Yehovah—Wan Gado di warti fu sma sabi en

A DE so taki yu e misi wan prenspari sani na ini yu libi? Efu yu sabi pikinso nomo fu Gado, dan yu e misi wan sani trutru. Fu san ede? Bika, soleki fa milyunmilyun sma kon si, te yu e kon leri sabi a Gado fu Bijbel, dan yu e kisi furu wini na ini yu libi. Yu kan kisi den wini disi nownow èn yu kan tan kisi wini na ini a ten di e kon.

Yehovah Gado, a Sma di meki sma skrifi Bijbel, wani fu wi kon leri sabi en. A psalm skrifiman skrifi: „So taki sma kan sabi taki yu, di nen na Yehovah, yu wawan na a Moro Heiwan na heri grontapu.” A sabi taki a prenspari gi wi fu kon leri sabi en. „Mi, Yehovah, na yu Gado, a Sma di e leri yu fu gi yusrefi wini.” Fa wi e kisi wini te wi sabi Yehovah Gado, a Moro Heiwan?—Psalm 83:18; Yesaya 48:17.

Wan trutru wini di wi e kisi na taki wi e kisi tiri fa fu du nanga den aladei problema, wi e kisi wan trutru howpu gi a ten di e kon, èn wi o de nanga wan korostu ati. Boiti dati, te wi sabi Yehovah bun, dan wi e kisi wan tra fasi fu denki fu den moro prenspari aksi di sma na heri grontapu e poti. Sortu aksi den e poti?

Yu libi abi wan marki?

Aladi sabidensi go na fesi na wan fasi di e fruwondru sma trutru, toku son sma e poti den srefi prenspari aksi ete: ’Fu san ede mi de dyaso? Pe mi e go? San na a marki fu a libi?’ Efu wan sma no e kisi wan piki di e meki en ati sidon, dan en libi no o abi wan marki trutru. Furu sma de di e firi taki den e misi wan sani? Wan ondrosuku di ben du na ini Doisrikondre, no so langa bifo a yari 2000, ben sori taki afu fu den sma di ben gi piki tapu den aksi, ben firi furu tron noso son leisi taki a gersi dati a libi fu den no abi wan marki. Kande a srefi sani e pasa tu pe yu e tan.

Te wan sma no sabi fu san ede a de na libi, dan a no man poti marki gi ensrefi tu. Furu sma e poti leki marki fu kisi wan bun wroko di e pai furu moni noso den e suku fu kisi so furu gudu leki den man. Ma toku, den e tan firi taki den e misi wan sani. Fu di son sma no sabi fu san ede den de na libi, meki a prakseri disi e trobi den so te, taki den no wani libi moro. Wan moi yongu uma ben ondrofeni a srefi sani disi. Soleki fa na International Herald Tribune e sori, dan na uma disi ben gebore na ini wan famiri di gudu srefisrefi èn a ben kisi spesrutu grani di soso gudu sma e kisi. Aladi a ben gudu srefisrefi, toku a ben firi taki en wawan de èn a ben firi taki en libi ben de fu soso. A swari tumusi furu fu den perki di e meki sma sribi èn di den sma feni en, a ben dede kaba. Kande yu sabi wan tu sma tu di dede takru dede, soso fu di den ben e firi taki na den wawan de.

Ma yu no yere taki son sma e feni dati sabidensi kan fruteri wi ala sani fu a libi? Na alawiki tijdschrift Die Woche fu Doisrikondre e taki: „Awinsi sabidensi abi tru tori, toku a no man yepi wi fu kon sabi suma na Gado èn fa fu abi wan bun libi. Na evolutie leri e gersi wan sani sondro wan bun fondamenti èn srefi den koniman di e wroko nanga spesrutu wet no man yepi wi fu kon sabi san na a marki fu a libi.” Sabiman ondrosuku furu sani di yepi sma fu kon  sabi fa ala sortu libisani e libi, èn fa sani e waka na grontapu di e meki taki libisani e tan na libi. Ma sabidensi no man fruteri wi fu san ede wi de dyaso èn pe wi e go. Efu wi e frutrow tapu sabidensi wawan, dan wi no o kisi piki tapu den aksi di abi fu du nanga a marki fu a libi. A bakapisi de, soleki fa a koranti Süddeutsche Zeitung ben taki, dati „furu sma e suku tiri na alape”.

A moro bun sma di kan gi so wan tiri, na a Mekiman. Fu di na en ben poti libisma na grontapu, meki na en musu sabi fu san ede den de dyaso. Bijbel e taki dati Yehovah ben meki libisma so taki den ben kan furu grontapu èn taki den ben kan sorgu gi grontapu. Na ini ala san den ben o du, den ben musu sori den fasi fu Yehovah; fasi soleki retidu, koni, nanga lobi. Te wi e frustan fu san ede Yehovah meki wi, dan dati e meki wi kon sabi fu san ede wi de dyaso.—Genesis 1:26-28.

San yu kan du?

