Jehofa Modimo yo a Swanelwago ke go Tsebja

NA E ka ba e le gore o fetwa ke selo se itšego se bohlokwa bophelong? Ge e ba e le gore o tseba mo gonyenyane ka Modimo, gona go tloga go le bjalo e le ka kgonthe. Ka baka la’ng? Ka gobane go tseba Modimo wa Beibele go tliša mehola e megolo bophelong bjalo ka ge batho ba dimilione ba šetše ba lemogile. Mehola ye e thoma gatee-tee gomme ke yeo e tla dulago e le gona le bokamosong.

Jehofa Modimo e lego Mongwadi wa Beibele, o nyaka gore re mo tsebe. Mopsalme o ngwadile gore: “Gore ba tsebe gobane ke wena o nnoši, o bitšwago Jehofa, yo godimo-dimo godimo ga lefase ka moka.” O a tseba gore ke mo go re holago go mo tseba. “Nna Morêna Modimo wa xaxo ke Xo ruta tše di Xo holaxo.” Re holega bjang ka go tseba Jehofa Modimo, yo Godimo-dimo?​—Psalme 83:​18; Jesaya 48:⁠17.

Mohola o mongwe wa kgonthe ke gore re hwetša tlhahlo ya go lebeletšana le mathata a letšatši le letšatši, kholofelo e tiilego bakeng sa bokamoso le khutšo ya monagano. Go oketša moo, go tlwaelana gabotse le Jehofa go re tutueletša go hlagolela boemo bja kgopolo bjo bo fapanego ka ditaba tše bohlokwa kudu tšeo batho ba lebeletšanago le tšona lefaseng ka bophara lehono. Ditaba tšeo ke dife?

Na Bophelo bja Gago bo na le Morero?

Go sa šetšwe tšwelopele e makatšago ya batho go tša thekinolotši, batho lehono ba sa dutše ba ipotšiša dipotšišo tše swanago tša bohlokwa: ‘Ke ka baka la’ng ke le mo? Ke ya kae? Morero wa bophelo ke ofe?’ Ge motho a sa hwetše dikarabo tše di kgotsofatšago, bophelo bja gagwe bo ka se be le morero wa kgonthe. Na batho ba bantši ba lemoga go hlaelelwa mo? Nyakišišo yeo e dirilwego kua Jeremane mafelelong a bo-1990 e utollotše gore seripa-gare sa bao ba arabetšego, gantši goba ka dinako tše dingwe ba nagana gore bophelo bo bonagala bo se na morero. Mohlomongwe boemo bjo bo swanago bo gona moo o dulago gona.

Ge motho a se na morero bophelong, o na le motheo o monyenyane woo a ka agago dipakane tša gagwe go ona. Ba bantši ba leka go tšeela legato go hlaelelwa mo ka go ba le mešomo yeo e atlegilego goba ka go kgoboketša mahumo. Lega go le bjalo, go hloka morero e ka ba mo go hlobago boroko. Go se be le morero bophelong e bile go tshwenya ba bangwe go fihla bokgoleng bjoo ba se sa kganyogago go phela. Yeo e bile phihlelo ya mosadi yo mofsa yo mobotse yoo go ya ka International Herald Tribune, a ilego a godišetšwa “gare ga mahumo a mantši le go ba le ditshwanelo tše dintši kudu.” Gaešita le ge a be a phela ka gare ga mahumo, o be a lewa ke bodutu gomme a ikwa gore bophelo bja gagwe ga bo na morero. O ile a nwa diphilisi tša boroko gomme a hwetšwa a hwile. O ka ba o tseba ka ba bangwe bao ba bego ba lewa ke bodutu bao ba ilego ba hwa ka tsela e sehlogo.

