ယေဟောဝါ—သိကျွမ်းထိုက်သည့်ဘုရားသခင်
ယေဟောဝါ—သိကျွမ်းထိုက်သည့်ဘုရားသခင်
သင့်ဘဝတွင် အရေးကြီးသောအရာတစ်ခုခု လက်လွတ်ဆုံးရှုံးနေပါသလော။ အကယ်၍ သင်သည် ဘုရားသခင်အကြောင်း အနည်းအကျဉ်းသာသိလျှင် သင်အမှန်တကယ် လက်လွတ်ဆုံးရှုံးနေပြီ။ အဘယ်ကြောင့်နည်း။ အကြောင်းမူကား လူသန်းပေါင်းများစွာ သိရှိခဲ့ကြသည့်အတိုင်း သမ္မာကျမ်းစာ၏ဘုရားသခင်ကို သိကျွမ်းခြင်းသည် အကျိုးအလွန်ကြီးလှ၏။ ဤအကျိုးကျေးဇူးများကို ယခုချက်ချင်းပင် ခံစားရပြီး နောင်အနာဂတ်အထိ ဆက်၍ခံစားရမည်ဖြစ်သည်။
သမ္မာကျမ်းစာ၏အာဘော်ရှင်၊ ယေဟောဝါဘုရားသခင်သည် ကျွန်ုပ်တို့ကို ကိုယ်တော်အား သိကျွမ်းစေလိုသည်။ ဆာလံဆရာက ဤသို့ရေးသားခဲ့သည်– “ထာဝရဘုရား [“ယေဟောဝါ၊” ကဘ] ဟူ၍ နာမတော်ရှိသော ကိုယ်တော်တစ်ပါးတည်းသာလျှင် မြေကြီးတစ်ပြင်လုံးအပေါ်မှာ အမြင့်ဆုံးသောဘုရား [သခင်] ဖြစ်တော်မူကြောင်းကို သိကြပါစေသော။” ကိုယ်တော်အားသိကျွမ်းခြင်းသည် ကျွန်ုပ်တို့အတွက် အကျိုးကြီးကြောင်း ကိုယ်တော်အသိအမှတ်ပြုသည်။ “ငါ [“ယေဟောဝါ၊” ကဘ] သည် သင်၏အကျိုးနှင့်ယှဉ်သောအရာကိုသွန်သင် . . . သော သင်၏ဘုရားသခင် ထာဝရဘုရားဖြစ်၏။” အကြီးမြတ်ဆုံးအရှင်၊ ယေဟောဝါဘုရားသခင်အား သိကျွမ်းခြင်းမှ ကျွန်ုပ်တို့ အဘယ်အကျိုးကျေးဇူး ခံစားကြရမည်နည်း။—ဆာလံ ၈၃:၁၈; ဟေရှာယ ၄၈:၁၇။
အမှန်ပင်ကြီးမားသော အကျိုးကျေးဇူးတစ်ခုမှာ နေ့စဉ်နှင့်အမျှ ကြုံတွေ့နေရသည့် ပြဿနာများကို ကိုင်တွယ်ဖြေရှင်းရန် လမ်းညွှန်မှုရသည်၊ အနာဂတ်အတွက် ခိုင်မြဲသောမျှော်လင့်ချက်နှင့် စိတ်ငြိမ်သက်မှုတို့ကိုလည်း ကျွန်ုပ်တို့ရရှိကြသည်။ ထို့အပြင်၊ ယေဟောဝါကို တရင်းတနှီးသိကျွမ်းလာသည့်အတွက် ယနေ့ ကမ္ဘာနှင့်အဝန်း လူတို့ကြုံတွေ့နေရသော အရေးပါအရာရောက်ဆုံး အရေးကိစ္စများအပေါ် သဘောထားပြောင်းလဲစေသည်။ ထိုအရေးကိစ္စများကား အဘယ်နည်း။
သင့်ဘဝတွင် ရည်ရွယ်ချက်ရှိသလော
