Jehová Diosta rejseyqa mayta yanapawasunman

ICHAPIS ashkha runas jinallataj, mana sonqo juntʼasqachu kausakunki. Jina kajtin, Diosta rejsiy yanapasunkiman. Payta rejseyqa mana kay tiempollapichu yanapasonqa, manaqa aswan qhepamanpis.

Jehová Diosqa payta rejsinanchejta munan. Chayrayku Bibliata ruwacherqa. Chaypitaj uj salmista jinata qhelqarqa: “Runasqa yachachunku sutiyki Jehová kasqanta. Runasqa yachachunku, qanllamin Aswan Patapi kaj Dios kasqaykita, tukuy jallpʼantinpi”, nispa. Diosqa yachan payta rejseyqa, allinninchejpaj kasqanta. Chayrayku niwanchej: “Noqa Jehová Diosniyki kani, noqa yachachiyki imachus qanpaj allin kasqanta”, nispa. ¿Imaynatá Jehová Diosta rejsiy yanapawanchej? (Salmo 83:18; Isaías 48:17).

Diosta rejseyqa llakiykunasninchejta aguantanapaj yanapawanchej, sonqo tiyasqa kanapajpis. Chantapis payta rejsispaqa, sumaj kausayta suyakuyta atisunman. Mana chayllachu, imastachus ashkha runas kausaymanta yachayta munanku, chaytapis yachasunman. ¿Mayqenkunataj chaykuna kanku?

¿Imapajtaj kausashanchej?

Runasqa ashkha imaspi ñauparinku, tʼukuna imastataj ruwanku. Jinapis imapajchus kausashasqankuta yachayta munallankupuni. Mana chayta yachaspaqa, qhasillapaj kausashasqankuta yuyanku. ¿Ashkha runaspunichu jinata yuyanku? 1997 watapi, Alemania llajtamanta ashkha runasta kausaymanta tapurisqanku. Paykunamanta khuskan jinapunitaj nisqanku, wakin kutis qhasillapaj kausashasqankuta yuyasqankuta. Ichá llajtaykipipis, wakin runas jinallatataj yuyanku.

Imapajchus kausashasqanchejta mana yachaspaqa, imatachus kausayninchejwan ruwananchejta mana yachasunmanchu. Chayrayku ashkha runas sumaj profesionniyoj kayta maskʼanku, chayri qolqeta maskʼayman qokunku. Jinapis mana kusisqachu kausanku. Wakenqa niña kausaytapis munankuchu. Uj revista 31 watayoj warmimanta parlarqa. Chay warmeqa manchay qhapaj familiapi uywakusqa. Jinapis sapitallan kashasqanta yuyarqa, manataj yacharqachu imapajchus kausashasqanta. Chayrayku mana kusisqachu kausarqa, wañuchikorqataj. Ichá qanpis ajinata wañuchikoj runasta rejsillankitaj.

Wakin runasqa ninku, cientificosqa tukuy imata willayta atiwasqanchejta. Jinapis Alemaniamanta uj revista, jinata nin: “Cientificosqa ashkha imasta yachachiwanchej. Jinapis Diosmanta, imaynatachus kausanamantapis mana yachachiyta atiwasunmanchu. Evolucionmanta yachachiy, cientificospa waj yachachiykunasninkupis, mana sonqochawasunmanchu, nitaj kusisqa kausanapaj yanapawasunmanchu”, nispa. Jinapunitaj, cientificosqa ashkha imasta yachanapaj yanapawanchej. Jinapis mana niyta atiwanchejchu, imaraykuchus kausashasqanchejta. Cientificoslla tukuy imata yachachinawanchejta suyasunman chayqa, mana yachasunmanchu imapajchus kausashasqanchejta. Alemaniamanta uj periódico nin: “Chayrayku runasqa, pipis ñanta rikuchinawanchejta necesitanchej”, nispa.

Diosnillanchejtaj chay ñanta rikuchiwanchej. Imaraykuchus pay ruwawarqanchej, kay jallpʼamantaj churawarqanchej. Chayrayku paylla willawasunman imapajchus kausashasqanchejta. Bibliaqa nin, Jehová Diosqa kay jallpʼata ruwasqanta, runas chaypi tiyakunankupaj, cuidanankupajtaj. Chantapis Diosqa runasta payman rijchʼakojta ruwarqa. Chayrayku pay jina cheqan kajta ruwayta munanchej, yachayniyoj, munakuyniyojtaj kanchej. Imapajchus Jehová Dios ruwawasqanchejta yachaspaqa, imapajchus kausashasqanchejta entiendesun (Génesis 1:26-28).

¿Imatá ruwasunman?

