Jehova​—Dios a Makanan Kabaten

WALA ta so nasasaew mo ya importantin bengatla ed bilay? No samet labat so amtam nipaakar ed Dios, segurado sirin a wala. Akin? Lapud, unong ya asukayan na minilyon a totoo, say pakapikabat ed Dios dia ed Biblia so mangiter na dakel a gunggona ed bilay. Sarayan gunggona so niwalan tampol tan mansiansia iratan angga ed arapen.

Kaliktan nen Jehova a Dios, say Autor na Biblia, a sikato so nakabkabat tayo. Oniay insulat na salmista: “Pian saray totoo nakabatan da a sika, a say ngaran mo a bukbukor et Jehova, Sankatageyan ka a manuna nen say amin a dalin.” Amta to a pankaabigan tayo so pakapikabat ed sikato. “Siak si Jehova a Dios mo, ya angibangat ed sika na nipaakar ed nabang mo.” Panon itayon nagunggonaan diad pakapikabat ed si Jehova a Dios, say Sankatagyan?​—Salmo 83:18; Isaias 48:17.

Say sakey a peteg a gunggona et say kiwanwan tayo sano aarapen iray inagew-agew a problema, say pakawalaan na mapekder ya ilalo ed arapen, tan mareen a nonot. Niarum ni, pakiwasen itayo na pakapikabat a maong ed si Jehova a bayuboan so duman awawey ed sankaimportantian iran isyu a kidudungetan na amin a totoo ed interon mundo natan. Anto iratan ya isyu?

Kasin Walay Gagala na Bilay Mo?

Anggaman walaray pandinayewan ya inaligwasan na teknolohiya na katooan, itetepet nin siansia na totoo natan so parehon makana a tepetepet ya: ‘Akin a wadia ak? Iner so arapen ko? Anto so gagala na bilay?’ No agmakaromog na makapenek iran ebat so too, anggapoy peteg a kabaliksan na bilay to. Kasin nalilikna na dakel a totoo iyan kakulangan? Imparungtal na surbi a ginawa diad Alemanya nen mansamposampot so dekada na 1990 a kapaldua ed saray atepetan so mabetbet odino sagpaminsan a makakaliknan singa andian na gagala so bilay. Nayarin ontan met so situasyon diad panaayaman mo.

No anggapo so gagala ed bilay, anggapoy pundasyon a pangiletnegan na indibidual na personal iran kalat to. Sasalien na dakel a bawien iyan kakulangan diad pangegemtan na matalonan karera odino diad pampapayaman. Bangbalet, makapagonigon so inkabegtebegtew. Makapaaburido ni ingen parad arum so inkaandian na gagala ed bilay ya anggad punton agda la labay so manbilay. Ontan so alikna na sakey a magangganan marikit ya, unong ed International Herald Tribune et binmaleg “a walaan na dakerakel a kayamanan tan ag-alimitaan a pribilehyo.” Anggaman mayamyaman, sikatoy maer-ermen tan liknaen ton anggapoy gagala na bilay to. Sikatoy nantumar na sleeping pills tan aromog ya inatey. Nayarin walaray kabat mon maer-ermen a totoo a makapasinagem so impatey da.

Balet, nadngel mo ta lan imbaga na totoo a say siensia so makapangipaliwawa ed sikatayo nipaakar ed bilay? Oniay ipapabitar na sinimban Die Woche na Alemanya: “Anggaman nayarin tua so siensia, satan so kulang no nipaakar ed espiritual. Say ebolusyon so ompatnag a makapkapuy,  tan anggan say quantum physics, a katekep toy agnibaga iran panguman-uman, so agmangipapagamor na inawa tan kaligenan.” Akatulong na baleg iray adiskobre na siensia pian nadeskribe so nanduruman klase na bilay tan ipaliwawa iray natural a sikulo tan proseso a manmamantini ed bilay. Balet, agsarag ya ipaliwawa ed sikatayo na siensia no akin a wadia itayo tan no iner so arapen tayo. No say mogmon pandependian tayo et say siensia, saray tepet tayo nipaakar ed gagala na bilay so mansiansian agnaebatan. Say resulta, unong ya inreport na peryodikon Süddeutsche Zeitung et “malaknab a pankaukolan parad panangiwanwan.”

Siopa ni so walad kipapasen a mangiter ed sikatayo na panangiwanwan noag say Manamalsa? Lapud sikato so angipasen ed totoo diad dalin, seguradon amta to no akin a wadia itayo. Ipapaliwawa na Biblia a pinalsa nen Jehova so totoo pian panoen tan asikasoen da so dalin, bilang say manangasikaso ed satan. Diad amin na saray kimey da, kaukolan ya ipatnag na totoo iray kalidad to, a singa say inkahustisya, kakabatan, tan aro. Bektaman a natalosan tayo so rason no akin a pinalsa itayo nen Jehova, naamtaan tayo no akin a wadia itayo.​—Genesis 1:26-28.

