Konfia den Yehova ku Henter Bo Kurason

“Esnan ku konosé bo nòmber lo pone nan konfiansa den bo.”—SALMO 9:10.

1, 2. Kiko ta algun kos ku hende ta konfia den dje pa siguridat pero ku ta enbano?

AWE ku tin asina tantu kos ta menasá nos bienestar, ta normal pa nos buska ken òf kiko por duna nos siguridat. Tin hende ta kere ku si nan tin mas plaka esei lo duna nan un futuro sigur, pero en realidat, plaka ta un refugio masha insigur. Beibel ta bisa: “Esun ku konfia den su rikesa lo kai.” (Proverbionan 11:28) Otro hende ta stèns riba lidernan humano, pero asta e mihó lidernan ta kometé eror. I ku tempu, nan tur ta muri. Beibel ta bisa e palabranan sabí aki: “No konfia den prensnan, den yu di hende, den kende no tin salbashon.” (Salmo 146:3) E palabranan inspirá ei ta spièrta nos tambe pa no konfia den nos mes esfuerso sin yudansa. Nos tambe ta simplemente “yu di hende.”

² Profeta Isaías a kritiká e lidernan nashonal di Israel di su tempu pasobra nan a konfia den “e refugio di mentira.” (Isaías 28:15-17) Den nan búskeda pa siguridat, nan a sera aliansanan polítiko ku nashonnan bisiña. E aliansanan ei tabata inkonfiabel, un mentira. Den un manera similar, hopi lider religioso djawe ta sera amistat ku lidernan polítiko. E  aliansanan aki tambe lo resultá di ta un “mentira.” (Revelashon 17:16, 17) Nan lo no trese siguridat duradero.

E Bon Ehèmpel di Hosué i Kalèb

3, 4. Kon e informe di Hosué ku Kalèb tabata distinto for di e dies otro spionnan?

³ Unda anto nos tin ku akudí pa siguridat? Na e mesun fuente ku Hosué i Kalèb a akudí den tempu di Moises. Djis despues di Israel su liberashon for di Egipto, e nashon tabata kla pa drenta Kanan, e Tera Primintí. Nan a manda 12 hòmber bai spioná e pais, i despues di 40 dia nan a bolbe pa duna nan informe. Ta dos so, Hosué i Kalèb, a bisa ku Israel tin chèns di konkistá Kanan. E otronan a konfirmá ku e pais tabata hopi atraktivo pero nan a bisa: “E pueblo ku ta biba den e tera ta fuerte, i e statnan ta fortifiká i masha grandi mes . . . Nos no por bai kontra e pueblo, pasobra nan ta muchu fuerte pa nos.”—Numbernan 13:27, 28, 31.

⁴ E israelitanan a hasi kaso di e dies spionnan i a haña asina hopi miedu ku nan a kuminsá murmurá kontra Moises. Finalmente, Hosué ku Kalèb a bisa hopi emoshoná: “E tera ku nos a pasa den pa spioná ta un tera sumamente bon. Si SEÑOR ta kontentu ku nos, e ora ei e lo hiba nos na e tera aki i duna nos é—un tera ku tin lechi i miel na abundansia. Solamente, no rebeldiá kontra SEÑOR, i no tene miedu di e pueblo di e tera.” (Numbernan 14:6-9) Pero tòg e israelitanan a nenga di skucha i komo resultado Dios no a permití nan drenta e Tera Primintí na e tempu ei.