Imapajchus kausashasqanchejta mana yachanchejchu chayqa, Bibliaqa niwanchej Jehová Diosta rejsinanchejta. Jesús nerqa: “Kaymin wiñay kausayqa: Qan kʼata cheqa Diosta rejsisunanku, kachamusqayki Jesucristotapis”, nispa. Bibliaqa nillawanchejtaj, munakuyniyoj kanata, Diospa Gobiernonpi kausanapaj kallpachakunanchejta ima. Jinamanta mana qhasipajchu kausasun, sumaj kausaytataj suyakusun. Chantapis imapajchus kausashasqanchejta yachasun (Juan 17:3; Eclesiastés 12:13).

Chayta yachay, ¿yanapawanchejchu? Juanpa kausayninmanta parlarina. * Juanqa Diospi creespapis mana payta valechejchu. Astawanpis drogakoj, khuchichakoj, suwakoj, motoswan purispataj tiemponta usuchej. Pay nin: “Ni ima ruwasqay kusichiwajchu. Qhasillapaj kausashasqayta piensarqani”, nispa. Jinapi 25 watasniyoj kashaspa, Diosta rejsiyta munarqa. Chayrayku Bibliata leeyta qallarerqa. Chay jinamanta Jehová Diosman qayllaykorqa, imapajchus kausashasqantapis entienderqa. Chantá kausayninta cambiarqa, bautizakorqataj. Kunanqa chunka watastaña Diospaj tukuy atisqanta llankʼashan. Juan nin: “Jehová Diosta sirveyqa, ni imawan kikinchakunchu. Payta rejsisqayrayku, niña qhasipajchu kausashasqayta yachani”, nispa.

Jinapis, ¿imapajchus kausashasqallanchejtachu yachayta munanchej? Mana. Kay mundo sapa kuti astawan sajrayasqanrayku, imaraykuchus ajinata sufrishasqanchejta yachayta munallanchejtaj.

¿Imaraykutaj sufrinchej?

Ima llakiypipis rikhurispaqa ninchej: “¿Imaraykutaj noqamanpuni kay llakiy chayamuwanri?”, nispa. Mana chayta yachaspaqa, llakisqalla, sonqo pʼakisqallataj kanchej. Chayrayku llakiyninchejta aguantanapajqa, imaraykuchus sufrishasqanchejta yachananchejpuni tiyan. Astawan entiendenapajqa, Brenda sutiyoj mamanta parlarina.

Pay nin: “Pasaj wataspi, warmi wawitay wañuporqa. Chayrayku may llakisqa kasharqani. Noqaqa Diospi creej kani. Chayrayku tata curaman rerqani sonqocharinawanpaj. Paytajrí niwarqa: “Wawitaykitaqa Dios cieloman pusakapun, angeliton kananpaj”, nispa. Chayrayku Diosta chejnikorqani, astawantaj llakikorqani. Brendaqa watasta ajina llakisqa karqa. Jinapis pay nillanpuni: “Ajinapi Jehovaj testigosninmanta uj hermana visitawarqa. Payqa Bibliapi rikuchiwarqa, mana Dioschu wawitayta cieloman apakapusqanta, nitaj angelitomanchu tukuchisqanta. Chayrayku mana Diosta chejnikunaychu kasqanta niwarqa. Chantapis yachachiwarqa, tukuy runas juchasapas nacekusqanchejrayku, wawitaypis onqoykusqanta. Bibliapi yachakullarqanitaj, wawitayqa wañuypi puñukushallasqanta, Jehová Diostaj tumpamantawan kausarichimunanta. Yachakullarqanitaj Jehová Diosqa, runasta ruwasqanta kay jallpʼapi wiñaypaj kusisqa kausakunankupaj, pisimantawantaj enteron jallpʼata uj kʼachitu paraisoman tukuchinanta. Jehová Diosta astawan rejsispaqa, payman astawan qayllaykorqani, llakiyniypis pisiyayta qallarerqa (Salmo 37:29; Hechos 24:15; Romanos 5:12).

Tukuy runas imallamantapis sufrinchej. Wakenqa llakiykunasninchejrayku sufrinchej. Wakintaj sufrinku: guerrasrayku, yarqhay kasqanrayku, terremotos, sinchʼi paras, chayri waj llakiykuna kasqanrayku. Brendaqa Bibliapi yachakorqa, mana Dioschu sufrinanchejpaj juchayoj kasqanta, nitaj runasta sufrinankupajchu ruwasqanta. Payqa yachakullarqataj, Dioslla tukuy sajra ruwaykunata tumpamantawan chinkachinanta. Chayta yachayqa mayta sonqocharqa. Kay mundo astawan sajrayasqanqa, rikuchiwanchej ‘tukukuy pʼunchaykunapi’ kausashasqanchejta, mosoj kausaytaj qayllitapiña kashasqanta (2 Timoteo 3:1-5; Mateo 24:7, 8).

