Jehová Diosta rijsinatami minishtinchij

MAIPICA ñucanchij causaipica ima faltashca shinachari sintirinchij. Diosmanta casi mana imata yachashpaca chashnami sintirinchij. ¿Imamanta? Achca gentecunami Yaya Diosmanta yachashpaca cunan punllacunapipish, shamuj punllacunapipish alli beneficiocunata chari tucushcata yachaj chayashcacuna.

Jehová Diosmi Bibliata quillcachirca. Paica ñucanchijcuna paita rijsichunmi munan. Salmo librota escribij shuj runaca: “Cambaj shuti Jehová cashcata gentecuna yachachun. Canllami tucui cai allpata Jatun mandaj cangui” nircami. Jehová Diosca paita rijsina ñucanchijpaj alli cashcatami yachan. Paica: “Ñucaca Mandaj Diosmi cani. Cambaj allipaj yachachij cambaj Diosmi cani” ninmi. ¿Yaya Diosta rijsinaca ima shinataj ñucanchijta ayudan? (Salmo 83:18; Isaías 48:17).

Yaya Diosca cunan punllacunapi tiyashca problemacunata chꞌimbapurachun, shungu ucupi tranquilo sintirichunmi ayudan. Shamuj punllapajpish shuj sumaj esperanzatami cun. Yaya Diosta alli rijsishpaca gentecuna rurashca importante tapuicunatami yachashun. ¿Gentecunaca ima tapuicunatataj rurancuna?

¿Imapajtaj causanchij?

Cai punllacunapica achca tecnologiami mirashca. Shinapish gentecunaca, “¿imamantataj causanchij, shamuj punllapica imataj tucushun?” nishca tapuicunata y shujtaj importante tapuicunata rurashpami catincuna. Chai tapuicunapaj respuestacunata mana yachashpami achca gentecunaca yangamanta causacushcata sintincuna. Por ejemplo, 1997 huatapi Alemania llajtapica achca gentecunatami entrevistarcacuna. Chai gentecunamanta chaupica yangamanta causacushcatami sintinchij nircacunami. ¿Can causan lugarpipish gentecunaca chashnallatajchu yuyancuna?

Ñucanchij causaipi yangamanta causacushcata sintishpa, sololla sintirishpaca shamuj punllapaj imata ruranatapish mana yachashunchu. Achcacunami chashna sintirishpaca shuj alli profesionta estudiashpa achca cullquita charinata yuyashcacuna. Pero chashnapish sololla, yangamanta causacushcatami sintirishcacuna. Maijancunaca chashna sintirishcamantami incluso ña mana causashpa catinata yuyancuna. Shuj revistapica shuj joven huarmi chashna sintirishcamanta ima tucushcatami parlarca. Chai joven huarmica achcata charij familiapi huiñashca cashpapish sololla sintirishcamanta, yangamanta causacushcata yuyashcamantami paillataj huañurirca. ¿Quiquinpish pi chashna sololla sintirishcata, paillataj huañurishcata uyashcanguichu?

Huaquin gentecunaca ñucanchij imapaj causashcataca cienciamanta estudiashpami yachai tucunchij nincunami. Alemaniamanta shuj revistapi nishca shinaca cienciaca achca cosascunatami ñucanchijmanca yachachi tucun. Pero espiritualmenteca mana ayudai tucunchu. Ñucanchij ima shina causanatapish mana yachachi tucunchu. Evolucionmanta yachaicuna, cienciamanta shujtaj yachaicunapish ñucanchijcuna cushilla, alli causachunca mana ayudai tucunchu. Cienciaca causaimantaca achcatami yachachi tucun. Pero ñucanchij imamanta causashcata, shamuj punllapi ima tucuna cashcataca mana yachachi tucunchu. Alemaniamanta shuj periodicopi nishca shinaca gentecunaca imapaj causashcata intindinatami minishtincuna.

Tucuita ruraj Diosmi ñucanchij imamanta causashcataca yachachi tucun. Diosca gentecuna cai Allpapi causachunmi rurarca. Chaimantami paica ñucanchij imamanta tiyashcataca yachan. Bibliapica Diosca ñucanchijcuna cai Allpapi mirarishpa causachun, cai Allpata cuidachunmi rurarca ninmi. Shinallataj Diosca gentecunataca paiman rijchajtami rurarca. Chaimantami gentecunaca Dios shina cashcata ruraj, alli yachaj, cꞌuyaj cai tucuncuna. Yaya Dios imamanta ñucanchijta rurashcata yachashpami, imapaj cai Allpapi causacushcata intindishun (Génesis 1:26-28).

¿Imatataj rurana cangui?

