“Tene Kurashi, Mi A Vense Mundu”

E DIA di Hesus su morto—dia 14 di nísan riba kalènder hudiu—a kuminsá ora solo a baha riba djaweps, 31 di mart di aña 33 di nos era. E anochi ei, Hesus i su apòstelnan a bini huntu den un sala parti ariba di un kas na Yerúsalèm pa selebrá e Pasku hudiu. Preparando pa “laga e mundu aki i bai serka e Tata,” Hesus a mustra ku el a stima su apòstelnan te na fin. (Huan 13:1) Kon? Dor di siña nan algun lès sublime, i asina prepará nan pa loke tabata bai sosodé.

Mas lat anochi, Hesus a bisa su disipelnan: “Tene kurashi, mi a vense mundu.” (Huan 16:33) Kiko e tabata ke men ku tal deklarashon intrépido? Loke e kier a bisa ta entre otro: ‘E maldat den mundu no a hasi mi amargá ni e no a pone mi tuma vengansa. Mi no a laga mundu primi mi den su malchi. Boso tambe por hasi meskos.’ Loke Hesus a siña su apòstelnan fiel den e oranan final di su bida riba tera lo a yuda nan tambe vense mundu.

Ken lo por nenga ku maldat ta reina tur kaminda den e mundu djawe? Kon nos ta reakshoná ora nos haña nos konfrontá ku inhustisia i aktonan di violensia sin sentido? Nan ta amargá nos bida òf reta nos pa tuma vengansa? Ki influensia e degenerashon moral ku ta reina tin riba nos? I ora nos agregá nos imperfekshon humano i tendensianan pekaminoso na tur esaki, nos ta haña nos ku dos lucha: unu kontra e mundu malbado i unu kontra nos mes mal inklinashonnan. Nos realmente por spera di sali viktorioso sin yudansa di Dios? Kon nos por risibí su yudansa? Ki kualidatnan nos mester kultivá pa yuda nos dominá nos inklinashonnan karnal? Pa haña e kontestanan, laga nos analisá kiko Hesus a siña su disipelnan stimá riba e último dia di su bida riba tera.

Vense Orguyo ku Humildat

Tuma por ehèmpel e problema di orguyo òf arogansia. Beibel ta bisa relashoná ku esei: “Orguyo ta bin promé ku destrukshon, i un spiritu arogante promé ku kaida.” (Proverbionan 16:18) Tambe e Skritura ta konsehá nos: “Si un hende pensa ku e ta algu, siendo ku e no ta nada, e ta gaña su mes.” (Galationan 6:3) Sí, orguyo ta destruktivo i engañoso. Ta sabí di nos parti pa odia ‘orguyo i arogansia.’—Proverbionan 8:13.

E apòstelnan di Hesus tabatin problema ku orguyo i arogansia? Por lo ménos na un okashon, nan a diskutí ku otro tokante ken tabata mas importante. (Marko 9:33-37) Na un otro okashon, Santiago ku Huan a pidi pa nan haña un posishon prominente den e Reino. (Marko 10:35-45) Hesus kier a yuda su disipelnan eliminá e tendensia aki. P’esei durante e sena di Pasku, el a lanta, mara un sèrbètè na su hep i laba pia di su disipelnan. E no a laga duda ta kiko tabata e lès ku e kier a siña nan. Hesus a  bisa: “Si ami anto, e Señor i Maestro, a laba boso pia, boso tambe mester laba pia di otro.” (Huan 13:14) Mester remplasá orguyo ku nèt lo kontrali: humildat.

Pero no ta fásil pa vense orguyo. Mas lat riba e anochi ei, despues ku Hesus a manda Hudas Iskariot bai, (kende tabata kla pa traishon’é) a surgi un diskushon fuerte entre e 11 apòstelnan. Riba kiko nan a pleita? Riba kua di nan aparentemente tabata esun di mas grandi! En bes di skual nan, un biaha mas ku pasenshi Hesus a enfatisá e importansia di sirbi otro. El a bisa: “E reinan di e paganunan ta goberná nan; i esnan ku tin outoridat riba nan ta wòrdu yamá ‘Shonnan bondadoso.’ Ma entre boso no mester t’asina; al kontrario, laga esun di mas grandi meimei di boso ta manera esun di mas hóben, i esun ku ta goberná manera esun ku ta sirbi.” Rekordando nan riba su ehèmpel, el a agregá: “Ami ta meimei di boso manera esun ku ta sirbi.”—Lukas 22:24-27.

