“Ia Outou Loto Tetele, ua Ou Manumalo i le Lalolagi”

NA AMATA le aso na maliu ai Iesu, i le aso 14 o Nisani i le kalena faa-Iutaia, i le Aso Tofi, Mati 31, 33 T.A., i le goto o le lā. I lenā pō, na faapotopoto ai Iesu ma ona soo i se potu pito i luga o se fale i Ierusalema mo le faamanatuina o le Paseka. A o nofo sauni o ia e “maliu atu i le Tamā,” na faailoa atu ai e Iesu e faapea, e alofa o ia i ona aposetolo seʻia oo i le iʻuga. (Ioane 13:1) E faapefea? I le aʻoaʻoina i ni lesona e sili ona tāua, ua sauniunia ai i latou mo mea i le lumanaʻi.

A o faagasolo le pō, na taʻu atu ai e Iesu i ona soo: “Ia outou loto tetele, ua ou manumalo i le lalolagi.” (Ioane 16:33) O le ā le uiga o lana fetalaiga lototele? I se isi faaupuga: ‘E leʻi avea amioga leaga a le lalolagi ma mea na ou ita pe fia taui ma sui ai. Ou te leʻi amio e pei o le lalolagi. E mafai foʻi ona faaalia le moni o lenā mea i o outou tulaga.’ O mea na aʻoaʻo e Iesu i ona aposetolo faamaoni i toe itula o lona soifuaga i le lalolagi, o le a fesoasoani iā i latou ina ia manumalo ai i le lalolagi

O ai sē na te faafitia le matuā faateteleina o le leaga lea ua iai i le lalolagi i aso nei? O le a faapefea ona tatou feagai ma faiga lē tonu ma faiga sauā? Pe e tatou te feita ai i nei mea, pe tofotofoina ai i tatou e taui atu le leaga i le leaga? Ua faapefea ona tāʻaina i tatou i amioga leaga paʻū maulalo o loo siʻomia ai i tatou? E lē gata i lea, o le lē lelei atoatoa faaletagata ma faanaunauga agasala, o lea, ua tatou tau ai se taua valalua faasaga e lē gata i mea leaga o le lalolagi ae o o tatou lava faanaunauga leaga. Pe e iai se faamoemoe e mafai ona tatou manumalo moni mai ai i nei mea e aunoa ma le fesoasoani a le Atua? E mafai faapefea ona tatou maua lana fesoasoani? O ā uiga e tatau ona tatou atiina aʻe ina ia fesoasoani e tetee atu ai i tuʻinanauga o le tino? Ina ia maua tali i nei fesili, seʻi o tatou iloiloina mea na aʻoaʻo e Iesu i ona soo pele i le aso mulimuli o lona soifuaga i le lalolagi.

Faatoʻilalo le Faamaualuga i le Lotomaulalo

O se faaaʻoaʻoga, seʻi manatu i le faafitauli o le faamaualuga po o le faasausili. Ua faapea mai le Tusi Paia e faatatau i lea uiga: “E muamua le faamaualuga i le malaia; e muamua foʻi le loto faasiasia i le paʻū.” (Faataoto 16:18) Ua fautuaina foʻi i tatou e le Tusi Paia: “Pe a manatu se tasi o le tagata aogā ia, a e leai, ua pelogia o ia e ia i lona manatu.” (Kalatia 6:3) O le mea moni, o le faamaualuga, e faaumatia ma faasesēina ai. E atamai mo i tatou le ʻinoʻino i le “faamaualuga ma le loto fefete.”—Faataoto 8:13.

Pe sa iai se faafitauli o aposetolo o Iesu i le loto fefete ma le faamaualuga? A itiiti mai e faatasi ona latou fefinauaʻi iā i latou lava po o ai e sili. (Mareko 9:33-37) I se isi taimi, na talosaga atu ai Iakopo ma Ioane mo ni tulaga sili i le Malo o le Atua. (Mareko 10:35-45) Sa faanaunau Iesu e fesoasoani i ona soo ina ia aveesea lenei faanaunauga. O lea, a o faagasolo le taumafaina o le  Paseka, na tū o ia i luga, ua fusi se solo i lona sulugātiti, ma amata ona mulumulu vae o ona soo. Sa tuusaʻo lava le lesona lea sa finagalo o ia e aʻoaʻoina e ona soo. Na fetalai atu Iesu: “Afai o aʻu le Alii, ma le aʻoaʻo, ua ou mulumuluina o outou vae, e tatau ona outou femulumuluaʻi o outou vae.” (Ioane 13:14) E tatau ona suia le uiga faamaualuga i lona tuufaafeagai—le lotomaulalo. 