Can rurashca tapuicunapaj respuestacunata mana tarishca cashpa, imamanta causacushcata mana yachai tucushca cashpaca Bibliapi tiyaj yuyaicunatami cati tucungui. Bibliapica Jehová Diosta rijsichunmi mandan. Jesuspish chai yuyaitami nirca. Paica: “Huiñai causaita charinaca cashnami: Diostajca canlla cashcata rijsinami, Jesucristopish can cachashca cashcata crinami” nircami. Shinallataj cꞌuyaj canatami yachai tucungui. Diospaj Gobiernoca ñallami paraíso Allpata mandanga. Chaipi causana munaitapishmi chari tucungui. Chashnami mana yangamanta causacushcata yachashpa shamuj punllapajpish shuj sumaj causaita shuyai tucungui. Can rurashca tapuicunapaj respuestacunata tarishpami cushilla cai tucungui (Juan 17:3, Biblia en Quichua Chimborazo, 1989; Eclesiastés 12:13).

¿Cai yuyaica ima shinataj quiquinta ayudai tucun? Hans shuti runamanta parlashun. * Paica Dios tiyashcata crishpapish Diosca paipaj causaipi mana importante cashcatami yuyarca. Chaimantami paica drogarishpa, chꞌican chꞌican huarmicunahuan causashpa, leycunata mana cazushpa, motocunapi yalli purinallata munaj carca. Paica: “Ñucaca chashna causashpapish mana cushilla sintirircanichu” ninmi. Chai runaca más o menos 25 huatacunata charishpami Diosta alli rijsinata decidirca. Chaimantami Bibliata alli estudiai callarirca. Paica Diospaj amigo tucushpa, Dios ñucanchijta imapaj rurashcata intindishpami paipaj mana alli causaita saquinata decidirca. Qꞌuipaca bautizarishpami testigo de Jehová tucurca. Paica 10 huatacunatami tiempo completopi Diosta sirvicushca. Chaimantami paica: “Jehová Diosta sirvinami ñuca causaipica tucuimanta yalli valishca can. Jehová Diosta rijsishpami cunanca mana yangamanta causacushcata sintirini” nin.

Pero gentecunaca imapaj causashcallataca mana yachanata munancunachu. Llaquicuna ashtahuan ashtahuan mirarishpa catijpica paicunaca shujtaj tapuitami rurarincuna.

¿Imamantataj llaquicunata charinchij?

Shuj llaqui japijpica ¿imamantataj chai tucuna carca? nishpami tapurinchij. Pero imamanta llaquicunata charishcata intindishpami mana yallitaj llaquirishpa chaicunahuan chꞌimbapurai tucushun. Por ejemplo, Bruni shuti huarmihuan ima pasashcata yachashun.

Brunipaj ushushica huaquin huatacuna huashamanmi huañushca carca. Paica Diospi crishcamantami sacerdotepajman rishpa ayudata mañashca carca. Chai sacerdoteca: “Cambaj huahuataca Diosmi shuj angelta shina jahua pachaman aparca” nishcami carca. Chashna nijpimi paica llaquilla sintirirca. Incluso Yaya Diostapishmi pꞌiñai callarirca. Achca huatacunatami chashna llaquilla pasarca. Qꞌuipaca shuj testigo de Jehová huarmimi Yaya Diosca mana culpata charishcata, huahuatapish mana shuj angelta shina cieloman apashcata Bibliahuan ricuchirca. Paipaj huahuaca juchayuj cashcamanta ungushpa huañushcatami intindichirca. Chaimi Bruni shuti huarmica: “Ñuca huahua huañuipi dormicushcata, Jehová Dios ñalla causachinatami yachaj chayarcani. Shinallataj Diosca gentecuna paraíso Allpapi huiñai huiñaita causachun rurashcata, chai nishcacunaca ñalla pajtarina cashcatami yachaj chayarcani. Yaya Dios ima shina cashcata intindishpami paipajman ashtahuan cuchuyarcani. Ña mana tanto llaquilla carcanichu” ninmi (Salmo 37:29; Hechos 24:15; Romanos 5:12).

Gentecunaca tucui laya llaquicunatami charincuna. Shinallataj macanacuicuna, yaricaicuna y shujtaj llaquicuna tiyashcamantami achcata sufrincuna. Bruni shuti huarmica Yaya Dios mana culpata charishcata, ñucanchij llaquicunahuan causachun mana munashcata, tucui tiyashca llaquicuna ñalla tucurigrishcatami intindirca. Chashnami aliviada sintirirca. Tucui laya llaquicuna tiyajta ricushpami tucuri punllacunapi causacushcata intindinchij. Ñallami tucuicuna sumaj causaita charishun (2 Timoteo 3:1-5; Mateo 24:7, 8).