E apòstelnan a kapta e punto? Ta parse ku sí. Hopi aña despues apòstel Pedro a skirbi: “Boso tur sea di akuerdo ku otro, teniendo kompashon ku otro, stimando manera ruman, i sea miserikordioso i humilde den spiritu.” (1 Pedro 3:8) Ta masha vital pa nos tambe vense orguyo ku humildat! Hamas nos mester laga set pa poder, fama òf posishon dominá nos bida. “Dios ta resistí e orguyosonan, ma ta duna grasia na e humildenan,” segun Beibel. (Santiago 4:6) Meskos tambe, un proverbio sabí di pasado ta bisa: “E rekompensa di humildat i e temor di SEÑOR ta rikesa, onor i bida.”—Proverbionan 22:4.

Kon Nos Por Vense Odio?

Un otro karakterístika komun den e mundu aki ta odio. I ta parse ku ta tur kaminda tin odio, kousá pa sea miedu, ignoransia, prehuisio, opreshon, inhustisia, nashonalismo, orguyo di tribu òf rasismo. (2 Timoteo 3:1-4) Odio a reina den tempu di Hesus tambe. E sosiedat hudiu tabatin un odio kontra kobradó di belasting. Ademas, hudiu no tabata parti un pan ku samaritano, i tambe nan tabatin despresio pa hende dje nashonnan ku no tabata hudiu. (Huan 4:9) Sin embargo, e sistema di adorashon ku Hesus a instituí ku tempu mester a aseptá hende di tur nashon. (Echonan 10:34, 35; Galationan 3:28) P’esei den su gran amor el a duna su disipelnan algu nobo.

Hesus a deklará: “Un mandamentu nobo mi ta duna boso, pa boso stima otro, i meskos ku ami a stima boso, pa boso tambe stima otro.” Nan mester a siña desplegá e amor aki, pasobra el a sigui bisa: “Na esaki tur hende lo sa ku boso ta mi disipel, si boso tin amor un pa otro.” (Huan 13:34, 35) E mandamentu tabata nobo p’e echo ku el a bai mas aleu ku “stima bo próhimo manera bo mes.” (Levítiko 19:18) Den ki sentido? Hesus a klarifiká e asuntu, bisando: “Esaki ta mi mandamentu, ku boso stima otro meskos ku ami a stima boso. Ni un hende no tin amor mas grandi ku esaki, ku un hende ta duna su bida pa su amigunan.” (Huan 15:12, 13) Nan mester tabata dispuesto pa sakrifiká nan bida pa otro disipel i pa otro hende.

Kon hende imperfekto por eliminá odio malisioso for di nan bida? Dor di remplasá esaki ku un amor di sakrifisio propio. Miónes di hende sinsero di tur antesedente étniko, kultural, religioso i polítiko ta hasiendo hustamente  esei. Awor nan ta integrando den un komunidat uní liber di odio, esta, e hermandat mundial di Testigunan di Yehova. Nan ta tuma na pechu e palabranan inspirá di apòstel Huan: “Ken ku odia su ruman ta un matadó; i boso sa ku ningun matadó no tin bida eterno ta permanesé den dje.” (1 Huan 3:15) Kristiannan berdadero no solamente ta nenga di karga arma den guera sino tambe ta traha duru pa mustra amor pa otro.

Kiko anto mester ta nos aktitut mental pa ku esnan ku no ta nos kompañeronan di adorashon i ku kisas ta mustra odio kontra nos? Ora Hesus tabata kologá na staka, el a hasi orashon na fabor di esnan ku tabata ehekutand’é, bisando: “Tata, pordoná nan, pasobra nan no sa kiko nan ta hasi.” (Lukas 23:34) Ora hòmbernan yen di odio a piedra disipel Esteban mata, su último palabranan tabata: “Señor, no tuma e piká aki di nan na kuenta!” (Echonan 7:60) Hesus i Esteban tabata kier lo mihó asta pa esnan ku tabata odia nan. No tabatin renkor den nan kurason. “Laga nos hasi bon na tur hende,” Beibel ta manda nos.—Galationan 6:10.

‘Un Ayudante pa Semper’

Despues ku Hesus a pasa un ratu largu ku su 11 apòstelnan fiel, el a informá nan ku djis lo e no ta ku nan mas den kurpa físiko. (Huan 14:28; 16:28) Pero el a sigurá nan: “Lo mi pidi e Tata, i e lo duna boso un otro konsolador (“ayudante,” NW), pa e keda serka boso pa semper.” (Huan 14:16) E ayudante primintí aki ta Dios su spiritu santu. Lo el a siña nan kosnan profundo di e Skritura i yuda nan kòrda loke Hesus a siña nan durante su ministerio riba tera.—Huan 14:26.

Kon spiritu santu por yuda nos awe? Wèl, Beibel ta e Palabra inspirá di Dios. E hòmbernan ku Dios a usa pa pronunsiá profesia i skirbi Beibel tabata “inspirá dor di spiritu santu.” (2 Pedro 1:20, 21; 2 Timoteo 3:16) Ora nos ta studia e Skritura i apliká loke nos ta siña, nos ta haña konosementu, sabiduria, komprondementu, perspikasia, disernimentu i kapasidat di pensa. Nos lo no ta mihó prepará e ora ei pa enfrentá e preshonnan di e mundu malbado aki?