Anto so Nagawaan Mo?

Panon to no diad apalabas et agka akaromog na makapenek iran ebat ed saray tepet ya: ‘Akin a wadia ak? Iner so arapen ko? Anto so gagala na bilay?’ Irerekomenda na Biblia a kabaten mon maong si Jehova. Diad tua et inkuan nen Jesus: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti [si] Jesu-Kristo.” Papasesegen ka met a bayuboan so maridios iran kalidad, nagkalalo la say aro, tan gawaen mon personal a kalat so manbilay a manpasakop ed onsasabin Mesianikon Panarian na Dios. Diad ontan et nawalaan ka na gagala ed bilay, tan makapaliket, maligen ya ilalo ed arapen. Saray makanan tepet a mangogonigon ed sika anggad natan so maseguron naebatan.​—Juan 17:3; Eclesiastes 12:13.

Panon a makatulong itan ed sika? Si Hans so makaamta no akin. * Diad apalabas iran taotaon sikatoy walaan na samet lambengat a pananisia ed Dios, balet anggapoy impluensya na pananisia nen Hans ed bilay to. Panggagayagaan nen Hans so druga, imoral a bibii, angkelag a krimen, tan saray motorsiklo. “Balet andian na kabaliksan so bilay, agmet talagan makapenek,” so insalaysay to. Sanen sikato lay man-25 años, nandesisyon si Hans a kabaten ton mismo so Dios diad maseet a pambasa ed Biblia. Sanen akabkabat to si Jehova tan atalosan to no anto so gagala na bilay, inuman nen Hans so kabibilay to tan nampabautismo bilang sakey ed saray Tasi nen Jehova. Sikato lay sigpot-panaon a ministro diad apalabas a samploran taon. Oniay prangkan inkuan to: “Say panlingkor ed si Jehova so sankaabigan a paraan na kabibilay. Anggapo lay mipara ed satan. Awalaan na gagala so bilay ko sanen akabkabat ko si Jehova.”

Siempre, aliwan say gagala na bilay lambengat so isyu a pampapagaan na dakel. Legan ya onuuges so kipapasen ed mundo, ondarakel so totoo a nagogonigon ed sananey nin makanan isyu.

Akin ya Agawa Itan?

Sano walay nagawan mauges, mabetbet ya akasentro so kanonotan na biktima ed sakey a tepet: Akin ya agawa itan? Mandedependin maong so emosyonal a pakatalona ed agawan mauges diad pakawalaan na dugan ebat ed satan a tepet. No anggapoy makapnek ya ebat, mantultuloy so panirap tan say biktima so manermen a maong. Alaen pan alimbawa so eksperiensya nen Bruni.

“Pigaran taon ed apalabas et inatey so melag nin ana’ko,” so insalaysay nen Bruni, a kapegleyay-edad to la ya ina. “Manisia ak ed Dios,  kanian tinmupleg ak ed pari mi pian naligliwa. Inkuan to’d siak ya inala na Dios ed tawen si Susanne, a sikatoy sakey lan anghel diman. Aglambengat akusbo so amin ed bilay ko lapud impatey to noagta binusol ko so Dios lapud impangala To ed sikato.” Nantultuloy so ot-ot tan irap nen Bruni ed loob na pigaran taon. “Asabin impanengneng na sakey ed saray Tasi nen Jehova ed siak manlapud Biblia ya anggapoy rason a busolen ko so Dios. Ag-inala nen Jehova si Susanne ed tawen, tan sikatoy aliwan anghel. Say sakit to et resulta na ag-inkayadyari na too. Si Susanne so nanaugip ed patey, a manaalagar a paolien nen Jehova. Naaralan ko met a pinalsa to so totoo a manayam ed ando lan ando diad paraison dalin, tan magano la iyan nagawa. Sanen atalosan ko no anton klasen persona si Jehova, apaapit ak ed sikato, tan ginmapon kinmepa so ot-ot a naliliknak.”​—Salmo 37:29; Gawa 24:15; Roma 5:12.

Minilyon a totoo so makakasagmak na nanduruman klase na mauges a bengatla: personal a trahedya, bakal, eras, odino kalamidad. Si Bruni so akainawa sanen abasa to ed Biblia ya aliwan si Jehova so natetel ed saray mauges a bengatla, ya agton balot gagala a manirap so katooan, tan magano to lan panganggaen so kaugsan. Say mismon katuaan ya onkakasmak so karelmengan et tanda a manbibilay itayo la ed “saray kaunoran ya agew” na sayan sistema na bengabengatla. Say makapakelaw a pananguman a pirawat tayon amin so magano lan nagawa.​—2 Timoteo 3:1-5; Mateo 24:7, 8.

