Tumamento di Decision—Un Reto Cu Bo No Por Evita

“SA CON pa tuma decision ta e cos di mas dificil pa haci, y pesei, si un persona por logra haci esei, e ta bira tambe e cos mas balioso”, Napoleon Bonaparte, Emperado Frances di siglo 19, a yega di bisa. Probablemente lo bo bai di acuerdo cu ambos aspecto di tumamento di decision menciona den e cita aki riba, ya cu hende en general gusta masha pa nan por tin control riba nan propio bida. Na mes momento, hende a haya sa cu tin bes no ta ningun tiki facil pa tuma decision.

Sea cu e ta facil of dificil, tumamento di decision ta algo cu bo no por evita. Tur dia nos tin cu tuma decision. Ora nos lanta mainta, nos tin cu dicidi kico pa bisti, kico pa desayuna y con pa trata cu yen di otro cos durante dia. Mayoria di e decisionnan aki no ta dje importante ei. Masha poco nos ta echt para pensa riba nan. Rara bes nos ta perde soño pa motibo cu nos ta precupa si den e casonan ei nos a tuma un bon decision of no.

Di otro banda, algun decision si tin consecuencia di largo alcanse. Hopi hoben den e mundo djawe tin cu dicidi ki meta pa sigui. Por ta nan tin cu dicidi ki clase di educacion nan tin mester y pa cuanto tempo. Tardi of tempran mayoria di nan lo dicidi si nan ta casa of ta keda soltero. Esnan cu ta scohe pa casa mester dicidi: ‘Mi ta suficientemente grandi y madura pa casa? Ki clase di partner mi ta desea, of mas importante ainda, ki clase di partner mi tin mester?’ Masha poco decision cu nos tuma tin un impacto asina profundo riba nos bida manera scohemento di un casa.

Ta vital pa tuma decisionnan sabi ora ta trata di asuntonan cu ta hopi importante, ya cu nos felicidad basicamente ta depende di esei. Tin hende kisas ta pensa cu nan ta suficientemente capas pa tuma e tipo di decisionnan ei nan mes, y ta pesei ora hende ofrece nan yudansa, nan lo por rechasa esei. Esei ta sabi? Laga nos mira.

[Reconocemento pa Potret na pagina 3]

Napoleon: Di e buki The Pictorial History of the World