Tuku i te Au Ikianga​—E Akaaoanga Kopae Koreia

“KARE roa e apinga ngata atu, e te mea akaperepere maataia kia rauka i te tuku i te ikianga,” i tuatua ei a Napoleon Bonaparte, e emepera no Varani i te 19 anere mataiti. Penei ka akatika koe i te reira, i te mea e te akaperepere ra te tangata i te akatere i to ratou uaorai au oraanga. I taua taime rai, kua kitea mai e ratou e kare i te mea ngoie ua kia tuku i te au ikianga.

Me e mea ngoie ua me kore e ngata, te tuku i te au ikianga kare e rauka i te kopaeia. E aro atu ana tatou i tetai angaanga i te au ra. I muri mai i te tu anga i te popongi, ka iki tatou e eaa te ka aao, e eaa te ka kai i te popongi, e ka akapeea me akono i tetai au apinga i taua ra ra. Te maata anga o teia au ikianga kare ia i te mea puapinga. Kare tatou e akamanako ana no runga i te reira. E taki tai ua ake taime ka ngere ia tatou te moe me e mea pakari ia e me kare.

I tetai tua, e mea puapinga maata tetai au ikianga. E manganui te au mapu i roto i te ao o teia tuatau ka tau kia iki e eaa ta ratou au angaanga ka aruaru atu ei. Penei ka iki ratou eaa te tu o te apii ka akono atu ratou e eaa te maata. Kare e roaia, ka iki te maata anga ia ratou me ka akaipoipo me kore ka noo takaua. Te aronga ka manako i te akaipoipo ka tau kia iki: ‘Kua tangata mamaata mai ainei au e kua pakari mai no te akaipoipo? Eaa te tu o taku tokorua ka inangaro, te mea maata atu, eaa te tu o te tokorua taku e anoano ra?’ E iti ua te au ikianga i roto i te oraanga te akakeu oonu maata maira ia tatou i ta tatou ikianga i tetai tokorua.

I roto i te au mea maata, e mea puapinga i te tuku i te au ikianga pakari, i te mea te vaira te mataora ki runga i ta tatou e iki ra. Penei te manako ra etai au tangata e kua tau ratou no te tuku i te au ikianga e penei ka kopae i te tauturu me orongaia atu te reira. E mea pakari ainei te reira? Ka akara ana tatou.

[Akameitakianga no te Tutu i te kapi 3]

Napoleon: From the book The Pictorial History of the World