„Hori deki-ati!—Mi wini grontapu kaba”

A DEI di Yesus dede, a di fu tinafo dei fu a mun Nisan tapu a Dyu kalender, bigin tapu fodewroko 31 maart 33 G.T. di son dongo. Na a mofoneti dati, Yesus nanga den apostel fu en kon makandra na ini wan tapusei kamra fu wan oso na ini Yerusalem fu hori a Paskafesa. Aladi Yesus ben e sreka ensrefi fu „gowe libi a grontapu disi fu go na en Tata”, toku a ben sori taki a lobi den apostel fu en te na a kaba (Yohanes 13:1). Fa a ben sori disi? Fu di a ben e leri den tumusi moi sani, èn na so wan fasi a ben e sreka den gi den sani di ben o pasa.

Di a kon moro lati, dan Yesus taigi den disipel fu en: „Hori deki-ati! Mi wini grontapu kaba” (Yohanes 16:33). San a ben wani taki nanga den krakti wortu disi? Wan fu den sani na disi: ’Den ogri sani fu a grontapu disi no meki mi kisi bita-ati èn den no meki mi teki refensi tu. Mi no gi grontapu pasi fu meki a kenki a fasi fa mi de. Yu kan du disi tu.’ Den sani di Yesus leri den getrow apostel fu en na ini den lasti yuru fu en libi na grontapu, ben o yepi den fu wini grontapu tu.

Na ini a ten disi grontapu lai ogridu. San wi e du te trawan e du ogri nanga wi aladi wi no du den noti? A e meki wi hori den na feanti noso a e meki wi wani teki refensi? Na ini a ten disi, libisma e libi na wan fasi di no fiti srefisrefi. Fa a fasi dati abi krakti na wi tapu? Te wi e prakseri tu taki wi leki libisma no de volmaakti èn taki wi abi sondu firi, dan yu kan taki dati wi abi fu feti nanga tu sani, namku a grontapu lontu wi èn den sondu firi fu wi. A de so taki wi sa wini den sani disi trutru, sondro taki Gado yepi wi? Fa wi kan kisi yepi fu en? Sortu fasi wi musu suku fu kisi, so taki wi kan kakafutu gi den sondu firi disi? Fu kisi wan piki tapu den aksi disi, meki wi luku san Yesus leri den lobi disipel fu en tapu a lasti dei fu en libi na grontapu.

Wini heimemre fu di yu e kweki sakafasi

Luku fu eksempre, a problema fu heimemre, noso bigimemre. Disi na san Bijbel e taki fu a sani disi: „Bigimemre e kon bifo wan sma e fadon, èn wan yeye fu heimemre e kon bifo wan sma e naki futu fadon” (Odo 16:18). Den Buku fu Bijbel e gi wi a rai sosrefi: „Efu iniwan sma e denki taki a de wan sani aladi a de noti, dan a e kori en eigi prakseri” (Galasiasma 6:3). Iya, heimemre e pori wan sma èn a e kori wan sma trutru. A de wan koni sani taki wi no lobi ’heimemre nanga bigimemre’ kwetikweti.—Odo 8:13.

Den apostel fu Yesus ben abi a problema fu heimemre? Wan leisi, den ben e hari taki nanga makandra suma fu den ben de a moro bigiwan (Markus 9:33-37). Wan tra leisi baka, Yakobus nanga Yohanes ben aksi fu kisi wan prenspari posisi na ini a Kownukondre (Markus 10:35-45). Yesus ben wani yepi den disipel fu en trutru fu puru a fasi dati. Sobun, aladi den ben e nyan a Paskafesa, a opo, a tai wan duku na en mindri, èn a bigin wasi den futu fu den disipel fu en. A ben de krin fu si san a ben wani leri den. „Efu  mi, aladi mi na Masra nanga Leriman, wasi un futu, dan unu musu wasi den futu fu makandra tu” (Yohanes 13:14). Den ben musu puru a fasi dati èn den ben musu kweki sakafasi na presi fu dati.

