Yehova un Dios Ku Ta Bale la Pena Konosé

TA POSIBEL ku bo ta pèrdiendo algu hopi importante den bida? Esei sigur lo ta e kaso si bo no sa mashá di Dios. Dikon? Pasobra manera miónes di hende a bin komprondé, un konosementu di e Dios di Beibel ta trese gran benefisio den bida. E benefisionan ta kuminsá mesora i nan ta duradero.

Yehova Dios, e Outor di Beibel, kier pa nos siña konos’é. El a bisa mediante profeta Isaías: “Pa boso konosé mi i kere mi.” E ta asta bisa ku si nos konos’é, esei lo ta pa nos mes bon. “Ami ta SEÑOR bo Dios, Kende ta siña bo, pa bo prosperá.” Ki benefisio nos ta saka dor di konosé Yehova Dios, e Haltísimo?—Isaías 43:10; 48:17; Salmo 83:18.

Un berdadero benefisio ta ku nos ta haña guia pa trata ku problemanan di tur dia, un speransa firme pa futuro i pas mental. Ademas, ora nos konosé Yehova bon esei ta motivá nos pa kultivá un aktitut diferente pa ku e preguntanan di mas importante ku hende rònt mundu ta konfrontá awe. Kua esakinan ta?

Bo Bida Tin Propósito?

Apesar di avansenan asombroso den teknologia, ainda tin hende ta hasi nan mes e mesun preguntanan básiko: ‘Pakiko mi ta aki? Unda mi ta bai? Kiko ta e propósito di bida?’ Si un persona no haña kontesta satisfaktorio riba e preguntanan aki, su bida no tin berdadero propósito. Tin hopi hende ku e problema aki? Un estudio ku nan a hasi na Alemania na kabamentu di siglo 20 ta mustra ku mitar dje personanan ku a kontestá sa sinti hopi bes òf de bes en kuando ku bida no tin propósito. Kisas kaminda bo ta biba tambe ta asina.

Un persona ku no tin un propósito den bida, no tin nada p’e basa su metanan personal ariba. Hopi hende ta purba yena e bashí aki dor di buska un karera eksitoso òf dor di akumulá rikesa. Sin embargo, e bashí ei por sigui molestiá nan. E echo ku un persona no tin propósito den bida por molestiá algun hende asina tantu ku nan no kier biba mas. Esei tabata e eksperensia di un bunita mucha muhé ku segun International Herald Tribune a lanta “den un abundansia fabuloso ku a dun’é tur sorto di derecho i privilegio.” Ounke e tabata biba den luho, e tabata sintié su so i ku su bida no tabatin propósito. El a bebe píldora pa drumi i nan a bin hañ’é morto. Podisé bo tambe konosé algun hende ku tabata sufri di soledat i ku a muri un morto trágiko.

Sin embargo, bo a yega di tende hende bisa ku siensia por bisa nos tur kos tokante bida? E korant semanal di Alemania, Die Woche, ta indiká: “Ounke siensia por tin rason, pa loke ta kosnan spiritual e ta defisiente. E teoria di evolushon ta yen di buraku, i ni sikiera e siensia di físika ku tur su variabelnan impredisibel no ta duna hende ningun klase di konsuelo òf siguridat.” Deskubrimentunan  sientífiko a kontribuí hopi na deskribí bida den su vários formanan i pa splika e prosesonan i siklonan natural ku ta konserbá bida. Tòg siensia no por bisa nos pakiko nos ta aki ni unda nos ta bai. Si ta riba siensia so nos ta dependé, nos preguntanan tokante e propósito di bida ta keda sin kontesta. I manera e korant Süddeutsche Zeitung a informá, esei ta pone ku tin “un nesesidat ekstenso pa guia.”

Ken ta den mihó posishon pa duna e guia ei, ku no ta e Kreadó? Siendo ku ta e ta esun ku originalmente a pone hende riba tera, e mester sa dikon nan ta aki. Beibel ta splika ku Yehova a krea hende pa nan por a yena e tera i kuid’é. Den tur nan aktividatnan, hende mester a reflehá e kualidatnan di Dios, manera hustisia, sabiduria i amor. Unabes nos ta komprondé pakiko Yehova a krea nos, nos sa pakiko nos ta aki.—Génesis 1:26-28.

Kiko Abo Por Hasi?

