Jéhovah: Mbeni Nzapa so a lingbi zo ahinga lo

MO YEKE hon peut-être na tele ti mbeni kota ye na yâ fini ti mo? Tongana mo hinga ye gi kete na ndo Nzapa, biani ye tongaso ayeke si na mo. Ngbanga ti nyen? Ngbanga ti so, tongana ti so azo kutu mingi ahinga, ti gi ti hinga Nzapa ti Bible ayeke ga na akota ye ti nzoni na yâ fini. Aye ti nzoni so ayeke ga fade fade na ayeke ngbâ lakue.

Jéhovah Nzapa, Lo so ayeke na gunda ti Bible, aye si e gi ti hinga lo. Wasungo psaume asû lani na mbeti: “Si ala lingbi hinga gi Mo oko ayeke, Mo so iri ti Mo ayeke L’Eternel [“Jéhovah”, NW], Mo so Mo yeke Lo Ti Nduzu Ahon Kue na ndo sese kue.” Lo hinga so a yeke ndali ti nzoni ti e mveni ti tene e hinga lo. “Mbi yeke L’Eternel Nzapa ti mo, Lo so awa mo si mo ga nzoni”. Tongana nyen e yeke wara ye ti nzoni na hingango Jéhovah Nzapa, Lo ti Nduzu Ahon Kue?​—Psaume 83:19; Esaïe 48:17.

Mbeni oko tâ ye ti nzoni ayeke so, e yeke wara fango lege ti leke akpale ti e ti lâ oko oko, e yeke duti na kpengba beku teti kekereke nga na siriri ti bibe. Na ndo ni, ti hinga Jéhovah nzoni ayeke pusu e ti maï mbeni bibe nde na ndo akota tënë so a yeke na gbele azo laso na ndo sese mobimba. Akota tënë wa?

Mo yeke na fini ngbanga ti nyen?

Atâa guengo na li ni ti senda-kode so adö bê, azo angbâ lakue ti hunda mara ti ahundango tënë tongana: ‘Ngbanga ti nyen mbi yeke na ndo sese? Mbi yeke gue na ndo wa? A leke fini ngbanga ti nyen?’ Tongana mbeni zo awara akiringo tënë so agbu bê ti lo pëpe, fade lo yeke hinga pëpe ngbanga ti nyen lo duti tâ na fini. Ye amanke azo mingi na lege so? Mbeni gingo nda ti ye so asala na kodoro ti Zamani na hunzingo ti siècle 20 afa so ndambo ti azo so a hunda tënë na ala, atene so fani mingi wala ngoi na ngoi, ala bâ so ala hinga pëpe ngbanga ti nyen a leke fini. Peut-être mara ti ye tongaso asi awe na ndo so mo lango dä.

Tongana mbeni zo ahinga pëpe ngbanga ti nyen lo yeke na fini, lo yeke tâ na nda ti tënë pëpe ti zia ambeni ye na gbele lo ti sala. Azo mingi, teti ye ni so amanke ala, atara ti kanga dû ni na tombango peko ti mbeni kua so alingbi ti ga na aye ti nzoni mingi, wala na bungbingo amosoro na ndo ti tele. Ye oko, a lingbi ti sala si bê ti zo angbâ gi lakue ti so. Ti hinga pëpe ngbanga ti nyen a leke fini aso même bê ti ambeni juska ala bâ so ala yeke tâ gi na nzara ti kui. A yeke ye so asi lani na mbeni pendere-wali kumbamba. Tongana ti so mbeni mbeti-sango International Herald Tribune atene, a bata lo “na yâ ti mbeni sewa so ayeke na mosoro nga na amatabisi mingi.” Atâa so lo lango na yâ ti nginza, lo bâ so lo yeke gi lo oko, na lo hinga pëpe ngbanga ti nyen lo yeke na fini. Lo nyon ayorö ti lango mingi nga na pekoni a wara lo na kuâ. Mo hinga peut-être ambeni zo so ayeke gi ala oko, so awara kuâ ti ngangu tongaso.