စက်မှုနည်းပညာဘက်တွင် အံ့သြဖွယ်ကောင်းလောက်အောင် တိုးတက်နေသော်လည်း ယနေ့ ဤအခြေခံကျသော မေးခွန်းများကို လူတို့မေးမြန်းနေကြဆဲပင်– ‘ကျွန်ုပ် အဘယ်ကြောင့် ဤနေရာတွင် ရောက်ရှိနေရသနည်း။ ကျွန်ုပ် အဘယ်အရပ်သို့ ဦးတည်သွားနေသနည်း။ ဘဝ၏ရည်ရွယ်ချက်ကား အဘယ်နည်း။’ ကျေနပ်လောက်သော အဖြေများမရရှိသူ၏ဘဝတွင် စစ်မှန်သောရည်ရွယ်ချက်ရှိလိမ့်မည်မဟုတ်ပေ။ ဤလိုအပ်ချက်ကို လူတို့ သဘောပေါက်ကြပါသလော။ ၁၉၉၀ ပြည့်လွန်နှစ်များအကုန်ပိုင်းတွင် ဂျာမနီနိုင်ငံ၌ ပြုလုပ်ခဲ့သည့် လေ့လာချက်တစ်ခုက မေးမြန်းခံရသူတစ်ဝက်သည် သူတို့ဘဝတွင် ရည်ရွယ်ချက်ရှိပုံမရကြောင်း မကြာခဏ သို့မဟုတ် တစ်ခါတစ်ရံ ခံစားမိကြသည်ဟု ဖော်ပြခဲ့၏။ သင်နေထိုင်သည့်ဒေသတွင်လည်း အလားတူအခြေအနေမျိုး ရှိနေနိုင်သည်။
ဘဝတွင် ရည်ရွယ်ချက်မရှိသူသည် ကိုယ်ပိုင်ပန်းတိုင်များထားရန် အခြေခံမရှိချေ။ လူအများသည် အောင်မြင်မှုရှိလုပ်ငန်းတစ်ခုလုပ်ခြင်း၊ စည်းစိမ်ဥစ္စာစုဆောင်းခြင်းအားဖြင့် ဤလိုအပ်ရာကို အစားထိုးဖို့ ကြိုးစားကြသည်။ သို့တိုင်၊ ဟာတာတာဖြစ်နေဆဲပင်။ ဘဝတွင် ရည်ရွယ်ချက်မရှိသည့်အတွက် လူအချို့သည် အသက်ပင်မရှင်လိုတော့ချေ။ ငယ်ရွယ်သည့်အလှပဂေးတစ်ဦး ထိုသို့ဖြစ်ခဲ့သည်၊ နိုင်ငံတကာ သံတော်ဆင့်သတင်းစာအရ ဤမိန်းကလေးသည် “ငွေပုံပေါ်ထိုင်ပြီး အခွင့်အရေးများစွာရ” သည့်ဘဝမျိုးတွင် ကြီးပြင်းလာခဲ့၏။ သူသည် စည်းစိမ်ရှိရှိနေထိုင်ခဲ့ရသော်လည်း အထီးကျန်ပြီး ဘဝတွင် ရည်ရွယ်ချက်မဲ့နေခဲ့သည်။ ထိုအခါ သူသည် အိပ်ဆေးသောက်ပြီး သေဆုံးသွားလေသည်။ ဤသို့သောဝမ်းနည်းဖွယ်အဖြစ်ဆိုးဖြင့် ဘဝကို အဆုံးတိုင်စေခဲ့သည့် အခြားအထီးကျန်သူများကိုလည်း သင်သိကောင်းသိပေမည်။
သို့သော် သိပ္ပံပညာသည် ဘဝအကြောင်း အပြည့်အစုံသိရှိစေနိုင်သည်ဟု လူအချို့ဆိုသည်ကို သင်ကြားဖူးပါသလော။ ဂျာမန် ပတ်စဉ်သတင်း ဒီ ဗော်ခါက ဤသို့ထောက်ပြသည်– “သိပ္ပံပညာသည် မှန်ကန်နေမည်ဖြစ်သော်လည်း ဝိညာဉ်ရေးအရမူ ချို့တဲ့သည်။ ဆင့်ကဲသီအိုရီသည်
