Panagdesisyon​—Sakey ya Agnapaliisan ya Angat

“ANGGAPO lay mas mairap, tan sirin et mas mabli nen say pakasarag a mandesisyon,” so aminsan ya inkuan nen Napoleon Bonaparte, a koma-19 a siglo ya emperador na Pransya. Nayarin onabobon kayo ed satan a parehon pamaakaran, lapud kaslakan a papablien na totoo so pakakontrol ed mismon bilay da. Ontan met, naaaralan da ya agaylan irap no maminsan so manggawa na saray desisyon.

Mainomay man odino mairap, agnapaliisan so manggawa na saray desisyon. Diad inagew-agew et nakaukolan tayoy mandesisyon. Kabangon tayo ed kabuasan, nepeg itayon mandesidi no anto so isulong tayo, no anto so pan-almusalan tayo, tan no panon ya arapen so dakerakel nin bengatla diad sanagew. Maslak ed sarayan desisyon so agtanto importante. Matalag tayo lan pannonotan ni itan. Matalag itayon agmakaugip no kasin makabat iratan odino andi.

Diad biek a dapag, malaknab so nalalanor ed arum a dedesisyonan. Nepeg a mandesidi so dakel a kalangweran ed mundo natan no antoran kalat so gegemtanen da. Nayarin desidien da no anton kurso so nakaukolan da tan no kaunongan kabayag itan. Diad saginonor, maslak ed sikara so mandesidi no kasin mangasawa odino miasawa ra odino mansiansia laran walad kasuloan. Saramay labay da lay mangasawa odino miasawa so nepeg a mandesidi: ‘Kasin matakken ak la odino wala ak la’d suston edad pian mangasawa odino miasawa? Anton klase na kapareha so labay ko, odino mas importante ni et anton klase na kapareha so nakaukolan ko?’ Say desisyon tayo nipaakar ed panagpili na kapareha so mangaapektan tuloy ed bilay tayo.

Diad saray bengatlan sankaimportantian et makana so panggawa na makabat iran desisyon, lapud say liket so mandependin tuloy ed panggawa tayo ed satan. Nayarin moriaen na arum a totoo a sarasarag da lay manggawa na ontan iran desisyon tan nayarin agda labay so patulongan. Kasin makabat itan? Nengnengen tayo.

[Picture Credit Line ed pahina 3]

Napoleon: Nanlapu ed libron The Pictorial History of the World