Ye oko, mo yeke mä ka azo mingi atene so senda-ye  alingbi ti mû na e tënë kue na ndo fini? Mbeni mbeti-sango ti kodoro ti Zamani Die Woche so ayeke sigigi yenga oko oko atene: “Atâa so senda-ye alingbi peut-être ti tene tâ tënë, na lege ti yingo, lo woko. Tënë so atene zo aga na lege ti nyama ade ti kpengba kue pëpe, na même senda-ye so abâ tënë ti akete kete ye ti ndagigi, so kite ayeke na ndo ni, alingbi pëpe ti ga na dengo bê nga na nzoni dutingo.” Aye so senda-ye awara asala ngangu mingi ti fa ye na ndo fini nga na ndo aye nde nde so angoro ni. Ala fa nga molongo ti tambela ti ndagigi nga na akusala nde nde so abata fini. Ye oko, senda-ye alingbi pëpe ti tene na e ngbanga ti nyen e yeke ge na ndo sese, nga e yeke gue na ndo wa. Tongana e zia gi bê ti e na ndo senda-ye, akiringo tënë na ahundango tënë ti e na ndo nda ti fini ayeke ngbâ gi senge. Ye ti pekoni ayeke, tongana ti so mbeti-sango Süddeutsche Zeitung atene lani: “azo ayeke na kota nzara ti wara fango lege.”

Zo wa, gi lo oko, alingbi ti fa lege ahon Wasalango ye? Teti so lo zia lani azo na ndo sese, lo lingbi biani ti hinga ngbanga ti nyen ala yeke na ndo ni. Bible afa so Jéhovah aleke azo ti tene ala sala si sese kue asi singo na azo, si ala bata ni. Na yâ kusala ti ala kue, a lingbi azo ahaka peko ti alengo ti lo tongana mbilimbili, ndara nga na ndoye. Gi tongana e hinga ngbanga ti nyen Jéhovah aleke e, e yeke hinga ngbanga ti nyen e yeke na ndo ti sese.​—Genèse 1:26-28.

Mo lingbi ti sala nyen?

Ka ye ni ayeke tongana nyen tongana mo wara giriri pëpe akiringo tënë na ahundango tënë so anzere na bê ti mo, tongana: ‘Ngbanga ti nyen mbi yeke na ndo ti sese? Mbi yeke gue na ndo wa? A leke fini ngbanga ti nyen?’ Bible awa mo ti gi ti hinga Jéhovah nzoni. Biani, Jésus atene lani: “Na so ayeke fini ti lakue lakue: ti hinga Mo, Mo so gi Mo oko ayeke tâ Nzapa, na ti hinga Jésus Christ, Lo so Mo to Lo awe.” A wa mo nga ti kono alengo ti Nzapa mbilimbili tongana ndoye, na ti zia na gbele mo ti sala kue ti duti na gbe ti Royaume ti Messie ti Nzapa so ayeke ga. Tongaso, fade mo yeke hinga ngbanga ti nyen mo yeke na fini, na mo yeke wara ande mbeni pendere kpengba beku teti kekereke. Fade a yeke kiri peut-être tënë na akpengba hundango tënë so angbâ juska laso ti gi bê ti mo.​—Jean 17:3; Zo-ti-fa-tene 12:15.

Tongana nyen akiringo tënë na akpengba hundango tënë so ayeke sala ande ngangu na ndo mo? Hans ayeke mara ti zo ni. * Teti angu mingi, lo mä na bê na Nzapa gi tongaso. Ye oko, mabe ti Hans asala ngangu pëpe na ndo fini ti lo. Lo ye nyongo mbangi, awali ndumba, akete kete kengo ndia, nga na kpengo na moto. Lo tene: “Me fini ayeke gi senge senge ye, na a lingbi ti wara ye ti nzoni na yâ ni pëpe.” Tongana lo si ndulu na ngu 25, lo mû desizion ti gi ti hinga tâ Nzapa ni mveni na dikongo Bible nzoni. Gi so lo hinga Jéhovah nzoni na lo hinga ngbanga ti nyen zo ayeke na fini, Hans achangé salango ye ti lo, na lo mû batême ti ga Témoin ti Jéhovah. Lo yeke na yâ kusala ti ngoi kue asala angu bale-oko awe. Lo fa tënë ti bê ti lo: “Ti sala na Jéhovah ayeke kota ye mingi na yâ fini. Mbeni ye ti haka na ni ayeke dä pëpe. Hingango Jéhovah asala si mbi hinga ngbanga ti nyen mbi yeke na fini.”

Biani, ti hinga ngbanga ti nyen a leke fini, ayeke pëpe gi oko gingo bê ti azo mingi. Teti so sese ayeke buba, gbâ ti azo ayeke gi bê ti ala na hundango mbeni kpengba tënë nde.

Ngbanga ti nyen aye ti ngangu asi?