မပီပြင်ဘဲ တပ်အပ်မပြောနိုင်၊ အပြောင်းအလဲများသော ကွမ်တမ်ရူပဗေဒပင်လျှင် နှစ်သိမ့်မှုနှင့် လုံခြုံမှု လုံးဝမပေးချေ။” သိပ္ပံပညာဆိုင်ရာ ရှာဖွေတွေ့ရှိချက်များသည် ပုံစံအမျိုးမျိုးရှိ သက်ရှိအကြောင်း များစွာဖော်ပြ၍ အသက်ဆက်စေသည့် သံသရာစနစ်များနှင့် လည်ပတ်စဉ်များကိုလည်း ရှင်းပြပေးခဲ့ပြီ။ သို့တိုင်၊ ကျွန်ုပ်တို့ အဘယ်ကြောင့် ဤတွင်ရောက်ရှိနေရသည်၊ အဘယ်သို့ဦးတည်နေသည်ကို သိပ္ပံပညာက မရှင်းပြနိုင်ပေ။ သိပ္ပံပညာကိုသာ လုံးလုံးမှီခိုအားထားမည်ဆိုလျှင် ဘဝ၏ရည်ရွယ်ချက်နှင့်ပတ်သက်သည့် မေးခွန်းများအတွက် အဖြေရမည်မဟုတ်ချေ။ ဆူးအက် ဒူးအိခ်ျ ဇီတန် သတင်းစာအစီရင်ခံသည့်အတိုင်း အကျိုးရလဒ်မှာ “လမ်းညွှန်မှု လွန်စွာလိုအပ်နေပေလိမ့်မည်” ဖြစ်သည်။လိုအပ်သည့်လမ်းညွှန်မှုကိုပေးရန် ဖန်ဆင်းရှင်ထက်သာသူ မည်သူရှိမည်နည်း။ ကိုယ်တော်သည် လူသားတို့ကို ဤကမ္ဘာမြေကြီးပေါ်တွင် အစကတည်းက နေရာချပေးထားရာ သူတို့ အဘယ်ကြောင့် ဤတွင်တည်ရှိရကြောင်းကို ကိုယ်တော်သိထားပေမည်။ ယေဟောဝါသည် လူကိုဖန်ဆင်းပြီး ကမ္ဘာမြေကြီးပေါ်နေထိုင်စေကာ ယင်းကိုကြည့်ရှုစောင့်ရှောက်စေလိုကြောင်း သမ္မာကျမ်းစာကရှင်းပြသည်။ လူသားတို့လုပ်ဆောင်လေသမျှတွင် တရားမျှတမှု၊ ဉာဏ်ပညာနှင့် ချစ်ခြင်းမေတ္တာ အစရှိသည့် ကိုယ်တော်၏အရည်အသွေးများကို ရောင်ပြန်ဟပ်ကြဖို့ဖြစ်သည်။ ကျွန်ုပ်တို့ကို ယေဟောဝါအဘယ်ကြောင့်ဖန်ဆင်းရကြောင်း ကျွန်ုပ်တို့သိပြီဆိုလျှင် ဤနေရာတွင် ကျွန်ုပ်တို့အဘယ်ကြောင့်ရှိနေကြောင်းကို သိကြရပြီ။—ကမ္ဘာဦး ၁:၂၆-၂၈။
သင်အဘယ်အရာပြုလုပ်နိုင်သနည်း
‘ကျွန်ုပ် အဘယ်ကြောင့် ဤနေရာတွင် ရောက်ရှိနေရသနည်း။ ကျွန်ုပ် အဘယ်အရပ်သို့ ဦးတည်သွားနေသနည်း။ ဘဝ၏ရည်ရွယ်ချက်ကား အဘယ်နည်း’ ဟူသောမေးခွန်းများအတွက် စိတ်ကျေနပ်ဖွယ်အဖြေများ ယခင်ကမရခဲ့လျှင် အသို့နည်း။ သို့ဆိုလျှင် ယေဟောဝါအား တရင်းတနှီးသိကျွမ်းရန်ကြိုးစားဖို့ သမ္မာကျမ်းစာကအကြံပြုသည်။ အမှန်ဆိုရလျှင် ယေရှုက “ထာဝရအသက်ဟူမူကား၊ မှန်သောဘုရားသခင် တစ်ဆူတည်းဖြစ်တော်မူသော ကိုယ်တော်ကိုလည်းကောင်း၊ စေလွှတ်တော်မူသော ယေရှုခရစ်ကိုလည်းကောင်း သိကျွမ်းခြင်းတည်း” ဟု မိန့်ဆိုခဲ့၏။ ထို့နောက် ဘုရားသခင်ရေးရာအရည်အသွေးများ၊ အထူးသဖြင့် ချစ်ခြင်းမေတ္တာကို ပြုစုပျိုးထောင်ရန်နှင့် ရောက်ရှိတော့မည့် ဘုရားသခင်၏မေရှိယနိုင်ငံတော်အောက်တွင် အသက်ရှင်နေထိုင်နိုင်ရန် ပန်းတိုင်ထားဖို့လည်း သင့်ကိုအားပေးထားသည်။ သို့ဆိုလျှင် သင့်ဘဝတွင် ရည်ရွယ်ချက်ရှိလာလိမ့်မည်၊ အနာဂတ်အတွက်လည်း အထူးကောင်းမွန်ပြီး စိတ်ချရသည့် မျှော်လင့်ချက်ရှိပေလိမ့်မည်။ ဤအချိန်အခါအထိ သင့်ကို စိတ်ရှုပ်ထွေးစေသော အခြေခံကျသည့် မေးခွန်းများအတွက်လည်း အဖြေရရှိပေလိမ့်မည်။—ယောဟန် ၁၇:၃; ဒေ. ၁၂:၁၃။
ယင်းက သင့်အတွက် မည်မျှထူးခြားစေနိုင်သနည်း။ ဟန်းစ်သည် ယင်းကို ကောင်းစွာဖြေဆိုပေးနိုင်သူတစ်ဦးဖြစ်သည်။ * ဟန်းစ်သည် လွန်ခဲ့သော နှစ်အနည်းက ဘုရားသခင်ရှိသည်ကို မရေမရာယုံကြည်သော်လည်း ထိုယုံကြည်မှုသည် သူ့အသက်တာအပေါ် ဩဇာမသက်ရောက်ခဲ့ချေ။ သူသည် မူးယစ်ဆေးဝါး သုံးစွဲခြင်း၊ အကျင့်ပျက်အမျိုးသမီးများနှင့်ပေါင်းခြင်း၊ ပြစ်မှုငယ်များကျူးလွန်ခြင်းနှင့် မော်တော်ဆိုင်ကယ်အဖွဲ့များနှင့်ပေါင်းခြင်းတို့ကို ပျော်ပိုက်ခဲ့သည်။ “ဒါပေမဲ့ ကျွန်တော့်ဘဝဟာ အဓိပ္ပာယ်မရှိဘူး၊ ဘာကျေနပ်မှုမှလည်းမရခဲ့ဖူးဘူး” ဟုသူရှင်းပြသည်။ အသက်နှစ်ဆယ်ကျော်လာသောအခါ ဟန်းစ်သည် ဘုရားသခင်ကိုသိကျွမ်းလာဖို့ ကျမ်းစာအသေအချာဖတ်မည်ဟု စိတ်ဆုံးဖြတ်လိုက်သည်။ ယေဟောဝါကို သူတရင်းတနှီးသိကျွမ်းလာပြီး ဘဝ၏ရည်ရွယ်ချက်ကို နားလည်လာသည်နှင့်တစ်ပြိုင်တည်း မိမိ၏ဘဝပုံစံကို ပြောင်းလဲကာ ယေဟောဝါသက်သေတစ်ဦးအဖြစ် နှစ်ခြင်းခံလိုက်သည်။ ယခု သူအချိန်ပြည့်ဓမ္မအမှုဆောင်နေသည်မှာ ဆယ်နှစ်ရှိလေပြီ။ သူက “ယေဟောဝါရဲ့အမှုတော်ကို ထမ်းဆောင်ရတာ အကောင်းဆုံးဘဝလမ်းစဉ်ပဲ။ ဘာနဲ့မှ နှိုင်းယှဉ်လို့မရဘူး။ ယေဟောဝါကိုသိကျွမ်းလာလို့ ဘဝမှာရည်ရွယ်ချက်ရှိပြီ” ဟုပွင့်ပွင့်လင်းလင်းပြောဆိုသည်။
