Oy sbalil mi laj kojtikintik li Jeovae

K’ALAL mu masuk xkojtikintik li Diose xuʼ van oy to kʼusi skʼan chkaʼi li ta jkuxlejaltike. ¿K’u chaʼal? Yuʼun epal miyon krixchanoetike yakʼojik venta ti k’alal chojtikinik li Dios ti chalbe skʼoplal li Vivliae tstabeik sbalil li avie xchiʼuk li ta jelavele.

Li Jeova, ti jaʼ yajval li Vivliae tskʼan ti akʼo xkojtikintike. Xi laj yal li jtsʼibajom yuʼun Salmoe: «Akʼo snaʼik krixchanoetik ti jaʼ Jeova li abie, ti voʼot noʼox atuk ti Buchʼu toj toyol oyot ta spʼejel balumile». Li Diose snaʼoj ti ta jtabetik sbalil mi laj kojtikintike, yuʼun xi chale: «Voʼon Jeovaun, voʼon Adiosun, voʼon ta jchanubtasot sventa xatabe sbalil atuk». ¿Kʼusi sbalil ta jtatik mi laj kojtikintik li Jeova ti jaʼ li Buchʼu stuk noʼox toj toyol oye? (Salmo 83:18; Isaias 48:17.)

Li sbalile jaʼ ti ta jtatik beiltaseletik sventa stsal kuʼuntik li vokoliletik ta jnuptantike, ti oy spatobil koʼontontik ta jelavel xchiʼuk ti jun noʼox koʼontontike. Jech xtok, kʼalal chkojtikintik lek li Diose tskoltautik sventa jtabetik stakʼobil li kʼusitik tsjakʼbe sbaik li krixchanoetik avie. ¿Kʼusitik jaʼ?

¿Mi oy sbalil li jkuxlejaltike?

Kʼuk chaʼal mi ep xa kʼusi achʼik lokʼem tal, li krixchanoetike jech-o tsjakʼbe sbaik: ¿Kʼuchaʼal liʼ oyutike? ¿Kʼuxi chijbatutik? ¿Kʼuchaʼal kuxulutik? Mi muʼyuk la jtabetik stakʼobiltake, muʼyuk sbalil li jkuxlejaltik ta melele. Mi chakʼik van venta li krixchanoetike. Leʼtik ta sjabilaltik 1990 ta Alemania la sjakʼbeik krixchanoetik mi oy balil li kuxlejale o mi chʼabal. J-oʼlole laj yalik ti chʼabal sbalile; taje xuʼ van jaʼ jech tsnopik ti bu nakalot eke.

Kʼalal chʼabal sbalil xkuxlejal ta xaʼi li jun krixchanoe, mu noʼox snaʼ kʼusi ta skʼan ta spas. Junantik ti chʼabal sbalil chaʼi li xkuxlejalike, chakʼik persa oy kʼusi staik: jech kʼuchaʼal ti oyuk lek yabtelike o saʼel takʼin, pe jech-o muʼyuk sbalil ta xaʼi sbaik, vaʼun mu xa skʼan xkuxiik. Li periodiko International Herald Tribune laj yalbe skʼoplal jun kʼupil sba tseb «ti te chʼi ta jun utsʼ alalil ti oy ep stakʼinik xchiʼuk ti ep kʼusitik tskʼupinike». Manchuk mi jkʼulejik, stuk-o chaʼi sba xchiʼuk muʼyuk sbalil li xkuxlejale, vaʼun la smil sba, laj yuchʼ ep poxiletik. Oy van buchʼu jech avabinojbe skʼoplal ti stuk chaʼi sbae xchiʼuk ti la smil sba eke.

¿Mi oy avabinoj junuk velta chalik ti x-albej yuʼun lek smelolal kʼusuk noʼox ta sventa jkuxlejaltik li siensiae? Li periodiko ta Alemania Die Woche chal: «Kʼuk chaʼal mi xtojob tajek li siensiae, tsalbil chkom kʼalal chalbe smelolal ta sventa li Diose. Li evolusione oy kʼusitik mu xtakʼ yuʼun ek, jech xtok li física cuánticae kʼuk chaʼal mi ep kʼusitik xchanojbeik skʼoplal, pe mu xakʼ spatobil oʼontonal xchiʼuk muʼyuk ta xakʼbutik jun oʼontonal. Li sientifikoetike xchanojbeik skʼoplal ep ta tos kuxlejal xchiʼuk xtok ti kʼu yelan ch-abtej li voʼe xchiʼuk li yan kʼusitike, manchuk mi jech, mu x-albej yuʼun smelolal kʼu chaʼal kuxulutik xchiʼuk kʼuxi chijbat. Ti jaʼuk noʼox oy li siensiae muʼyuk-o bu ta jtabetik stakʼobil ¿kʼu yuʼun ti kuxulutike? Jaʼ yuʼun, kʼuchaʼal chal li periodiko Süddeutsche Zeitung «jkotoltik chtun kuʼuntik beiltasel».

