majaw du taw nga ai kun? Ngai gara lam de hkawm nga ai kun? Prat a yaw shada lam gaw hpa kun?’ ngu ai ga san ni hpe naw san nga ding yang re

[Kadun dawk]

“Yehowa gaw kaning re ai Karai re ai hpe chye wa ai hte kalang ta shi hpang de sit sa wa ai”

[Kadun dawk]

“Yehowa a magam gun ai gaw kaja htum prat hkrun lam re. Hpa hte mung n lu shingdaw ai. Yehowa hpe chye chyang wa ai majaw, prat hta yaw shada lam nga sai”