လူအများစိတ်ဝင်စားနေကြသည်မှာ ဘဝရည်ရွယ်ချက်တစ်ခုတည်း မဟုတ်ပါ။ ကမ္ဘာ့အခြေအနေဆုတ်ယုတ်လာသည်နှင့်အမျှ လူတို့သည် နောက်ထပ်အရေးကိစ္စတစ်ခုကြောင့် စိတ်အနှောင့်အယှက် ပိုဖြစ်လာနေကြသည်။
ဤသို့အဘယ်ကြောင့် ဖြစ်ပျက်ရသနည်း
ဆင်းရဲခက်ခဲမှု ရုတ်တရက်ကျရောက်လာသည့်အခါ ဤသို့ အဘယ်ကြောင့်ဖြစ်ပျက်ရသနည်းဟု ဆင်းရဲခက်ခဲမှုခံရသူက သိလိုသည်။ ဆင်းရဲခက်ခဲမှုကို စိတ်ပိုင်းအရ ကိုင်တွယ်ဖြေရှင်းနိုင်စွမ်းရှိရန် ထိုမေးခွန်း၏ သင့်လျော်သောအဖြေ ရရှိထားဖို့လိုသည်။ စိတ်ကျေနပ်လောက်ဖွယ် အဖြေမရရှိထားပါက ဆက်စိတ်ဆင်းရဲနေမည်ဖြစ်ပြီး ခံရသူခမျာ ပို၍စိတ်နာကြည်းသွားနိုင်ပါသည်။ ဥပမာ၊ ဘရူနီ၏အတွေ့အကြုံကို သုံးသပ်ကြည့်ကြစို့။
“လွန်ခဲ့တဲ့နှစ်အနည်းငယ်လောက်က ကျွန်မရဲ့ သမီးလေးဆုံးသွားဆာလံ ၃၇:၂၉; တမန်တော် ၂၄:၁၅; ရောမ ၅:၁၂။
တယ်။ ဘုရားသခင်ကို ကျွန်မယုံကြည်လို့ ဒေသခံခရစ်ယာန်ဘုန်းကြီးတစ်ပါးဆီသွားပြီး စိတ်သက်သာမှုရှာခဲ့တယ်။ ဇူဇဲနာကို ဘုရားသခင်ကောင်းကင်ခေါ်သွားပြီး အခု ကောင်းကင်တမန်တစ်ပါးဖြစ်နေပြီလို့ သူကပြောပြတယ်။ ကျွန်မသမီးလေးဆုံးသွားလို့ ကျွန်မအတွက် အရာရာဟာ ပြိုလဲသွားရုံမက သမီးလေးကိုခေါ်ဆောင်သွားလို့ ဘုရားသခင်ကိုပါ ကျွန်မအရမ်းမုန်းသွားတယ်” ဟု ယခု လူလတ်ပိုင်းအရွယ်ရှိ မိခင်တစ်ဦးဖြစ်သူ ဘရူနီကရှင်းပြသည်။ ဘရူနီသည် စိတ်နာကြည်းမှုနှင့် ဆင်းရဲခြင်းဝေဒနာကို နှစ်ပေါင်းများစွာ ဆက်ခံစားခဲ့ရရှာသည်။ “အဲဒီလိုခံစားနေရတုန်းမှာ ယေဟောဝါသက်သေတစ်ယောက်က ဘုရားသခင်ကို ကျွန်မမုန်းစရာအကြောင်းလုံးဝမရှိဘူးလို့ သမ္မာကျမ်းစာကနေ ဖော်ပြပေးခဲ့တယ်။ ယေဟောဝါဟာ ဇူဇဲနာကို ကောင်းကင်ခေါ်သွားတာမှမဟုတ်တာ၊ သမီးလေးဟာ ကောင်းကင်တမန်တစ်ပါးလည်း ဖြစ်မနေဘူးဆိုတာ သိလာတယ်။ သူမကျန်းမမာဖြစ်ရတာဟာ လူ့မစုံလင်မှုကြောင့်ပဲ။ အခုသေခြင်းမှာ ဇူဇဲနာအိပ်ပျော်နေပြီး သူ့ကို ယေဟောဝါထမြောက်စေမယ့်အချိန်ကို စောင့်နေတုန်းပဲ။ ကိုယ်တော်ဟာ လူကို ပရဒိသုမြေကြီးပေါ်မှာ ထာဝစဉ်နေထိုင်ဖို့ ဖန်ဆင်းခဲ့တဲ့အတွက် မကြာခင် အဲ့ဒီအတိုင်းဖြစ်တော့မယ်လို့ ကျွန်မသိလာတယ်။ ယေဟောဝါဟာ ဘယ်လိုပုဂ္ဂိုလ်မျိုးဖြစ်မှန်း ကျွန်မစသိလာတာနဲ့ ကိုယ်တော့်ထံချဉ်းကပ်ခဲ့တဲ့အတွက် ကျွန်မရဲ့နာကျင်မှုလည်း တဖြည်းဖြည်းသက်သာလာတယ်။”—ကိုယ်တိုင်ကြုံတွေ့ရသည့် ဝမ်းနည်းကြေကွဲမှု၊ စစ်မှု၊ ငတ်ပြတ်မှု၊ သဘာဝဘေးဒဏ် အစရှိသည့် ဆင်းရဲခက်ခဲမှုအမျိုးမျိုးကို ခံစားနေကြရသူ သန်းနှင့်ချီရှိသည်။ ဆင်းရဲခက်ခဲမှုခံရခြင်းသည် ယေဟောဝါကြောင့်မဟုတ်ကြောင်း၊ လူသားတို့ကို ဝေဒနာခံစားစေလိုတော်မူသည်မဟုတ်ကြောင်းနှင့် များမကြာမီ ဆိုးသွမ်းမှုကို အဆုံးတိုင်စေမည်ဖြစ်ကြောင်း သမ္မာကျမ်းစာ၏ရှင်းပြချက်ကို ဘရူနီကြားသိသည်နှင့်တစ်ပြိုင်တည်း သက်သာမှုရလေ၏။ ဆိုးသွမ်းမှု တိုးများလာနေခြင်းကိုယ်နှိုက်က လက်ရှိအစီအစဉ်စနစ်၏ ‘နောက်ဆုံးနေ့ရက်များ’ တွင် ကျွန်ုပ်တို့အသက်ရှင်နေရသည့် နိမိတ်လက္ခဏာတစ်ခုဖြစ်သည်။ ကျွန်ုပ်တို့အားလုံး တောင့်တကြသည့် အကြီးအကျယ်တိုးတက်ကောင်းမွန်လာမည့် ပြောင်းလဲမှုကြီး နီးနေပြီ။—၂ တိမောသေ ၃:၁-၅; မဿဲ ၂၄:၇၊ ၈။
ဘုရားသခင်အား သိကျွမ်းလာခြင်း
ဟန်းစ်နှင့် ဘရူနီတို့သည် ဘုရားသခင်အကြောင်း အနည်းအကျဉ်းသာသိထားကြသည်။ ကိုယ်တော့်အကြောင်း များများမသိကြသော်လည်း ကိုယ်တော်ကိုယုံကြည်ကြ၏။ ယေဟောဝါကို တိကျမှန်ကန်စွာသိကျွမ်းဖို့ အချိန်ပေးလေ့လာကြသောအခါ သူတို့အကျိုးခံစားခဲ့ရသည်။ ကျွန်ုပ်တို့ခေတ်နှင့်ဆိုင်သည့် အရေးကြီးဆုံးမေးခွန်းများ၏ သင့်လျော်သောအဖြေများကို သူတို့ရရှိသွားကြ၏။ ယင်းကြောင့် သူတို့သည် စိတ်ငြိမ်သက်မှုရပြီး အနာဂတ်အတွက် စိတ်ချရသောမျှော်လင့်ချက်လည်း ရရှိသွားသည်။ ထပ်တူအတွေ့အကြုံမျိုးကို ယေဟောဝါ၏ကျေးကျွန်သန်းချီ တွေ့ကြုံခဲ့ကြပြီ။