¿Bu xuʼ jtatik lekil tojobtasel jech kʼu chaʼal chakʼ li Diose? Ta skoj ti jaʼ la smeltsan li krixchanoetike snaʼoj lek kʼu chaʼal ti kuxulutike, li Vivliae chal ti la smeltsan krixchanoetik Jeova sventa tsnojesik li balumile xchiʼuk ti xchabiike. Li krixchanoetike tskʼan ox chakʼik ta ilel talelaletik kʼu chaʼal li stalelaltak Diose: tukʼilal, pʼijilal xchiʼuk kʼanelal. Kʼalal chkaʼibetik smelolal kʼu yuʼun la spasutik li Jeovae chkaʼitik kʼu chaʼal ti kuxulutike (Jenesis 1:26-28).

¿Kʼusi xuʼ xapas li voʼote?

Mi muʼyuk bu ataojbe stakʼobil li sjakʼobiltak jech kʼuchaʼal liʼe: ¿Kʼuchaʼal liʼ oyutike? ¿Kʼuxi chijbat? ¿Kʼu yuʼun kuxulutik? Li Vivliae ta xalbutik ti akʼo kojtikintik lek li Jeovae. Jech, xi onoʼox laj yal li Jesukristoe: «Jaʼ skʼoplal kuxlejal sbatel osil liʼe: ti ta xojtikinikote, li jun noʼox melel Diosote xchiʼuk ti chojtikinik ek li buchʼu la atak tale, li Jesukristoe». Jech xtok, lek ti xatsʼites lekil talelaletik kʼuchaʼal kʼanelal xchiʼuk ti oyuk ta avoʼonton xakuxi kʼalal ch-ajvalilaj li Ajvalilal yuʼun Diose, vaʼun jech me chatabe sbalil li akuxlejale xchiʼuk oy lek spatobil avoʼonton ta jelavel xchiʼuk chatabe stakʼobil li kʼusi chavul-o avoʼontone (Juan 17:3; Eklesiastes 12:13).

¿Mi oy sbalil kʼalal ta jtabetik stakʼobil li kʼusi ta jkʼan ta jnaʼtike? Li Hanse chalbutik ti oye. * Kʼuk chaʼal mi xojtikin onoʼox jutuk Dios muʼyuk ta xakʼ ta xkuxlejal li kʼusitik xchʼunojane, tikʼil ta droga, nopem xaʼi ta saʼ yantstak, tstikʼ sba ta kʼopetik xchiʼuk jaʼ batem ta yoʼonton li motoetike. Xi laj yale: «Muʼyuk sbalil ta xkaʼi li jkuxlejale, muʼyuk kʼusi ta snojesbun li koʼontone». Kʼalal 25 xa ox sjabilale kʼot ta nopel yuʼun ti chchan lek Vivlia sventa xojtikin ta melel li Diose. Kʼalal lek xa ox xil sbaik xchiʼuk li Jeovae xchiʼuk ti laj yaʼibe smelolal kʼu yuʼun ti kuxulutike, la sjel li xkuxlejale xchiʼuk laj yichʼ voʼ kʼu chaʼal stestigo Jeova. Lajuneb xa jabil chtun tal ta tsʼakal ora. Xi ta xal ta sjunul yoʼontone: «Mu kʼusi xkoʼolaj-o ti chijtun ta stojolal Jeovae. Ti laj kojtikine laj yakʼbe sbalil li jkuxlejale».

Pe li krixchanoetike maʼuk noʼox tsvul-o yoʼontonik ti kʼu yuʼun kuxulutike. Ta skoj ti yantik xa sok echʼel li kuxlejal avie, oy to kʼusitik yan tsjakʼbe sbaik ti tsvul-o yoʼontonike.

¿Kʼu xa noʼox chaʼal ti jech kʼot ta pasele?

