Ang Adlaw nga Pagahandomon

KADTO mao ang adlaw nga bug-os nakapausab sa kaugmaon sa katawhan mao nga sila karon may palaabotong dumalayong mga panalangin. Walay laing adlaw sa kasaysayan nga may ingon nga epekto diha sa kaugmaon sa tawo. Kadto mao ang adlaw nga nahuman ni Jesus ang tanang buluhaton nga maoy iyang gianhi sa yuta. Nga gilansang sa sakitanang estaka, siya miginhawa sa kataposang higayon ug mituaw: “Natuman na!” (Juan 19:30) Unsay katuyoan sa pag-anhi ni Jesus?

“Ang Anak sa tawo mianhi,” matod sa Bibliya, “dili aron pagaalagaran, kondili aron sa pag-alagad ug sa paghatag sa iyang kalag nga usa ka lukat baylo sa daghan.” (Mateo 20:28) Gihatag ni Jesus ang iyang kalag, o kinabuhi, aron ang tawo maluwas gikan sa napanunod nga sala ug kamatayon. Oo, “gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Pagkabililhong tagana ang halad lukat ni Jesus!

Ang adlaw sa kamatayon ni Jesus maoy adlaw nga pagahandomon tungod sa lain pang rason. Sa maong adlaw ang Anak sa Diyos nagtudlo sa iyang mga apostoles ug hinungdanong mga leksiyon nga makatabang kanila nga magpabiling matinumanon. Ang iyang kataposang mga pulong nakatandog pag-ayo sa kasingkasing sa iyang mga tinun-an! Unsa ang iyang mga pagtulon-an? Sa unsang paagi kita makabatog kaayohan sa gitudlo ni Jesus kanila? Kining mga pangutanaha hisgotan sa sunod nga artikulo.