Kiko si den pasado bo no a haña kontesta satisfaktorio riba e siguiente preguntanan: ‘Pakiko mi ta aki? Unda mi ta bai? Kiko ta e propósito di bida?’ Beibel ta animá bo pa siña konosé Yehova íntimamente. De echo, Hesus a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” Tambe bo ta ser animá pa kultivá kualidatnan di Dios, foral amor, i pone komo bo meta personal pa biba bou di su binidero Reino Mesiániko. E ora ei lo bo tin un propósito den bida i un speransa maravioso i garantisá pa futuro. Tin hopi chèns ku lo bo haña kontesta riba tur e preguntanan fundamental ku a konfundí bo te awor.—Huan 17:3; Eklesiástes 12:13.

Kuantu diferensia e kontestanan aki por hasi? Hans ta un hòmber ku por bisa bo esei. * Añanan pasá e tabata kere leu ayá den Dios, pero su fe no tabatin niun efekto riba su bida. E tabata gusta usa droga, anda ku muhénan inmoral, kometé krímennan leve i kore motersaikel. “Pero mi bida tabata bashí, mi no tabatin berdadero satisfakshon,” e ta splika. Ora Hans tabatin bint’i piku aña, el a disidí di siña konosé Dios personalmente dor di tuma su tempu pa lesa Beibel. Unabes ku el a siña konosé Yehova íntimamente i a komprondé kiko ta e propósito di bida, Hans a kambia su estilo di bida i a batisá komo Testigu di Yehova. E último dies añanan aki el a traha den e sirbishi di tempu kompletu. E ta bisa frankamente: “E mihó manera pa biba ta sirbiendo Yehova. No tin nada ku por para banda di esei. Konosé Yehova a duna mi bida propósito.”

Klaru ku e propósito di bida no ta e úniko kos ku ta preokupá hopi hende. Segun ku e kondishonnan di mundu ta bai atras, mas i mas hende ta preokupá ku un otro asuntu importante.

Dikon Esaki A Sosodé?

Na momentu di kalamidat, hopi bes e víktimanan ta hasi nan mes e pregunta: Dikon esaki a sosodé? E abilidat pa trata emoshonalmente ku kalamidat ta dependé hopi di si e víktima por haña un bon kontesta pa e pregunta ei. Si no tin un kontesta satisfaktorio, e víktima ta sigui sufri i e por bira amargá. Tuma por ehèmpel e eksperensia di Bruni.

Bruni, awor un mama di kuarent’i piku aña, ta splika: “Algun aña pasá mi beibi a muri. Dor ku mi tabata kere den Dios, mi a bai buska konsuelo serka pastor. El a bisa mi ku Dios a tuma Susanne den shelu, i ku awor e ta un anguelitu einan. Henter mi mundu a kai den otro ku morto di mi yu, i awor mi a  kuminsá odia Dios tambe pasobra t’e a kita mi yu for di mi.” Bruni su doló i sufrimentu a dura vários aña. El a kontinuá: “Despues, un Testigu di Yehova a mustra mi for di Beibel ku mi no tabatin motibu pa odia Dios. No ta Yehova a tuma Susanne p’e bai shelu, ni e no a bira angel tampoko. Su malesa tabata resultado di imperfekshon humano. Susanne ta sosegá den morto, sperando riba Yehova p’e resusit’é. Tambe m’a siña ku Dios a traha hende pa biba pa semper den un paradeis riba tera, i ku su boluntat lo ser realisá pronto. Unabes mi a kuminsá komprondé ki klase di persona Yehova realmente ta, mi a hala mas serka dje, i mi doló a kuminsá mengua.”—Salmo 37:29; Echonan 24:15; Romanonan 5:12.

Miónes di hende ta ser afektá dor di kalamidat di un òf otro manera: tragedia personal, guera, hamber òf desaster natural. Bruni a haña alivio unabes ku el a haña sa for di Beibel ku Yehova no ta kulpabel pa kalamidat, ku nunka no tabata su intenshon pa hende sufri, i ku pronto lo e pone fin na maldat. E echo so ku maldat ta oumentando ta un señal ku aktualmente nos ta bibando den “e último dianan” di e sistema di kosnan aki. E kambio dramátiko ku lo trese algu mihó ku nos tur ta anhelá ta hopi serka.—2 Timoteo 3:1-5; Mateo 24:7, 8.