ယေဟောဝါကိုသိကျွမ်းလာရန် သမ္မာကျမ်းစာကို စေ့စေ့စပ်စပ် ဖတ်ရှုလေ့လာခြင်းနှင့် အစပြုသည်၊ သမ္မာကျမ်းစာက ကိုယ်တော့်အကြောင်းနှင့် ကျွန်ုပ်တို့ထံမှ ကိုယ်တော် အဘယ်အရာတောင်းဆိုကြောင်း ဖော်ပြသည်။ ပထမရာစုမှ သူတချို့ ထိုသို့ပြုလုပ်ခဲ့ကြ၏။ သမိုင်းပညာရှင်နှင့် ဆေးဆရာဖြစ်သူ လုကာက ဂရိနိုင်ငံ၊ ဗေရိမြို့ရှိ ဂျူးအသင်းသူအသင်းသားများသည် “အလွန်ကြည်ညိုသောစေတနာစိတ်နှင့် [ပေါလုနှင့်သိလတို့ထံမှ] နှုတ် [မြွက်စကား] တော်ကိုခံယူ၍ မှန်မမှန်သိခြင်းငှာ ကျမ်းစာကို နေ့တိုင်းအစဉ်စေ့စေ့ကြည့်ရှုကြ၏” ဟု ရေးသားဖော်ပြသည်။—တမန်တော် ၁၇:၁၀၊ ၁၁။
ပထမရာစုခရစ်ယာန်များသည် အသင်းတော်များတွင် အတူတကွစုဝေးခြင်းကိုလည်း ပြုလုပ်ခဲ့ကြ၏။ (တမန်တော် ၂:၄၁၊ ၄၂၊ ၄၆; ၁ ကောရိန္သု ၁:၁၊ ၂; ဂလာတိ ၁:၁၊ ၂; ၂ သက်သာလောနိတ် ၁:၁) ယနေ့လည်း ထပ်တူပင်။ ယေဟောဝါသက်သေများသည် ယေဟောဝါထံချဉ်းကပ်ရန်နှင့် ကိုယ်တော့်အမှုတော်ထမ်းရွက်ခြင်းမှ ရွှင်လန်းမှုရရှိကြရန် အထူးစီစဉ်ထားသည့် အစည်းအဝေးများသို့ အသင်းတော်လိုက် အတူတကွစုရုံးကြသည်။ ဒေသခံသက်သေခံများနှင့် ပေါင်းသင်းခြင်းမှ အခြားအကျိုးတစ်ခုရသေးသည်။ လူတို့သည် မိမိတို့ဝတ်ပြုကိုးကွယ်သော ဘုရားသခင်နှင့် တဖြည်းဖြည်း ပို၍ပို၍တူလာသည့်အတွက် ယေဟောဝါကိုယ်တော်တိုင်တင်ပြသည့် အရည်အသွေးများကို ယေဟောဝါသက်သေများသည် ယင်းကို အကန့်အသတ်သာဖြစ်သော်ငြားလည်း တင်ပြကြ၏။ ထို့ကြောင့် သက်သေခံများနှင့်အတူစုဝေးခြင်းက ယေဟောဝါအား ပိုသိကျွမ်းလာစေသည်။—ဟေဗြဲ ၁၀:၂၄၊ ၂၅။
အရှင်သခင်တစ်ပါးတည်းကို သိကျွမ်းလာဖို့ များစွာအားစိုက်ထုတ်ရပုံပေါက်ပါသလော။ အမှန်တကယ်ပင် အားထုတ်ရပေမည်။ သို့သော် အသင် ဖြစ်မြောက်အောင်မြင်စေလိုသည့် အရာများစွာကို ထိုသို့ပြုလုပ်ရမည် မဟုတ်ပေလော။ ထိပ်တန်းအားကစားသမားတစ်ဦးဖြစ်ဖို့ အားစိုက်ထုတ်လေ့ကျင့်ခဲ့ရသည်ကို စဉ်းစားကြည့်ပါ။ ဥပမာ၊ ပြင်သစ်နိုင်ငံ အိုလံပစ် ရေခဲပြင်လျှောစီး ရွှေတံဆိပ်ဆုရှင် ဇဲန်း-ကလော့ဒ် ကီလီက အောင်မြင်သော နိုင်ငံတကာ အားကစားပြိုင်ပွဲဝင်သူတစ်ဦးဖြစ်ရန် ပြုလုပ်ခဲ့ရသမျှအကြောင်း ဤသို့ဆိုသည်– “ပြိုင်ပွဲမဝင်ခင် ဆယ်နှစ်ကြိုတင်ပြီး နှစ်နဲ့ချီ၊ နေ့တိုင်း ဒါကိုပဲ တွေးတောစီမံနေရတယ် . . .
