„Nikalloqinasi, silarsuarmut ajugaareerpunga“

ULLOQ Jiisusip toquffia — juutit qaammatisiutaanni nisanip 14-ianni — ukiumi 33-mi marsip 31-anni seqernup tarrinnerani aallartippoq. Unnummi tassani Jiisusi apustiliilu poorskisiorniarlutik Jerusalemimi inimi qullermi katersuupput. Jiisusip „Ataatamukarluni silarsuarmit matumannga aallarfissani“ piareersaatigalugu, apustilini naggatissamut allaat asallugit takutippaa. (Johannesi 13:1) Qanoq? Siunissami pisussanut piareersaatigisaannik nuanningaartunik ilinniartillugit.

Unnuup ingerlanerani Jiisusip apustilini ima oqarfigai: „Nikalloqinasi, silarsuarmut ajugaareerpunga.“ (Johannesi 16:33) Oqaatsini isumalluarpaluttut taakku qanoq-uku isumaqartikkai? Ilaatigut imatut: ’Silarsuarmi ajortut akeqqersimaartunngortinngilaannga akiniaatissimanangaluunniit. Silarsuup immisut pissuseqartinniarlunga tatisinera akuerinngilara. Malissinnaavassinga.’ Jiisusip inuunermini nalunaaquttap akunnerini kingullerni apustiliminut aalajaatsunut ilinniartitsissutigisai, apustiliisa aamma silarsuarmut ’ajugaanissaminnut’ iluaqutigissavaat.

Ullutsinni silarsuaq ajortoqangaarpoq. Naapertuilluanngitsuliornerit isumaqanngitsumillu nakuusernerit tusaraangatsigik qanoq qisuariartarpugut? Ima uumissuilertigisarpugut akiniaarusulerluta? Avatangiisitsinni ileqqorluttoqarnera qanoq uagutsinnut sunniuteqartarpa? Tamakkua nammineq naammalluinnanngitsuunitsinnut ajortulioqqajaanitsinnullu kattukkutsigik, akiuuffissagut marluupput: avatangiiserput silarsuaq ajortoq, namminerlu ajortulioqqajaanerput. Guutimit ikiorneqarata ajugaanissarput ilimagisinnaavarput? Qanoq ililluta Guutimit ikiorneqarsinnaavugut? Uinikkut ajortulioqqajaanerit akiorniarlugit pissutsit suut ineriartortittariaqarpavut? Apeqqutit taakku akissutissarsiorlugit Jiisusip nunami inuunermini ullormi kingullermi ajoqersukkaminut ilinniartitsissutigisai misissorneroriartigik.

Makitasuujuneq maniguunneq sakkugalugu ajugaaffigiuk

Assersuutigeriartigu pissuseq makitasuujuneq, imaluunniit imminut pingaartinneq. Pissuseq taanna pillugu Biibilimi ima allassimavoq: „Imminut pingaartinneq ajunaarnerup siulerisarpaa makitasaarnerlu naakkiunnerup.“ (Ussatit 16:18) Biibilimi aamma ima allassimavoq: „Imminut pingaartuusorisoq, uffa taamaannani, taanna imminut salloqittarpoq.“ (Galatiamiut 6:3) Aap, makitasuujuneq pissusiuvoq aserorsaataallunilu salloqittaataasoq. Silatusaassaagut „makitasaarneq usorsisimaarnerlu“ uumigigutsigik. — Ussatit 8:13.

Makitasuujuneq Jiisusip apustiliisa ajornartorsiutigaat? Minnerpaamik ataasiarlutik kina annerpaartarinerlugu oqallisigaat. (Markusi 9:33-37) Ulloq alla Jaakup Johannesillu Guutip naalagaaffiani nuimasumik inissisimaffeqarnissartik qinnutigaat. (Markusi 10:35-45) Jiisusip ajoqersukkani taamaaqqajaasarunnaarsikkusuppai. Poorskimi nereqatigiitsillutik nikuippoq, allarummillu saaliaqutseriarluni ajoqersukkami isigai asappai. Ilinniartitsissutigerusutaa  suunersoq qularutissaanngilaq. Jiisusi ima oqarpoq: „Uanga ilissinnut Naalagaallungalu Ajoqersuisuusunga isikkasi asakkakkit, taava ilissi aamma pisussaavusi isikkassinnik asaaqatigiissallusi.“ (Johannesi 13:14) Makitasuujuneq akerlianik — maniguunnermik — taarserneqartariaqarpoq.