Lega go le bjalo, na o kile wa kwa batho ba bolela gore thutamahlale e ka re botša se sengwe le se sengwe ka bophelo? Kuranta ya beke le beke ya Jeremane ya Die Woche e bolela gore: “Gaešita le ge thutamahlale e ka ba e nepile, e a fokola ditabeng tša moya. Tlhagelelo e bonagala e le selo sa motheo, gomme gaešita le go se kgonthišege ka  moka ga dilo ga thuto yeo e dirišwago go hlalosa mekgwa le dika tša dilo tše nyenyane dithutong tše raraganego go dirišwa thuto ya dipalo, ga e nee khomotšo le tšhireletšego.” Dilo tšeo di fihleletšwego ke thutamahlale di dirile mo gontši go hlalosa bophelo ka dibopego tša bjona le go hlalosa medikologo ya tlhago le dilo tšeo di thekgago bophelo. Lega go le bjalo, thutamahlale e ka se re botše gore ke ka baka la’ng re le mo le gore re ya kae. Ge e ba re ithekgile ka thutamahlale feela, dipotšišo tša rena tša mabapi le morero wa bophelo di tla dula di sa arabja. Bjalo ka ge kuranta ya Süddeutsche Zeitung e begile, mafelelo ke “go nyakega ga tlhahlo mo go phatlaletšego.”

Ke mang yo a lego boemong bjo bokaone bja go nea tlhahlo e bjalo go feta Mmopi? Ka ge mathomong a beile batho lefaseng, o swanetše go tseba lebaka leo ka lona ba lego mo. Beibele e hlalosa gore Jehofa o bopile batho e le gore ba ka dula lefaseng gomme ba le hlokomele, e be bahlokomedi ba lona. Medirong ya bona ka moka, batho ba be ba tla bonagatša dika tša gagwe tše bjalo ka toka, bohlale le lerato. Ge re šetše re kwešiša lebaka leo ka lona Jehofa a re bopilego, re tseba lebaka leo ka lona re lego mo.​—Genesi 1:​26-⁠28.

O ka Dira’ng?

Go thwe’ng ge e ba nakong e fetilego o sa hwetša dikarabo tše di kgotsofatšago dipotšišong tše: ‘Ke ka baka la’ng ke le mo? Ke ya kae? Morero wa bophelo ke ofe?’ Beibele e kgothaletša gore re tsebe Jehofa kgaufsi. Ge e le gabotse, Jesu o itše: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” Le wena o kgothaletšwa go hlagolela dika tša go boifa Modimo, lerato ka mo go kgethegilego, le go dira gore e be pakane ya gago go phela ka tlase ga Mmušo wa Modimo wa Mesia wo o tlago. Ke moka o tla ba le morero bophelong le kholofelo e kgahlišago le e šireletšegilego ka bokamoso. Ka ntle le pelaelo, dipotšišo tša bohlokwa tšeo go fihla ga bjale di bego di go tshwenya di tla arabja.​—Johane 17:⁠3; Mmoledi 12:⁠13.

Seo se ka dira phapang e kaaka’ng? Hans ke monna yo a swanetšego go tseba. * Nywageng e fetilego o be a dumela go Modimo ka tsela e tlwaelegilego, eupša tumelo ya Hans e be e sa tutuetše bophelo bja gagwe. Hans o be a thabela dihlare-tagi, basadi ba boitshwaro bjo bo gobogilego, bosenyi bja go se re selo le dithuthuthu. O hlalosa gore: “Eupša bophelo bo be bo se na morero, bo tloga bo sa kgotsofatše.” Ge a le nywageng ya gagwe ya magareng ga bo-20, Hans o ile a dira phetho ya go nyaka go tseba Modimo e le ka kgonthe ka go bala Beibele ka kelohloko. Ge a šetše a tsebile Jehofa kgaufsi gomme a kwešišitše morero wa bophelo, Hans o ile a fetoša mokgwa wa gagwe wa go phela gomme a kolobetšwa e le yo mongwe wa Dihlatse tša Jehofa. O bile bodireding bja nako e tletšego ga e sa le go tloga nywageng e lesome e fetilego. O bolela ka go tšwa pelong gore: “Go hlankela Jehofa ke tsela e kaone kudu ya go phela. Ga go na selo se sengwe seo go ka bapetšwago le gona. Go tseba Jehofa go dirile gore ke be le morero bophelong.”

Ke therešo gore morero wa bophelo ga se taba e nnoši yeo batho ba bantši ba tshwenyegilego ka yona. Ge maemo a lefaseng a dutše a phuhlama, batho ba oketšegilego ba tshwenywa ke taba e nngwe ya bohlokwa.

Ke ka Baka La’ng Bothata bo Diragetše?