¿Imaynatá Diosta rejsisunman?

Juanwan Brendawanqa Diospi creerqanku. Jinapis mana payta allintachu rejserqanku. Jehová Diosta astawan rejsispaqa, entienderqanku imapajchus kausashasqankuta, imaraykuchus llakiykuna kasqantapis. Chayta yachayqa, paykunata sonqocharqa, sumaj kausayta suyakunankupajtaj yanaparqa. Jehová Diospa may chhika kamachisninpis, kikillantataj sonqochayta tarerqanku.

¿Imaynatá Diosta rejsisunman? Bibliata sumajta estudiaspa. Imaraykuchus Biblialla paymanta yachachiwanchej. Chantapis willawanchej, imatachus ruwananchejta munasqanta. Ñaupa cristianospis chayta ruwarqanku. Bibliaj ujnin libronta qhelqaj Lucasqa, Berea llajtapi cristianosmanta jinata nerqa: ‘Paykunaqa Diospa palabranta tukuy sonqo japʼikorqanku. Diosmanta Qhelqasqatataj sapa día allinta estudiaj kanku. Pablomantawan Silasmantawan yachakusqanku, cheqachus manachus kasqanta yachanankupaj’ (Hechos 17:10, 11).

Chantapis ñaupa cristianosqa, congregacionespi tantakoj kanku (Hechos 2:41, 42, 46; 1 Corintios 1:1, 2; Gálatas 1:1, 2; 2 Tesalonicenses 1:1). Kay tiempopipis, Jehovaj testigosnenqa kikillantataj ruwanku. Tantakuykunasniykoqa wakichisqa kashan, runas Jehová Diosman qayllaykunankupaj, payta kusiywan sirvinankupaj ima. Chantapis Jehovaj testigosninpa reunionesninkupeqa, Jehová Diosta astawan rejsinki. Imaraykuchus Diosta sirvejkunaqa, payman rijchʼakunankupaj kallpachakunku (Hebreos 10:24, 25).

Kausayninchejpeqa imallapajpis kallpachakunanchejpuni tiyan. Ajinallatataj Diosta rejsinapajpis kallpachakunanchej tiyan. Jinapis chay ruwasqanchejqa, mana qhasipajchu kanqa. Imastachus runas jatun competenciaspi gananankupaj ruwasqankupi piensarina. Chay competenciasman yaykoj runa nin: “Uj competenciapi gananapajqa, chunka wata ñaupajta wakichikuna tiyan. Sapa día, sapa watataj sinchʼita kallpachakuna tiyan”, nispa. Runasqa chay jina unayta kallpachakunku, chunka minutosta jinalla competenciapi kanankupaj. Jehová Diosta rejsiytajrí, uj competenciamanta nisqaqa aswan sumaj.

Jehová Diosman astawan kʼaskaykuna

Ni pipis qhasipaj kausayta munanchejchu. Chayrayku imapajchus kausashasqaykita chayri imaraykuchus llakiykuna kasqanta yachayta munaspaqa, Jehová Diosta rejsinaykipaj kallpachakuy. Payta rejseyqa, mana kunallanchu yanapasonqa, manaqa wiñaypaj.

¿Maykʼajllapis Jehová Diosmanta yachakuyta tukusunchu? Mana. Payta unaytaña yupaychajkunapis, paymanta yachakushallankupuni. Jehová Diosta astawan rejsisqanchejman jina, aswan kusisqa kasun, astawantaj payman kʼaskaykusun. Noqanchejpis apóstol Pablo jina nina: “Diospa bendicionesnenqa may chhikapuni. Yachayninpis, imastachus yachasqanpis mana tukukuyniyoj. Imatachus ruwasaj nisqanpis mana yachay atina, jinallataj ñankunasninpis mana rejsiy atina. Chayrayku qhelqasqa kashan: ‘¿Pitaj Jehová Diospa yuyasqanta rejsiyta atinri? Chayri, ¿pitaj payta yuyaychanmanri?’” (Romanos 11:33, 34).

[Sutʼinchaynin]

[Yuyarinapaj]

Runasqa imapajchus kausashasqankuta yachayta munallankupuni.

[Yuyarinapaj]

“Jehová Diosta astawan rejsispaqa, payman astawan qayllaykorqani”.

[Yuyarinapaj]

“Jehová Diosta sirveyqa, ni imawan kikinchakunchu. Payta rejsisqayrayku, niña qhasipajchu kausashasqayta yachani”.