Jehova oKalunga oo atushe twa pumbwa okushiiva

MBELA ope na oshinima shimwe sha fimana osho u wete sha kambela monghalamwenyo yoye? Ngeenge ou shii ashike kanini kombinga yaKalunga, osha yela kutya ope na sha osho sha kambela monghalamwenyo yoye. Omolwashike hatu tile ngaho? Omolwaashi ovanhu omamiliyona ova mona kutya okushiiva kombinga yaKalunga, oo a popiwa mOmbiibeli, ohashi eta omauwa mahapu monghalamwenyo. Omunhu oha mono omauwa diva, nomauwa oo otaa kalelele.

Jehova Kalunga, Omushangi wOmbiibeli, okwa hala tu mu shiive. Omupsalme okwa shanga a ti: “Vo va kale, ve shi koneka, nokutya Oove ou to ifanwa Omwene, Ove auke u li po Okombadambada medu alishe.” Okwa didilika kutya otashi ke tu etela ouwa, ngeenge otwa shiiva Kalunga. “Aame Omwene Kalunga koye, ou handi ku longo eshi tashi ku wapalele.” Ongahelipi hatu dulu okumona ouwa mokushiiva Jehova Kalunga, Omukombadambada? — Epsalme 83:18; Jesaja 48:17.

Omauwa amwe oo hatu mono ongaashi ewiliko, opo tu dule okutaalela omaupyakadi oo hatu shakeneke efiku keshe, okukala tu na eteelelo la twa li na sha nonakwiiwa nosho yo ombili yopamadiladilo. Shikwao vali, okukala tu shii nawa Jehova ohashi tu kwafele tu kale tu na etaleko la yooloka ko kwaalo ovanhu vahapu ve na li na sha neenghalo. Eenghalo odo odilipi?

Mbela onghalamwenyo yoye oi na ngoo eityo?

Nonande outeknologi owa xuma komesho neenghono, ovanhu kunena onghee ngoo tava pula omapulo a fimanenena ngaashi: ‘Omolwashike ndi li momwenyo? Onda finda peni? Elalakano longhalamwenyo olashike naanaa?’ Ngeenge omunhu okwa kala i na mona omanyamukulo taa mbilipaleke komapulo oo, onghalamwenyo yaye ihai kala i na eityo. Mbela ovanhu vahapu ohava didilike ngoo oupyakadi oo? Omakonakono, oo a li a ningwa moGermany mo 1990 nasha, okwa ulika kutya etata laavo va li va pulwapulwa, omafimbo amwe ohava kala ve udite kutya onghalamwenyo kai na naanaa eityo lasha. Otashi dulika ovanhu vamwe moshitukulwa sheni navo osho hava kala ve udite ngaho.

Ngeenge onghalamwenyo yomunhu oya kala ihe na eityo, otashi ka kala shidjuu kuye okulitulila po omalalakano. Ovanhu vahapu ohava kendabala okukandula po oupyakadi oo mokulalakanena omaifano taa ti sha, ile okulikongela omaliko. Ashike lwanima ohava ka didilika kutya oupyakadi oo inau dja po. Okukala nonghalamwenyo ihe na eityo ohashi wilile po ovanhu neenghono, fiyo oposhitwa opo omunhu ina hala vali okukala nomwenyo. Osho osha li sha ningilwa omukainhu umwe omunyasha, oo a popiwa moshifo sho-International Herald Tribune, kutya okwa “kulila moukwaneumbo wa punapala nokwa li e na keshe osho a pumbwa.” Nonande okwa li e na onghalamwenyo youdjeko, okwa li ha kala a fya oudja nokwa li e udite kutya onghalamwenyo yaye kai na eityo. Okwa li a nwa eepela dokukofifa nokwe ke lituwa a fya. Otashi dulika u shii vamwe ovo onghalamwenyo yavo ya xula monghedi ya tya ngaho.

