Filioch—Mi Weires Nge Sise Tongeni Ti Senikich

NAPOLEON Bonaparte, sou nemenemen Franis lefilen 1804 me 1814, a apasa: “Esap wor och mettoch mi weires seni, are auchea seni ewe tufichin pwisin filata.” Neman kopwe tipeeu ngeni ekkena ruu poraus, pun aramas ra kan aucheaani ar tufichin pwisin nemeni manauer. Nge ra fen pwal kaeo pwe ar apwungu mettoch ese kon lien mecheres.

Ese lifilifil mecheresin are weiresin met sia pwungupwung won nge, sise tongeni su seni wiisach le filata. Sia wiisen pwungupwung won sokkopaten mettoch iteiten ran. Mwirin sia pwata lesossor, sia wiisen filata met sipwe ufouf me ani unau, me sia pwungupwung won chommong mettoch lon ewe ran. Lape-ngeniir mi kisikis. Sise kan ekiek sefal ussur ika sia fen filioch are filingau.

Nge, ekkoch mettoch sia pwungupwung won mi fokkun lamot. Chommong sarafo repwe filata met repwe achocho ngeni lon manauer. Repwe pwungupwung won ewe sokkun sukul repwe fiti me ukuukun ttamen ar feilo sukul. Epwe tori ewe fansoun lape-ngeniir repwe filata ika repwe pupulu are lipich. Chokkewe mi filata pupulu repwe wiisen pwungupwung won ekkeei kapas eis: ‘Mei naf ieri me ai asimau fan iten ai upwe pupulu? Epwe ifa ekkewe lapalap ua saani ren puluwei, are a lamot seni ena, ikkefa lapalapen puluwei epwe poluoch ngeniei.’ Esap tongeni wor chommong mettoch sipwe filata lon manauach mi lamot seni filen puluwach.

Ren kefil mi watte lamoter, a lamot ach sipwe pwungupwungoch. Ach pwapwa mi alongolong won ach fori. Ekkoch ra luku pwe ra tufichin pwungupwungoch me resap etiwa ewe alillis mi kawor. Mi tipatchem ena? Sipwe ppi.

[Credit Line]

Napoleon: Seni ewe puk The Pictorial History of the World