Kalal oy kʼusi tsots tsnuptan jun krixchanoe xi tsjakʼbe sbae: ¿Kʼu xa noʼox chaʼal jech kʼot ta pasel? Mi la stabe li stakʼobile, xuʼ me stsal yuʼun li at-oʼontone, pe mi muʼyuk la stabee, xuʼ me jech ta svul-o yoʼonton. Jkʼelbetik echʼel sloʼil xkuxlejal Bruni ti jaʼ jun tsebal antse.

«Leʼ xa jayibtik jabile cham li jtseb Susane. Li voʼone jchʼunoj ti oy Diose, jaʼ yuʼun bat jsaʼ spatobil koʼonton ta stojolal li palee. Vaʼun laj yalbun ti laj la yikʼ echʼel Dios ta vinajel li jtsebe sventa la tspas ta jun yaj-anjel. Kʼalal cham li jtsebe solel lajem likom yuʼun xchiʼuk lik jpʼaj li Diose». Toj jal tajek laj yaʼibe xkʼuxul svokol li Brunie. Xi to laj yale: «Jun stestigo Jeova laj yakʼbun kil ta Vivlia ti maʼuk ta smul Dios ti cham li jtsebe, muʼyuk bu laj yikʼ echʼel ta vinajel sventa tspas ta yaj-anjel. Ti ipaje jaʼ ta skoj ti jkuchojtik li mulile. Li jtsebe xkoʼolaj kʼuchaʼal yakal chvay, jmalaoj ti chchaʼkuxes li Jeovae. Laj kaʼibe smelolal xtok ti Jeovae la smeltsan krixchanoetik sventa xkuxiik sbatel osil liʼ ta balumil ta jun paraisoe, taje jutuk xa tajek skʼan xkʼot ta pasel. Kalal laj kaʼibe lek smelolal kʼu yelan stalelal ta melel li Jeovae linopaj ta stojolal xchiʼuk kʼunkʼun lik chʼayuk li xkʼuxul koʼontone» (Salmo 37:29; Echos 24:15; Romanos 5:12).

Ta smiyonal xa noʼox krixchanoetik ep ta tos vokoliletik ta snuptanik, xuʼ van oy kʼusi tsnuptanik ta anil o ta skoj pas kʼop, viʼnal, nojelal ta voʼ o yan kʼusitik. Li Brunie patbat tajek yoʼonton kʼalal la xchan ta Vivlia ti maʼuk ta smul Jeova ti oy vokolile, ti muʼyuk onoʼox oy ta yoʼonton ti xil svokol li krixchanoetike xchiʼuk ti jutuk xa skʼan slajes li choplejale. Ti yantik xa xjel bal li kuxlejal avie, jaʼ ta skoj ti kuxulutik ta slajebal xa kʼakʼale. Poʼot xa me xkʼot ta pasel li lekilal jmalaojtike (2 Timoteo 3:1-5; Mateo 24:7, 8).

Kʼuxi xuʼ xkojtikintik li Diose

Li Hans xchiʼuk Brunie xchʼunojik ti oy Diose, pe jutuk toʼox xojtikinik, jaʼ yuʼun kʼalal la xchʼakbeik skʼakʼalil sventa xojtikinik lek li Jeovae ep la stabeik sbalil, la stabeik stakʼobil li kʼusi tsvul-o yoʼontonik avi kʼakʼale. Ta skoj taje jun yoʼontonik xchiʼuk la sta spatobil yoʼontonik ta jelavel. Ta smiyonal xa noʼox yajtuneltak Jeova jech kʼotem ta stojolalik ek.

Sventa chkojtikintik lek li Jeovae skʼan jkʼeltik lek li Vivliae xchiʼuk jnopbetik skʼoplal, yuʼun li Vivliae jaʼ chchanubtasutik sventa Jeova xchiʼuk te chalbutik li kʼusi tskʼan jpastik eke. Jaʼ jech la spasik junantik krixchanoetik ta baʼyel siglo. Li j-al loʼil xchiʼuk jpoxtavanej Lukase xi laj yalbe skʼoplal li tsobobbail ta Berea (Grecia): «Mas oy tajek ta yoʼontonik chchʼamik li skʼop Diose xchiʼuk tskʼelbeik lek smelolal skotol kʼakʼal li Tsʼibetik sventa tskʼelik mi jech ta melel li kʼusitike» (Echos 17:10, 11).

