Yahova Ndiye Mulungu wodikana kumudziwa

KO MUNKUPHONYESA vinthu vinango vodikana maninge pa moyo? Ngati muchadziwa vinthu ving’onong’ono pa nkhani ya Mulungu, ndiye kuti munkuphonya. Ndawa chani? Ndawa kudziwa Mulungu wa m’Baibolo, ninge wanthu azinji achawonera, kuchabweresa phindu ikulu pa moyo. Ndipo phindu mweyi ikandoyamba nthawe mweyo ichakhalapo mpaka kalekale.

Yahova Mulungu, munikachiro wa Baibolo, ankufuna kuti timudziwe. Wamasalimo adanemba kuti: ‘Kuti adziwe kuti imwe mwekha, dzina yanu ndimwe Yahova, ndimwe Wandzulundzulu padziko yose yapasi.’ Iye achadziwa kuti ndise womwe tichaphindula tikamudziwa. ‘Ine Yahova ndine Mulungu wanu, yemwe nichakupfunzisani kuti vinthu vikufambireni bwino.’ Ko tichaphindula tani tikadziwa Yahova Mulungu, Wandzulundzulu?—Salimo 83:18; Yesaya 48:17.

Phindu ibodzi yomwe tichaigumana niyakuti tichagumana malangizo yomwe yangatithandize pomwe tikagumana na mabvuto ntsiku na ntsiku, tichadikhira motsimikiza vinthu vabwino vantsogolo ndipo tichakhalasoti na ntendere wa mumtima. Ndiposoti, kumudziwa bwino maninge Yahova kuchatichitisa kukhala na maganizo yanyowani pa nkhani zodikana, zomwe wanthu ankugumana nazo ntsiku zino padziko yose yapasi. Ko ni nkhani ziponi zimwezi?

Ko moyo wanu unacholinga?

Podiya kuti wanthu wayenda patsogolo maninge pa vinthu vomwe ankuvikonza, ntsiku zino wanthu anango achabvunza mibvunzo yabodzi na yabodzi, ninge yakuti: ‘Ndawa chani ninamoyo? Ko tsogolo yangu iri tani? Ko chakulinga cha moyo nchani?’ Peno munthu achagumana midawiro yofika pa moyo, iye achakhala alibe chakulinga chaicho cha moyo. Ko wanthu azinji achaona kuti anabvuto mweyi? Kafukufuku yemwe adachitika ku Alemanha kumamaliziro kwa magole ya 1990 adawonesa kuti 50% ya wanthu womwe adabvunziwa nthawe zizinji adawona kuti moyo ulibe cholinga. Panango virimbo teno kwamuchakhala.

Kukhala alibe cholinga pa moyo, munthu achakhala alibe maziko yolimba bwinobwino yomwe achamangapo volinga vake. Anango wayesa kumalisa bvuto mweyi mwa kupfunzira basa za padzulu maninge panango kukhala na chuma. Koma kukhala ulibe cholinga kungakhale koshupa. Kukhala ulibe cholinga kukhumudwisa anango mwakuti afika posafunambo kukhala na moyo. Vimwevi ndivo vomwe vidachitikira ntsikana munango wokhuza. Mobverana na vomwe jornal International Herald Tribune, iye adalerewa “pa muyi pomwe penze chirichose komasoti wenze na mwayi wochita vinthu vizinji.” Olo kuti wenze na vose vodikana pa moyo, iye wenze na chungululu ndipo iye ambaona kuti moyo wake wenze ulibe cholinga. Iye adamwa mapiritsi yogonesa tulo ndipo adamugumana wafa. Panango muwadziwa wanthu anango wa chungululu womwe adamwalira mobvesa ntsisi.