¿Diosta rijsingapajca imatataj rurana canchij?

Hans shuti runa, Bruni shuti huarmica Diospi crishpapish pai ima laya cashcataca mana alli yacharcacunachu. Chaimantami Diosta alli rijsingapaj achcata esforzarircacuna. Chaita rurashpami paicuna rurashca tapuicunapaj respuestata tarircacuna. Qꞌuipaca ña mana yallitaj llaquilla cashpami shamuj punllapajpish shuj sumaj esperanzata charircacuna. Diosta sirvij achca gentecunami casi chai laya experienciacunata charishcacuna.

Jehová Diosta rijsingapajca Bibliapi imata nicushcatami alli estudiana canchij. Bibliapimi Dios ima shina cashcata, ñucanchij imata rurachun munashcata yachachin. Ñaupa punllacunapi causaj gentecunapish chaitami rurarcacuna. Diosta sirvij Lucaspish Bereapi saquirij congregacionpi cajcuna imata rurashcatami quillcarca. Bereapi causajcunaca Pablo y Silas ‘huillashcata alli uyashpaca chashna cashcata mana chashna cashcata yachangapajmi Taita Dios Quillcachishcacunataca punllata alli ricujcuna carca’ (Hechos 17:10, 11).

Punta siglopi Jesusta catijcunaca congregacioncunapimi tandanacujcuna carca (Hechos 2:41, 42, 46; 1 Corintios 1:1, 2; Gálatas 1:1, 2; 2 Tesalonicenses 1:1). Cunan punllacunapish chashnallatajmi can. Testigo de Jehovacunaca congregacioncunapi tandanacushpami gentecuna Jehová Diospajman cuchuyachun, paita cushilla sirvichun ayudancuna. Shinallataj Testigocunaca Jehová Diospaj ejemplota catingapajmi esforzarincuna. Quiquinpish testigo de Jehovacunapaj tandanacuicunaman purishpaca Jehová Diospaj ejemplota ima shina catinata, paita ima shina alli rijsinatami yachai tucungui (Hebreos 10:24, 25).

¿Ciertochu Yaya Diosta rijsingapajca chashna esforzarina canchij? Ari. Yuyashun, causaipi ima minishtirishcata charingapaj o ima munashcata pajtachingapajpish achcatami esforzarina canchij ¿nachu? Por ejemplo, jatun pugllaicunapi participaj deportistacunapi yuyashun. Shuj deportistaca cashnami nirca: “Pugllaicuna manaraj callarijpimi 10 huatacuna huashaman entrenashpa callarina can. Y cada punllami sinchita practicana tucun”. Deportistacunaca 10 minutocunallata compitishpa participana cashpapish achca tiempotami practicancuna. ¿Manachu Yaya Diosta rijsingapaj esforzarinaca chaicunata ashtahuan valij can?

Diospajman ashtahuanmi cuchuyangui

Tucuicunami imamanta causashcata yachasha ninchij. Quiquinca yangamanta causacushcata shina yuyashpa, imamanta llaquicuna tiyashcata yachasha nishpaca Jehová Diostami puntapica rijsina cangui. Paimanta yachashpami mana yangamanta causacushcata crishpa huiñaita cushilla causangui.

Jehová Diosmanta yachanataca mana nunca saquishunchu. Achca huatacunata Diosta sirvijcunapish Yaya Diosmantaca yachashpami catincuna. Yaya Diosta alli rijsishpaca cushillami sintirishun, paipajman ashtahuanmi cuchuyashun. Apóstol Pablo ima nishcahuanmi de acuerdo cashun. Paica: “¡Diosca tucuita yalli yachaj canata, yuyaiyuj canata yallitaj charijmari! ¡Pai imata yuyacushcatapish, pi mana yachai tucunchu! ¡Pai imata ruracushcatapish, pi mana intindi tucunchu! Chaimanta ¿pitaj Jatun Diospaj yuyaitaca intindirca? Mana cashpaca ¿pitaj paipaj cunajca cashca canga?” nircami (Romanos 11:33, 34).

[Nota]

[Comentario]

Gentecunaca, “¿imamantataj causanchij, shamuj punllapica imataj tucushun?” nishca tapuicunata rurashpami catincuna

[Comentario]

“Yaya Dios ima shina cashcata intindishpami paipajman ashtahuan cuchuyarcani”

[Comentario]

“Jehová Diosta sirvinami ñuca causaipica tucuimanta yalli valishca can. Jehová Diosta rijsishpami cunanca mana yangamanta causacushcata sintirini”