“Betang Dipelo, Xobane Lefase le Fentšwe ke Nna”

LETŠATŠI la lehu la Jesu​—letšatši la bo-14 la kgwedi ya se-Juda ya Nisani​—le ile la thoma ge letšatši le sobela ka Labone, March 31, 33 C.E. Mantšiboeng ao, Jesu le barutiwa ba gagwe ba ile ba bokana ka phapošing ya ka godimo ya ntlo kua Jerusalema e le gore ba bine Paseka. Ge a be a itokišeletša “xo tloxa lefaseng le xo ya xo Tat’axwe,” Jesu o ile a bontšha gore o be a rata baapostola ba gagwe go fihla bofelong. (Johane 13:⁠1) Bjang? Ka go ba ruta dithuto tše botse e le ge a ba lokišeletša seo se tlago go direga nakong e tlago.

Bošego ge nako e dutše e tšwela pele, Jesu o ile a botša barutiwa ba gagwe gore: “Betang dipelo, xobane lefase le fentšwe ke Nna.” (Johane 16:​33) O be a bolela’ng ka mantšu ao a bontšhago go ba le sebete? Ka boripana o be a bolela se: ‘Bobe bja lefaseng ga se bja mpefediša goba bja dira gore ke itefeletše. Ga se ka dumelela lefase le mpitlaganyetša sebopegong sa lona. Se se ka itlhatsela e le therešo le go wena ka mo go swanago.’ Seo Jesu a se rutilego barutiwa ba gagwe diiring tšeo tša mafelelo tša bophelo bja gagwe bja lefaseng se be se tla ba thuša gore le bona ka mo go swanago ba fenye lefase.

Ke mang yo a ka ganago gore bobe bo aparetše lefase lehono? Re arabela bjang go go hloka toka le ditirong tša bošoro bjo bo se nago tlhaologanyo? Na dilo tše di a re befediša goba di re leka gore re lefetše bobe ka bobe? Re tutuetšwa bjang ke boitshwaro bjo bo phuhlamago bjo bo re dikologilego? Go oketša go se, re na le go se phethagale le ditshekamelo tša sebe, ka baka leo go na le dintwa tše pedi tšeo re swanetšego go di lwa: ya malebana le lefase le kgopo le ya malebana le ditshekamelo tše kgopo tše re nago le tšona. Na ruri re ka holofela go fenya ntle le thušo ya Modimo? Re ka hwetša bjang thušo ya gagwe? Ke dika dife tšeo re swanetšego go di hlagolela bakeng sa go re thuša go lwa le ditshekamelo tša nama? Bakeng sa go hwetša dikarabo, a re hlahlobeng seo Jesu a ilego a se ruta barutiwa ba gagwe ba ba rategago letšatšing la mafelelo la bophelo bja gagwe mo lefaseng.

Fenya Boikgogomošo ka Boikokobetšo

Ka mohlala, nagana ka bothata bja boikgogomošo goba boikgantšho. Beibele ge e bolela ka bjona e re: “Boikgogomošo bo eta thobego pele; gomme go wa go etwa pele ke go ikgantšha.” (Diema 16:​18, PK) Mangwalo a re eletša gape ka gore: “Xe motho a ka ithsema a re: Ke selô, mola à se selô, ó a iphora.” (Ba-Galatia 6:⁠3) Ee, boikgogomošo bo a senya e bile bo a fora. Re dira gabotse ge re hloya “boikxanthšô, le boikxoxomošô.”​—Diema 8:⁠13.

Na baapostola ba Jesu ba ile ba ba le bothata ka boikgantšho le boikgogomošo? Bonyenyane lebakeng le lengwe, ba ile ba ngangišana ka gore ke mang yo mogolo. (Mareka 9:​33-37) Lebakeng le lengwe gape, Jakobo le Johane ba ile ba kgopela maemo a phagamego Mmušong. (Mareka 10:​35-45) Jesu o be a kganyoga go thuša barutiwa ba gagwe go tumola tshekamelo ye. Ka gona,  nakong yeo ba bego ba e-⁠ja sejo sa Paseka, o ile a emelela, a tšea lešela gomme a thoma go hlapiša barutiwa ba gagwe maoto. O ile a fetišetša seo a bego a nyaka gore ba ithute sona. Jesu o ile a re: “Xe Nna ke lexo Moruti le Morêna, kè Le hlatswitše maoto, le lena xo Le swanetše xe Le hlatswana maoto.” (Johane 13:​14) Boikgogomošo bo swanetše go tšeelwa sebaka ke leganetši la bjona​—boikokobetšo.