Makitasuujunerli akioruminaatsuuvoq. Unnummi tassani kingusinnerusukkut, Jiisusip killuussisoq Judasi Iskarioti aneqqoreeraa, apustilit aqqanillit assortuutingaalerput. Suna assortuussutigaat? Arlartik kina annerunersoq. Naveernagit Jiisusip kamagittarluni erseqqissarpaa allanik kiffartuussineq pingaaruteqartuusoq. Ima oqarpoq: „Inuiaat kunngiisa naalagaaffigisarpaat, naalakkersuisullu avaaginnittunik taaneqartittarput. Ilissi taamaassanngilasi; akornassinnili annersarsi nukarlersassitut issaaq siulersuisorlu kiffartortutut.“ Namminerlu maligassiuinerminik eqqaasinniarlugit ima nangippoq: „Uanga akornassinni kiffartortutut ippunga.“ — Lukasi 22:24-27.

Tamatuma isumaa apustilit paasivaat? Taamaagunarpoq. Ukiualuit tamatuma kingorna apustili Petrusi ima allappoq: „Tamassi isumaqatigiillusi inooqatigiigitsi misiginneqataasarlusi, qatanngutigiittut asaqatigiillusi, nallittuisarlusi qanilaarlusilu.“ (1 Petrusi 3:8) Uagutsinnuttaaq pingaaruteqarluinnarpoq makitasuujunerup maniguunneq sakkugalugu ajugaaffiginissaa. Tusaamasaanissaq, pissaaneqarnissaq innuttaaqatigiinniluunniit atorfikkaajunissaq kiserluinnaat ulapputigilerutsigu silatusaassanngilagut. Apustili Jaaku ima allappoq: „Guutip makitasuut akerartorpai, qanilaartulli saammaattarpai.“ (Jaaku 4:6) Ussatitoqqami assingusumik allassimasoqarpoq: „Qanilaarnerup Guutimillu mianerinninnerup akissarsiarititaat tassaapput pisuussutit ataqqinaallu inuunerlu.“ — Ussatit 22:4.

Uumissuineq qanoq ajugaaffigineqarsinnaava?

Pissuseq alla silarsuup matuma malunnaatigilluagaa tassaavoq uumissuineq. Uumissuineq siooranermik, ilisimasakinnermik, paqumisunnermik, naqisimaneqarnermik, naapertuilluanngitsuliornermik, inuiaassutsimik pingaartitsivallaarnermik, naggueqatigiit kulturiannik imaluunniit allamik nagguilimmik uumissuinermik pissuteqaraluarpat sumi tamaaniippoq. (2 Timotheusi 3:1-4) Aamma Jiisusip nalaani uumissuisarneq nalinginnaavoq. Ilanngaaserisut uumigineqartarput innuttaaqatigiinnillu juutiusunit anisitaasarlutik. Juutit Samariamiut atassuteqarfigiumaneq ajorpaat. (Johannesi 4:9) Guutimik nalusut, imaluunniit juutiunngitsut, aamma juutinit asissorneqartarput. Pallorfiginneriaaserli Jiisusip atulersitaa piffissanngorpat inuit inuiannit tamaneersut atulissavaat. (Apustilit Suliaat 10:34, 35; Galatiamiut 3:28) Taamaattumik Jiisusip asannilluni ajoqersukkani nutaamik tunivai.

Jiisusi ima oqarpoq: „Inassummik nutaamik tunivassi: Asaqatigiissaasi. Soorlu uanga asagissi, taamattaaq ilissi asaqatigiissaasi. Asaqatigiikkussi tamatumuuna tamarmik paasissavaat ajoqersugarigissi.“ Tassa ajoqersukkat asanninnerup tamatuma ersersinnissaa ilikkartariaqarpaat. (Johannesi 13:34, 35) Inatsit nutaajuvoq ima paasillugu inatsimmik uumannga annerugami: „Tullit ilittut asassavat.“ (3 Mosesi 19:18) Qanoq ililluni? Jiisusi ima nassuiaavoq: „Inassutiga tassa asaqatigiissasusi, soorlu uanga ilissi asagissi. Annerusumik asanninneqanngilaq ikinngutini pillugit inuunerminik akiginnittup asanninneranit.“ (Johannesi 15:12, 13) Apustilit arlartik allallu pillugit inuunertik pilliutigeriaannaasariaqarpaat.

