‘!Yufala i No Fraet! Mi Mi Winim Wol Ya Finis’

DEI blong ded blong Jisas—hemia namba 14 dei blong manis we ol man Jiu oli kolem Nisan—i stat taem san i godaon long Tasde, Maj 31, 33 K.T. * Long naet ya, Jisas mo ol aposol blong hem oli kam wanples long wan rum antap long wan haos long Jerusalem blong mekem lafet blong Pasova. Taem Jisas i stap rere “blong hem i aot long wol ya, i gobak long Papa blong hem,” hem i soem long ol aposol blong hem we hem i lavem olgeta olwe. (Jon 13:1) ?Olsem wanem hem i soem samting ya? Hem i tijim sam nambawan lesen long olgeta, mo long rod ya hem i rerem olgeta blong fesem ol traem we oli stap kam.

Taem naet ya i gohed, Jisas i talem long ol disaepol blong hem se: “Yufala i no fraet. Mi mi winim paoa blong olgeta samting blong wol ya finis.” (Jon 16:33) ?Tok ya i minim wanem? I olsem we Jisas i stap talem se: ‘Nogud fasin blong ol man long wol ya i no mekem mi mi kam kros mo i no mekem mi mi wantem givimbak. Mi mi no letem wol ya i pulum mi blong folem fasin blong hem. Yufala tu i save mekem olsem.’ Tijing we Jisas i givim long ol gudfala aposol blong hem long ol laswan aoa bifo we hem i ded, i halpem olgeta, blong olgeta tu oli save winim wol ya.

I klia se wol tede i fulap long ol nogud fasin. ?Wanem filing blong yumi taem yumi luk fasin we i no stret mo raf fasin we ol man oli mekem? ?Ol fasin ya oli mekem yumi kam kros no oli pulum yumi blong wantem givimbak? ?Mo taem ol man raonabaot long yumi oli no moa folem ol gudfala fasin, samting ya i gat paoa long fasin blong yumi tu? I no rabis wol ya nomo we i pulum yumi blong mekem sin. Yumi gat wan faet agensem slak fasin blong yumi tu. ?Yumi rili save winim faet ya sipos God i no givhan long yumi? ?Olsem wanem yumi save kasem help blong God? ?Wanem ol fasin we yumi mas wokem blong givhan long yumi blong agensem ol nogud samting we bodi blong yumi i wantem? Blong faenem ansa long ol kwestin ya, i gud yumi lukluk long ol tijing we Jisas i givim long ol gudfala disaepol blong hem long laswan dei blong hem long wol ya.

Winim Fasin Praod Wetem Tingtingdaon

Tingbaot problem we i kamaot from fasin blong praod, no flas tingting. Baebol i talem se: “Man we i praod bambae i kasem trabol we i spolemgud hem, mo man we i flas tumas bambae i foldaon we i foldaon olgeta.” (Ol Proveb 16:18) Mo tu, Baebol i givim advaes se: “Sipos wan man i stap ting se, ‘Mi mi wan man ya,’ be hem i man nating nomo, hem i stap giaman nomo long hem.” (Galesia 6:3) Yes, fasin blong praod i save spolem mo trikim yumi. I waes blong no laekem nating “fasin blong praod mo fasin blong luklukdaon long narafala man.”—Ol Proveb 8:13.

?Ol aposol blong Jisas oli gat fasin blong praod mo oli luklukdaon long ol narafala? Baebol i tokbaot wan taem we oli stap rao se hu long olgeta i hae moa. (Mak 9:33-37) Long wan narafala taem, Jemes mo Jon, tufala i askem long Jisas blong tufala i kasem wan hae ples long Kingdom. (Mak 10:35-45) Jisas i wantem halpem ol disaepol blong hem blong winim slak fasin ya. Ale, taem olgeta oli stap mekem lafet blong Pasova, Jisas i girap, i tekemaot kot blong hem, mo i tekem wan tawel i parpar long hem, mo i stat blong wasem leg blong ol disaepol blong hem. Lesen we hem i wantem olgeta oli lanem i klia nomo. Jisas i talem  se: “From we mi, mi Masta mo mi Tija blong yufala, mi wasem leg blong yufala, yufala tu i mas waswasem leg blong yufala.” (Jon 13:14) Ol disaepol ya oli mas lego fasin blong praod mo wokem fasin we i defren olgeta—hemia tingtingdaon.