E lē faigofie la ona faatoʻilaloina le faamaualuga. Mulimuli ane i lenā pō, ina ua faatulaʻi ese e Iesu ia Iuta le Sekara, o lē e lē o toe umi se taimi ona ia faalataina lea o Iesu, na mapuna aʻe ai se finauga aasa i le va o aposetolo e toʻa 11. O le ā lo latou faafitauli? Po o ai o i latou e sili! Na i lo o le otegia o i latou, na toe faamamafa atu ai foʻi ma le onosai e Iesu le tāua o le auauna atu i isi. Na ia fetalai atu: “O tupu o nuu ese ua aliitaʻi i latou; o ē pule foʻi iā i latou ua taʻua i latou o ē agalelei. Ae lē faapea outou; peitaʻi o lē sili iā te outou, ia avea o ia ia pei o le aupito itiiti; o lē pule foʻi, ia pei o le auauna ia.” I le faamanatuina atu iā i latou o lana faaaʻoaʻoga, na ia toe fetalai ai e faapea: “A o aʻu nei, o loo iā te outou e pei o le auauna lava.”—Luka 22:24-27.

Pe na maua e le ʻauaposetolo le manatu? O le mea moni, na maua. Na tusi mai mulimuli ane le aposetolo o Peteru e faapea: “Ia loto gatasi outou uma, ia fealofani, ia alolofa i le ʻau uso, ia mutimuti vale i le alofa, ia agalelei.” (1 Peteru 3:8) Maʻeu le tāua o lo tatou faatoʻilaloina foʻi o le faamaualuga i le lotomaulalo! E atamai mo i tatou le aua neʻi aafia i le saʻilia o le fia taʻutaʻua, le malosi, po o tulaga maualuluga. Ua faapea mai le Tusi Paia: “E tetee atu le Atua i ē faamaualuluga, a e foaʻi mai le alofa tunoa i ē faamaulalo.” (Iakopo 4:6) Ua faapena foʻi ona taʻua i se faataoto poto anamua e faapea: “O le taui o le faamaulalo ma le mataʻu iā Ieova, o le oloa lea, ma le viiga, ma le ola.”—Faataoto 22:4.

E Faapefea Ona Faatoʻilaloina le Feitagaʻi?

Seʻi manatunatu i se isi uiga lea o loo taatele i le lalolagi—le feitagaʻi. E foliga mai, o loo iai i mea uma lava le feitagaʻi, po ua māfua ona o le fefe, le valea, faailoga tagata, teteega, lē faamasinotonu, lotonuu, faiga faaituʻau, po o le faailoga lanu. (2 Timoteo 3:1-4) Sa taatele foʻi le feitagaʻi i aso o Iesu. Sa itagia le ʻauaolafoga ma teena ai e tagata Iutaia. Sa leai ni faifaiga a tagata Iutaia ma Samaria. (Ioane 4:9) Sa vaai maulalo foʻi tagata Iutaia i tagata o Nuu Ese. Ae peitaʻi, mulimuli ane, sa faaaofia ai tagata mai atunuu uma lava i le tapuaʻiga lea na faatūina e Iesu. (Galuega 10:34, 35; Kalatia 3:28) O lea, na ia tuuina atu ai ma le alofa i ona soo se mea fou.

Na folafola atu e Iesu: “O le poloaʻiga fou ou te tuu atu ai iā te outou, ia outou fealofani; faapei ona ou alofa atu iā te outou, ia fealofani foʻi outou.” Sa tatau ona latou aʻoaʻoina ina ia faaalia lea lava alofa, auā ua ia faapea mai: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:34, 35) Sa fou le poloaʻiga, o lea sa sili atu na i lo o le alofa “i lē lua te tuaoi ia pei o oe lava iā te oe.” (Levitiko 19:18) I le ā le auala? Sa faamanino e Iesu le mataupu i le faapea atu: “O laʻu poloaʻiga lenei, ia outou fealofani, pei ona ou alofa atu iā te outou. E lē sili lava le alofa o se tasi i lenei alofa, ia tuuina atu e se tasi lona ola e sui aʻi ana uō.” (Ioane 15:12, 13) Sa tatau ona latou lotomalilie e faataulagaina o latou lava ola, o le tasi mo le isi faapea ma isi.

