Jehova Leza Iweelede Kuzyibwa

SENA mulaalilwa kuzyiba cintu cimwi ciyandika kapati alimwi cikonzya kumugwasya mubuumi? Ikuti kamuzyi buyo makani masyoonto kujatikizya Leza, nkokuti aayo masimpe. Nkaambo nzi? Nkaambo kakuti, ikuzyiba Leza mukamwini Bbaibbele kulagwasya kapati mubuumi kweelana abantu banji mbobajana. Eeci cilacitika mpoonya-mpoonya alimwi ciyoozumanana akumbele.

Jehova Leza, sikwaanza Bbaibbele, uyanda kuti tumuzyibe. Sintembauzyo wakalemba kuti: “Bantu abazyibe kuti yebo, oojisi zina lyakuti Jehova, yebo olikke ndonduwe Mupatikampatila atala aanyika yoonse.” Sintembauzyo wakazyiba kuti ndiswe tugwasyigwa ciindi notumuzyiba. Bbaibbele lyaamba kuti: “Mebo, nde Jehova ndime Leza wako, ndime ndikuyiisya kuti ugwasyigwe.” Ino tugwasyigwa buti kwiinda mukumuzyiba Jehova Leza, Mupatikampatila?​—Intembauzyo 83:18; Isaya 48:17.

Lugwasyo lumwi ndwakuti ulatupa busolozi ibutugwasya kuliyumya kumapenzi ngotujana buzuba abuzuba, tulaba abulangizi bwakumbele businizyide alimwi aluumuno lwamumizeezo. Kuyungizya waawo, kumuzyiba kabotu Jehova kulatugwasya kwiilanga munzila yeelede mibuzyo iiyandika kapati njobajisi bantu banji munyika mazuba aano. Ino mibuzyo nzi eeyo?

Sena Buumi Bulaampindu?

Nokuba kuti bantu bazwidilila kapati mumakani aatekkinoloji, banji mazuba aano balabuzya mibuzyo njiyonya eeyi iiyandika kapati yakuti: ‘Nkaambo nzi ncotuli waano aanyika? Ino tuunka kuli? Ino buumi bujisi mpindu nzi?’ Ikuti muntu taabujana bwiinguzi bumvwika, buumi bwakwe bulakonzya kubula mpindu. Sena bantu banji mbobalimvwa oobo? Buvwuntauzi ibwakacitwa ku Germany mumyaka yakuma 1990, bwakatondezya kuti cisela cabantu ibakali kubuzigwa-buzigwa kanji-kanji naa zimwi ziindi bakali kulimvwa kuti buumi bunyina mpindu. Ambweni oobo mbocibede akubusena nkomukkala.

Ikuti muntu kabona kuti buumi bunyina mpindu, ulakonzya kuba atwaambo tusyoonto itukonzya kumukulwaizya kuba ambaakani. Banji basola kumanizya penzi eeli kwiinda mukuyandaula mulimo uuvwolwa mali manji naa kuvwuba. Nokuba boobo, penzi eeli kunyina nolyamana. Kulimvwa kubula mpindu mubuumi kulakonzya kunyonganya cakuti muntu inga walimvwa kuti tacigwasyi kuzumanana kupona. Eeci ncecakamucitikila mukaintu umwi, kweelana anyuzipepa iitegwa International Herald Tribune, “wakakomenena mumukwasyi iwakavwubide kapati alimwi wakajisi zyoolwe zinji kapati.” Nokuba kuti wakalivwubide, wakali kulendelelwa alimwi akulimvwa kuti buumi bunyina mpindu. Wakanywa mapiilusi aapa koona, aboobo wakajanika ulifwide. Ambweni kuli bamwi mbomuzyi ibakali kulimvwa kulendelelwa, balo ibakafwa munzila eeyi yuusisya.