Be, i no isi blong winim fasin blong praod. Let long naet ya, Jisas i sanemaot Judas Iskariot, man ya we biaen i letem Jisas i go long han blong ol enemi blong hem. Biaen, ol 11 aposol we oli stap, oli stat blong rao bigwan. ?From wanem oli rao? !Oli rao from tingting ya se hu long olgeta i hae moa! Jisas i no tok strong long olgeta, be wetem longfala tingting, hem i soemaot wan moa taem bakegen se i impoten blong kam olsem man we i rere blong mekem wok blong narafala. Hem i talem se: “Ol king blong ol hiten man oli gat paoa long ol man blong olgeta. Mo ol haeman blong olgeta oli wantem kasem nem ya se, ‘Fren blong ol man’. Be fasin blong yufala bambae i no olsem. Sipos wan long yufala i hae moa, hem i mas kam olsem man we i yangfala moa long yufala. Mo man we i lida blong yufala, hem i mas kam olsem man blong wok nomo blong yufala.” Nao hem i pulum olgeta blong tingbaot eksampol blong hem, i se: “Mi mi stap long medel blong yufala olsem man blong karem kakae nomo.”—Luk 22:24-27.

?Ol aposol oli kasem save long lesen we Jisas i tijim long olgeta? Yes, i klia se oli kasem poen ya. Plante yia biaen, aposol Pita i raet se: “Yufala evriwan i mas gat wan tingting nomo, mo yufala i mas gat sore long yufala. Yufala i mas lavlavem yufala olsem we yufala i wan brata nomo, mo yufala i mas mekem i gud long yufala, we tingting blong yufala i stap daon.” (1 Pita 3:8) !I impoten tumas we yumi tu yumi lego fasin blong praod mo wokem tingtingdaon! Yumi waes sipos yumi no joen long fasin blong ronem haenem, paoa, no posisen. Baebol i talem se: “God i agensem olgeta we oli praod, be long olgeta we tingting blong olgeta i stap daon, hem i stap givhan long olgeta long gladhat blong hem.” (Jemes 4:6) Mo tu, wan waes proveb blong bifo i talem se: “Man we i obei long Hae God, mo i mekem tingting blong hem i stap daon, hem bambae i kam rij man. Bambae hem i gat longfala laef, mo ol man bambae oli ona long hem.”—Ol Proveb 22:4.

Winim Fasin Blong No Laekem Nating Narafala

Tingbaot wan narafala fasin we i kam antap plante long wol ya—hemia fasin blong no laekem nating narafala man. Tru ya, long evri ples, ol man oli no laekem narafala man from we oli fraet long narafala no oli no gat save long sam samting, ale oli stap jajem narafala wetem rong tingting, no oli gat fasin agens, fasin blong mekem i no stret, fasin blong flas from kantri, laen, no kala. (2 Timoti 3:1-4) Long taem blong Jisas tu, fasin ya i kam antap bigwan. Ol man Jiu oli no laekem nating ol man blong tekem mane blong takis mo oli no joen nating wetem ol man Sameria. (Jon 4:9) Mo tu, oli daonem ol man blong narafala nesen. Be, wosip ya we Jisas i stanemap, hem i wan wosip we ol man blong olgeta nesen bambae oli joen long hem. (Ol Wok 10:34, 35; Galesia 3:28) Taswe, wetem lav, Jisas i givim wan niufala samting long ol disaepol blong hem.

Jisas i talem se: “Mi mi givim wan niufala loa long yufala se, ‘Yufala i mas lavlavem yufala.’ Olsem we mi mi lavem yufala, ale long sem fasin, yufala i mas lavlavem yufala.” Ol disaepol oli mas lan blong soemaot lav ya, taswe Jisas i talem se: “Nao from we yufala i stap lavlavem yufala, bambae olgeta man oli luksave se yufala i man blong mi.” (Jon 13:34, 35) Loa ya i niuwan, from we hem i go moa long loa we i talem se: “Yufala i mas lavem ol man we oli stap raonabaot long yufala.” (Levitikas 19:18) ?Olsem wanem loa ya i go moa? Poen ya i kam klia taem Jisas i talem se: “Loa blong mi i olsem, se yufala i mas lavlavem yufala, olsem we mi mi lavem yufala. I no gat man we i lavem ol fren blong hem moa, i winim man we i lusum laef blong hem blong i sevem ol fren blong hem.” (Jon 15:12, 13) Ol man blong Jisas oli mas rere blong ded from brata blong olgeta mo ol narafala man.