Ge bothata bo hlasela, gantši mohlaselwa o tshwenywa ke potšišo ye e tee: Ke ka baka la’ng bo diragetše? Bokgoni bja go lebeletšana le bothata ka katlego maikwelong bo ithekgile kudu ka go hwetša karabo e nepagetšego potšišong yeo. Ge e ba go se na karabo e kgotsofatšago, go tlaišega go tšwela pele gomme mohlaselwa a ka nyama kudu. Ka mohlala, nagana ka phihlelo ya Bruni.

Bruni yoo ga bjale e lego mma wa nywaga ya magareng o hlalosa gore: “Nywaga e sego kae ya go feta ke ile ka hwelwa ke ngwana wa mosetsana. Ke be ke dumela go Modimo, ka gona ke ile  ka nyaka khomotšo go moperisita wa lefelong la gešo. O ile a mpotša gore Modimo o išitše Susanne legodimong, moo ga bjale e lego morongwa. Ga se ka ka ka šulafatšwa feela ke go hwa ga gagwe, eupša ke ile ka hloya Modimo ka baka la go mo tšea.” Bohloko bja Bruni le tlaišego di ile tša tšwela pele ka nywaga e mmalwa. “Ke moka yo mongwe wa Dihlatse tša Jehofa o ile a mpontšha ka Beibeleng gore ke be ke se na lebaka la go hloya Modimo. Jehofa ga se a iša Susanne legodimong, e bile ga se morongwa. Bolwetši bja gagwe e bile ditla-morago tša go se phethagale ga batho. Susanne o ithobaletše lehung, o letetše gore Jehofa a mo tsoše. Ke ithutile gape gore o bopile batho gore ba phele ka mo go sa felego lefaseng la paradeise, le gore se se tla phethagatšwa kgaufsinyane. Gatee-tee ge ke šetše ke thomile go kwešiša gore Jehofa ke motho wa mohuta ofe e le ka kgonthe, ke ile ka batamela kgaufsi le yena gomme bohloko bja-ka bo ile bja thoma go okobala.”​—Psalme 37:​29; Ditiro 24:​15; Ba-Roma 5:⁠12.

Batho ba dimilione ba kgongwa ke mathata ka ditsela tše di fapa-fapanego: masetlapelo a motho ka noši, ntwa, tlala goba kotsi ya tlhago. Bruni o ile a imologa ge a šetše a bone go tšwa ka Beibeleng gore Jehofa ga se a swanelwa go bewa molato bakeng sa mathata, gore ga se a ka a rera gore batho ba tlaišege le gore kgaufsinyane o tla fediša bobe. Taba ya gore bokgopo bo tšwela pele ke leswao la gore ga bjale re phela “mehleng ya bofêlô” bja tshepedišo ye ya dilo. Phetogo e kgahlišago yeo e tla tlišago kaonefatšo e kgolo kudu yeo ka moka ga rena re e hlologetšego e kgaufsi kudu.​—2 Timotheo 3:​1-⁠5; Mateo 24:​7, 8.

Go Tseba Modimo

Hans le Bruni ba be ba na le kgopolo e tlwaelegilego ka Modimo. Ba be ba dumela go yena ntle le go tseba mo gontši ka yena. Maiteko a bona a ile a putswa ge ba be ba diriša nako gore ba tsebe Jehofa ka tsela e nepagetšego. Ba ile ba hwetša dikarabo tše di nepagetšego tša dipotšišo tše bohlokwa kudu tša mehla ya rena. Se se ile sa dira gore ba be le khutšo ya monagano le kholofelo e tiilego ka bokamoso. Bahlanka ba Jehofa ba dimilione ba bile le phihlelo e swanago.

Go tseba Jehofa go thoma ka go badišiša Beibele, e lego yeo e re botšago ka yena le ka seo a se nyakago go rena. Se ke seo se ilego sa dirwa ke ba bangwe lekgolong la pele la nywaga. Radihistori yoo e lego ngaka Luka o bega gore ditho tša phuthego ya ba-Juda ya Berea kua Gerika ‘di amogetše lentšu go tšwa go Paulo le Silase ka go rata, tša hlwa di bala mangwalo ka mehla di nyaka mo a kwanago le tšeo di bego di di kwa.’​—Ditiro 17:​10, 11.