Mbela owa uda nale ovanhu tava popi kutya ounongononi otau dulu oku tu lombwela ashishe osho twa pumbwa okushiiva kombinga yonghalamwenyo? Oshifo shomoGermany Die Woche osha ti: “Nonande ounongononi ohau popi oinima i li paushili, owa dopa ngeenge tashi uya poinima yopamhepo nosho yo yopaenghedi. Ehongo loevolusi itali monika tali eta po sha, nokuli nokunongonona oinima, oko luhapu kwa kwatela mo okumbeleka, inaku ningifa ovanhu va kale tava hafele onghalamwenyo ve li meameno.” Ovanongononi ova kendabala okuyelifa kombinga yoinima i lili noku lili oyo i na omwenyo nosho yo oinima ngaashi edingonoko lomeva, ile omhepo, nanghee oinima imwe hai longo, opo i kaleke po omwenyo. Ashike nande ongaho, ounongononi owa dopa oku tu lombwela kutya omolwashike tu na omwenyo nosho yo kutya otwa finda peni. Ngeenge otwa kala ashike twe lineekela moinima i na sha nounongononi, itatu ka mona omanyamukulo komapulo etu e na sha neityo longhalamwenyo. Ongaashi ashike sha popiwa koshifo sho-Süddeutsche Zeitung osho sha ti, “ovanhu ova pumbwa ewiliko filufilu.”

Mbela olyelye vali ta dulu okuyandja ewiliko la denga mbada ehe fi Omushiti? Molwaashi oye a shitila ovanhu kombada yedu, oku na okukala e shii kutya omolwashike ve na omwenyo. Ombiibeli oya popya kutya Jehova okwa shita ovanhu, opo va yadeke edu nokulifila oshisho. Ovanhu ova li va pumbwa okuhopaenena omaukwatya aye ngaashi ouyuki, ounongo nosho yo ohole mukeshe osho tava ningi. Shimha twa udu ko kutya omolwashike Jehova e tu shita, otashi ke tu kwafela tu mone kutya omolwashike tu li kombada yedu. — Genesis 1:26-28.

Oshike to dulu okuninga po?

Ongahelipi ngeenge ino mona omanyamukulo taa mbilipaleke komapulo ngaashi: ‘Omolwashike ndi na omwenyo? Onda finda peni? Eityo longhalamwenyo olashike?’ Ombiibeli otai ku ladipike u shiive nawanawa Jehova. Nokuli naJesus okwa ti: “Opo ovanhu va ka mone omwenyo waalushe, ove na okushiiva kutya oove auke Kalunga kashili naau wa tuma, Jesus Kristus.” Ombiibeli otai ku ladipike yo u kulike omaukwatya opakalunga, unene tuu ohole, noku shi ninga elalakano u ka kale koshi yOuhamba waKalunga wopaMessias. Kungaho opo ashike to ka dula okukala nonghalamwenyo i na eityo nosho yo onakwiiwa ya amenwa. Oto ka mona yo omanyamukulo omapulo aeshe a fimana oo wa kala nokulipula. — Johannes 17:3; Omuudifi 12:13.

Otashi ke ku kuma ngahelipi, ngeenge owa mono omanyamukulo komapulo aeshe oo wa kala u na? Hans oku shii oku shi pulwa. * Okwa kala ngoo a itavela kutya Kalunga oko e li, ashike eitavelo laye inali mu linyengifa a katuke eenghatu diwa monghalamwenyo yaye. Okwa kala ha hafele oinima ngaashi okushila oingangamifi, eembwada, okulonga ominyonena nokushinga eemota. Okwa ti: “Onghalamwenyo yange kaya li i na eityo lasha nokanda li nda hafa.” Eshi Hans a li e na omido 20 nasha, okwa li a tokola okushiiva nawa Kalunga mokulesha Ombiibeli noukeka. Eshi a shiiva Jehova nawanawa, okwa li a hovela okuuda ko eityo longhalamwenyo, a lundulula onghalamwenyo yaye nokwa ninginifwa e li Ondombwedi yaJehova. Okwa kala moilonga yefimbo li yadi yokuudifa oule weedula omulongo da pita. Okwa popya a ti: “Okulongela Jehova oko onghedi ya denga mbada monghalamwenyo. Kape na osho tashi dulu okuyelekwa nasho. Eshi nda shiiva Jehova, osha kwafela nge ndi kale ndi na elalakano monghalamwenyo.”

Ovanhu vahapu kave na ashike omalimbililo e na sha neityo longhalamwenyo. Eshi eenghalo dounyuni tadi ende nokunaipala, ovanhu onghee ngoo tava hangwa komalipulo amwe vali.