Lega go le bjalo, ga go bonolo go fenya boikgantšho. Ka morago mantšiboeng ao, ka morago ga ge Jesu a rakile Judase Isikariote yo a bego a le kgaufsi le go mo eka, go ile gwa tsoga ngangišano e kgolo gare ga baapostola ba 11. Ba be ba ngangišana ka eng? Ka gore ke mang yo mogolo gare ga bona! Go e na le go ba omanya, ka go se fele pelo Jesu o ile a gatelela gape bohlokwa bja go hlankela ba bangwe. O ile a re: “Dikxoši tša dithšaba di a di buša; le ba ba di bušaxo ka tše thata, ba rêtwa ba thwe Sethakxa. Xo lena xo se kê xwa ba byalo. E moxolo mo xo lena a a kê e monyenyane; e a bušaxo a a kê mohlankedi.” Ge a ba gopotša ka mohlala wa gagwe o itše: “Nna xare xa lena nka ke mohlanka wa lena.”​—Luka 22:​24-⁠27.

Na baapostola ba ile ba kwešiša? Go molaleng gore ba ile ba kwešiša. Nywaga ka morago moapostola Petro o ile a ngwala gore: “Bang ba kxopolô e tee ka moka xa lena, Le kwêlanê bohloko, Le ratanê le bana ba bô-lêna, Le bê ba bonôlô le ba botho.” (1 Petro 3:⁠8) Go bohlokwa gakaakang gore le rena re fenye boikgogomošo ka boikokobetšo! Re dira gabotse gore re se ke ra tanywa go phegeleleng botumo, matla goba maemo. Beibele e re: “Modimo ó lwa le baikxodiši; ba xo ikokobetša ó ba sétša ka dikxauxêlô.” (Jakobo 4:⁠6) Seema sa bogologolo le sona se re: “Boikokobetšô le xo boifa Morêna, moputsô ké lehumô, le xo rêtwa, le xo phela.”​—Diema 22:⁠4.

O ka Fenya Bjang Lehloyo?

Nagana ka mokgwa o mongwe wo o tlwaelegilego lefaseng​—lehloyo. Go sa šetšwe gore le bakwa ke poifo, go se tsebe, go beba sefahlego, kgatelelo, go hloka toka, botšhaba, kgethollo ka meloko goba kgethollo, go bonala lehloyo le tletše gohle. (2 Timotheo 3:​1-⁠4) Le mehleng ya Jesu lehloyo le be le atile. Balekgetho e be e le balahlwa bao ba hloilwego setšhabeng sa ba-Juda. Ba-Juda ba be ba sa nwešane meetse le ba-Samaria. (Johane 4:⁠9) Le gona, ba-Ntle le bona ba be ba nyatšwa ke ba-Juda. Lega go le bjalo, mafelelong tsela ya borapedi yeo Jesu a ilego a e hloma e be e tla amogela batho ba ditšhaba ka moka. (Ditiro 10:​34, 35; Ba-Galatia 3:​28) Ka gona ka lerato o ile a nea barutiwa ba gagwe selo se itšego se sefsa.

Jesu o ile a re: “Ké Le nea molaô o mofsa, wa xo re Le ratanê, wa xo re Le ratanê byalo ka Nna xe ke Le ratile.” Ba ile ba swanela ke go ithuta go bontšha lerato le, ka gobane o tšwetše pele ka gore: “Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.” (Johane 13:​34, 35) Molao e be e le o mofsa ka gobane o be o fetela ka kua ga go rata ‘wa geno ka mokgwa wo o ithatago ka gona.’ (Lefitiko 19:​18) Ka tsela efe? Jesu o ile a lokiša taba ka gore: “Molaô wa-ka šó: Ratanang byalo ka xe Nna ke Le ratile. Xa xo e a naxo le leratô le le fetišaxo la eo a xafaxo bophelô bya xaxwe ka ’baka la baxwêra ba xaxwe.” (Johane 15:​12, 13) Ba be ba swanetše go ikemišetša go hwelana le go hwela ba bangwe.