Koma, ko mwabvapo wanthu anango ankunena kuti sayantsi ingatifotokozere vose vokhudza moyo? Jornal ya sondo na sondo yaku Alemanha Die Woche idati: “Olo kuti sayantsi ingambalewe chaivo, ilibe malangizo yokhudza nkhani zauzimu. Chikhulupiriro chakuti wanthu na nyama zinango vidachita kuchinja kuchokera ku vinthu vinango, ni vosakhutirisa, komasoti olo sayantsi yodziwa vinthu vizinji maninge yomwe mpfundo zake zimbandochinjachinja ni yosalimbikisa komasoti ichathandizalini khukhala na moyo wabwino.” Vomwe wa sayantsi wagumana vathandiza maninge pakufotokoza makhaindi yosiyanasiyana ya vinthu va moyo na kufotokoza momwe vinthu va chirengedwe vichafambira na vinthu vomwe vichathandiza kuti moyo upitirize kukhalapo. Koma, sayantsi ingatiuzelini va moyo komasoti momwe tsogolo yathu iriri. Peno tichadalira sayantsi maninge, mibvunzo yathu yokhudza cholinga cha moyo yadzadawiriwelini. Mobverana na jornal ya Süddeutsche Zeitung idanenera, mapeto yake ni yakuti wanthu azinji achasowa chinthu chakuti chiwatsogolere.”

Ko pali munango yemwe angatitsogolere kuposha Mulengi? Pakuti iye pakuyamba adayika wanthu padziko yapasi, iye ndiye yemwe achadekana kudziwa ndawa yake wanthu mwawo anamoyo. Baibolo ichafotokoza kuti Yahova adalenga wanthu kuti akhale pa dziko ya pasi na kukhala wonyang’anira. Mu vochita vawo vose, wanthu angadikana kuwonesa makhalidwe yake ninge chilungamo, nzeru na chikondi. Tikadziwa ndawa yake Yahova adatirengera tichadziwa ndawa yake tinamoyo.—Genesis 1:26-28.

Ko mungachite tani?

Tani peno mu nthawe ya m’mambuyo umu mulibe kugumana midawiro yokhutirisa ya mibvunzo yakuti: ‘Ndawa chani ninamoyo? Ko tsogolo yangu iri tani? Ko chakulinga cha moyo nchani?’ Baibolo ichanena kuti muchadekana kumudziwa bwino maninge Yahova. Ndipo, Yesu adati: ‘Pakuti moyo wosapera adzaugumane akambapfunzira na kudziwa va imwepo Mulungu chaiye, na va Yesu Khrisitu yemwe imwepo mudamutuma.’ Munkulimbikisiwa pomwe kukhala na makhalidwe ya Mulungu, makamaka chikondi, ndipo chikhale cholinga chanu kuti mudzakhale mu Ufumu wa Mesiya wa Mulungu yemwe unkubwera. Ndipo chikhale chakulinga pa moyo wanu ndiposoti tsogolo yokondweresa na yotsimikizirika. Mibvunzo yodikana maninge yomwe yakushupisani m’mbuyo umu mosakayikira yadzadawiriwe.—Yohane 17:3; Mlaliki 12:13.

Ko midawiro ya mibvunzo yodikana mwayo yadzakukhudzeni tani? Hans ankudziwa. a Magole yapita ambakhulupirira Mulungu pang’ono, koma chikhulupiriro chake chimbakhudzalini moyo wake. Hans ambakonda kuphatisira basa mankhwala yosokoneza nsolo, akazi wa chigololo, chiwawa na kuchita masenzeka ya mahonda. Iye adati: “Koma moyo wenze alibe chakulinga, wosakondweresa bwinobwino.” Pewenze na magole pafupifupi 25 Hans ambafuna kudziwa Mulungu bwinobwino mwa kulewenga Baibolo mosamala. Padamudziwa bwino Yahova na kudziwa cholinga cha moyo, Hans adachinja makhalidwe yake ndipo adabatiziwa nkukhala m’bodzi wa Mboni za Yahova. Iye wakhala ankuchita utumiki wanthawe zose kwa magole 10 yapita. Iye moona ntima adati: “Kutumikira Yahova ndicho chinthu chabwino maninge pa moyo wa munthu. Palibe chirichose chomwe chingalingane na vimwevi. Kudziwa Yahova kwachitisa moyo wangu kukhala na cholinga.”

Mwavinkuonekera, chakulinga cha moyo ndiyo yokha nkhani yomwe ichachitisa kuti wanthu ambakhale na nkhawa zizinji. Pomwe vinthu mudziko vinkuyipiraipira, wanthu azinji achashupika na nkhani inango pomwe yodikana.

Ndawa chani vimwevi vidachitika?

