“Ka Akamaroiroi ra, Kua Riro te Re o Teianei Ao Iaku”

TE RA i mate ei a Iesu​—te ra 14 o te marama ngati Iuda o Nisana​—kua akamata i te opunga ra i te Paraparau, Mati 31, 33 T.N. I taua aiai ra, kua akaputuputu mai a Iesu e tana au apotetoro ki roto i tetai pia i runga o tetai are i Ierusalema no te akamaara i te Pasa. Iaia e akateateamamao ra i te ‘akaruke mai i teianei ao, ka aere atu ei ki te Metua ra,’ kua akaari a Iesu e kua aroa aia i tana au apotetoro e tae ua atu ki te openga. (Ioane 13:1) Akapeea ra? Na te apiianga kia ratou i te au apiianga tau tikai, te akateateamamao anga ia ratou no te ka tupu a te tuatau ki mua.

I taua po e aere ua atura, kua akakite atu a Iesu ki tana au pipi: “Ka akamaroiroi ra, kua riro te re o teianei ao iaku.” (Ioane 16:33) Eaa te aiteanga o tana tuatua akamaroiroi anga? I roto i tetai tuanga, ko teia: ‘Kare roa te kino i roto i te ao i akariro iaku kia tamou ua atu i te riri e kare katoa i akakeu iaku kia tutaki i te kino. Kare au i tuku ana i te ao kia kukumi atu iaku ki roto i to te reira akatikatika anga. Ka tika katoa teia i roto i toou turanga.’ Ko ta Iesu i apii atu ki tana au apotetoro tiratiratu i roto i taua au ora openga ra o tona oraanga i te enua nei ka tauturu rai ia ratou kia autu i te ao.

Koai tei kore e akatika e te maata nei te kino i roto i teia ao i teia tuatau? Ka akapeea tatou i te ariu anga atu ki te au tuatua tau kore e te au ta anga puapinga kore? Te akariri ra ainei teia ia tatou me kare te timata ra ia tatou kia tutaki atu? Ka akapeea tatou i te akakeuangaia e te topa anga o te tu akono tau takapini ia tatou? I te pae mai i teia ko to tatou au tu tangata apa ua e te au tu ara ua, e e putoto anga ta tatou kia tamaki atu i te ngai tamaki: te patoi anga i te ao kino kitea uaia e te patoi anga i te au tu kino i roto ia tatou. Ka rauka ainei ia tatou i te aere autu ua me kare ta te Atua tauturu? Ka akapeea e raukai ia tatou tana tauturu? Eaa te au tu ka tau tatou kia tatanu ei tauturu ia tatou i te patoi i te au anoano o te kopapa? No te au pauanga, ka akara ana tatou ki ta Iesu i apii ki tana au pipi akaperepereia i te ra openga o tona oraanga i te enua nei.

Autu i te Tu Parau ma te Tu Akaaka

Ei akaraanga, ka akamanako ana, i te manamanata o te tu parau, me kare te tu nengonengo. No te reira, te akakite maira te Pipiria: “Ko te parau to te mate ra na mua, e te ngakau nengonengo ra, to te inga ïa na mua.” (Maseli 16:18) Te ako katoa maira te au Tuatua Tapu ia tatou: “Kia manako tetai iaia uaorai e, e tangata maata aia, e kare ua ana e puapinga, kua vavare aia iaia uaorai.” (Galatia 6:3) Ae, ka akatupu te tu parau i te kino e te manako akavare. Ka pakari tatou i te makitakita i te ‘akamaata e te ngakau parau.’​—Maseli 8:13.

I tupu ana ainei te manamanata o te tu akamaata e te tu parau ki ta Iesu apotetoro? I tetai atianga, kua tauetono ratou i rotopu ia ratou uaorai e koai tei maata atu. (Mareko 9:33-37) I tetai mai tuatau, kua pati a Iakobo raua ko Ioane i te au turanga teitei i roto i te Patireia. (Mareko 10:35-45) Kua inangaro a Iesu i te tauturu i tana au pipi i te akakore i taua tu. No reira i te tuatau kai anga i te kai Pasa, kua tu aia ki runga, kua mou atura i tetai  tauera, e kua akamata i te orei i te vaevae o tana au pipi. Kare aia i akaruke i te ekoko anga no te apiianga tana i inangaro ia ratou kia apii. “E kua orei na oki au, ko te Atu e te Orometua, i to kotou vaevae,” i na Iesu ei, “kia orei katoa oki kotou i to kotou uaorai vaevae e tikaʼi.” (Ioane 13:14) E tau kia tupauia te tu parau ki tei tuke​—te tu akaaka.