Ma a no de wan makriki sani fu wini heimemre. Bakaten di a kon moro lati, baka di Yesus seni Yudas Iskariot gowe, di ben o tori en, dan den 11 apostel bigin meki bigi trobi. Fu san ede? Fu di ibriwan fu den ben wani de a moro bigiwan! Na presi taki Yesus taki nanga den nanga atibron, dan ete wan leisi a sori den nanga pasensi taki a de prenspari fu dini trawan. A taki: „Den kownu fu den trakondre sma e basi den, èn den sma di abi makti na den tapu, den e taki fu den dati den na sma di e du bun gi trawan. Ma unu no musu de so. We, meki a moro bigiwan fu unu tron leki a moro yonguwan, èn a wan di de a moro prenspariwan, musu de a wan di e dini trawan.” Fu memre den na a eksempre di a gi, a e taki tu: „Mi de na un mindri leki a wan di e dini unu.”—Lukas 22:24-27.

Den apostel frustan san Yesus ben wani leri den? Soleki fa a sori, den frustan en. Baka wan tu yari, na apostel Petrus ben skrifi: „Un alamala musu abi a srefi fasi fu denki, sori firi gi trawan, abi brada lobi, abi safu sari-atifasi, abi wan yeye fu sakafasi” (1 Petrus 3:8). A de tumusi prenspari taki wi tu e wini heimemre fu di wi e kweki sakafasi! A de wan koni sani gi wi fu no feti fu abi wan bigi nen, makti, noso wan hei posisi na ini a libimakandra. „Gado e kakafutu gi den heimemrewan”, na so Bijbel e taki, „ma a e gi no-frudini bun-ati na den sakafasiwan” (Yakobus 4:6). Wan fositen odo e taki fu a srefi sani tu, taki: „A bakapisi fu sakafasi nanga a frede gi Yehovah, na gudu èn glori èn libi.”—Odo 22:4.

Fa fu wini bita-ati

Luku wan tra fasi di furu sma na ini grontapu abi, namku bita-ati. Difrenti sani kan meki wan sma abi bita-ati. Son leisi na fu di den e frede, noso fu di den no sabi fa sani de trutru, noso fu di den e denki takru fu tra sma aladi den no sabi den sma dati srefi. Trawan abi bita-ati fu di den e kisi kwinsi, noso den kisi fu du nanga kruktudu. A kan tu taki sma e kisi bita-ati fu di den lobi den kondre pasa marki, noso fu di den e desko tra sma fu wan tra lo, noso sma di abi wan tra kloru skin. Ma awinsi fa no fa, bita-ati de na ala sei (2 Timoteyus 3:1-4). Bita-ati ben lai na ini a ten fu Yesus tu. Den Dyu ben abi bita-ati gi den sma di ben e teki belasting moni gi lanti. Den Dyu no ben e bumui nanga den Samariasma tu (Yohanes 4:9). Den ben abi bita-ati sosrefi gi tra sma di no ben de Dyu. Ma safrisafri, sma fu ala nâsi ben o teki a fasi fu anbegi di Yesus seti (Tori fu den Apostel 10:34, 35; Galasiasma 3:28). Sobun, na wan lobi-ati fasi, Yesus gi en disipel wan nyun komando.

Yesus ben taki: „Mi e gi unu wan nyun komando, fu unu lobi makandra; neleki fa mi lobi unu, fu unu lobi makandra tu.” Den ben musu leri fu sori a lobi disi, bika a taki moro fara: „Na a fasi disi ala sma o sabi taki unu na mi disipel, te unu lobi makandra” (Yohanes 13:34, 35). A komando disi ben nyun fu di a wani taki moro leki fu „lobi a sma na yu sei leki yusrefi” (Lefitikus 19:18). Fa so? Yesus ben tyari a tori disi kon na krin di a taki: „Disi na mi komando, taki unu lobi makandra neleki fa mi ben lobi unu. Nowan sma abi moro lobi leki a disi, taki wan sma musu gi en sili abra gi a bun fu den mati fu en” (Yohanes 15:12, 13). Den ben abi fu de klariklari fu dede gi makandra èn gi trawan.