Tsoka ikachitika, wanthu womwe wakhudziwa achakhala na nbvunzo wakuti: Ndawa chani vimwevi vidachitika? Kushupika kupirira ndawa ya tsoka, kuchathemba kugumana n’dawiro wa nbvunzo muyu. Peno n’dawiro wofika pa moyo unkugumanikalini, mabvuto yachapitiriza kukhalapo ndipo womwe wakhudziwa angashupike maninge mumtima. Mwakulinganiza, onani vomwe vidachitikira Bruni.

“Bruni yemwe manje ni mayi wachikulire adati: “Magole yanganani yapita mwana wangu nkazi kacheche adamwalira. Pakuti nimbakhulupirira Mulungu nidakumbira wantsembe wa mudera yathu kuti anithandize. Iye adaniuza kuti Mulungu adamutenga Susanne kuyenda naye kudzulu pomwe iye manje ni mngelo. Ndawa ya kumwalira kwake, vinthu vose m’moyo mwangu vidasokonezeka ndipo nidamuzonda Mulungu ndawa yakuti adamutenga.” Kwa magole yanganani Bruni adapitiriza kuwawiwa moyo na kushupika. “Ndipo wa Mboni za Yahova adaniuza mwakuniwonesa m’Baibolo kuti palibe chifukwa chozondera Mulungu. Yahova alibe kutenga Susanne kuyenda naye kudzulu ndipo iye ni mngelo lini. Iye adadwala ndawa ya kusowa ungwiro kwa wanthu. Susanne ali mu tulo twa impfa, podikhira kuti Yahova adzamumukise. Nidapfunzira soti kuti iye adakonza wanthu kuti adzakhale na moyo mpakana kalekale mparadaiso pa dziko ya pasi, ndipo vimwevi vichitike manjemanje. Pomwe nidayamba kudziwa kuti Yahova ni wotani, nidafendera kwa iye ndipo kuwawiwa ntima kwangu kudayamba kuchepa.”—Salimo 37:29; Machitidwe 24:15; Aroma 5:12.

Wanthu azinji achakhudziwa na kushupika na njira zosiyanasiyana. Olo mabvuto yokhudza iwo wokha, nkhondo, njala panango matsoka ya chilengedwe. Ntima wa Bruni udakhala pasi padadziwa kuchokera m’Baibolo kuti Yahova ndiyelini achachitisa mabvuto, chenzelini chakulinga chake kuti wanthu ambabonere. Ndipo manjemajepa amalise mabvuto. Kuyingizirika kwa vinthu voyipa ni chizindikiro chakuti manje tinkukhala ‘m’masiku yomalizira’ yadongosolo ino ya vinthu. Kuchinja kukulu kwa vinthu kukhala vabwino komwe ise tose tichada kuli pafupi kuchitika.—2 Timoteyo 3:1-5; Mateyu 24:7, 8.

Kumudziwa Mulungu

Hans na Bruni ambamudziwa Mulungu pang’ono. Iwo ambamukhulupirira koma ambadziwalini vijinji va iye. Padakhala na nthawe ya kumudziwa bwinobwino Yahova, khama yawo idaphindula. Iwo adagumana midawiro ya mibvunzo yodekana yomwe yaliko ntsiku zino. Vimwevi vidawachitisa kukhala na mtendere wa muntima na kudikhira vinthu vabwino va kutsogolo. Vimwevi vachitikira pomwe atumiki wa Yahova mamidyau yazinji.

Kudziwa Yahova mosamala mwa kuyamba kupfunzira Baibolo, yomwe ichatiuza va iye na vomwe achada kwa ise. Mwevi ndivo anango adachita m’magole 100 yoyambirira ya nthawe yathu ino. Luka, wonemba vochitika vakalekale adanemba kuti wanthu wa mumpingu wa Bereya, mu dziko ya Grécia, ‘adatambira mawu [kwa Paulo na Sila] na kufunisisa na moyo wose, na kusinkhasinkha Malemba mwayo ntsiku zose, ngati nivokwanisika.’—Machitidwe 17:10, 11.