Pangabkabat ed Dios

Si Hans tan Bruni so datin walaan na samet ya ideya nipaakar ed Dios. Sikatoy panisiaan da anggaman daiset so amta ra nipaakar ed sikato. Sanen angigana iray panaon pian susto ran napikabatan si Jehova, atumangan iray sagpot da. Awalaan ira na makapenek iran ebat ed sankaimportantian iran tepet ed panaon tayo. Saya so angipagamor ed sikara na kareenan na nonot tan maligen ya ilalo ed arapen. Minilyon ed saray lingkor nen Jehova so walaan na ontan met ya eksperiensya.

Say pangabkabat ed si Jehova so onggapo diad pangusisan maong ed Biblia, a mangipapaamta na nipaakar ed sikato tan ed no anto so kakaukolanen to ed sikatayo. Ontan so ginawa na arum nen inmuna a siglo. Inreport na historyador tan doktor a si Lucas a saray membro na Judion kongregasyon ed Berea, Gresya, so ‘angako ed salita [manlapud si Pablo tan Silas] diad sipaparaan a nonot, ya inagew-agew ya inusisa ra so sulat, no peteg so sarayan bengatla.’​—Gawa 17:10, 11.

Saray inmunan siglo a Kristiano so nantitipon met diad saray kongregasyon. (Gawa 2:41, 42, 46; 1 Corinto 1:1, 2; Galacia 1:1, 2; 2 Tesalonica 1:1) Ontan met natan. Saray kongregasyon na saray Tasi nen Jehova so mantitipon para ed saray miting a nikaduman denisinyo pian ontulong ed saray indibidual a napaapit ed si Jehova tan magayagan manlingkor ed sikato. Say pilimog ed saray Tasi ed lugar yo so walaan na kaaruman a gunggona. Lapud saray totoo so kalkalnan makakaalig ed Dios a dadayewen da, saray Tasi nen Jehova so mangipapatnag ed saray kalidad ya ipapatnag a mismo nen Jehova, anggaman diad limitadon paraan. Kanian say pilimog ed saray Tasi so ontulong ed sikatayon nakabat a maong si Jehova.​—Hebreos 10:24, 25.

Kasin singa mairap so pangabkabat ed sakey a Persona? Peteg a kaukolan so pansagpot. Balet agta ontan so nagagawa ed dakel a bengatla ed bilay a labay mon dampoten? Isipen pa so impasyan pampapasal na sakey a maong ya atleta. Alimbawa, say taga Pransya a si Jean-Claude Killy, ya analo na balitok a medalya ed skiing diad Olympics, so analambit ed no anto so kaukolan pian magmaliw a matalonan milalaban diad internasyonal ya isport: “Kaukolan kan onggapo na 10 taon antis na pikontis tan iplano itan diad loob na taotaon tan isipen itan ya inagew-agew . . . Satan so trabaho ed loob na 365 ya agew ed sakey taon, diad mental tan pisikal a  paraan.” Amin itan a panaon tan sagpot et para labat ed pilaslasan ed galaw a nayarin manbayag na samploy minuto! Agaylan nagkalalo​—tan mas manbayag​—so nagunggona diad pangabat ed si Jehova.

Relasyon a Lalon Napaapit

Siopa so agmalabay a nawalaan na bengatlan importante ed bilay? Anggapo. Kanian, sano nalikas mon anggapoy gagala na bilay mo odino pirawat mon nipaliwawa ed sika no akin a nagagawa so mauges a bengatla, sirin et panggunaetan mon kabaten si Jehova, say Dios dia ed Biblia. Say pakapikabat ed sikato so magnayon a mamaaligwas ed bilay mo.

Kasin ontunda so panagaral tayo nipaakar ed si Jehova? Saramay manlilingkor ed sikato diad loob la na dakel a taon so siansian mankelaw ed naaralan da tan ed saray bengatlan mantutultuloy dan naaaralan nipaakar ed sikato. Say pakaamta ed saratan a bengatla so mamapaliket tan mamapaapit ed sikatayo ed Dios. Komon ta onabobon itayo ed kanonotan nen apostol Pablo, ya angisulat: “O say kaaralman na kayamanan na kakabatan tan pakaamta na Dios! Agaylan agnausisa a kanonotan to, tan agnatebek ira a dalan to! Ta siopa ta so akatalos na kanonotan na Katawan? Ono siopa so mananimbawa to?”​—Roma 11:33, 34.

[Paimano ed Leksab]

[Blurb ed pahina 5]

Itetepet nin siansia na saray indibidual so parehon makanan tepetepet ya: ‘Akin a wadia ak? Iner so arapen ko? Anto so gagala na bilay?’

[Blurb ed pahina 6]

“Sanen atalosan ko no anton klasen persona si Jehova, apaapit ak ed sikato”

[Blurb ed pahina 7]

“Say panlingkor ed si Jehova so sankaabigan a paraan na kabibilay. Anggapo lay mipara ed satan. Awalaan na gagala so bilay ko sanen akabkabat ko si Jehova”