Omolwashike sha ningilwa?

Ngeenge pa holoka oshiponga, luhapu ovo va ninga oihakanwa ohave lipula kutya: Omolwashike sha ningilwa? Opo omunhu a dule okulididimikila ouyehame oo wa etifwa koshiponga osho sha holoka po, konyala oshe likolelela kokumona enyamukulo tali mbilipaleke kepulo olo. Ngeenge nakuninga oshihakanwa ina mona enyamukulo tali mbilipaleke, oha kala a wililwa po neenghono nokwa nyemata. Pashihopaenenwa, natu ka tale osho sha ningilwa Bruni.

Okwa ti: “Omido da ya onda filwa okamonakadona kange. Molwaashi onda li nda itavela muKalunga, onda li nda ka konga ehekeleko komufita. Okwa lombwela nge kutya Kalunga okwa kufa po okamonakadona kange Susanne, e ka twala meulu, nopaife oke li okaengeli. Kanda li ashike nda wililwa po kefyo lokamonakadona kange, ndele onda li yo nda handukila Kalunga eshi e ka kufa po.” Bruni okwa kala mouyahame nomoluhodi oule womido dihapu. Okwa weda ko a ti: “Opo nee onda li nda ulikilwa kuumwe womEendombwedi daJehova mOmbiibeli kutya kandi na etomheno lokuhandukila Kalunga. Jehova ina twala okamonakadona kange Susanne meulu, nokake li okaengeli. Ouyehame wako owa li oshidjemo shokuhawanenena kwovanhu. Susanne okwa kofa mefyo nokwa teelela Jehova e mu nyumune. Onde lihonga yo kutya Kalunga okwa ninga omalongekido opo ovanhu va ka kale moparadisa kombada yedu, naasho oshi li poku ka ningwa. Eshi nda hovela okuuda ko kutya Jehova omunhu naanaa a tya ngahelipi, onda hovela okweehena popepi naye. Ouyehame noluhodi lange oya hovela okushuna pedu.” — Epsalme 37:29; Oilonga 24:15; Ovaroma 5:12.

Ovanhu vahapu ova wililwa po komaudjuu monghedi yonhumba, ile yongadi, ngaashi: omaupyakadi opaumwene, oita, ondjala nosho yo oiponga yopaushitwe. Bruni okwa li e udite a hekelekwa eshi e lihonga mOmbiibeli kutya Jehova haye e na okupewa ombedi omolwomaudjuu oo hae tu hange, nonokutya kashi fi elalakano laye ovanhu va kale tava mono oixuna; navali ota ka xulifa po okumona oixuna akushe. Naashi owii tau ende tau naipala, oshi li oumbangi kutya otu li “momafiku axuuninwa” ounyuni ou. — 2 Timoteus 3:1-5; Mateus 24:7, 8.

Shiiva Kalunga

Hans naBruni ova li ve na omataleko a yoolokafana e na sha naKalunga. Ova li va itavela muye, ashike kava li ve shii shihapu kombinga yaye. Ndele eshi va katuka eenghatu opo va shiive Jehova nawanawa, osha li she va etela ouwa. Ova li va mona omanyamukulo komapulo oo a fimanenena kunena. Osha li she va pa ombili yopamadiladilo nosho yo eteelelo la twa li na sha nonakwiiwa. Ovapiya vaJehova vahapu ove na onakwiiwa ya fela oko.

Okushiiva Jehova ohashi pula omunhu a konakone Ombiibeli, oyo tai tu lombwele kombinga yaye naasho a hala tu ninge. Osho osho vamwe va li va ninga mefelemudo lotete. Omunandjokonona nomupangi Lukas okwa popya kutya oilyo yeongalo lOshijuda muBerea nomuGreka oya li ya “tambula ko eendjovo daKalunga [okudja kuPaulus naSilas] nomutima aushe, nove di konakona noukeka efiku keshe va tale ngeenge osho va lombwelwa oshoshili tuu.” — Oilonga 17:10, 11.