Bakriste ba lekgolong la pele la nywaga le bona ba ile ba bokana gotee diphuthegong. (Ditiro 2:​41, 42, 46; 1 Ba-Korinthe 1:​1, 2; Ba-Galatia 1:​1, 2; 2 Ba-Thesalonika 1:⁠1) Go bjalo le lehono. Diphuthego tša Dihlatse tša Jehofa di bokana gotee bakeng sa diboka tšeo di hlametšwego ka mo go kgethegilego go thuša batho go batamela kgaufsi le Jehofa le go thabela go mo hlankela. Go bokana le Dihlatse tša lefelong la geno go na le mohola o oketšegilego. Ka ge batho ganyenyane-ganyenyane ba e ba bjalo ka Modimo yo ba mo rapelago, Dihlatse tša Jehofa di bontšha dika​—gaešita le ge di di bontšha ka tsela e lekanyeditšwego​—tšeo Jehofa ka boyena a di bontšhago. Ka gona go bokana le Dihlatse go re thuša go tseba Jehofa kaone kudu.​—Ba-Hebere 10:​24, 25.

Na go tseba Motho o tee go kwagala go nyaka boiteko bjo bogolo kudu? Go tloga go nyaka boiteko e le ka kgonthe. Eupša na seo ga se sa therešo ka dilo tše dintši tšeo o nyakago go di fihlelela bophelong? Nagana ka boiteko bjo ramabelo yo a tšwago pele a bo dirago go itlwaetšeng ga gagwe. Ka mohlala, Jean-Claude Killy yo a thopilego mentlele wa gauta Diphadišanong tša mabelo tša France o bolela se mabapi le seo se akaretšwago go go ba mophadišani yo a atlegilego dipapading tša botšhaba-tšhaba: “O swanetše go thoma nywaga e 10 pele gomme o e rulaganyetše ka nywaga-nywaga gomme o nagane ka yona letšatši le lengwe le le lengwe . . . Ke mošomo wa  matšatši a 365 ka ngwaga, monaganong le mmeleng.” O diriša nako yeo ka moka le boiteko feela gore a tšee karolo phadišanong ya lebelo leo le ka tšeago metsotso e lesome feela! Go bjalo kudu gakaakang​—le mo go swarelelago kudu​—ka seo re ka se fihlelelago ka go tseba Jehofa.

Tswalano Yeo e Golago ka mo go Tšwelago Pele

Ke mang yo a nyakago go se hwetše selo se itšego se bohlokwa bophelong? Ga go le o tee. Ka gona, ge e ba o na le maikwelo a gore bophelo bja gago ga bo na morero wa kgonthe goba ge e ba o nyaka go hlalosetšwa gore ke ka baka la’ng mathata a hlasela, gona ikemišetše e le ka kgonthe go tseba Jehofa, Modimo wa Beibele. Go ithuta ka yena go ka fetoša bophelo bja gago gore e be bjo bokaone, ka mo go sa felego.

Na re tla ke re tlogele go ithuta ka Jehofa? Bao ba bego ba dutše ba mo hlankela ka nywaga e mentši ba sa dutše ba makatšwa ke seo ba ithutilego sona ka yena le ke dilo tše difsa tšeo ba tšwelago pele ba ithuta tšona ka yena. Go ithuta dilo tše bjalo go a re thabiša e bile go re batametša kgaufsi kudu le yena. Anke re dumelelane le dikgopolo tša moapostola Paulo yo a ngwadilego gore: “A! Bodiba bya lehumô la Modimo, le bya bohlale bya xaxwe, bya tsebô ya xaxwe! A! Dikahlolô tša xaxwe di-hlaya-mohlathi; ditsela tša xaxwe xa di latišexe. Ké mang a tsebilexo kxopolô ya Morêna? Moeletši wa xaxwe ké mang?”​—Ba-Roma 11:​33, 34.

[Mengwalo ya ka tlase]

[Caption on page 5]

Batho ba sa dutše ba ipotšiša dipotšišo tše swanago tša bohlokwa: ‘Ke ka baka la’ng ke le mo? Ke ya kae? Morero wa bophelo ke ofe?’

[Caption on page 6]

“Gatee-tee ge ke šetše ke thomile go kwešiša gore Jehofa ke motho wa mohuta ofe e le ka kgonthe, ke ile ka batamela kgaufsi le yena”

[Caption on page 7]

“Go hlankela Jehofa ke tsela e kaone kudu ya go phela. Ga go na selo se sengwe seo go ka bapetšwago le gona. Go tseba Jehofa go dirile gore ke be le morero bophelong”