Te Ra kia Maaraia

KO TE reira te ra tei taui takiri i te mataara o te tangata ei meitaki mutu kore nona. Kare atu e ra ke i roto i te tuatua enua tei rauka taua tupu anga ki runga i to te tangata tuatau ki mua. Ko te reira te ra i akaoti takiri ei a Iesu i tana i aere mai i te rave i te enua nei. Kua patiaia ki runga i te rakau tamamae, kua rave aia i tona akaea openga e kua kapiki atu: “Kua oti.” (Ioane 19:30) Eaa te akakoroanga i aere mai ei a Iesu?

“Kare oki te Tamaiti a te tangata i aere mai,” i na te Pipiria ei, “kia taviniia tona, ei tavini ra, e kia oronga i tona ora ei oko no te tangata e manganui.” (Mataio 20:28) Kua oronga a Iesu i tona meta, me kare oraanga, e raukai kia akaoraia mai te tangata mei te tu anga i te ara e te mate. Ae, “i aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Mei teaa te puapinga i to Iesu atinga ra!

Te ra i mate ei a Iesu ko te reira te ra kia maaraia no tetai atu tumu ke. I taua ra ra kua apii te Tamaiti a te Atua ki tana au apotetoro i te au apiianga puapinga maata te ka tauturu ia ratou kia vai tiratiratu. Mei teaa atura tana au tuatua openga i te akakeu anga i te au ngakau o tana au pipi! Eaa ra tana au apiianga? Ka akapeea tatou i te puapingaanga mei ta Iesu i apii kia ratou? Ka uriuriia teia au uianga i roto i te atikara e aru mai nei.