5. Dikon Hosué ku Kalèb a duna un informe positivo?

⁵ Dikon Hosué ku Kalèb a duna un bon informe, miéntras ku e dies spionnan a duna un mal informe? Nan tur 12 a mira e mesun statnan fuerte i nashonnan establesí. I e diesnan tabatin rason ora nan a bisa ku Israel no ta sufisiente fuerte pa konkistá e pais. Hosué ku Kalèb tambe tabata sa esei. Sin embargo, e diesnan a mira e situashon for di un punto di bista humano. Di otro banda, Hosué ku Kalèb a konfia den Yehova. Nan a mira e obranan poderoso ku el a hasi na Egipto, na Laman Kòrá i na pia di Seru Sinaí. Figurá bo ku añanan despues e simpel informe di e aktonan ei tabata sufisiente pa motivá Rahab di Yériko pa riska su bida pa yuda e pueblo di Yehova! (Hosué 2:1-24; 6:22-25) Hosué ku Kalèb, siendo testigu di e aktonan di Yehova, tabatin konfiansa apsoluto ku Dios lo sigui bringa pa su pueblo. Kuarenta aña despues, a keda probá ku nan konfiansa tabata hustifiká ora ku un generashon nobo di israelita, bou di e liderato di Hosué, a marcha drenta Kanan i a konkistá e pais.

Pakiko Nos Mester Konfia Yehova sin Reserva

6. Dikon kristiannan djawe ta bou di preshon, i unda nan mester pone nan konfiansa?

⁶ Den ‘e tempu trabahoso aki,’ nos, meskos ku e israelitanan, ta konfrontá enemigunan ku ta mas fuerte ku nos. (2 Timoteo 3:1) Nos ta konfrontá preshonnan moral, spiritual i, den algun kaso, asta físiko. Riba nos mes, nos no por resistí e preshonnan ei ya ku nan ta originá di un fuente sobrehumano, Satanas e Diabel. (Efesionan 6:12; 1 Huan 5:19) Unda anto nos por haña yudansa? Den orashon na Yehova, un hòmber fiel di pasado a bisa: “Esnan ku konosé bo nòmber lo pone nan konfiansa den bo.” (Salmo 9:10) Si di bèrdat nos konosé Yehova i ta komprondé kiko su nòmber ta nifiká, nos lo tin mesun konfiansa den dje ku Hosué ku Kalèb tabatin.—Huan 17:3.

7, 8. (a) Kon kreashon ta duna nos motibu pa konfia den Yehova? (b) Ki motibunan Beibel ta duna pa konfia den Yehova?

⁷ Dikon nos mester konfia den Yehova? Pa un parti Hosué ku Kalèb a hasi esei pasobra nan a yega di mira evidensia di su poder. Nos tambe tin evidensia. Por ehèmpel, konsiderá Yehova su obranan di kreashon, inkluso e universo, ku su míles di miónes di galaksia. E tremendo forsanan di naturalesa ku Yehova ta kontrolá ta demostrá ku en bèrdat e ta e Todopoderoso.  Segun ku nos ta meditá riba e maravianan di kreashon, nos tin ku bai di akuerdo ku Jòb, kende a bisa di Yehova: “Ken por strob’é? Ken por puntr’é: ‘Ta kiko bo ta hasi?’” (Jòb 9:12) Bon mirá, si Yehova ta na nos banda nos no tin nodi tene miedu di nada den universo.—Romanonan 8:31.

⁸ Konsiderá tambe e Palabra di Yehova, Beibel. E ta un fuente inagotabel di sabiduria divino i tin poder pa yuda nos vense mal kustumber i adaptá nos bida na e boluntat di Yehova. (Hebreonan 4:12) Ta mediante Beibel nos ta siña konosé Yehova pa nòmber i mira kiko su nòmber ta nifiká. (Éksodo 3:14, NW) Nos ta realisá ku Yehova por bira loke sea ku e kier—un Tata amoroso, un Hues hustu, un Guerero viktorioso—pa e kumpli ku su propósito. I nos ta mira kon su palabra semper ta bira realidat. Segun ku nos ta studia e Palabra di Dios nos ta ser konmoví pa bisa manera e salmista: “Mi ta konfia den bo palabra.”—Salmo 119:42; Isaías 40:8.

9. Kon e areglo di reskate i Hesus su resurekshon ta fortalesé nos konfiansa den Yehova?

⁹ E areglo di reskate ta un otro motibu pa konfia den Yehova. (Mateo 20:28) Ta algu masha maravioso ku Dios a manda su propio Yu bin muri komo un reskate pa nos! I e reskate realmente tin hopi poder. E ta kubri piká di tur hende ku repentí i akudí na Yehova ku un kurason onrado. (Huan 3:16; Hebreonan 6:10; 1 Huan 4:16, 19) Hesus mester a resusitá pa e por a paga e reskate. I e milager ei, di kua sentenáres di hende tabata testigu, ta un motibu mas pa konfia den Yehova. E ta un garantia ku nos speransa lo kumpli.—Echonan 17:31; Romanonan 5:5; 1 Korintionan 15:3-8.

