E Dia Mas Memorabel

ESEI tabata e dia ku a kambia e rumbo di humanidat kompletamente pa unu di bienestar eterno. Niun otro dia den historia a kousa un impakto asina grandi riba futuro di humanidat. Tabata e dia ku Hesus a kompletá tur loke el a bin hasi na mundu. Klabá na un staka di tormento, el a hala su último rosea i a sklama: “Ta kumplí!” (Huan 19:30) Pakiko Hesus a bini na mundu?

Beibel ta bisa: “E Yu di hende no a bin pa wòrdu sirbí, ma pa sirbi, i pa duna su bida komo preis di reskate pa hopi.” (Mateo 20:28) Hesus a duna su bida pa asina humanidat por ser reskatá for di piká heredá i morto. Sí, “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” (Huan 3:16) Pues, Hesus su sakrifisio tin un balor inmenso!

E dia di Hesus su morto ta memorabel pa un motibu mas. Riba e dia ei e Yu di Dios a siña su apòstelnan lèsnan balioso ku lo a yuda nan keda fiel. Su último palabranan lo mester a konmové kurason di e disipelnan ei! Kiko el a siña nan? Kon nos por benefisiá for di loke Hesus a siña nan? E siguiente artíkulo lo kontestá e preguntanan aki.