E mafai faapefea e tagata lē lelei atoatoa ona aveesea le feitagaʻi ma le lotoleaga mai o latou olaga? E ala i le suia i le alofa faataulagaina. O le mea tonu lava lenā o loo faia e le faitau miliona o tagata loto faamaoni mai atunuu, aganuu, lotu,  ma talaaga faapolotiki. Ua tuufaatasia nei i latou e avea o se nuu autasi, e aunoa ma se feitagaʻi—le ʻauuso o Molimau a Ieova i le lalolagi aoao. Ua latou faatatauina upu faagaeeina a le aposetolo o Ioane e faapea: “O i latou uma o ē ʻinoʻino i o latou uso, o fasioti tagata i latou; ua outou iloa foʻi e leai sē fasioti tagata e tumau iā te ia le ola faavavau.” (1 Ioane 3:15) E lē gata ina e lē auai Kerisiano moni i so o se fetauaʻiga, ae taumafai foʻi ina ia fealofani.

O le ā la so tatou manatu iā i latou o ē e lē o ni o tatou uso talitonu ma i latou o feita mai iā i tatou? A o tautau i le laau faaoosala, na tatalo Iesu mo i latou na faaooina le sala iā te ia, i le faapea atu: “Loʻu Tamā e, ia e faamagaloina atu iā te i latou; auā ua latou lē iloa le mea ua latou faia.” (Luka 23:34) Ina ua fetogia e tagata na tutumu i le ita le soo o Setefano ma maliu ai, na faapea ana upu mulimuli: “Le Alii e, aua e te tuuina atu lenei agasala iā te i latou.” (Galuega 7:60) Sa finagalo Iesu ma Setefano i se lelei e oo iā i latou na feita iā te i laʻua. Sa leai se fia taui ma sui iā i laʻua. Ua apoapoaʻi mai le Tusi Paia iā i tatou e faapea: “Ia tatou agalelei . . . i tagata uma lava.”—Kalatia 6:10.

‘Se Fesoasoani e Faavavau’

A o faagasolo la latou faatasiga ma ona soo faamaoni e toʻa 11, na faailoa atu e Iesu iā i latou ua lē o toe umi se taimi ona lē toe faatasi lea o ia ma i latou i le tino. (Ioane 14:28; 16:28) Ae na ia faamautinoa atu iā i latou: “Ou te fai atu foʻi i le Tamā, ona foaʻi mai ai lea e ia iā te outou le tasi Fesoasoani, ina ia tumau pea o ia iā te outou e faavavau.” (Ioane 14:16) O le fesoasoani lea e folafola mai, o le agaga paia o le Atua. O le a na aʻoaʻo i latou i mea loloto o le Tusi Paia ma faamanatu atu iā te latou mea na aʻoaʻoina ai i latou e Iesu i le taimi o lana faiva i le lalolagi.—Ioane 14:26.

E mafai faapefea ona fesoasoani le agaga paia iā i tatou i aso nei? O le Tusi Paia, o le Afioga faagaeeina a le Atua. O tagata na tuuina mai i ai valoaga ma tusia le Tusi Paia, na “osofia mai e le Agaga Paia.” (2 Peteru 1:20, 21; 2 Timoteo 3:16) O lo tatou suʻesuʻeina o le Tusi Paia ma faatatauina mea ua tatou aʻoaʻoina, ua tatou maua ai le poto, atamai, le malamalama, le faautauta, le tofā mamao, ma le tomai e mafaufau ai. Po ua lē sili atu ea ona saunia lelei ai i tatou i le feagai ai ma omiga mai le lalolagi leaga lea o loo tatou fesagaʻi?

I le isi itu, o le agaga paia o se fesoasoani aogā ma malosi mo le faia o le lelei, e mafai ai e tagata o loo ia tāʻaina ona faaalia uiga faale-Atua. Ua faapea mai le Tusi Paia: “A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le amio mamā.” Pe e lē o uiga ea nei o loo tatou manaʻomia ina ia faatoʻilaloina ai tuʻinanauga o le tino ia faia amioga lē mamā, le feʻainaʻi, le lotoleaga, le lotoa, ma isi uiga faapena?—Kalatia 5:19-23.

E mafai foʻi ona tatou maua “le matuā tele o le mana” e feagai ai ma ni faafitauli po o mea faigatā pe a faalagolago i le agaga o le Atua. (2 Korinito 4:7) Talu ai e lē aveesea e le agaga paia ia tofotofoga po o faaosoosoga, ae mautinoa lava e mafai ona fesoasoani iā i tatou e tumau ai i na mea. (1 Korinito 10:13) Na tusi Paulo e faapea: “Ou te mafaia mea uma lava ona o ia ua faamalosi mai iā te aʻu.” (Filipi 4:13) E foaʻi mai e le Atua le malosi lea e ala i lona agaga paia. E tatou te matuā loto faafetai ai mo le agaga paia! Ua folafolaina atu mo i latou o ē e ‘alolofa iā Iesu ma tausi i ana poloaʻiga.’—Ioane 14:15.