San yu musu du efu, na ini a ten di pasa, yu no feni wan bun piki tapu den aksi: ’Fu san ede mi de dyaso? Pe mi e go? Sortu marki a libi abi?’ Bijbel e gi a rai fu kon leri sabi Yehovah bun. Fu taki en leti, Yesus ben taki: „Disi wani taki têgo libi, fu den teki sabi na ini den fu yu, a wan-enkri tru Gado èn fu en di yu seni kon, Yesus Krestes.” Yu e kisi deki-ati tu fu kweki den fasi fu Gado, spesrutu lobi. Poti leki marki gi yusrefi taki yu wani libi na ondro a tiri fu a nyun Mesias Kownukondre fu Gado di e kon. Dan yu libi sa abi wan marki èn yu sa abi wan tumusi moi howpu gi a ten di e kon. Soleki fa a sori, dan yu sa kisi piki tapu den moro prenspari aksi di ben e trobi yu te na ten.—Yohanes 17:3; Preikiman 12:13.

Te yu e kisi piki tapu den aksi disi, dan dati sa yepi yu trutru? Hans na wan man di musu sabi efu dati de so. * Furu yari pasa, a ben abi pikinso bribi na ini Gado nomo, ma a bribi fu en no ben abi krakti tapu en libi. Hans ben lobi drugs, uma di e libi wan yayo libi, ogridu, èn motro. „Ma mi ben firi taki mi ben e libi wan soso libi, mi no ben de koloku”, na so a e fruteri. Di Hans ben abi sowan 25 yari, dan a bosroiti fu kon leri sabi Gado trutru fu di a bigin leisi Bijbel finifini. Di a kon leri sabi Yehovah moro bun èn di a kon frustan san na a marki fu a libi, dan Hans kenki a fasi fa a ben e libi èn a teki dopu leki wan Kotoigi fu Yehovah. Tin yari kaba a e du furuten diniwroko. A e taki: „Trutru, fu dini Yehovah na a moro bun fasi fu libi. Nowan tra sani moro bun leki disi. Mi kon abi wan marki na ini mi libi fu di mi kon leri sabi Yehovah.”

A no de fu taki, dati a marki fu a libi a no a wan-enkri sani di e gi furu sma broko-ede. Fu di a situwâsi na ini a grontapu e kon moro takru, meki moro nanga moro sma e broko den ede nanga wan tra tumusi prenspari tori.

Fu san ede rampu e pasa?

Te rampu e pasa, dan sma e aksi densrefi wán sani nomo, namku: Fu san ede a sani disi pasa? A fasi fa a sma o handri te so wan sani miti en, abi furu fu du nanga a piki di a o kisi tapu na aksi dati. Efu a sma no e kisi wan piki di e meki en ati sidon, dan a e tan pina fu a rampu disi ede èn a kan kon kisi bita-ati. Luku fu eksempre san ben miti Bruni.

„Wan tu yari pasa a beibi fu mi dede”, na so Bruni, wan mama di pasa 40 yari, e taki. „Fu di mi ben e bribi na ini Gado, meki mi go suku trowstu na a priester fu a birti pe mi e tan. A taigi mi taki Gado ben teki Susanne fu tan na hemel, pe a tron wan engel. A dede fu Susanne bruya mi heri libi èn mi ben abi bita-ati gi Gado fu di a teki mi beibi tyari gowe.” Bruni ben e pina èn sari wan tu yari langa. „Dan wan Kotoigi fu Yehovah sori mi na ini Bijbel taki mi no ben musu abi bita-ati gi Gado. Yehovah no ben teki  Susanne fu go tan na hemel, èn a no de wan engel. A siki fu en ben de a bakapisi fu a de di libisma no de volmaakti. Susanne e sribi na ini dede èn a e wakti fu Yehovah gi en wan opobaka. Mi kon frustan tu taki Gado ben meki libisma fu libi fu têgo na ini wan paradijs grontapu, èn a no o de langa moro fosi a du disi. Di mi kon frustan sortu sma Yehovah de trutru, dan mi kon moro krosibei na en èn safrisafri a pen di mi ben e firi kon saka.”—Psalm 37:29; Tori fu den Apostel 24:15; Romesma 5:12.

Milyunmilyun sma abi fu du nanga ala sortu problema. Son leisi ongoloku e miti a sma srefi, son leisi den abi fu du nanga feti, angriten, noso rampu soleki gronseki. Bruni ben prisiri fu si na ini Bijbel taki a no de so taki Yehovah e tyari problema kon, èn noiti a no ben abi na prakseri taki libisma ben musu pina. A kon si tu taki heri esi Yehovah o tyari wan kaba kon na ala ogri di de. Fu di ogridu e kon moro furu, meki wi kon sabi taki now wi e libi na ini „den lasti dei” fu a seti fu sani disi. A bigi kenki di musu kon fu meki ala sani kon bun, èn di ala sma wani so te, de krosibei.—2 Timoteyus 3:1-5; Mateyus 24:7, 8.