?Olsem wanem ol sinman oli save lego fasin ya blong no laekem nating narafala? Oli mas wokem fasin lav we i pusum olgeta blong lego samting we  olgeta nomo i wantem. Plante milian man we oli kamaot long ol defdefren laen, kastom, skul, mo pati blong politik oli mekem samting ya finis. Naoia oli joengud olsem wan komuniti nomo we ol man blong hem oli no stap agensem narafala—hemia ol Witnes Blong Jeova we oli olsem wan brata nomo long olgeta ples blong wol. Olgeta ya oli tinghevi long tok we tabu spirit i pusum aposol Jon blong raetem se: “Man we i no laekem Kristin brata no sista blong hem, i stap agensem hem, hem i man blong kilim man i ded. Mo yufala i save finis, se ol man olsem, oli no gat laef ya we i no save finis.” (1 Jon 3:15) Ol trufala Kristin oli no joen long ol faet blong wol ya, mo antap long samting ya oli traehad blong soem lav long ol brata sista blong olgeta.

?Be, yumi mas gat wanem tingting long ol man we oli no gat sem bilif wetem yumi mo we oli soem se oli no laekem yumi? Taem Jisas i hang long pos, hem i prea from olgeta we oli kilim hem i ded, se: “Papa, plis yu fogivim olgeta ya, from we oli no save samting ya we oli stap mekem.” (Luk 23:34) Taem ol man we oli no laekem nating disaepol Steven, oli stonem hem i ded, lastok we Steven i talem i olsem se: “Masta. Taem yu jajem olgeta, plis yu no makem sin ya blong olgeta.” (Ol Wok 7:60) Jisas, mo Steven, tufala i wantem mekem i gud long olgeta man, wetem olgeta ya tu we oli no laekem nating tufala. Tufala ya i no gat fasin blong holem kros. Baebol i givim advaes long yumi se: “Yumi mas mekem i gud long olgeta man.”—Galesia 6:10.

‘Samting Blong Givhan Blong Olwe’

Taem miting wetem ol 11 gudfala aposol blong hem i stap gohed, Jisas i talem long olgeta se bambae i no longtaem hem i aot long wol ya. (Jon 14:28; 16:28) Be hem i mekem olgeta oli sua long wan samting i se: “Bambae mi mi askem long Papa blong mi, mo hem bambae i givim wan narawan i kam blong givhan long yufala. Narawan ya hem i Spirit blong Givhan, we bambae hem i save stap oltaem wetem yufala.” (Jon 14:16, Nyutesteman wetem Ol Sam long Bislama) Samting ya blong givhan, hem i tabu spirit blong God. Spirit ya bambae i tijim olgeta long ol dip samting blong Baebol, mo bambae i mekem olgeta oli tingbaot olgeta samting we Jisas i lanem olgeta taem hem i stap long wol.—Jon 14:26.

?Olsem wanem tabu spirit i save givhan long yumi tede? Tingbaot, Baebol hem i Tok we God i pusum ol man blong raetem. Ol man we God i yusum blong oli talemaot ol profet tok mo raetem Baebol, “tabu spirit [nao] i stap givim tok long olgeta.” (2 Pita 1:20, 21; 2 Timoti 3:16) Taem yumi stadi Baebol mo mekem samting we yumi lanem i wok long laef blong yumi, yumi kasem moa save, waes, dip save, fasin luksave, fasin blong skelemgud ol samting, mo fasin blong tingtinggud. !Long rod ya bambae yumi rere moa blong fesem ol hadtaem blong rabis wol ya!

Tabu spirit i save givhan long yumi long wan narafala rod bakegen. Tabu spirit blong God i wan strong paoa we i pusum man blong mekem i gud, mo hem i mekem man i naf blong soemaot ol fasin olsem God. Baebol i talem se: “Tabu spirit, hem i stap mekem ol man oli gat narafala fasin. Hem i stap mekem we oltaem olgeta oli stap lavem ol man, mo oli stap glad, mo oli gat pis long tingting blong olgeta. Hem i stap mekem we tingting blong olgeta i longfala, mo oli gat sore long man, mo we fasin blong olgeta i gud nomo, mo i stret oltaem we i no save jenis. Hem i stap mekem we olgeta oli kwaet man, mo oli save blokem ol samting we olgeta nomo oli wantem.” Yumi nidim ol fasin ya blong winim ol nogud fasin blong bodi olsem rabis fasin long saed blong seks, faet, jalus, kros, mo ol narafala fasin olsem.—Galesia 5:19-23.