Spiritu santu ta un ayudante den un manera mas. Spiritu santu di Dios ta un forsa poderoso i benefisioso ku ta yuda hende ku ta bou di su influensia manifestá kualidatnan di Dios. Beibel ta bisa ku “fruta di e spiritu ta amor, goso, pas, pasenshi, kariño, bondat, fieldat, mansedumbre, dominio propio.” No ta nèt e kualidatnan aki nos tin mester pa vense inklinashonnan karnal relashoná ku inmoralidat, bringamentu, yalursheit, rabiamentu i kosnan asina?—Galationan 5:19-23.

Dor di dependé riba e spiritu di Dios, tambe nos por risibí “poder mas ayá di loke ta normal” pa trata ku kualkier problema òf angustia. (2 Korintionan 4:7, NW) Ounke spiritu santu kisas no ta kita prueba ni tentashon, sigur e por yuda nos wanta nan. (1 Korintionan 10:13) Apòstel Pablo a skirbi: “Pa tur kos mi tin e forsa den birtut di esun ku ta duna mi poder.” (Filipensenan 4:13, NW) Dios ta duna e poder ei pa medio di su spiritu santu. Nos por ta hopi gradisidu pa e spiritu santu! Ken ku ta ‘stima Hesus i warda su mandamentunan’ lo por konta ku spiritu santu.—Huan 14:15.

“Keda den Mi Amor”

Riba su último anochi komo ser humano, tambe Hesus a bisa su apòstelnan: “Esun ku tin mi mandamentunan i ta warda nan, esei ta esun ku ta stima mi; i esun ku ta stima mi lo wòrdu stimá dor di mi Tata.” (Huan 14:21) “Keda den mi amor,” Hesus a stimulá nan. (Huan 15:9) Kon kedamentu den e amor di e Tata i di e Yu ta yuda nos den nos lucha kontra nos mes inklinashonnan pekaminoso i kontra e mundu malbado?

Wèl, nos realmente por kombatí mal tendensia si nos no tin un motivashon fuerte pa hasi esei? No tin nada ku por stimulá nos mas tantu ku e deseo di tin un bon relashon ku Yehova Dios i ku su Yu. Ernesto, * un yònkuman  ku tabatin un lucha fuerte kontra e estilo di bida inmoral ku el a hiba for di tempu ku e tabata teenager, ta splika: “Mi kier a agradá Dios, i mi a siña for di Beibel ku e no ta gusta e manera ku mi tabata biba. P’esei mi kier a kambia mi bida pa kumpli ku e normanan di Dios. Tur dia mi tabatin ku lucha kontra pensamentu sushi i negativo ku ainda tabata drenta mi mente. Pero mi tabata determiná pa gana e bataya aki, i konstantemente mi tabata pidi Dios su yudansa. Despues di dos aña mi a vense e opstákulonan di mas grandi, ounke ainda mi ta masha estrikto ku mi mes.”

Pa loke ta e bataya kontra mundu, pensa riba e orashon final ku Hesus a ofresé promé ku el a bandoná e sala djariba den Yerúsalèm. El a hasi orashon na su Tata na fabor di su disipelnan: “Mi no ta pidi bo pa saka nan for di mundu, ma pa bo warda nan di e malbado. Nan no ta di mundu, meskos ku ami no ta di mundu.” (Huan 17:15, 16) Ki un konsuelo! Yehova ta kuida esnan ku e ta stima i ta fortalesé nan tanten ku nan ta keda separá for di mundu.

“Kere den Dje”

Si nos ta warda e mandamentunan di Hesus, en bèrdat nos por sali viktorioso den nos lucha kontra e mundu malbado i kontra nos tendensianan pekaminoso. Sin embargo, pa importante ku e viktorianan ei ta, nan no por eliminá ni mundu ni piká heredá. Pero nos no tin nodi desesperá.

Beibel ta deklará: “Mundu ta pasa bai i su deseonan tambe, ma esun ku hasi e boluntat di Dios ta permanesé pa semper.” (1 Huan 2:17) Hesus a duna su bida pa reskatá “ken ku kere den dje” for di piká i morto. (Huan 3:16) P’esei anto, segun ku nos ta oumentá nos konosementu di e boluntat di Dios i di su propósitonan, laga nos tuma na pechu e spièrtamentu di Hesus: “Kere den Dios, kere tambe den mi.”—Huan 14:1.

[Nota]

[Plachi na página 6, 7]

Hesus a stimulá su apòstelnan pa ‘keda den su amor’

[Plachi na página 7]

Pronto hende lo no sufri mas di piká ni di su efektonan