Inara, kare e ngoie ana i te autu i te tu parau. I taua aiai rai i muri ake i te akaunga anga a Iesu ia Iuda Ikariota kia aere, tei vaitata i te pikikaa iaia, kua tupu mai te taumaroanga riririri i rotopu i te 11 apotetoro. To ratou manamanata? Koai ia ratou tei maata atu! Kare i karo atu ia ratou, kua tuatua maata akaou a Iesu ma te tamou marie i te puapinga no te tavini anga i tetai ke. Kua tuatua aia: “Te akateitei nei te ui ariki o te etene i rungao ia ratou; e taua aronga i akavi ia ratou ra, te tapaia nei ïa i te takinga-meitaki. Kareka kotou na, kare ïa e tika kia pera: ko tei maata i roto ia kotou na, kia arite katoa ïa i tei iti; e tei mana ra, kia arite katoa ïa i te tavini.” Te akamaara anga ia ratou i tona akaraanga, kua tuatua mai aia: “E tau ra au mei te tavini ra i roto ia kotou nei.”​—Luka 22:24-27.

Kua marama ainei te au apotetoro? I te akaraanga ae. I te au mataiti i muri mai kua tata te apotetoro ko Petero: “Ei ngakau tai to kotou ravarai, i te aroa katoa anga, ei aroa taeake ra, ei ngakau maru, ei ngakau taunga.” (1 Petero 3:8) Mei teaa te puapinga e kia autu katoa tatou i te tu parau ma te tu akaaka! Ka pakari tatou kia kore e o oonu atu ki roto i te aruaru anga i te rongonui, te mana, me kare te turanga. “E patoi mai te Atua i te aronga nengonengo,” i na te Pipiria ei, “e oronga maira i te aroa ua i te aronga akaaka.” (Iakobo 4:6) Pera katoa, te akakite ra tetai materi pakari taito e: “Te tutaki o te taakaaka e te mataku ia Iehova, ko te apinga nui ïa, ko te ngateitei ïa, ko te ora ïa.”​—Maseli 22:4.

Autu i te Riri​—Akapeea?

Ka akamanako ana i tetai tu matauia i roto i te ao​—te makitakita. Me kua akatupuia e te mataku, te kite kore, te akavaavaa, te taomianga, te tu tau kore, te turuturuanga enua, te turuturuanga i te kopu, me kare te iriiri pakiri, i te akaraanga tei te au ngai ravarai te makitakita. (2 Timoteo 3:1-4) Kua totoa maata katoa te makitakita i to Iesu tuatau. Kua makitakitaia te aronga koi tero tei akatakakeia i roto i te ngai tangata ngati Iuda. Kare te au ngati Iuda i kapiti atu ana ki te au Samaria. (Ioane 4:9) Kua akavaavaa katoaia te aronga Kenitara, me kare te aronga kare i te au ngati Iuda, e te au ngati Iuda. Inara, i te openga ra, te mataara o te akamorianga ta Iesu i akatumu kia akono i te au tangata mei te pa enua ravarai. (Angaanga 10:34, 35; Galatia 3:28) No reira kua oronga aroa ua aia i tetai apinga ou ki tana au pipi.

Kua akakite a Iesu: “E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai.” Kua anoano ia ratou kia akaari i teia aroa, i nana ei: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioane 13:34, 35) Kua ou te akauenga tera te tu kua aere mamao atu te reira i te aroa ua anga “i to tangata tupu mei toou aroa ia koe uaorai.” (Levitiku 19:18) Na teea mataara? Kua akataka mai a Iesu i teia tumu manako, i te na ko anga: “Teia taku akauenga, kia aroa kotou ia kotou uaorai, mei iaku i aroa ia kotou. Kia oronga te tangata i tona uaorai ora no tona au taunga, kare rava e tangata aroa maata atu i te reira.” (Ioane 15:12, 13) Ka tau ratou kia puareinga i te akaatinga i to ratou au oraanga no tetai e tetai ke.