 Fa libisma di no de volmaakti, kan puru takru bita-ati na ini den libi? Fu di den o kweki wan tra fasi na presi fu bita-ati, namku lobi di o meki taki den de klariklari fu gi ensrefi. Milyunmilyun reti-ati sma, awinsi den de fu tra kondre noso lo, awinsi den abi difrenti kulturu, awinsi den ben de na difrenti kerki, noso awinsi den ben abi difrenti politiek fasi fu denki, toku den e gi densrefi fu dini trawan na wan lobi-ati fasi. Now den e kon makandra sondro bita-ati, na ini a bradafasi fu Yehovah Kotoigi na heri grontapu. Den e gi yesi na den wortu fu Yohanes di a ben skrifi nanga santa yeye, taki: „Ibri sma di teige en brada, na wan kiriman. Unu sabi taki nowan kiriman abi têgo libi na ini en fu ala ten” (1 Yohanes 3:15). Tru Kresten no e weigri wawan fu teki prati na ini feti, ma den e du furu muiti tu fu sori lobi gi makandra.

Ma sortu fasi fu denki wi musu abi fu den sma di no abi a srefi bribi leki wi èn fu den sma di kande abi bita-ati gi wi? Di Yesus ben de na a pina-udu, dan a ben begi gi den sma di spikri en taki: „Tata, gi den pardon, bika den no sabi san den e du” (Lukas 23:34). Di den bita-ati man ben ston Stefanus kiri, dan a ben taki den lasti wortu disi: „Yehovah, no aksi den frantwortu fu a sondu disi” (Tori fu den Apostel 7:60). Yesus nanga Stefanus ben winsi soso bun gi sma, srefi gi den sma di no ben wani si den na ai. Den no ben abi bita-ati. Bijbel e gi wi a deki-ati disi: „Meki wi du bun gi ala sma.”—Galasiasma 6:10.

’Wan yepiman fu têgo’

Moro lati na a konmakandra fu Yesus nanga en 11 apostel, dan Yesus fruteri den taki a ben o de nanga den leki libisma fu wan syatu pisi ten ete (Yohanes 14:28; 16:28). Ma a gi den a dyaranti taki: „Mi sa aksi a Tata èn a sa gi unu wan tra yepiman di sa de nanga unu fu têgo” (Yohanes 14:16). A yepiman di a ben pramisi den na Gado santa yeye. A ben o leri den dipi sani fu den Buku fu Bijbel èn a ben o meki den memre san Yesus leri den di a ben du en wroko na grontapu.—Yohanes 14:26.

Fa a santa yeye kan yepi wi na ini a ten disi? We, Bijbel na a Wortu fu Gado di sma skrifi nanga santa yeye. Den man di Gado ben gebroiki fu taki profeititori èn fu skrifi Bijbel, ben taki èn skrifi „soleki fa santa yeye ben tyari den” (2 Petrus 1:20, 21; 2 Timoteyus 3:16). Te wi e studeri den Buku fu Bijbel èn te wi e du san wi leri, dan wi e kisi sabi, koni, wi man frustan sani bun, wi e kisi koni fu man si sani krin, èn wi e kisi a yoisti fasi fu denki. Na so wan fasi wi man sreka wisrefi moro bun fu kakafutu gi den tesi fu na ogri grontapu disi.

A santa yeye e yepi na wan tra fasi tu. A santa yeye fu Gado na wan bigi krakti di e du bun wroko. Den sma di abi a krakti disi e sori den fasi fu Gado. Bijbel e taki: „A froktu fu a yeye na lobi, prisiri, vrede, langa pasensi, switifasi, bun-ati, bribi, safri-atifasi, a dwengi di wan sma e dwengi ensrefi.” A no den fasi disi wi abi fanowdu so taki wi kan wini den sondu firi fu hurudu, streilibi, dyarusu, atibron, èn tra srefi sortu sani?—Galasiasma 5:19-23.