Tongana aye ti ngangu asi, mingi ni, azo so ye ni asi na ala ayeke na hundango tënë oko: Ngbanga ti nyen aye tongaso asi? Ti hinga tâ kiringo tënë na hundango tënë so ayeke mû lege ti hon ndo ti vundu so aye ti ngangu ni ayeke ga na ni. Tongana a lingbi pëpe ti wara mbeni kiringo tënë  so anzere na bê, bango pasi ti zo ni ayeke ngbâ lakue, na lo lingbi ti duti na ngonzo mingi. Bâ, na tapande, mbeni ye so asi na Bruni.

Bruni, so fadeso ayeke mbeni mama so aga biazo, atene: “Kete molenge ti mbi ti wali akui aninga kete awe. Mbi mä na bê na Nzapa, na tongaso, mbi gi dengo bê na mbage ti prêtre ti kodoro ni. Lo tene na mbi so Nzapa amû Susanne awe na yayu ti tene lo ga fadeso mbeni ange. Ndali ti kuâ ti molenge ti mbi, nzara ti gigi ahunzi na yâ ti mbi, me mbi ke nga Nzapa na bê oko teti so lo mû molenge ti mbi.” Hungo pono na pasi ti Bruni angbâ lakue ti gue na li ni teti angu mingi. “Na pekoni, mbeni Témoin ti Jéhovah afa na mbi na yâ Bible so mbi yeke na raison oko pëpe ti ke Nzapa na bê oko tongaso. Jéhovah amû Susanne ti gue na lo na nduzu pëpe, na lo ga nga mbeni ange pëpe. Kobela ti lo aga na peko ti dutingo mbilimbili-kue pëpe ti azo. Susanne alango na yâ kuâ, na lo yeke ku Jéhovah ti tene azingo lo. Mbi manda nga so lo leke azo ti duti lakue lakue na ndo mbeni sese ti paradis, nga, na yâ ngoi kete, ye so ayeke ga ande tâ tënë. Gi so mbi hinga mara ti Nzapa wa Jéhovah ayeke biani, mbi kiri mbi ga ndulu na lo, na pono ti mbi akomanse ti hunzi yeke yeke.”​—Psaume 37:29; Kusala 24:15; aRomain 5:12.

Azo kutu mingi ayeke wara aye ti ngangu na ambeni lege nde: a lingbi ti duti mbeni ye ti vundu so asi na zo ni mveni, bira, kota nzara ti kobe, wala aye ti ngangu ti ndagigi. Bruni abâ na yâ Bible so a yeke pëpe Jéhovah si ayeke na gunda ti aye ti ngangu so ayeke si. Lo leke lâ oko pëpe azo ti bâ pasi, nga, na yâ ngoi kete, fade lo yeke hunzi aye ti sioni. A yeke aye so la adë bê ti Bruni. So sioni angbâ lakue ti gue na li ni afa so e yeke fadeso na “lâ ti nda ni” ti aye ti sese so. Ngoi ti kota gbiango aye ti sioni na aye ti nzoni so e yeke ku kungo aga ndulu awe.​—2 Timothée 3:1-5; Matthieu 24:7, 8.

Ti gi ti hinga Nzapa

Hans na Bruni ahinga lani Nzapa gi tongaso. Ala mä na bê na lo sân ti hinga ye mingi na ndo ti lo. Tongana ala mû ngoi mingi ti gi ti hinga Jéhovah mbilimbili, ala wara aye ti nzoni na pekoni. Ala wara tâ kiringo tënë na akota hundango tënë so azo ayeke hunda laso. Ye so aga na ala siriri ti bibe na kpengba beku teti kekereke. Awakua ti Jéhovah kutu mingi awara mbeni mara ti ye tongaso.

Ti gi ti hinga Jéhovah ato nda ni na tâ dikongo Bible ni mveni, so afa na e ye na ndo ti lo nga ye wa lo hunda na e. A yeke ye so ambeni asala lani na kozo siècle. Wasungo-mbaï na docteur Luc atene so amembre ti kongregation ti aJuif ti Bérée so ayeke na Grèce ‘ayeda na tënë [ti Paul na Silas] na nzoni bê. Ala yeke gi yâ ti Mbeti ti Nzapa lakue ti bâ wala atënë so kue Paul ayeke tene so ayeke na lege ni.’​—Kus. 17:10, 11, Buku ti Nzapa, Fini Mbuki, 1995.

