Siku Ra Nkoka Swinene

I SIKU leri cinceke vumundzuku bya vanhu hilaha ku heleleke leswaku va kuma mikateko ya hilaha ku nga heriki. A ku na siku rin’wana ematin’wini leri ri veke ra nkoka eka vanhu ku fana na rona. A ku ri siku leri Yesu a hetisiseke leswi a a tele ku ta endla swona laha misaveni. Loko a beleriwile emhandzini ya nxaniso u tiphofule ro hetelela ivi a ku: “Swi hetisisiwile”! (Yohane 19:30) Xana Yesu a te hi xikongomelo xihi?

Bibele yi ri: ‘N’wana wa munhu a nga telanga ku tirheriwa, kambe u tele ku tirhela ni ku nyikela moya-xiviri wakwe wu va nkutsulo wa lavo tala.’ (Matewu 20:28) Yesu u nyikele moya-xiviri, kumbe vutomi byakwe leswaku vanhu va ta kutsuriwa eka ndzhaka ya xidyoho ni rifu. Ina, “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Hakunene, gandzelo ra Yesu i lunghiselelo ra nkoka!

Siku ra ku fa ka Yesu i siku ra nkoka swinene. Hi siku rero N’wana wa Xikwembu u dyondzise vaapostola vakwe swilo swa nkoka leswi nga ta va pfuna leswaku va tshama va tshembekile. Hakunene, marito wolawo yo hetelela ma fanele ma khumbe timbilu ta vadyondzisiwa volavo! Xana u va dyondzise yini? Xana hi nga vuyeriwa njhani eka leswi Yesu a va dyondziseke swona? Swivutiso leswi hi ta bula ha swona eka xi- hloko lexi landzelaka.