Inuit naammalluinnanngitsut qanoq naakkittaatsumik uumissuiunnaarsinnaappat? Uumissuiunnaarlutik imminut pilliutigeriaannaasumik asannilerlutik. Inuit eqqortuliorusuttut millionilikkuutaat taamaaliulereerput qanorluunniit  inuiaassutsikkut, kulturikkut, upperisarsiornikkut politikkikkulluunniit tunuliaqutaqaraluarlutik. Qatanngutigiissutut peqatigiinni — silarsuaq tamakkerlugu Jehovap Nalunaajaasuisa peqatigiissortaani — uumissuinertaqanngitsumi ataasiussuseqalersimapput. Apustili Johannesip isumassarsisinneqarluni oqaasii tusarsimavaat: „Kinaluunnit qatanngumminik uumiginnittoq toqutsisuuvoq, nalunngilarsilu toqutsisimasoq kinaluunniit inuunermik naassaanngitsumik immini pigisaqanngitsoq.“ (1 Johannesi 3:15) Kristumiut ilumoortut qanorluunniit ittumik sakkuaannermut peqataajumanngiinnarnatik; aammattaaq imminnut asannittuliorfiginissartik ilungersuutigingaarpaat.

Qanorli pissuseqarfigissavavut uppeqatiginngisavut, immaqalu allaat uagutsinnik uumissuerpaluttut? Jiisusi nappakkami naalliutsitaaffimmi nivingalluni Romamiut imminik toqutsilersut ima qinnuppai: „Ataataq, isumakkeerfigikkit suliartik nalummassuk.“ (Lukasi 23:34) Stefanusip angutinit uumissuisunit ujaqqanik milloorneqarluni toqulerluni oqaasii kingulliit imaapput: „[Jehova], ajortuliamut tamatumunnga pisuuteqinagit!“ (Apustilit Suliaat 7:60) Jiisusip Stefanusillu inuit tamaasa, allaat uumissortitik, ajunnginnerpaamik kissaappaat. Akeqqersimaartunngunngillat uumissuisunngornatilluunniit. „Tamanut ajunngitsuliorniarta,“ Biibilimi allassimavoq. — Galatiamiut 6:10.

’Naassaanngitsumik illersuisoq’

Jiisusip apustilit aqqanillit unnukkorsioqatigitillugit oqaluttuuppai erniinnaq uinikkut ilagiunnaassallugit. (Johannesi 14:28; 16:28) Imali neriorsoqqissaarpai: „Ataataq qinnuigiumaarpara, tuniumaarpaasilu illersuisussamik allamik naassaanngitsumik ilissinniittussamik.“ (Johannesi 14:16) Illersuisussaq neriorsuutigisaq tassaasimavoq tassaallunilu Guutip anersaava illernartoq. Tamatuma Allakkat paasiuminaatsortaanik paasitissavaat eqqaasillugillu Jiisusip nunami kiffartortilluni ilinniartitsissutigisaanik. — Johannesi 14:26.

Ullumikkut anersaap illernartup qanoq ikiorsinnaavaatigut? Aap, Biibili tassaavoq Guutip oqaasia isumassarsiarititaasoq. Angutit Guutip siulittuisitai Biibilimillu allatsitai ’Anersaamit Illernartumit sunnertillutik oqaaseqarput’. (2 Petrusi 1:20, 21; 2 Timotheusi 3:16) Allakkat atuaqqissaaraangatsigik ilikkakkavullu atoraangatsigik ilisarsisarpugut, ilisimassuseqalerluta, paasinnittarluta, siuneqassuseqalerluta, naliliisinnaassuseqalerluta eqqarsarluarsinnaanerulerlutalu. Taamaalilluta silarsuup matuma ajortup tatisinera akiorsinnaanerulersinnaassanngilarput?

Guutip anersaava illernartoq aamma allakkut iluaqutigisinnaavarput. Pissaanerujussuuvoq, pissaaneq sunniiffigisaminut ajunngitsunik inerititaqartitsisartoq Guutillu pissusiinut assingusunik pissuseqalersitsisartoq. Biibilimi ima allassimavoq: „Anersaap inerititai tassaapput asanninneq, nuannaarneq, eqqissineq, kamajasuunnginneq, inussiarnisaarneq, ajunngitsuuneq, unneqqarissuseq, qanilaarneq imminullu naalakkersinnaaneq.“ Tamakkorpiaanngillat uinngup kinguaassiuutitigut inuunerloqqajaaneranut, saqitsaateqqajaaneranut, sinngaqqajaaneranut, kamajasuuneranut assigisaannullu akiuunnissatsinnut pisariaqartitavut? — Galatiamiut 5:19-23.