A-Chrétien ti kozo siècle ayeke bungbi nga legeoko na yâ akongregation (Kusala 2:41, 42, 46; 1 aCorinthien 1:1, 2; aGalate 1:1, 2; 2 aThessalonicien 1:1). A yeke bâ mara ti ye so laso. A-Témoin ti Jéhovah ayeke bungbi legeoko na yâ akongregation na ngoi ti abungbi so a leke ni ti mû maboko na azo ti leke nzoni songo na Jéhovah na ti wara ngia na salango na lo. Ti bungbi na aTémoin na ndo so mo yeke dä ayeke ga na aye ti nzoni na ndo ni. Teti so azo ayeke mû yeke yeke tapande ti Nzapa so ala yeke voro, aTémoin ti Jéhovah afa na gigi, même atâa so akatikati ayeke na yâ ni, alengo so Jéhovah, lo mveni, afa na gigi. Ni la, ti bungbi na aTémoin ayeke mû maboko na e ti gi ti hinga Jéhovah nzoni mingi ahon ti kozo.​—aHébreu 10:24, 25.

A bâ so a hunda ngangu mingi ti gi ti hinga mbeni Zo oko? Biani, a hunda ngangu. Ye oko, a yeke nga lakue tâ tënë pëpe teti gbâ ti aye so mo ye ti sala na yâ fini ti mo? Bi bê na ndo ngangu so mbeni wanguru so iri ti lo awu asala ti leke tele ti lo nzoni. Na tapande, Jean-Claude Killy, mbeni kota wanguru so awara palata ti lor na France, atene tënë so ge na ndo ye so zo alingbi ti sala ti sö benda na akota mandako ti wanguru: “A lingbi mo mû angu bale-oko kozoni na mandako ni ti leke tele ti mo nzoni. Mo yeke leke tele ti mo na yâ  ti ngu oko oko, na mo yeke bi bê ti mo na ndo ni lâ na lâ . . . A yeke mbeni kusala so mo yeke sala ni, na bibe nga na ngangu ti mo kue, na yâ ngu oko kue.” A yeke gi ti sala mandako ni teti apenze-ngbonga bale-oko, si zo ni amû angoi mingi na asala ngangu kue tongaso! Ye so gingo ti hinga Nzapa aga na ni ayeke mingi, na aninga mingi.

Mbeni songo so angbâ lakue ti kpengba

Zo wa aye ti hon tâ gi na tele ti mbeni kota ye na yâ ti fini? Zo oko pëpe. Tongaso, tongana mo bâ so mo hinga tâ ye so mo yeke sala pëpe na yâ fini ti mo, wala tongana mo ye mbeni fango nda ti tënë na ndo ye so asala si aye ti ngangu asi, zia na bê ti mo kue ti gi ti hinga Jéhovah, Nzapa ti Bible. Ti manda ye na ndo lo alingbi ti changé aye mingi na yâ fini ti mo aninga.

E yeke zia ande ti manda ye na ndo Jéhovah mbeni lâ? Bê ti azo so angbâ ti sala na Jéhovah teti angu mingi adö teti ye so ala manda awe nga na afini ye so ala ngbâ lakue ti manda na ndo lo. Ti manda aye tongaso asala si e wara ngia na ayeke mû lege na e ti ga lakue ndulu na lo. Zia e duti na mara bibe ti bazengele Paul so atene: “Mosoro na ndara na hingango ye ti Nzapa ayeke kota mingi! Zo alingbi hinga nda ti fango ngbanga ti Lo pëpe, na zo alingbi hinga nda ti lege ti Lo pëpe! Teti zo nyen ahinga bibe ti Seigneur? Wala zo nyen ayeke wawango ti Lo?’”​—aRomain 11:33, 34.

[Kete tënë na gbe ni]

[Kete tënë na lembeti 5]

Azo angbâ lakue ti hunda amara ti akpengba hundango tënë so: ‘Ngbanga ti nyen mbi yeke na ndo sese? Mbi yeke gue na ndo wa? A leke fini ngbanga ti nyen?’

[Kete tënë na lembeti 6]

“Gi so mbi hinga mara ti Nzapa wa Jéhovah ayeke biani, mbi kiri mbi ga ndulu na lo”

[Kete tënë na lembeti 7]

“Ti sala na Jéhovah ayeke kota ye mingi na yâ fini ti mbi. Mbeni ye ti haka na ni ayeke dä pëpe. Hingango Jéhovah asala si mbi hinga ngbanga ti nyen mbi yeke na fini”