Ka akapeea e raukai i te au tangata apa ua i te akakore i te makitakita akatupu mamae mei to ratou au oraanga? Na te mono anga i te reira ma te aroa akaatinga uaorai. E au mirioni ua atu te au  tangata ngakau tae tei aere mai mei te au ngai eteniki katoatoa, te peu, te akonoanga, e te poritiki te rave ra i te reira. Te taokotaiia nei ratou i teianei ki roto i tetai ngai tangata kare e makitakita, ma te taokotai​—te akataeakeanga takapini i te koropu o te Au Kite o Iehova. Te akono ra ratou i te au tuatua akauruia a te apotetoro ko Ioane: “Ko tei makitakita i tona taeake, e ta tangata ïa: kua kite oki kotou e, kare o te ta tangata ra e ora mutu kore e vai i roto iaia.” (1 Ioane 3:15) Kare anake te au Kerititiano mou i patoi i te rave i te au apinga tamaki no te tamakianga te angaanga pakari katoa ra i te akaari i te aroa ki tetai e tetai.

Eaa, i reira, to tatou tu ki te aronga kare i te au taeake irinaki e penei ka akaari mai i te makitakita kia tatou? Iaia e tautau ra ki runga i te rakau tamamae, kua pure a Iesu no te aronga i tamate iaia, i te na ko anga: “E taku Metua, e akakore mai koe i ta ratou ara, kare oki ratou i kite i ta ratou i rave nei.” (Luka 23:34) I te pei anga te aronga makitakita i te toka ki runga i te pipi ko Setephano e mate ua atu, ko tana au tuatua openga: “E te Atu e, auraka teianei ara e io mai kia ratou nei!” (Angaanga 7:60) Kua inangaro a Iesu raua ko Setephano i tei meitaki no te aronga tei makitakita ia raua. Kare te makitakita i roto i to raua ngakau. “E takinga-meitaki tatou i te tangata ravarai,” i ako mai ei te Pipiria ia tatou.​—Galatia 6:10.

‘Tetai Tauturu e Tuatau Ua Atu’

I te uipaanga ma tana 11 apotetoro tiratiratu e aere ua atura, kua akakite atu a Iesu kia ratou e kare e roa atu kare aia e vai mai kia ratou i te pae kopapa. (Ioane 14:28; 16:28) Inara kua akapapu atu aia kia ratou: “Naku oki e pati atu i te Metua ra, e nana e oronga mai i tetai [“tauturu,” NW] ia kotou, kia noo tikai ki o kotou nei e tuatau ua atu.” (Ioane 14:16) Te tauturu tei taputouia mai ko to te Atua vaerua tapu. Ka apii te reira i te au mea oonu o te au Tuatua Tapu kia ratou e ka akamaara kia ratou i ta Iesu i apii ana kia ratou i te tuatau o tana angaanga orometua i te enua nei.​—Ioane 14:26.

Ka akapeea te vaerua tapu i te tauturu anga ia tatou i teia tuatau? I na, e Tuatua akauruia na te Atua te Pipiria. Te au tangata tei taangaangaia kia tuatua i te au totou e kia tata i te Pipiria kua ‘tuatua i ta te vaerua tapu i tuku mai ia ratou ra.’ (2 Petero 1:20, 21; 2 Timoteo 3:16) Ta tatou apii anga i te au Tuatua Tapu e te taangaanga anga i ta tatou e apii ra te oronga maira i te kite kia tatou, te pakari, te maramaanga, te kite oonu, te kite karape, e te manako kite roa. Kare ainei tatou i akateateamamao meitakiia no te aro atu i te au taomianga o te ao kino ra?

E tauturu katoa te vaerua tapu i roto i tetai atu mataara. E mana ririnui te vaerua tapu o te Atua no te meitaki, te akariroanga i te aronga i raro ake i tana akakeuanga kia akaari i te au tu tau i te Atua. ‘Kareka ta te vaerua e akatupu, ko te inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, te maru, te akono meitaki,’ i na te Pipiria ei. Kare ainei e ko teia te au tu te umuumuia ra e tatou kia autu atu i te au anoano o te kopapa te tu akono tau kore, te putotoanga, te akarere, te riri, e te vai atura?​—Galatia 5:19-23.