10. Ki motibunan personal nos tin pa konfia den Yehova?

¹⁰ Esakinan ta djis algun motibu pakiko nos por i mester tin konfiansa apsoluto den Yehova. Tin hopi motibu mas, i algun di nan ta personal. Por ehèmpel, de bes en kuando nos tur ta konfrontá situashonnan difísil den bida. Segun ku nos ta buska Yehova su guia pa trata ku nan, nos ta mira kon práktiko e guia ei ta. (Santiago 1:5-8) Mas nos dependé riba Yehova den nos bida diario i mira e bon resultadonan di hasi esaki, mas firme nos konfiansa den dje lo ta.

David A Konfia den Yehova

11. Apesar di ki sirkunstansianan David a konfia den Yehova?

¹¹ David di antiguo Israel ta un persona ku a konfia den Yehova. David a konfrontá menasa na man di Rei Saul, ku kier a mat’é, i di e ehérsito filisteo, ku tabata purba konkistá Israel. Sin embargo, el a sobrebibí i asta a sali viktorioso. Dikon? David mes a splika: “SEÑOR ta mi lus i mi salbashon; di ken lo mi tin temor? SEÑOR ta e fortalesa di mi bida; di ken lo  mi tin miedu?” (Salmo 27:1) Nos tambe lo tin éksito si nos konfia den Yehova meskos David.

12, 13. Kon David a mustra ku nos mester konfia den Yehova asta ora opositornan ta usa nan lenga komo arma kontra nos?

¹² Na un okashon David a resa: “Tende mi bos, o Dios, den mi kehamentu; warda mi bida for di temor pa e enemigu. Skonde mi pa e konseho sekreto di e hasidónan di maldat, pa e tumulto di esnan ku ta kometé inikidat, kendenan a mula nan lenga hasié mes skèrpi ku spada. Nan a mek palabra amargo komo flecha, pa tira den skondí riba hende inosente.” (Salmo 64:1-4) Nos no sa sigur ta kiko a motivá David pa skirbi e palabranan aki. Pero sí nos sa ku awe opositornan na mesun manera ta “mula nan lenga,” usando nan abla komo arma di guera. Nan ta “tira” riba kristiannan inosente, usando palabra papiá i skirbí komo “flecha” pa duna hende un idea robes di e kristiannan. Si nos ta konfia firmemente den Yehova, kiko lo ta e resultado?

¹³ David a sigui bisa: “Ma Dios lo tira riba nan ku flecha; diripiente nan lo wòrdu heridá. Asina e lo hasi nan trompeká riba nan mes lenga. . . . E hende hustu lo ta kontentu den SEÑOR i lo tuma refugio den dje.” (Salmo 64:7-10) Sí, ounke enemigunan ta mula nan lenga kontra nos, na final di kuenta nan lo “trompeká riba nan mes lenga.” Ku tempu Yehova ta laga e asuntu resultá den algu positivo, pa asina esnan ku a konfia den dje por alegrá.

Ezekias Su Konfiansa A Resultá di Ta Bale la Pena

14. (a) Apesar di ki situashon peligroso Ezekias a konfia den Yehova? (b) Kon Ezekias a demostrá ku e no a kere e mentiranan di e asirio?