Batho ba sa phethagalago ba ka tumola bjang lehloyo maphelong a bona? Ka gore le tšeelwe legato ke lerato la boikgafo. Batho ba dimilione ba dipelo tše di botegago go tšwa ditlogong ka moka tša morafo, setšo, bodumedi le bopolitiki  ba dira sona seo. Ga bjale ba tlaleleditšwe setšhabeng se se nago le botee, se se se nago lehloyo​—borwarre bja lefase ka moka bja Dihlatse tša Jehofa. Ba ela hloko mantšu a buduletšwego a moapostola Johane a rego: “Mang le mang e a hloilexo ngwan’abô ké mmolai, xomme Le a tseba xa xo mmolai e a naxo le bophelô byo bo sa felexo byo bo kaxo dula è le bya xaxwe.” (1 Johane 3:​15) Bakriste ba therešo ga ba gane feela go tsenya letsogo ntweng eupša e bile ba šoma ka thata go bontšhana lerato.

Lega go le bjalo, re swanetše go lebelela bjang batho bao e sego badumedi-gotee le rena le bao ba ka bago ba re hloile? Ge a be a lekeletše koteng ya tlhokofatšo, Jesu o ile a rapelela babolai ba a re: “Tata! Ba lebalêlê, xobane xa ba tsebe se ba se diraxo!” (Luka 23:​34) Ge banna ba bego ba tletše lehloyo ba be ba thuma morutiwa Stefano ka mafsika go fihlela a e-⁠hwa, mantšu a gagwe a mafelelo e bile a rego: “Morêna, O se ba balêlê sebe sé!” (Ditiro 7:​60) Jesu le Stefano ba be ba nyakela gaešita le ba bego ba ba hloile se se kaone kudu. Ba be ba se na lehloyo ka dipelong tša bona. Beibele e re eletša ka gore: “A re direng botse; re bo direlê batho bohle.”​—Ba-Galatia 6:⁠10.

‘Molwedi wa go Iša ka go sa Felego’

Ge seboka le baapostola ba 11 ba botegago se dutše se tšwela pele, Jesu o ile a ba botša gore go se go ye kae a ka se sa hlwa a e-⁠ba le bona ka nama. (Johane 14:​28; 16:​28) Eupša o ile a ba kgonthišetša gore: “’Me Nna ke tlo kxopêla Tate, a tlo Le nea Molwedi e mongwê, xore a tlê a dulê le lena xo iša xo sa felexo.” (Johane 14:​16) Moya o mokgethwa wa Modimo ke wona mothuši yo a holofeditšwego. O be o tla ba ruta dilo tše di tseneletšego tša Mangwalo gomme o ba gopotše dilo tšeo Jesu a ba rutilego tšona bodireding bja gagwe bja lefaseng.​—Johane 14:⁠26.

Moya o mokgethwa o ka re thuša bjang lehono? Ke therešo gore Beibele ke Lentšu la Modimo leo le buduletšwego. Banna bao ba bego ba bolela diporofeto le go ngwala Beibele ba be “bà išwa ke Môya o mokxêthwa.” (2 Petro 1:​20, 21; 2 Timotheo 3:​16) Go ithuta ga rena Mangwalo le go diriša seo re ithutago sona go re nea tsebo, bohlale, kwešišo, temogo le bokgoni bja go nagana. Ka gona na ga se ra hlangwa kaone gore re lebeletšane le dikgateletšo tša lefase le kgopo?

Moya o mokgethwa ke mothuši ka tsela e nngwe gape. Moya o mokgethwa wa Modimo ke matla a magolo bakeng sa go dira botse, a dira gore bao ba lego ka tlase ga tutuetšo ya wona ba kgone go bontšha dika tša go boifa Modimo. Beibele e re: “Dienywa tša Môya, tšôna ké leratô, le lethabô, le moláô; ke xo se fêle pelo, le botho, le bonôlô, le pôtêxô le bolêta, le boithswarô.” Na tše ga se dika tšeo re di nyakago e le gore re fenye ditshekamelo tša nama malebana le boitshwaro bjo bo gobogilego, dintwa, lehufa, bogale le dilo tše swanago le tšeo?​—Ba-Galatia 5:​19-⁠23.