Na te irinakianga ki to te Atua vaerua, ka rauka katoa ia tatou “te mana maata meitaki” no te akono atu i etai manamanata me kare taitaia. (2 Korinetia 4:7) Koi kore ei te vaerua tapu e akaatea ke i te au timataanga me kare te au mea akavareanga, papu e ka rauka i te reira i te tauturu ia tatou i te tamou marie i te reira. (1 Korinetia 10:13) “E tika iaku te au mea ravarai nei i te Mesia, ko tei akamaroiroi mai iaku nei,” i tata ei te apotetoro ko Paulo. (Philipi 4:13) Te oronga maira te Atua i taua mana na roto i tona vaerua tapu. Mei teaa ta tatou ariki meitaki anga i te vaerua tapu! Kua taputouia te reira ki te aronga tei ‘anoano ia Iesu ra, ka akono i tana ra au akauenga.’​—Ioane 14:15.

‘Kia Noo ma te Akaperepereia e Au’

I tona po openga ei tangata, kua akakite katoa a Iesu ki tana apotetoro: “Tei iaia taku au akauenga, e kua akono aia i te reira ra, koia tei anoano mai iaku; e tei anoano mai iaku ra, ka akaperepereia mai aia e taku Metua ra.” (Ioane 14:21) ‘Kia noo ma te akaperepereia e au,’ i ako mai ei aia ia ratou. (Ioane 15:9) Ka akapeea te noo anga ki roto i te akaperepere o te Metua e te Tamaiti i te tauturu anga ia tatou i roto i ta tatou tamakianga i te au anoano ara ua i roto ia tatou uaorai e ma te ao kino ra?

I na, ka rauka ainei ia tatou i te akaaere i to tatou au tu kino me ngere tatou i te akakeuanga  ketaketa kia rave akapera? Eaa atu te akakeuanga maata atu i te anoano kia rauka te pirianga meitaki ma te Atua ko Iehova e tana Tamaiti? Ko Ernesto, * e mapu tane tei tamaki atu i te putotoanga ngata o te tu oraanga akono tau kore tei akonoia e ia mei tona mapuanga, te akamarama maira: “Kua inangaro au i te akamareka i te Atua, e kua apii mai au mei te Pipiria e kare aia e mareka ana i toku tu oraanga. No reira kua iki au kia riro ei tangata tuke, kia akono i ta te Atua au aratakianga. I te au ra, kua putoto atu au i te au manako viivii e te papu kore, tei tupu ua mai i roto i toku manako. Inara kua tauta au kia autu atu i teia tamakianga, e kua pure putuputu au no ta te Atua tauturu. I muri ake i te rua mataiti kua kore atu te mea kino, noatu kua akono pakari au iaku uaorai.”

No te putotoanga ma te ao ra, ka akamanako ana i ta Iesu pure openga i tuatua i mua ake ka akaruke ei i te pia i runga ake i Ierusalema. No tana au pipi, kua pure aia ki tona Metua e kua pati kiaia: “Kare au i pure ia koe e, ka apai ke atu koe ia ratou i teianei ao, kia tiaki maira koe ia ratou, auraka ei kino. Kare ratou i to teianei ao, mei iaku nei rai oki, kare i to teianei ao.” (Ioane 17:15, 16) Mei teaa atura te akapapu anga! Te akara maira a Iehova i te aronga tana e aroa maira e te akaketaketa atura ia ratou ia ratou e akatakake ra mei te ao.

“Ka Akarongo Katoa”

Te akonoanga i ta Iesu au akauenga ka tauturu tikai ia tatou kia autu i roto i ta tatou putotoanga i te ao kino e to tatou au tu ara ua. Noatu, te puapinga ra taua au autuanga, kare e rauka i te reira i te akakore i te ao e te ara tei tu ia. Inara auraka tatou e taitaia.

“Te ngaro ke nei teianei ao, ma ta to reira katoa e anoano nei,” i na te Pipiria ei, “ko tei akono ra i to te Atua ra anoano, e tika ïa i te ora anga e tuatau ua atu.” (1 Ioane 2:17) Kua oronga mai a Iesu i tona oraanga kia akaora mai mei te ara e te matenga “i te katoatoa te taangaanga [ra] i te akarongo kiaia.” (Ioane 3:16, NW) Ia tatou e tupu ra i roto i to tatou kite i te anoano e te au akakoroanga a te Atua, i reira, kia akamanako tatou i ta Iesu akoanga: “Ka akarongo i te Atua, ka akarongo katoa mai iaku.”​—Ioane 14:1.

[Tataanga Rikiriki i Raro]

[Tutu i te kapi 6, 7]

‘Kia noo ma te akaperepereia e au,’ i raurau mai ei a Iesu i tana au apotetoro

[Tutu i te kapi 7]

Rangatira mei te ara e tona au tupuanga kare e roa atu ka kiteaia