Ang Adlaw nga Dapat Dumdumon

AMO ini ang adlaw nga nagbag-o gid sang palaabuton sang katawhan para sa ila dayon nga kaayuhan. Wala na sing iban pa nga adlaw sa maragtas ang may subong sini nga epekto sa palaabuton sang katawhan. Amo ini ang adlaw nga natapos ni Jesus ang iya ginkari sa duta. Antes mahunos ang iya katapusan nga ginhawa, samtang nalansang sa usok sang pag-antos, nagtuaw sia: “Natuman na!” (Juan 19:30) Ngaa nagkari si Jesus?

“Ang Anak sang tawo nagkari,” siling sang Biblia, “indi agod alagdon, kundi agod mag-alagad kag ihatag ang iya kalag subong gawad nga kabaylo sang madamo.” (Mateo 20:28) Ginhatag ni Jesus ang iya kalag, ukon kabuhi, agod luwason ang katawhan gikan sa ginpanubli nga sala kag kamatayon. Huo, “ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-⁠o nga magtuo sa iya indi malaglag kundi may kabuhi nga walay katapusan.” (Juan 3:16) Daw ano ka hamili nga aman ang halad ni Jesus!

Ang adlaw sang kamatayon ni Jesus isa ka adlaw nga dapat dumdumon bangod sang isa pa ka rason. Sa sini nga adlaw gintudluan sang Anak sang Dios ang iya mga apostoles sing mapuslanon nga mga leksion nga magabulig sa ila sa pagpabilin nga matutom. Pat-od gid nga natandog sang iya katapusan nga mga pulong ang tagipusuon sang iya mga disipulo sadto! Ano ang iya gintudlo? Paano kita makabenepisyo gikan sa gintudlo ni Jesus sa ila? Binagbinagon ini nga mga pamangkot sa masunod nga artikulo.