Te wi e frutrow tapu a yeye fu Gado, dan wi kan kisi „krakti di bigi pasa marki” sosrefi, so taki wi man pasa iniwan problema noso firi fu broko-saka (2 Korentesma 4:7). Aladi a santa yeye no e puru gens noso tesi, toku a kan yepi wi fu horidoro te den sani disi e miti wi (1 Korentesma 10:13). Na apostel Paulus ben skrifi: „Gi ala sani mi abi a tranga fu en di e gi mi krakti” (Filipisma 4:13). Gado e gi a krakti disi nanga yepi fu en santa yeye. Wi breiti srefisrefi nanga a santa yeye! Den wan di ’lobi Yesus èn e du den komando fu en’, sa kisi a santa yeye disi.—Yohanes 14:15.

„Tan na ini a lobi fu mi”

Na en lasti neti leki libisma, Yesus taigi en apostel sosrefi: „A sma di abi den komando fu mi èn e hori den, en na a sma di lobi mi. Èn a sma di lobi mi, a Tata fu mi sa lobi en” (Yohanes 14:21). A gi den a deki-ati: „Tan na ini a lobi fu mi” (Yohanes 15:9). Fa a tan di wi o tan na ini a lobi fu a Tata nanga a Manpikin kan yepi wi fu feti teige den sondu firi fu wi èn teige na ogri grontapu lontu wi?

We, a de so taki wi o man basi den sondu firi fu wi trutru efu wi no e kisi tranga fu du so? Te  wi abi a winsi fu abi wan bun banti nanga Yehovah Gado èn nanga en Manpikin dan dati o gi wi tranga fu basi den sondu firi. Ernesto * na wan yonguman di ben musu feti trutru nanga a yayolibi di a ben e libi sensi en tini yari. A e taki: „Mi ben wani plisi Gado, èn mi leri fu Bijbel taki Gado no ben lobi a fasi fa mi ben e libi. Sobun, mi teki a bosroiti fu tron wan tra sortu sma di e libi akruderi den wet fu Gado. Ibri dei mi ben abi fu feti nanga takru, fisti prakseri di ben e kon na mi ede ete. Ma mi teki a fasti bosroiti fu wini a feti disi èn mi ben e begi Yehovah doronomo fu yepi mi. Baka tu yari mi ben man basi a problema disi, ma te now ete, mi e feti nanga misrefi.”

Ini a tori fu a feti di wi abi fu feti teige a grontapu disi, luku san Yesus pristeri na ini a lasti begi fosi a gowe libi a tapusei kamra na ini Yerusalem. A begi en Tata gi den disipel fu en, taki: „Mi no e begi yu fu puru den na grontapu, ma mi e begi yu fu kibri den gi na ogriwan. Den no de wan pisi fu grontapu, neleki fa mi no de wan pisi fu grontapu” (Yohanes 17:15, 16). Fu tru, dati na wan bigi trowstu! Yehovah e luku den wan di a lobi èn a e gi den krakti te den e tan aparti fu grontapu.

„Sori bribi”

Te wi e ondrosuku den komando fu Yesus, dan dati sa yepi wi trutru fu wini a feti di wi e feti teige na ogri grontapu èn teige den sondu firi fu wi. Ma aladi wi kan wini a grontapu nanga den sondu firi fu wi, toku wi no man puru den. Ma wi no musu lasi-ati.

„Grontapu e pasa gowe nanga den lostu fu en”, na so Bijbel e taki, „ma a sma di e du a wani fu Gado, e tan fu têgo” (1 Yohanes 2:17). Yesus gi en libi fu frulusu „ibriwan sma di e sori bribi na ini en” fu sondu nanga dede (Yohanes 3:16). Te wi e kisi moro sabi fu san Gado wani èn fu den sani di a abi na prakseri fu du, dan dati e meki wi teki a deki-ati di Yesus gi wi: „Bribi na ini Gado, bribi na ini mi tu.”—Yohanes 14:1.

[Futuwortu]

[Prenki na tapu bladzijde 6, 7]

Yesus gi en apostel a deki-ati: „Tan na ini a lobi fu mi”

[Prenki na tapu bladzijde 7]

Heri esi wi sa kon fri fu sondu nanga ala den bakapisi fu dati