Pele, sena mwakamvwa kale bantu kabaamba kuti sayaansi ilakonzya kutwaambila makani oonse aajatikizya buumi? Nyuzipepa iitegwa German weekly Die Woche yakati: “Nokuba kuti sayaansi njamasimpe, talili lyoonse noyaamba zintu zyamasimpe kujatikizya Leza. Njiisyo yakusanduka kwazintu ilibonya kuti taijisi bumboni buzwide alimwi alwalo lwiiyo lujatikizya mbozibeleka zintu zyoonse (quantum physics) azintu mbozicinca-cinca, tazipi luumbulizyo alimwi alukwabililo luli loonse.” Basayaansi basolekesya kupandulula buumi munzila ziindene-indene, akupandulula mbozicinca zintu alimwi ambozibeleka kupa kuti buumi kabuliko. Nokuba boobo, sayaansi kunyina noikonzya kutwaambila kaambo ncotuli waano anyika alimwi ankotuya. Ikuti naa twabikkila maano kapati kumakani aasayaansi, mibuzyo yesu iijatikizya mpindu yabuumi kunyina noikonzya kwiingulwa. Kweelana amboyakaamba nyuzipepa iitegwa Süddeutsche Zeitung, “bantu banji bayandika busolozi.”

Nguni weelela kupa busolozi buli boobu kunze lya Mulengi? Mbwaanga ngowakabikka bantu anyika, kweelede kuti ulizyi kaambo ncobali waano anyika. Bbaibbele lyaamba kuti Jehova wakalenga bantu kutegwa bazuzye nyika alimwi akwiilanganya. Muzintu zyoonse nzyobacita, bantu beelede kutondezya bube bwakwe mbuli, bululami, busongo alimwi aluyando. Kufwumbwa kuti twakamvwisya kaambo Jehova ncaakatulengela, tuyoozyiba kaambo ncotuli waano anyika.​—Matalikilo 1:​26-​28.

Ncinzi Ncomweelede Kucita?

Mbuti kuti musyule tiimwakabujana bwiinguzi bumvwika bwamibuzyo yakuti: ‘Nkaambo nzi ncotuli waano aanyika? Ino tuunka kuli? Ino buumi bujisi mpindu nzi? Bbaibbele limukulwaizya kumuzyiba kabotu Jehova. Amana buya Jesu wakaamba kuti: “Eeci caamba buumi butamani, ikuti bakuzyiba yebo O Leza mwini-mwini ooli olikke, ayooyo ngookatuma, Jesu Kristo.” Kunze lyaboobo, mukulwaizyigwa kuba abube bwabunaleza, kwaambisya luyando, akuba amakanze aakuyoopona mu Bwami bwa Leza buboola Bwabu Mesiya. Mpoonya muyooba abuumi buli ampindu alimwi abulangizi bwakumbele bukkomanisya. Mibuzyo iyali kumukatazya kapati ambweni iyakwiingulwa.​—Johane 17:3; Mukambausi 12:13.

Ino bwiinguzi bwamibuzyo eeyi iiyandika kapati buyoomujatikizya buti? Icakacitikila Ba Hans cilakonzya kutugwasya mukaambo aaka. * Myaka yainda, ba Hans tiibakajisi lusyomo luyumu muli Leza, aboobo lusyomo oolo tiilwakapa kuti buumi bwabo bucince. Bakali kukukkomanina kubelesya misamu iikola, kutalilemeka, kucita tulandu tusyoonto-syoonto alimwi akubalisya mahonda. Bakaamba kuti: “Pele buumi tiibwakali kukkomanisya alimwi tiibwakali kupa kukkutila.” Nobakajisi myaka iitandila ku 25, ba Hans bakasala kumuzyiba Leza kwiinda mukubala Bbaibbele cakubikkila maano. Ciindi nobakamuzyiba kabotu Jehova alimwi ampindu yabuumi, ba Hans bakacinca bukkale bwabo alimwi akubbapatizyigwa kuba Kamboni wa Jehova. Alimwi babeleka mumulimo waciindi coonse kwamyaka iili 10 yainda. Cakutainda mumbali bakaamba kuti: “Kubelekela Jehova nenzila yiinda kubota mubuumi. Kunyina cintu cili coonse ncotukonzya kweezyanisya akubelekela Jehova. Kumuzyiba Jehova kwandipa kupona buumi bulaampindu.”

Masimpe ngakuti makani aajatikizya mpindu yabuumi taali ngamakani alikke aabajatikizya bantu banji. Bukkale munyika mbobuyaabwiindila kubija, bantu banji balakatazyigwa amubuzyo uumbi uuyandika kapati.

Nkaambo Nzi Penzi Eeli Ncolyacitika?