Akhrisitu wa m’magole 100 yoyambirira wa munthawe yathu ino ambasonkhana soti mumipingu. (Machitidwe 2:41, 42, 46; 1 Akorinto 1:1, 2; Agalatiya 1:1, 2; 2 Atesalonika 1:1) Vimwevi vinkuchitika soti ntsiku zino. Mipingu ya Mboni za Yahova yachasonkhana pabodzi pamisonkhano yomwe yakonzewa makamaka na chakulinga cha kuthandiza wanthu kufendera kwa Yahova na kukondwa pakumutumikira. Kusonkhana na Mboni za Yahova za mu dera yanu kuna phindu inango pomwe. Pakuti wanthu pang’ono na pang’ono achalingana na Mulungu yemwe achamutumukira, Mboni za Yahova zichawonesa, olo pavinthu ving’onoving’ono, pa makhalidwe yomwe Yahova achayawonesa. Ndipo mwapa, kusonkhana na wa Mboni za Yahova kuchatithandiza kumudziwa bwino Yahova.—Aheberi 10:24, 25.

Ko vimwevi vinkuwonesa kuti ni chibasa chikulu chakundofuna kudziwa munthu m’bodzi yekha basi? Khama ni yodikana. Koma ko nchibodzibodzilini na vinthu vizinji vomwe tichada kukhala navo pa moyo? Ganizirani khama yomwe wamasenzeka wobvekera achakhala nayo pakukonzekera. Mwakulinganiza, Jean-Claude Killy shasha wa mpikisano wa olimpiko wa ku França, yemwe adawina mphaso ya golide adafotokoza vomwe munthu achadekana kuchita kuti ambakhale ankuwina. Iye adati: “Munthu achadekana kukhala ankukonzekera kwa magole 10 nthawe ikalibe kufika ndipo akonzekeretu vimwevi kwa magole yazinji na kumbaganizira mpikisano ntsiku iriyose . . . Na basa ya ntsiku zose zokwana 365 pagole, yomwe munthu achadekana kuyikumbukira na kuiphatiratu.” Nthawe yose mweyi achachita khama kuti adzatenge nawo mbali pamasenzeka yomwe panango yandodzamala minutu 10 basi. Manje tani na chinthu chodikana na chokhalisa maninge chomwe mungachigumane mwa kumudziwa Yahova!

Ushamwali womwe uchapitiriza kukula

Ko ni mbani yemwe ankufuna kuphonya chinthu chofunika maninge pa moyo? Palibe. Ndipo mwapa, peno muwona kuti moyo wanu ulibe cholinga panango peno munkufuna kudziwa ndawa yake mabvuto yatichitikira, tsimikizirani muntima mwanu kumudziwa Yahova. Kupfunzira va iye kudzachinje moyo wanu kuti ukhale wabwino mpakana kalekale.

Ko padzakhale nthawe yomwe tidzasiye kupfunzira va Yahova? Wanthu womwe wakhala ankupfunzira nthawe itali achakhala wodabwa akaona vinthu vomwe ankupfunzira, komasoti vinthu vinyowani vomwe ankupitiriza kupfunzira. Kupfunzira vinthu vimwevi kuchatichitisa kukhala wokondwa na kumufenderera Yahova. Naboni tilinganize vimwevi na nkhani ya Paulo, yomwe adainemba kuti: ‘Iye ananzeru zapadzulu ndiposoti ni wodziwa vinthu maninge. Viweruzo vake ni vosawerengeka. Pakuti mbani ankudziwa maganizo ya Yahova, ndipo mbani angamupase malangizo?’’—Aroma 11:33, 34.

[Mawu ya m’nyantsi]

[Mawu yokopa chidwi ya tsamba]

Wanthu anango achabvunza mibvunzo yabodzi na yabodzi, ninge yakuti: ‘Ndawa chani ninamoyo? Ko tsogolo yangu iri tani? Ko chakulinga cha moyo nchani?’

[Mawu yokopa chidwi ya tsamba]

“Panidayamba kudziwa kuti Yahova ali tani, nidayamba kumufenderera”

[Mawu yokopa chidwi ya tsamba]

“Kutumikira Yahova ni chinthu chabwino maninge pa moyo wa munthu. Palibe chilichose chingalingane na vimwevi. Kudziwa Yahova kwachitisa moyo wangu kukhala na chakulinga”