Say Sankaimportantian ya Agew

SAMAN so agew a sigpot ya anguman ed awaran na sankatooan parad magnayon a pankaabigan to. Anggapo lay arum ya agew ed awaran ya awalaan na ontan lan epekto ed arapen na katooan. Saman so agew sanen asumpal nen Jesus so amin a kaukolan ton gawaen diad dalin. Sanen akapasak ed panamairapan a kiew, sikatoy linminawa na aralem insan kinmelyaw: “Asumpal la!” (Juan 19:30) Antoy gagala na inyakar nen Jesus diad dalin?

Onia so inkuan na Biblia: ‘Say Anak na too agdia linma a panlingkoran, noag say manlingkor, tan iter toy bilay to a panondon ed amayamay.’ (Mateo 20:28) Inter nen Jesus so kamarerwa, odino bilay to, pian iliktar so katooan ed atawir a kasalanan tan ipapatey. On, “ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Agaylan mabalor so bagat nen Jesus!

Say impatey nen Jesus so sankaimportantian ya agew lapud sakey nin rason. Diad saman ya agew, imbangat na Anak na Dios iray apostol to na makana iran leksion ya ontulong ed sikaran mansiansian matoor. Seguradon saray imbalikas to antis na impatey to so anenyeg ed kapusoan na saraman a babangatan! Antoray imbangat to? Panon itayon nagunggonaan ed imbangat nen Jesus ed sikara? Sarayan tepet so singbaten ed ontumbok ya artikulo.