“Ia Tumau Pea Outou i Loʻu Alofa”

I le pō mulimuli a o avea o se tagata, na taʻu atu ai foʻi e Iesu i ona aposetolo: “O lē ua iā te ia aʻu poloaʻiga ma tausi i ai, o ia lea e alofa mai iā te aʻu; o lē alofa mai foʻi iā te aʻu, e alofaina o ia e loʻu Tamā.” (Ioane 14:21) Ua ia faalaeiau atu iā i latou: “Ia tumau pea outou i loʻu alofa.” (Ioane 15:9) E faapefea ona fesoasoani iā i tatou le tumau pea i le alofa o le Tamā ma le Atalii i la tatou taua e tetee atu ai i faanaunauga agasala i o tatou loto faapea le lalolagi leaga?

Ia, pe e mafai ona pulea o tatou faanaunauga leaga pe afai e tatou te lē faia ni taumafaiga malolosi e faia faapea? O le ā se uunaʻiga sili o iai na i lo o le faanaunau ia maua se faiā lelei ma Ieova le  Atua ma lona Alo? Ua faamatala mai e Ernesto, * o se tama talavou o lē na faia se taumafaiga fitā e tau ai faasaga i se olaga lē mamā na ola ai ina o sefulu ma ona tupu ona tausaga e faapea: “Sa ou manaʻo e faafiafia le Atua, ma na ou iloa mai le Tusi Paia, e lē fiafia o ia i le olaga lea sa ou ola ai. O lea, na ou manatu ai e suia ala o loʻu olaga, e faatatau atu i taʻiala a le Atua. I aso uma lava, ou te tau ai e tetee atu i mafaufauga lē mamā e faaleagaina ai ia sa fetaomi mai pea i loʻu mafaufau. Ae sa ou maumauaʻi pea ou te manumalo i lenei taua, ma tatalo faatauanau atu mo se fesoasoani mai le Atua. Ina ua mavae le lua tausaga, na ou manumalo i tulaga e sili ona leaga, ae e ui i lea, o loo ou matuā faaeteete pea lava.”

E tusa ai ma le taua o loo faia ma le lalolagi, seʻi manatu i le tatalo mulimuli a Iesu a o leʻi tuua lenā potu o le fale a luga i Ierusalema. Sa ia tatalo i lona Tamā mo ona soo i lona talosaga atu: “Ou te lē ole atu ina ia e ave ese iā te i latou i le lalolagi, a ia e tausi iā te i latou ina neʻi leaga. E lē ni o le lalolagi i latou, faapei o aʻu foi, ou te lē so le lalolagi aʻu.” (Ioane 17:15, 16) Maʻeu se faamautinoaga! O loo leoleo e Ieova ma faamalosia ē na te alofa i ai a o tumau pea ona latou vavae ese mai le lalolagi.

“Ia Faatuatua”

O le tausia o poloaʻiga a Iesu, o le mea moni, e mafai ona fesoasoani iā i tatou e manumalo ai i la tatou tauiviga faasaga i le lalolagi amioleaga ma o tatou faanaunauga agasala. Ae peitaʻi, po o le ā le tāua o na manumalo, ae e lē mafai ona soloia ese ai le lalolagi po o le agasala tuufaasolo. Ae e lē tatau ona tatou lotovaivai.

Ua faailoa mai e le Tusi Paia: “E mavae atu foʻi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.” (1 Ioane 2:17) Na foaʻi atu e Iesu lona soifua e laveaʻi ai mai le agasala ma le oti i latou uma o ‘ē e faatuatua iā te ia.’ (Ioane 3:16) A o faateleina lo tatou iloa o le finagalo o le Atua ma ana fuafuaga, seʻi o tatou ave i fale le apoapoaʻiga a Iesu e faapea: “Ia outou faatuatua i le Atua, ia faatuatua mai foʻi iā te aʻu.”—Ioane 14:1.

[Faamatalaga pito i lalo]

[Ata i le itulau 6, 7]

Na faalaeiauina e Iesu ona aposetolo e faapea, “Ia tumau outou i loʻu alofa”

[Ata i le itulau 7]

Ua lē pine ona faasaʻolotoina atoatoa lea mai le agasala ma ona āuga