¹⁴ Rei Ezekias tabata un otro persona kende su konfiansa den Yehova a keda probá di ta hustifiká. Durante e reinado di Ezekias, e poderoso ehérsito asirio a menasá Yerúsalèm. E ehérsito ei a derotá hopi otro nashon. El a asta konkistá tur e statnan di Huda, ku eksepshon di Yerúsalèm, i Senakerib a broma ku lo e konkistá e stat ei tambe. Via Rabsakes, el a deklará—korektamente—ku ta enbano pa Israel konfia den Egipto pa yud’é. Sin embargo, despues di esei Senakerib a bisa: “No laga bo Dios, den kende bo ta konfia, gaña bo, bisando: ‘Yerúsalèm lo no wòrdu entregá den man di rei di Asiria.’” (Isaías 37:10) Pero Ezekias tabata sa ku Yehova no ta gañ’é. P’esei el a resa pidi: “O SEÑOR nos Dios, libra nos for di [Asiria] su man, pa tur reino di mundu por sa ku abo so, SEÑOR, ta Dios.” (Isaías 37:20) Yehova a skucha e orashon di Ezekias. Den un solo anochi, un angel a mata 185.000 sòldá asirio. Yerúsalèm a keda di spar i Senakerib a bandoná e teritorio di Huda. Tur hende ku a tende di e suseso aki a haña sa tokante Yehova su grandesa.

15. Kiko so por yuda nos prepará pa kualkier situashon difísil ku nos por haña nos aden den e mundu instabil aki?

 ¹⁵ Awe nos ta den un situashon di guera, meskos ku Ezekias. Den nos kaso e ta un guera spiritual. Maske nos ta guereronan spiritual, tòg nos tin ku desaroyá sierto abilidatnan pa sobrebibí. Nos tin ku premirá e atakenan i prepará nos mes pa resistí nan. (Efesionan 6:11, 12, 17) Den e mundu instabil aki, situashonnan por kambia diripiente. Disturbionan sivil por lanta kabes inesperadamente. Paisnan ku semper a demostrá toleransia religioso por bira intolerante. Solamente si nos prepará nos mes meskos ku Ezekias, dor di desaroyá un konfiansa apsoluto den Yehova, nos lo ta kla pa kiko ku pasa.

Kiko Ta Nifiká Konfia den Yehova?

16, 17. Kon nos ta demostrá ku nos ta konfia den Yehova?

¹⁶ Konfia den Yehova ta mas ku djis bisa esei ku boka. E ta enserá nos kurason i ta ser demostrá dor di nos akshonnan. Si nos ta konfia den Yehova, nos lo konfia tambe kompletamente den su Palabra, Beibel. Nos lo les’é tur dia, meditá riba dje i lag’é guia nos bida. (Salmo 119:105) Konfia den Yehova ta enserá tambe konfia den e poder di spiritu santu. Ku yudansa di spiritu santu nos por kultivá fruta ku ta agradá Yehova i vense mal kustumbernan ku ta duru ankrá. (1 Korintionan 6:11; Galationan 5:22-24) Pues, ku e yudansa di spiritu santu, hopi hende a logra stòp di huma i di usa droga. Otronan a bandoná un bida inmoral. P’esei, si nos ta konfia den Yehova, nos lo aktua den su forsa, no riba nos mes forsa.—Efesionan 3:14-18.

¹⁷ Ademas, konfia den Yehova ta nifiká konfia esnan ku é ta konfia. Por ehèmpel, Yehova a hasi areglo pa “e esklabo fiel i prudente” atendé e interesnan di Reino riba tera. (Mateo 24:45-47) Nos no ta purba aktua independientemente, ni nos no ta ignorá e nombramentu ei, pasobra nos ta konfia den Yehova su areglo. Mas ainda, ansianonan ta sirbi den e kongregashon kristian lokal i, segun apòstel Pablo, ta spiritu santu a pone nan ei. (Echonan 20:28) Dor di koperá ku e areglo di ansiano den kongregashon, tambe nos ta demostrá ku nos ta konfia den Yehova.—Hebreonan 13:17.