Ka go ithekga ka moya wa Modimo, re ka amogela gape le “matla a fetišago a tlwaelegilego” bakeng sa go lebeletšana le bothata goba tlaišego. (2 Ba-Korinthe 4:⁠7, NW) Gaešita le ge moya o mokgethwa o ka se tloše diteko, ka ntle le pelaelo o ka re thuša go di kgotlelela. (1 Ba-Korinthe 10:​13) Moapostola Paulo o ngwadile gore: “Ke kxôna tšohle ka Eo a mphaxo matla, Yêna Kriste.” (Ba-Filipi 4:​13) Modimo o nea matla a bjalo ka moya wa gagwe o mokgethwa. Re ka thaba gakaakang bakeng sa moya o mokgethwa! O holofetšwa bao ba ‘ratago Jesu gomme ba boloka melao ya gagwe.’​—Johane 14:⁠15.

“Dulang lè le Leratong La-ka”

Bošegong bja gagwe bja mafelelo e le motho, Jesu o ile a botša baapostola ba gagwe gore: “E a naxo le melaô ya-ka ’me a e lôtôla, ké yêna a nthataxo. ’Me e a nthataxo, ó tlo ratwa ke Tate.” (Johane 14:​21) O ile a kgothaletša gore: “Dulang Lè le leratong la-ka.” (Johane 15:⁠9) Go dula leratong la Tate le la Morwa go re thuša bjang go lweng ga rena le ditshekamelo tša go dira sebe tše di lego ka go rena gotee le lefase le kgopo?

Go ba gona, na ruri re ka laola ditshekamelo tše mpe ge e ba re hloka tutuetšo e matla ya go dira bjalo? Ke kgothatšo efe e kgolo yeo e ka bago gona go feta kganyogo ya go ba le tswalano e botse le Jehofa Modimo gotee le Morwa wa gagwe? Ernesto, * lesogana leo le lwelego ntwa e matla malebana le tsela e gobogilego ya  bophelo yeo a e phetšego nywageng ya gagwe ya go obelela e masome-pedi o hlalosa gore: “Ke be ke nyaka go thabiša Modimo, gomme ke ile ka ithuta go tšwa ka Beibeleng gore o be a sa kgahlišwe ke tsela yeo ke bego ke phela ka yona. Ka gona ke ile ka phetha ka gore ke be mohuta o fapanego wa motho, ke dumelelane le tlhahlo ya Modimo. Letšatši le lengwe le le lengwe ke ile ka swanelwa ke gore ke lwe le dikgopolo tše mpe le tše di gobogilego tšeo di bego di sa dutše di ntlhasela monaganong. Eupša ke be ke ikemišeditše go fenya ntwa ye, gomme ke ile ka rapelela thušo ya Modimo ke sa kgaotše. Ka morago ga nywaga e mebedi bothata bjo bogolo bo be bo fedile, le ge e le gore ke sa hwetša go le thata go itshwara.”

Ge e le mabapi le go lwa le lefase, ela hloko thapelo ya Jesu ya go phetha pele a ka tloga ka phapošing yeo ya ka godimo kua Jerusalema. Ge a be a rapelela barutiwa ba gagwe go Tatagwe o ile a kgopela gore: “Xa ke kxopele xore O ba tlošê lefaseng; ke ba kxopêlêla xo phêmêlwa bobe. Bôná xa se ba lefase, byalo ka Nna kè se wa lefase.” (Johane 17:​15, 16) A mantšu a kgonthišetšago gakaakang! Jehofa o hlokomela bao a ba ratago gomme o a ba matlafatša ge ba dutše ba ikarola lefaseng.

‘Bontšha Tumelo’

Go latela ditaelo tša Jesu ka kgonthe go ka re thuša go fenya ntweng ya rena ya malebana le lefase le kgopo le ditshekamelo tša rena tša go dira sebe. Lega go le bjalo, gaešita le ge diphenyo tše bjalo di le bohlokwa, di ka se fediše lefase goba sebe sa leabela. Eupša ga se ra swanela go nolega moko.

Beibele e re: “Lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.” (1 Johane 2:​17) Jesu o neetše bophelo bja gagwe go lokolla “mang le mang e a mo dumetšexo” sebeng le lehung. (Johane 3:​16) Ge re dutše re gola tsebong ya rena ya go tseba thato ya Modimo le merero ya gagwe, gona anke re eleng hloko keletšo ya Jesu e rego: “Dumêlang Modimo, le Nna Le ntumêlê.”​—Johane 14:⁠1.

[Mengwalo ya ka tlase]

[Caption on page 7]

Jesu o kgothaleditše baapostola ba gagwe gore: “Dulang Lè le leratong la-ka”

[Caption on page 7]

Go lokologa sebeng le go ditla-morago tša sona go tla tloga go phethagala