Ciindi nokwacitika penzi limwi, muntu ooyo wacitikilwa kanji-kanji ubikkila maano kumubuzyo wakuti: nkaambo nzi penzi eeli ncolyacitika? Cilakatazya kuliyumya ciindi nomwacitikilwa mapenzi kusikila mane mwajana bwiinguzi bumvwika kujatikizya mubuzyo ooyu. Ikuti tiimwajana bwiinguzi bumvwika, kupenga kulazumanana alimwi sikucitikilwa penzi eelyo inga unookatazyidwe. Mucikozyanyo, amubone cakacitikila ba Bruni.

Ba Bruni bakaamba kuti: “Myaka misyoonto yainda kana kangu kasimbi kakafwa. Akaambo kakuti ndakali kusyoma muli Leza, ndakasala kujana luumbulizyo kumupaizi wakubusena nkondakali kukkala. Wakandaambila kuti Leza wakamutola kujulu Susanne, akuti lino mungelo. Inyika yakandicincila kapati akaambo kalufwu lwamwanaangu alimwi ndakamusulaika Leza akaambo kakumutola kujulu.” Ba Bruni bakazumanana kupenga mumoyo kwamyaka minji. Bakayungizya kwaamba kuti: “Mpoonya Kamboni wa Jehova umwi wakanditondezya mu Bbaibbele kuti kunyina kaambo kakeelede kundipa kumusulaika Leza. Jehova tanaakamutola kujulu Susanne, alimwi tali mungelo pe. Bulwazi bwakwe bwakaboola akaambo kakutalondoka kwabantu. Susanne uloona mulufwu, ulindila Jehova kuti akamubusye. Alimwi ndakaiya kuti Jehova wakalenga bantu kuti kabapona lyoonse muparadaiso anyika, alimwi eeci ciyoozuzikizyigwa ino-ino. Ciindi nondakatalika kumvwisya bwini mbwabede Jehova, ndakaba acilongwe anguwe alimwi aasyoonto-syoonto ndakaleka kupenga mumoyo.”​—Intembauzyo 37:29; Milimo 24:15; Baroma 5:​12.

Mamiliyoni aabantu balacitikilwa mapenzi aasiyene-siyene mbuli: bukkale bukatazya kapati, nkondo, nzala naa ntenda zilicitikila. Ba Bruni bakalimvwa kukatalukwa ciindi nobakalibonena mu Bbaibbele kuti Jehova talinguwe uutuletela mapenzi, akuti tanaakali makanze aakwe kuti bantu kabapenga alimwi akuti ino-ino uyoobumanizya bubi boonse. Ikuvwula kwabubi ooku ikuyaabwiindila buya kutondezya kuti lino tupona “kumazuba aamamanino” aabweende bwazintu oobu. Kucinca kwazintu kugambya kwalo ikuyoopa kuti zintu zibote, kulaafwaafwi kapati.​—2 Timoteyo 3:​1-5; Matayo 24:​7, 8.

Kumuzyiba Leza

Ba Hans aba Bruni tiibakamuzyi kabotu Leza. Bakali kumusyoma pele tiibakazyi zinji kujatikizya nguwe. Nobakaaba ciindi cabo kutegwa bamuzyibe kabotu Jehova, bakagwasyigwa kapati. Bakajana bwiinguzi bumvwika kujatikizya mibuzyo iiyandika kapati iivwula kubuzyigwa mazuba aano. Eeci cakabapa kuba aluumuno lwamumizeezo alimwi akuba abulangizi businizyide bwakumbele. Babelesi ba Jehova banji bainda mubukkale bukozyenye.

Kumuzyiba kabotu Jehova kulatalika kwiinda mukubala Bbaibbele cakubikkila maano, lyalo ilitwaambila kujatikizya nguwe alimwi ancayanda kulindiswe. Eeci ncobakacita bamwi mumwaanda wamyaka wakusaanguna. Syaazibwene mumakani aakaindi alimwi musilisi Luka wakaamba kuti ba Juda kumbungano yaku Bereya a Girisi, “bakaliyandide kapati mumyoyo kutambula jwi, [kuzwa kuli Paulo a Sila] kabavwuntauzya cakulomya mu Magwalo abuzuba kutegwa babone naa zintu eezyi mbozibede ncobeni.”​—Milimo 17:10, 11.

