Dei We Yumi Mas Tingbaot

DEI ya i jenisim fiuja blong olgeta man, mo i givim janis long olgeta blong kasem blesing we i no save finis. I no gat wan narafala dei we i gat paoa long fiuja blong man olsem dei ya. Hemia dei we Jisas i finisim olgeta wok we hem i kam long wol blong mekem. Taem hem i stap hang long pos, hem i pulum laswan win blong hem mo i krae aot i se: “Olgeta samting i finis nao” (Jon 19:30) ?Jisas i kam long wol blong mekem wanem wok?

Long Baebol yumi ridim tok ya blong Jisas se: “Mi mi Pikinini blong Man, be mi mi no kam blong bambae ol man oli mekem wok blong mi. Mi mi kam blong mekem wok blong olgeta, mo blong givim laef blong mi blong pem rod blong plante man oli go fri.” (Matiu 20:28) Jisas i givim laef blong hem, blong ol man oli save kam fri long sin mo ded we oli kasem long Adam. Yes, from we ‘God i lavem tumas ol man long wol, hem i givim stret pikinini blong hem, wan nomo we hem i gat, blong olgeta man we oli bilif long hem bambae oli no save lus, oli gat laef we i no save finis.’ (Jon 3:16) !Sakrifaes blong Jisas i wan nambawan blesing!

Be, i gat wan narafala risen bakegen we i mekem se dei blong ded blong Jisas i impoten tumas. Long dei ya Pikinini blong God i tijim ol aposol blong hem long sam nambawan lesen we bambae i halpem olgeta blong stanap strong. !I sua se, ol lastok we Jisas i talem bifo we hem i ded i rili kasem hat blong ol disaepol ya! ?Wanem ol tijing we Jisas i givim long olgeta? ?Olsem wanem yumi save kasem gudfala frut from ol tijing ya? Bambae yumi luk ansa long tufala kwestin ya long nekis haf.