Sigui e Ehèmpel di Pablo

18. Kon kristiannan awe ta sigui e ehèmpel di Pablo, pero den kiko nan no ta pone nan konfiansa?

¹⁸ Apòstel Pablo a konfrontá hopi preshon den su sirbishi, meskos ku nos. Den su tempu hende a duna outoridatnan un mal impreshon di kristianismo, i tabatin bes ku Pablo a purba korigí e impreshonnan robes ei òf establesé e obra di prediká legalmente. (Echonan 28:19-22; Filipensenan 1:7, NW) Awe kristiannan ta sigui su ehèmpel. Unda ku ta posibel, nos ta yuda eduká hende tokante nos obra, usando tur medio ku tin disponibel. I nos ta hasi esfuerso pa defendé e bon nobo i estables’é legalmente. Sin embargo, nos no ta pone henter nos konfiansa den tal esfuerso, ya ku nos no ta konsiderá ku nos éksito òf frakaso ta dependé di si nos gana kasonan den korte òf haña publisidat positivo. Mas bien nos ta konfia den Yehova. Nos ta kòrda e animashon ku el a duna Israel di antiguo: “Boso úniko forsa ta sintá den keda kalmu i konfia den mi.”—Isaías 30:15, BPK.

19. Ora nos rumannan tabata ser persiguí, kon a keda demostrá ku nan konfiansa den Yehova tabata hustifiká?

¹⁹ Tabatin biaha durante nos historia moderno ku nos obra a ser prohibí òf restringí na Ost i Wèst Europa, den partinan di Asia i Áfrika, i den paisnan di Sur- i Norteamérika. Esaki kier men ku nos konfiansa den Yehova no tabata hustifiká? Nò. Ounke tabatin biaha ku Yehova a permití persekushon severo pa un motibu ku el a konsiderá válido, amorosamente el a fortalesé esnan ku tabata sufri di e persekushonnan ei. Hopi kristian bou di persekushon a establesé un bunita reputashon di fe i konfiansa den Dios.

20. Ounke kisas nos ta benefisiá di libertatnan legal, den ki aspektonan nunka nos lo komprometé?

 ²⁰ Di otro banda, den mayoria pais nos tin rekonosementu legal, i tin biaha nos ta haña publisidat positivo den medionan di komunikashon. Nos ta apresiá esaki i ta rekonosé ku esaki tambe ta kontribuí na Yehova su propósito. Ku su bendishon, nos ta usa e libertat mas grandi ku nos tin, no pa mehorá nos estilo di bida personal, sino pa sirbié abiertamente i plenamente. Sin embargo, nunka nos lo komprometé nos neutralidat, ni mengua nos aktividat di prediká ni debilitá den un òf otro manera nos sirbishi na Yehova djis pa nos ta bon mirá den bista di outoridatnan. Nos ta siudadano di e Reino Mesiániko i ta para firme na e banda di Yehova su soberania. Nos speransa no ta den e sistema di kosnan aki, sino den e mundu nobo kaminda e Reino Mesiániko lo ta e úniko gobièrnu ku ta goberná mundu. Ningun bòm ni misil ni atake nuklear por sagudí e gobièrnu ei òf tumb’é for di shelu. E ta un gobièrnu invensibel i lo kumpli ku loke ta Yehova su propósito.—Daniel 2:44; Hebreonan 12:28; Revelashon 6:2.

21. Ki rumbo nos ta desididu pa sigui?

²¹ Pablo a bisa: “Nos no ta di esnan ku ta hala atras pa destrukshon, sino di esnan ku tin fe pa preservashon di e alma.” (Hebreonan 10:39) P’esei laga nos tur sirbi Yehova fielmente te na fin. Nos tin tur motibu pa pone nos pleno konfiansa den Yehova awor i pa semper.—Salmo 37:3; 125:1.

Kiko Bo A Siña?

• Dikon Hosué ku Kalèb a bini bèk ku un informe positivo?

• Kua ta algun motibu pakiko nos mester tin konfiansa apsoluto den Yehova?

• Kiko ta nifiká konfia den Yehova?

• Ku konfiansa den Yehova, nos ta desididu pa tuma ki posishon?

[Preguntanan di Estudio]

[Plachi na página 15]

Dikon Hosué ku Kalèb a duna un informe positivo?

[Plachi na página 16]

Kreashon ta duna nos motibu fuerte pa konfia den Yehova

[Rekonosementu]

Tur tres potrèt: Kortesia di Anglo-Australian Observatory, saká dor di David Malin

[Plachi na página 18]

Konfia den Yehova ta nifiká konfia esnan ku é ta konfia