Banakristo bamumwaanda wamyaka wakusaanguna, abalo bakali kubungana mumbungano. (Milimo 2:​41, 42, 46; 1 Bakorinto 1:​1, 2; Bagalatiya 1:​1, 2; 2 Batesalonika 1:1) Mbocibede oobo amazuba aano. Bakamboni ba Jehova balabungana mumbungano kucita miswaangano, iyakabambilwa kugwasya baabo ibajanika kutegwa babe acilongwe ciyumu a Jehova alimwi akumubelekela calukkomano. Kuyanzana a Bakamboni bakubusena nkomukkala akwalo kulagwasya kapati. Mbwaanga bantu asyoonto-syoonto balamwiiya Leza ngobakomba, Bakamboni ba Jehova balasolekesya kutondezya bube mbwajisi Jehova. Aboobo kubungana a Bakamboni kulatugwasya kumuzyiba kabotu Jehova.​—Bahebrayo 10:24, 25.

Sena eeci caamba kuti tuyandika kubeleka canguzu kutegwa tumuzyibe kabotu Leza? Inzya cilayandika kapati kubeleka canguzu. Pele sena oobu tabusyi mbocibede akuzintu zinji nzyomunga mwayanda kucita mubuumi? Mucikozyanyo, amweezeezye kujatikizya kusolekesya nkwacita sikubalika ciindi nalibambila muzundano. Ba Jean-Claude Killy, balo ibakapegwa bulumbu bwamendulo yangolida ziindi zyotatwe mumizundano yakusiyana mucaanda iyakacitika mu 1968 ku France, bakaamba boobu kujatikizya zintu izyeelede kubikkilwa maano kutegwa muntu azwidilile mumuzundano wamasi: “Weelede kutalika kulibambila kakucili myaka iili 10, akunoocita oobo mwaka amwaka alimwi akunoowuyeeya muzundano buzuba abuzuba . . . Ooyu mulimo ngwayelede kucita muntu buzuba abuzuba kusikila mane mwaka wamana.” Kulibambila koonse ooku ikutola ciindi cilamfwu boobu, inga nkwamuzundano ambweni uutola buyo maminiti aali 10! Eeci citondezya kuti citola ciindi alimwi kuyandika kubeleka canguzu kutegwa tumuzyibe Jehova.

Cilongwe Icizumanana Kuyuma

Nguni uutayandi kugwasyigwa acintu ciyandika kapati mubuumi? Kunyina pe. Aboobo, ikuti naa mwabona kuti buumi bwanu bunyina mpindu naa kuti muyanda bupanduluzi ibutondezya kaambo ncokuli mapenzi, amusolekesye kumuzyiba Jehova Leza, mukamwini Bbaibbele. Kwiiya kujatikizya nguwe kulakonzya kucinca bukkale bwanu akumupa kupona buumi buli kabotu, ibutamani.

Sena kuli notuyooleka kwiiya kujatikizya Jehova? Aabo ibamubelekela kwamyaka minji balagambwa kujatikizya zintu nzyobaiya kujatikizya nguwe alimwi azintu zipya nzyobaciiya kujatikizya nguwe. Kwiiya zintu eezyi kutuletela lukkomano alimwi akutupa kuba acilongwe ciyumu anguwe. Atwaazuminizye majwi amwaapostolo Paulo iwakalemba kuti: “Eelo kaka talweeli lubono, busongo aluzyibo lwa Leza! Eelo kaka tazitobeleki mbeta zyakwe alimwi kunyina uunga waziteelela nzila zyakwe zyoonse! Nkaambo ‘ino nguni waizyiba mizeezo ya Jehova, naa nguni waba sikumulaya?’”​—Baroma 11:33, 34.

[Bupanduluzi Buyungizidwe]

[Majwi aakwelelezya sikubala]

Bantu balabuzya mibuzyo njiyonya eeyi iiyandika kapati yakuti: ‘Nkaambo nzi ncotuli waano aanyika? Ino tuunka kuli? Ino buumi bujisi mpindu nzi?’

[Majwi aakwelelezya sikubala]

“Ciindi nondakatalika kumvwisya bwini mbwabede Jehova, ndakaba acilongwe anguwe”

[Majwi aakwelelezya sikubala]

“Kubelekela Jehova nenzila yiinda kubota mubuumi. Kunyina cintu cili coonse ncotukonzya kweezyanisya akubelekela Jehova. Kumuzyiba Jehova kwandipa kupona buumi bulaampindu”