Siña Konosé Dios

Hans ku Bruni tabatin un idea vago di Dios. Nan a kere den dje sin ku nan tabata sa muchu kos di dje. Ora ku nan a tuma tempu pa haña un konosementu eksakto di Yehova, nan esfuersonan a duna fruta. Nan a haña kontestanan apropiá pa e preguntanan di mas importante pa nos tempu. Esaki a duna nan pas mental i un speransa sigur pa futuro. Miónes di sirbidó di Yehova a eksperensiá mesun kos.

Bo ta siña konosé Yehova dor di kuminsá lesa i analisá Beibel, e buki ku ta konta nos tokante dje i loke e ta rekerí di nos. Esaki ta loke algun hende den e promé siglo a hasi. Lukas, historiadó i dòkter, a informá ku e miembronan dje kongregashon hudiu na Berea, Gresia, “a risibí e palabra [for di Pablo i Silas] ku bon boluntat i tabata skrudiñá e Skrituranan tur dia, pa mira si e kosnan aki tabata asina.”—Echonan 17:10, 11.

Tambe e kristiannan di promé siglo a reuní huntu den kongregashon (òf iglesia). (Echonan 2:41, 42, 46; 1 Korintionan 1:1, 2; Galationan 1:1, 2; 2 Tesalonisensenan 1:1) Esei ta e kaso tambe awe. Kongregashonnan di Testigunan di Yehova ta bini huntu pa reunionnan prepará spesialmente pa yuda hende hala serka Yehova i haña goso den sirbié. Asosiashon ku Testigunan lokal tin mas benefisio. Pokopoko un hende ta kuminsá parse e Dios ku e ta adorá mas i mas. Meskos tambe, maske ta den un sentido limitá, Testigunan di Yehova ta desplegá kualidatnan ku Yehova ta manifestá. P’esei si nos ta reuní huntu ku e Testigunan, nos lo siña konosé Yehova mas mihó ainda.—Hebreonan 10:24, 25.

Bo ta haña ku esaki ta eksigí muchu esfuerso djis pa bo konosé ún Persona? Un kos ta sigur, e ta rekerí esfuerso. Pero esei no ta asina tambe den kaso di hopi kos ku bo kier logra den bida? Pensa riba e esfuerso ku un gran deportista ta hinka den training. Por ehèmpel, e ganadó di medaya di oro pa ski den e Olimpiada di Fransia, Jean-Claude Killy, ta konta kuantu esfuerso bo tin ku hasi pa logra éksito den kompetensianan internashonal di deporte: “Bo tin ku kuminsá 10 aña promé ku e olimpiada i plania aña tras aña pensando tur dia riba dje . . . E ta un empleo di 365 dia pa aña, mentalmente i físikamente.” Tur e tempu i esfuerso ei ta pa bo djis kompetí den  un kareda ku por dura solamente dies minüt! Loke nos por logra dor di siña konosé Yehova ta hopi mas tantu, i ta asta mas duradero.

Un Relashon Ku Ta Bira Mas i Mas Estrecho

Ken kier pèrdè algu importante den bida? Niun hende. P’esei, si bo ta sinti ku bo bida ta falta berdadero propósito òf bo ta anhelá pa un splikashon pakiko tin kalamidat, determiná firmemente pa siña konosé Yehova, e Dios di Beibel. Si bo siña di dje esei por hasi hopi kambio den bo bida, kambionan positivo i pa semper.

Nos lo stòp di siña tokante Yehova un dia? Hende ku tin dékadanan ta siña tokante Yehova ainda ta keda strañá di kosnan ku nan a siña di dje i di e kosnan nobo ku nan ta sigui siña di dje. Ora nos siña di kosnan asina nos ta bira felis i e ta hala nos mas serka Dios. Laga ku nos tambe por ripití e pensamentunan di apòstel Pablo, kende a skirbi: “O profundidat di e rikesanan, tantu di e sabiduria komo di e konosementu di Dios! Ki inskrudiñabel su huisionan ta i insondabel su kamindanan! Pasobra ta ken a konosé e mente di SEÑOR, òf ta ken a bira su konsehero?”—Romanonan 11:33, 34.

[Nota]

[Plachi na página 5]

Ainda tin hende ta hasi nan mes e mesun preguntanan básiko: ‘Pakiko mi ta aki? Unda mi ta bai? Kiko ta e propósito di bida?’

[Plachi na página 6]

“Unabes mi a kuminsá komprondé ki klase di persona Yehova realmente ta, mi a hala mas serka dje”

[Plachi na página 7]

“E mihó manera pa biba ta sirbiendo Yehova. No tin nada ku por para banda di esei. Konosé Yehova a duna mi bida propósito”