Annikilliortilluta ajornartorsiortillutaluunniit Guutip anersaavata tatigineratigut ’pissaaneq pissusissap akimugaa’ pisinnaavarput. (2 Korinthimiut 4:7, NV) Imaassinnaavoq anersaap illernartup misilinneqarnivut ussernartorsiornivullu piinngikkai, qularnanngilluinnarporli artorsartitaaqqunata ikiussagaatigut. (1 Korinthimiut 10:13) „Tamaasa pissatsitsisikkut atussallugit sapinngilakka,“ apustili Paulusi allappoq. (Filippimiut 4:13) Guutip anersaaq illernartoq atorlugu taamatut pissaaneqartittarpaatigut. Qujamasunnissatsinnut pissutissaqarluarpugut! Anersaaq taanna ’Jiisusimik asannittunut inassutaanillu maleruaasunut’ tamanut neriorsuutaavoq. — Johannesi 14:15.

„Asannissutsinniittuaritsi“

Nunami inuunermini unnummi kingullermi Jiisusi apustiliminut aamma ima oqarpoq: „Inassutinnik piginnillunilu aalajangiussisoq tassaavoq uannik asannittoq; uannillu asannittoq Ataatannit asaneqassaaq.“ (Johannesi 14:21) „Asannissutsinniittuaritsi,“ Jiisusip kajumissaarpai. (Johannesi 15:9) Ataatap Ernerullu asannissusianiittuarutta ajortulioqqajaanitta akiornerani ikiorneqarsinnaavugut silarsuarlu ajortoq avatangiiserput ’ajugaaffigalugu’?

 Kajumissuseqarujussuanngikkutta ajortulioqqajaanivut aqukkuminaatsissavavut. Allamilli kajuminnarnerusoqarpa Jehova Guutimut erneranullu attaveqarlualerusunnermit? Ernesto, * inuusuttuaraallunili inuunerlunnerisimasani iperarniarlugu ilungersungaarsimasoq, ima nassuiaavoq: „Guuti nuannaartikkusuppara, Biibilimilu ilikkarpara inuunerisara nuannarinngikkaa. Aalajangerpunga uangaassutsinnik allannguiniarlunga Guutip najoqqutassiaanut naapertuuttumik inuusinnaaniarlunga. Ullut tamarluinnaasa eqqarsaatit nikallornartut paquminartullu isummannut takkuttuartut akiortariaqarpakka. Ajugaaffiginissaalli aalajangiusimavara Guutimullu ikioqqullunga qinujuarpunga. Ukiut marluk qaangiummata ajornersaa anigorpara, sulili imminut sukangaffigisariaqarpunga.“

Silarsuup avatangiisitta akiorneranut atatillugu Jiisusip Jerusalemimi illup qalianit poorskisiorfimminit anitinnani qinnutaa kingulleq malugisariaqarpoq. Ajoqersukkani sinnerlugit ima qinuvoq: „Qinnutinngilakka silarsuarmit peerseqqullugit, paareqqullugilli ajortumut peqqunagit. Silarsuarmit pisuunngillat, soorlu uanga silarsuarmit pisuunngitsunga.“ (Johannesi 17:15, 16) Qinnut toqqissiallannarpoq, ilaa! Jehovap asasini paarai, silarsuarmillu avissaarsimagaangata nakussatsittarlugit.

„Guutimut upperitsi“

Jiisusip inassutaata maleruarnera silarsuup ajortup ajortulioqqajaanittalu ’ajugaaffiginissaannut’ iluaqutigissavarput. Ajugaanerit taamaattut pingaaruteqaraluarlutik, silarsuatoqqamik peersitsisinnaanngillat ajortulioqqajaajunnaarsissinnaanataluunniit. Taamaattoq neriuutaaruttariaqanngilagut.

Biibilimi ima allassimavoq: „Silarsuaq piumatussusialu nungussapput, Guutilli piumasaanik iliortoq naassaanngitsumik atassaaq.“ (1 Johannesi 2:17) Jiisusip inuunini tunniuppaa „[imminut] uppertoq kinaluunniit“ ajortimit toqumillu aniguisinniarlugu. (Johannesi 3:16) Guutip piumasaanik siunertaanillu ilisarsinerujartortilluta Jiisusip oqaaqqissaarutaa maleruaqqissaartigu: „Guutimut upperitsi, uannullu upperitsi.“ — Johannesi 14:1.  (wE 3/15 03)

[Quppernerup ataani ilanngussaq]

[Qupp. 6, 7-mi assiliartaq]

„Asannissutsinniittuaritsi,“ Jiisusip apustilini oqarfigai

[Qupp. 7-mi assiliartaq]

Ajortimit sunniutaanillu aniguisitaanissaq erniinnaq piviusunngussaaq