Kon leri sabi Gado

Hans nanga Bruni ben abi wan frafra denki fu Gado. Den ben e bribi na ini en, ma den no ben sabi furu fu en. Di den teki ten fu kon leri sabi Yehovah moro bun, dan den kisi wini fu a muiti di den du. Den kisi bun piki tapu den moro prenspari aksi di sma e poti na ini a ten disi. A sani disi ben meki den ati firi korostu èn den kisi wan tumusi moi howpu gi a ten di e kon. Milyunmilyun futuboi fu Yehovah ben ondrofeni a srefi sani tu.

Te wan sma wani fu kon leri sabi Yehovah, dan a musu studeri Bijbel finifini, fu di Bijbel e sori wi a fasi fa a tan èn san a e aksi fu wi. Na dati son sma fu a fosi yarihondro ben du. A historia skrifiman èn datra Lukas e fruteri taki den memre fu a Dyu gemeente na ini Berea, na Grikikondre, ’ben teki a wortu [fu Paulus nanga Silas] nanga den heri ati nanga frustan èn aladei den ben ondrosuku den Buku fu Bijbel finifini fu si efu den sani disi ben de so trutru’.—Tori fu den Apostel 17:10, 11.

Den fosi yarihondro Kresten ben kon makandra tu na ini gemeente (Tori fu den Apostel 2:41, 42, 46; 1 Korentesma 1:1, 2; Galasiasma 1:1, 2; 2 Tesalonikasma 1:1). Na so a de tu na ini a ten disi. Yehovah Kotoigi e kon makandra na ini den gemeente fu den, spesrutu fu yepi ibri sma fu kon krosibei na Yehovah èn fu prisiri fu dini en. Fu abi demakandra nanga tra Kotoigi na ini a birti pe yu e tan e tyari tra wini kon tu. A de so taki safrisafri wan libisma e kon kisi den fasi fu a Gado di a e anbegi. Dati meki Yehovah Kotoigi e sori den srefi fasi di Yehovah e sori, awinsi den no man du disi na wan volmaakti fasi neleki Yehovah. Sobun, te wi e kon makandra nanga Kotoigi dan disi sa yepi wi fu kon leri sabi Yehovah moro bun.—Hebrewsma 10:24, 25.

Yu e feni taki yu musu du so furu muiti soso fu kon leri sabi wan Sma nomo? Fu tru, wi musu du muiti. Ma a no de so taki yu musu du furu muiti tu fu doro tra marki na ini yu libi? Prakseri a muiti di wan barinen sportman e du te a e oefen en skin. Luku fu eksempre Jean-Claude Killy, di ben wini wan gowtu medari gi Fransikondre na ini den Olympis Prei di sma e hori na winter ten na ini son kondre. A e fruteri san wan sma musu du fu tron winiman ini a sport disi: „Yu musu bigin oefen yu skin 10 yari fosi den Olympis Prei èn furu yari langa yu abi fu tan seti sani fu doro a marki disi aladi yu e tan hori a tori disi na prakseri . . . Ibri dei fu a yari yu musu du muiti fu man doro a marki disi; a musu abi krakti tapu yu denki èn tapu yu skin.” Wan sma musu du so furu muiti, soso fu hori wan strei di e kaba kande na ini wan tu miniti nomo! Ma te wi e leri sabi Yehovah dan dati e meki wi kisi  moro wini èn a wini di wi e kisi fu dati e tan fu wan moro langa pisi ten.

Wan banti di e kon tranga moro nanga moro

Suma wani misi wan prenspari sani na ini en libi? Nowan sma. Fu dati ede, efu yu e firi taki yu libi no abi wan trutru marki noso efu yu wani sabi fu san ede rampu e miti wi, dan teki a fasti bosroiti fu kon leri sabi Yehovah, a Gado fu Bijbel. Te yu kon leri sabi en, dan yu o abi wan moro bun libi, di sa tan fu wan langa pisi ten.

A de so taki baka wan pisi ten yu o sabi ala sani fu Yehovah? Kwetikweti. Den wan di e dini en furu yari kaba e fruwondru ete fu sani di den leri fu en èn sosrefi fu den nyun sani di den e tan leri fu en. Te wi e leri den sortu sani disi, dan dati e meki wi kon koloku èn a e tyari wi kon moro krosibei na en. Meki wi abi a srefi denki leki na apostel Paulus, di ben skrifi: „O, fa Gado abi bun furu gudu, nanga koni, nanga sabi! Den krutu fu en e dangra sma fu frustan èn nowan sma kan kon sabi den pasi fu en! Bika ’suma kon sabi a denki fu Yehovah, noso suma tron a raiman fu en?’”—Romesma 11:33, 34.

[Futuwortu]

[Prenspari pisi na tapu bladzijde 5]

Te now ete, sma e poti den srefi prenspari aksi disi: ’Fu san ede mi de dyaso? Pe mi e go? Sortu marki a libi abi?’

[Prenspari pisi na tapu bladzijde 6]

„Di mi kon frustan sortu sma Yehovah de trutru, dan mi kon moro krosibei na en”

[Prenspari pisi na tapu bladzijde 7]

„Fu dini Yehovah na a moro bun fasi fu libi. Nowan tra sani moro bun leki disi. Mi kon abi wan marki ini mi libi fu di mi kon leri sabi Yehovah”