Ovakriste vomefelemudo lotete navo ova li hava ongala pamwe momaongalo. (Oilonga 2:41, 42, 46; 1 Ovakorinto 1:1, 2; Ovagalati 1:1, 2; 2 Ovatessaloniki 1:1) Osho ohashi ningwa yo nokunena. Omaongalo Eendombwedi daJehova ohaa ongala pamwe nelalakano lokukwafela oohandimwe va ehene elela popepi naJehova nova mone ehafo eshi tave mu longele. Okweendafana novaitaveli vakwetu ohashi eta yo ouwa umwe vali. Nomokweendela ko kwefimbo, ovanhu ohava hovele okuulika omaukwatya a fa aKalunga oo hava longele; nEendombwedi daJehova ohadi ulike naanaa omaukwatya oo haa ulikwa kuJehova. Onghee hano, okweendafana nEendombwedi daJehova oshe tu kwafela tu shiive Jehova nawanawa. — Ovaheberi 10:24, 25.

Mbela otashi monika sha fa tashi pula eenghendabala opo u dule okushiiva Kalunga? Oshoshili kutya owa pumbwa okukatuka eenghatu. Ngaashi ashike ho ningi opo u dule okuhanga, ile u wanife po oinima imwe monghalamwenyo. Diladila ashike keenghendabala odo omutondoki ha ningi, ngeenge te lideula. Pashihopaenenwa, Jean-Claude Killy, oo e li enyakwa moudano wokungongola mo-snow, okwa popya shi na sha neenghendabala odo omunhu ha ningi, opo a kale enyakwa moudano oo, a ti: “Fimbo ku na eedula 10 oudano oo u hovele, ou na okuliunganeka nawa omudo keshe nokukala ho diladila kombinga yao efiku keshe; sha hala okutya, odula aishe to lideula pamadiladilo nopalutu omafiku 365.” Efimbo alishe olo wa kala to longifa nosho yo eenghendabala odo wa ninga, oto ke i longifa ashike mefiyafanepo olo tali ka kwata oule wominute omulongo lwaapo! Mbela oto diladila kutya otashi pula efimbo neenghendabala di fike peni opo u shiive Jehova nawanawa?

Ekwatafano olo hali ende tali kolo

Olyelye mbela a hala okupitililwa po koshinima osho sha fimanenena monghalamwenyo? Nande oumwe. Onghee hano, ngeenge owa didilike kutya monghalamwenyo yoye omwa kambela sha, ile wa halelela okushiiva kutya omolwashike monghalamwenyo mu yadi omaupyakadi, ninga eenghendabala u shiive Jehova, Kalunga oo a popiwa mOmbiibeli. Ngeenge owe mu shiiva, otashi ka xwepopaleka onghalamwenyo yoye fiyo alushe.

Mbela ope na ngoo fiku tu ka mane okulihonga kombinga yaJehova? Ovo va kala tava longele Jehova oule womido, onghee ngoo hava kala va kuminwa oinima oyo ve lihonga kombinga yaye nosho yo imwe ipe oyo tave lihongo kombinga yaye natango. Okulihonga oinima ya tya ngaho ohashi tu etele ehafo nohashi tu ehenifa popepi elela naye. Onghee hano, atusheni natu kaleni metwokumwe neendjovo domuyapostoli Paulus, odo tadi di: “Oupuna, ounongo neshiivo laKalunga oi fike peni! Kape na oo ta dulu okuuda ko omatokolo neendjila daye. ‘Olyelye ta dulu okushiiva omadiladilo aJehova, ile olyelye ta dulu oku mu pa omayele?’” — Ovaroma 11:33, 34.

[Omashangelo opedu]

 [Ouyelele u li pepandja 5]

Ovanhu onghee ngoo tave lipula omapulo ngaashi: ‘Omolwashike ndi li kombada yedu? Onda finda peni? Eityo longhalamwenyo olashike naanaa?’

 [Ouyelele u li pepandja 6]

“Eshi nda hovela okuuda ko kutya Jehova omunhu naanaa a tya ngahelipi, onda hovela okweehena popepi elela naye”

 [Ouyelele u li pepandja 7]

“Okulongela Jehova oko onghedi ya denga mbada monghalamwenyo. Kape na osho tashi dulu okuyelekwa nasho. Eshi nda shiiva Jehova, osha kwafela nge ndi kale ndi na elalakano monghalamwenyo”