An Aldaw na Dapat Girumdomon

IYAN an aldaw na biyong luminiwat sa dalagan nin katawohan para sa daing sagkod na ikararahay kaiyan. Daing ibang aldaw sa kasaysayan an nagkaigwa nin siring na epekto sa ngapit nin katawohan. Iyan an aldaw na tinapos ni Jesus an gabos na gibohon nia sa pagdigdi nia sa daga. Nakapako sa hariging pasakitan, sia mauutsan na asin sia kuminurahaw: “Tapos na!” (Juan 19:30) Anong katuyohan na nagdigdi si Jesus?

“An Aki nin tawo nagdigdi,” sabi kan Biblia, “bakong tanganing paglingkodan, kundi tanganing maglingkod asin itao an saiyang kalag bilang pantubos na karibay nin dakol.” (Mateo 20:28) Itinao ni Jesus an saiyang kalag, o buhay, tanganing ikaligtas an katawohan sa minanang kasalan asin kagadanan. Iyo, “an Dios namoot na gayo sa kinaban na itinao nia an saiyang Aking bugtong, tanganing an lambang nagtutubod sa saiya dai mapahamak kundi magkaigwa nin buhay na daing katapusan.” (Juan 3:16) Kanigoan kahalagang probisyon an atang ni Jesus!

An aldaw kan kagadanan ni Jesus iyo an aldaw na dapat girumdomon huli sa saro pang dahelan. Sa aldaw na iyan itinokdo kan Aki nin Dios sa saiyang mga apostol an mahalagang mga leksion na matabang sainda na magdanay na fiel. An huri niang mga tataramon segurado nanggad na nakatudok sa puso kan mga disipulong idto! Ano an mga katokdoan nia? Paano kita makikinabang sa itinokdo sa sainda ni Jesus? Totokaron an mga hapot na ini sa masunod na artikulo.