တစ်နှစ်ပတ်လုံး၊ ၃၆၅ ရက်စလုံး စိတ်ရောကိုယ်ပါ နှစ်မြှုပ်ထားရတဲ့အလုပ်ဖြစ်တယ်။” ဆယ်မိနစ်သာကြာမည့် ပြိုင်ပွဲတစ်ပွဲတွင် ဝင်ပြိုင်ဖို့အရေး ရှိရှိသမျှ အချိန်နှင့် အားစိုက်ထုတ်မှု ပေးဆပ်ရလေသည်! ယေဟောဝါအား သိကျွမ်းခြင်းဖြင့် ရရှိမည့် အောင်မြင်မှုမှာ ပို၍ပင် ကြာရှည်တည်မြဲပါသည်။သာ၍ရင်းနှီးကျွမ်းဝင်လာသည့် ဆက်ဆံရေး
ဘဝတွင် အရေးကြီးသောအရာတစ်ခုခုကို မည်သူဆုံးရှုံးခံလိုမည်နည်း။ မည်သူမျှရှိမည်မဟုတ်ပေ။ သို့ဖြစ်လျှင် သင့်ဘဝတွင် စစ်မှန်သည့်ရည်ရွယ်ချက်မရှိဟု ခံစားရမည်၊ သို့မဟုတ် ဆင်းရဲခက်ခဲမှု အဘယ်ကြောင့် ရုတ်တရက်ကျရောက်လာသည်ကို သင်သိလိုလျှင် သမ္မာကျမ်းစာ၏ ဘုရားသခင် ယေဟောဝါကို သိကျွမ်းလာဖို့ ပြတ်ပြတ်သားသားဆုံးဖြတ်ပါလေ။ ကိုယ်တော့်ကို သင်သိကျွမ်းလာလျှင် သင့်ဘဝ ရေရှည်တိုးတက်ကောင်းမွန်လာပေလိမ့်မည်။
ယေဟောဝါအကြောင်း မသင်ယူတော့ဘဲနေမည့်အချိန် တစ်ချိန်ချိန်ရှိမည်လော။ ကိုယ်တော်၏အမှုတော်ကို နှစ်ချီထမ်းရွက်ခဲ့ကြသူတို့သည် ကိုယ်တော့်အကြောင်း သူတို့သိရှိခဲ့ရာများနှင့် ဆက်လက်သိရှိလာနေသေးသည့် အသစ်သောအရာများကို အံ့သြချီးမွမ်းနေရဆဲပင်။ ဤသို့သိရှိလာသောအရာများသည် ကျွန်ုပ်တို့ကိုပျော်ရွှင်စေပြီး ကိုယ်တော်နှင့် ပို၍ရင်းနှီးကျွမ်းဝင်လာစေသည်။ “ဘုရားသခင်၏ပညာနှင့်ဉာဏ်တော်သည် အလွန်ကျယ်ဝန်းနက်နဲစွတကား။ စီရင်တော်မူချက်တို့ကို အဘယ်သူမျှစစ်၍မကုန်နိုင်။ ကြွတော်မူရာလမ်းတို့ကို လိုက်၍ရှာသော်လည်း မတွေ့မမီနိုင်။ ‘ထာဝရဘုရား၏စိတ်တော်ကို အဘယ်သူသိသနည်း။ ထာဝရဘုရားနှင့် အဘယ်သူသည်တိုင်ပင်ဘက်ပြုသနည်း’” ဟု ရေးသားခဲ့သူ တမန်တော်ပေါလု၏သဘောကို ကျွန်ုပ်တို့ ပဲ့တင်ထပ်နိုင်ကြပါစေ။—ရောမ ၁၁:၃၃၊ ၃၄။
[အောက်ခြေမှတ်ချက်]
^ အပိုဒ်၊ 12 အမည်များကို ပြောင်းလဲထားသည်။
[စာမျက်နှာ ၅ ပါ အကျဉ်းဖော်ပြချက်]
လူတို့သည် ‘ကျွန်ုပ်အဘယ်ကြောင့် ဤနေရာတွင် ရောက်ရှိနေရသနည်း။ အဘယ်အရပ်သို့ ဦးတည်သွားနေသနည်း။ ဘဝရည်ရွယ်ချက်ကား အဘယ်နည်း’ ဟူသော အခြေခံကျသည့်မေးခွန်းများကို မေးမြန်းနေကြဆဲပင်
[စာမျက်နှာ ၆ ပါ အကျဉ်းဖော်ပြချက်]
“ယေဟောဝါဟာ ဘယ်လိုပုဂ္ဂိုလ်မျိုးဖြစ်မှန်း ကျွန်မစသိလာတာနဲ့ ကိုယ်တော့်ထံ ကျွန်မချဉ်းကပ်ခဲ့တယ်”
[စာမျက်နှာ ၇ ပါ အကျဉ်းဖော်ပြချက်]
“ယေဟောဝါရဲ့အမှုတော်ကို ထမ်းဆောင်ရတာ အကောင်းဆုံး ဘဝလမ်းစဉ်ပဲ။ ဘာနဲ့မှ နှိုင်းယှဉ်လို့မရဘူး။ ယေဟောဝါကိုသိကျွမ်းလာလို့ ဘဝမှာရည်ရွယ်ချက်ရှိပြီ”