Te raveraa i te mau faaotiraa—te hoê faaheporaa eita e nehenehe e ape

“AITA ˈTU e mea fifi aˈe, e mea faufaa aˈe ïa i te iteraa e nafea ia faaoti,” ta Napoléon Bonaparte, te emepera no Farani no te senekele 19 ïa i parau i mutaa iho. E farii paha outou i teie manaˈo, i te mea iho â râ na te taoˈa e faatere ra i te oraraa iho o te taata. I taua atoa taime ra, ua haapii ratou e i te tahi taime e ere roa ˈtu i te mea ohie ia rave i te mau faaotiraa.

Noa ˈtu e e mea ohie aore ra e mea fifi, eita e nehenehe e ape i te raveraa i te mau faaotiraa. E rave tatou i te mau faaotiraa i te mau mahana atoa. Ia tia mai tatou i te poipoi, e mea tia ia faaoti tatou eaha ta tatou e oomo, eaha ta tatou e amu, e nafea ia rave i te tahi atu â mau ohipa i te roaraa o te mahana. E ere i te mea faufaa roa te rahiraa o teie mau faaotiraa. E varavara tatou i te feruri faahou atu. E varavara tatou i te ere i te taoto noa ˈtu e e mea paari aore ra e mea paari ore te reira.

I te tahi aˈe pae, e mea faufaa roa te tahi mau faaotiraa. E mea tia ia faaoti te feia apî e rave rahi i roto i te ao no teie tau eaha te mau tapao ta ratou e titau. E faaoti paha ratou eaha te huru haapiiraa ta ratou e hinaaro e eaha te maororaa. Peneiaˈe i muri aˈe, e faaoti te rahiraa o ratou e faaipoipo anei aore ra e faaea taa noa. E mea tia ia faaoti te feia e opua ra e faaipoipo: ‘Ua naeahia anei to ˈu matahiti e ua navai anei to ˈu paari no te faaipoipo? Eaha te huru apiti ta ˈu e hinaaro, aore ra te mea faufaa ˈtu â eaha te huru apiti e tano ia ˈu?’ E mea iti roa te mau faaotiraa i roto i te oraraa o te ohipa ˈtu â i nia ia tatou i ta tatou maitiraa i te hoê apiti.

No te mau mea faufaa roa ˈˈe, e mea titauhia ia rave i te mau faaotiraa paari, i te mea e tei te na reiraraa e oaoa ˈi tatou. Peneiaˈe te manaˈo nei te tahi mau taata e ua ite ratou i te rave i teie mau faaotiraa e e patoi mai paha ratou ia pûpûhia ˈtu te tauturu. E mea paari anei te reira? E hiˈo anaˈe ïa.

[Faaiteraa i te fatu o te hohoˈa i te api 3]

Napoléon: No roto i te buka The Pictorial History of the World