Jech xtok, li yajtsʼaklomtak Kristo ta baʼyel sigloe nopem xaʼiik ta stsob sbaik (Echos 2:​41, 42, 46; 1 Korintios 1:​1, 2; Galatas 1:​1, 2; 2 Tesalonicenses 1:1). Li avi kʼakʼal eke, li stestigotak Jeovae ta stsob sbaik ta salonetik sventa skoltaik li krixchanoetik yoʼ xnopajik ta stojolal Jeova xchiʼuk ti xlik tunikuk ta stojolal ta sjunul yoʼontonike. Li buchʼutik ta xchiʼinik li stestigotak Jeovae oy yan sbalil ta stabeik, jaʼ ti ta xojtikinik mas li Diose, yuʼun li stestigotak Jeovae chakʼik persa chakʼ ta ilel stalelalik kʼuchaʼal li Diose (Ebreos 10:24, 25).

¿Mi mu jechuk ti skʼan ep xkakʼ kiptik sventa xkojtikintik li Diose? Jech ta melel, pe ep onoʼox me ta xkakʼ kipaltik kʼalal oy kʼusi ta jkʼan ta jtatik ta jkuxlejaltike. Jnopbetik skʼoplal li jtajimoletik ti chchʼak skʼakʼalilik xchiʼuk ti tsots chakʼ yipalik sventa chchapan sbaike. Jech kʼuchaʼal li Jean-Claude Killy ti chtajin ta jun tajimol ti esqui sbie, la spas kʼanal jun medalla de oro ta jun olimpiada, chal kaʼitik kʼusi skʼan xichʼ pasel sventa xichʼ pasel kanale: «Lajuneb jabil ta jchapan jbatik baʼyuk, ta jnopbetik skʼoplal jujun kʼakʼal, jech, sjunul jabil te ta jnopilanbetik-o skʼoplal, skʼan jchapan jnopbentik xchiʼuk jnopes jbekʼtal jtakopaltik». Skotol taje skʼan jech xichʼ pasel manchuk mi kʼajomal noʼox 10 minuto chjalij li tajimol o li tsalbaile. Pe mi la jnopbetik skʼoplale mas to me ep sbalil ta jtatik mi laj kojtikintik li Jeovae.

Mas lek chkil jbatik xchiʼuk

¿Mi mu jechuk ti jkotoltik ta jkʼantik chlekub li jkuxlejaltike? Jech, jaʼ yuʼun mi chʼabal sbalil chavaʼi li akuxlejale xchiʼuk mi chakʼan chanabe smelolal kʼu yuʼun oy vokoliletike, ayanuk ta avoʼonton yojtikinel li Jeova, ti jaʼ yajval li Vivliae. Mi la avojtikin leke, chjel echʼel akuxlejal ta sbatel osile.

¿Mi chkʼot van yorail ti mu xa persauk ta jchantik mas ta stojolal li Jeovae? Li buchʼutik jal xa yojtikinojik talel li Jeovae, ep to kʼusitik kʼupilik sba ta xchanik xchiʼuk chojtikinik ta stojolal. Kʼalal mi laj kojtikintik echʼel mas li Jeovae mas xijmuyubaj xchiʼuk mas nopol chkaʼi jbatik ta stojolal. Jechuk jnopbentik kʼuchaʼal li jtakbol Pablo ti xi laj yale: «¡Batsʼi muʼyuk spajeb li skʼulejal Diose, li spʼijile xchiʼuk li yojtikinobil yuʼune! ¡Mu tabaj li chapanel yuʼune xchiʼuk mu xlaj ta aʼibel smelolal li sbee! Yuʼun ‹¿buchʼu xojtikinbe snopben li Jeovae o mi oy van buchʼu chtojobtasat?› » (Romanos 11:33, 34).

[Tsʼib ta yok vun]

[Tsʼib ti mukʼtik sletraile]

Li krixchanoetike jech-o tsjakʼbe sbaik: ¿Kʼuchaʼal liʼ oyutike? ¿Kʼuxi chijbatutik? ¿Kʼuchaʼal kuxulutik?

[Tsʼib ti mukʼtik sletraile]

«Kalal laj kaʼibe lek smelolal kʼu yelan stalelal ta melel li Jeovae li nopaj ta stojolal»

[Tsʼib ti mukʼtik sletraile]

«Mu kʼusi xkoʼolaj-o ti chijtun ta stojolal Jeovae. Ti laj kojtikine laj yakʼbe sbalil li jkuxlejale»