Taem yumi dipen long spirit blong God, yumi save kasem “paoa ya we i bigwan tumas” blong fesem eni trabol no wari. (2 Korin 4:7) I tru se tabu spirit i no save karemaot ol traem, be hem i save halpem yumi blong stanap strong tru long ol traem ya. (1 Korin 10:13) Aposol Pol i raet se: “Mi save mekem evri samting, long paoa blong Kraes ya we i stap mekem mi mi strong.” (Filipae 4:13) God i givim paoa ya tru long tabu spirit blong hem. !Yumi talem bigfala tangkiu from tabu spirit ya! Mo tabu spirit ya, Jisas i promes blong givim long olgeta we oli ‘lavem hem, [mo we] oli obei long ol tok blong hem.’—Jon 14:15.

“Oltaem Yufala i Mas Joen Gud Long Mi”

Mo tu, long laswan naet bifo we Jisas i ded, hem i talem long ol aposol blong hem se: “Man we i kasemgud ol tok blong mi, mo i stap obei long olgeta, man ya nao i lavem mi. Mo man we i lavem mi, Papa blong mi bambae i lavem hem.” (Jon 14:21) Hem i talem long olgeta se: “Oltaem yufala i mas joen gud long mi blong mi mi save lavem yufala olwe.” (Jon 15:9) ?Olsem wanem fasin blong joen gud long Jeova mo Jisas, i save halpem yumi blong faet agensem ol slak fasin mo rabis wol ya?

Tingbaot. ?Bambae yumi naf blong winim ol slak fasin blong yumi sipos i no gat wan strong risen we i pusum yumi blong mekem olsem? Taswe, wan risen  nomo we i strong naf blong pusum yumi blong winim ol slak fasin blong yumi, hemia se yumi wantem frengud wetem Jeova mo Pikinini blong hem. Wan yangfala man we nem blong hem Ernesto, * i bin faet strong agensem ol rabis fasin blong hem. Taem hem i yangfala yet, fasin blong laef blong hem i nogud finis. Hem i eksplenem se: “Mi wantem se God i glad long mi, mo long Baebol, mi lanem se hem i no glad long fasin blong laef we mi stap folem. Ale mi mekemap tingting blong mi blong jenis mo folem ol rul blong hem. Evri dei, mi mas faet agensem ol nogud, doti tingting we oli stap kamaot long tingting blong mi. Be mi gat strong tingting blong winim faet ya, mo mi prea oltaem blong God i givhan long mi. Afta we tu yia i pas, faet ya i kam isi moa, be mi mas stap strong yet long mi wan.”

Long saed blong faet we yumi gat agensem wol ya, tingbaot laswan prea blong Jisas bifo we hem i aot long rum antap long haos long Jerusalem. Hem i prea from ol disaepol blong hem, mo i askem Papa blong hem se: “Mi mi no askem long yu blong yu tekemaot olgeta long wol ya. Mi wantem blong yu blokem man nogud ya Setan, blong i no kam spolem olgeta, yu holem olgeta oli stap gud oli sef. Mi mi no man blong wol ya, mo long sem fasin, olgeta tu oli no man blong wol ya.” (Jon 17:15, 16) !Tok ya i rili leftemap tingting! Jeova i stap lukaot long olgeta we oli lavem hem mo taem oli no joen long wol ya hem i mekem olgeta oli kam strong moa.

‘Soemaot Bilif’

Fasin blong obei long ol loa blong Jisas i save halpem yumi blong winim faet blong yumi agensem rabis wol mo slak fasin blong yumi. Nating se i impoten we yumi winim faet ya, yumi no save finisim wol ya no sin blong yumi. Be samting ya i no mas mekem yumi harem nogud.

Baebol i talem se: “Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.” (1 Jon 2:17) Jisas i givim laef blong hem blong ‘olgeta we oli soemaot bilif long hem,’ oli save kam fri long sin mo ded. (Jon 3:16, NW ) Taem yumi gohed blong kasem moa save long samting we God i wantem mo ol stamba tingting blong hem, i gud yumi traehad blong folem advaes blong Jisas se: “Yufala i mas bilif long God, mo yufala i mas bilif long mi tu.”—Jon 14:1.

[Ol Futnot]

[Tok blong pija long pej 7]

Jisas i pulum ol aposol blong hem blong oli ‘joen gud long hem oltaem’

[Tok blong pija long pej 7]

Bambae i no longtaem, ol man oli kam fri long sin mo ol trabol we oli kamaot from sin