Usen Oro Ẹnyenede Nditi

ENYE ekedi usen oro okokpụhọrede ini iso ubonowo ofụri ofụri man ọfọn ke nsinsi. Idụhe usen efen ke mbụk oro okokpụhọrede ini iso ubonowo ntre. Emi ekedi usen oro Jesus okokụrede kpukpru se enye ekedide ndinam ke isọn̄. Ke ẹkọn̄de enye ke eto ndutụhọ, enye ama ọduọk akpatre ibifịk esie onyụn̄ ofiori ete: “Okụre.” (John 19:30) Ntak emi Jesus ekedide isọn̄?

Bible ọdọhọ ete: “Eyen Owo [ikedịghe] man ẹnam n̄kpọ ẹnọ Enye, edi man Enye anam n̄kpọ ọnọ owo, onyụn̄ ọnọ uwem Esie ndifak ediwak owo.” (Matthew 20:28) Jesus ọkọnọ uwem esie man ẹkpekeme ndifak ubonowo nsio ke idiọkn̄kpọ ye n̄kpa oro mmọ ẹkedade ẹmana. Ih, “Abasi akamama ererimbot ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Nso ọsọn̄urua enọ ke uwa Jesus edi ntem!

Ntak efen odu oro ẹnyenede nditi usen n̄kpa Jesus. Ke usen oro Eyen Abasi ama ọnọ mme apostle esie nti ukpep oro ẹdin̄wamde mmọ ẹka iso ẹsọn̄ọ ẹda. Mme akpatre ikọ esie ẹketụk esịt mme mbet esie didie ntem! Mme ukpep ewe ke enye ọkọnọ? Didie ke nnyịn ikeme ndibọ ufọn nto se Jesus ekekpepde mmọ? Ẹyebọrọ mme mbụme emi ke ibuotikọ oro etienede.