Panon Kan Makapanggawa na Makabat Iran Desisyon?

“SAY makabat a too ondengel komon, tan namunat ed aral,” so inkuan nen Solomon, ya ari na kadaanan ya Israel. Maslak ed sikatayo so makapanggagawa no maminsan na agmakabat iran desisyon lapud sikatayo so ag-ontatalineng ed simbawa na arum.​—Uliran 1:5.

Saraman a salita nen Solomon so nisulat ed saginonor diad Biblia, pati saray arum ed “talon libo a proverbio” a tinibukel to. (1 Arari 4:32) Kasin nagunggonaan itayo ed pakapikabat tan pangunor ed makabat iran diparan to? On. Ontulong iratan ed sikatayo ‘pian naamtaan so kakabatan tan bangat; pian nibiig iray salita na pakatalos; pian naawat so bangat ed makalakal a kagagawa, dia ed inkatunong tan kaptekan tan katukoyan.’ (Uliran 1:2, 3) Singbaten tayo so limaran totontonen a nibase ed Biblia a makatulong pian makapanggawa itayo na makabat iran desisyon.

Nonoten Iray Manbayag a Pansumpalan

Arum a desisyon so walaan na makana iran pansumpalan. Kanian, panggunaetan a determinaen lan unona no anto iratan. Manalwar ed pakasagyat ed saray temporaryon gunggona a sengegay agyo pakamoria ed saray makapuy tan manbayag a pansumpalan. “Say masimpit a too nanengneng to so mauges, tan yamot to so inkasikato; balet say karaklan ontuloy, tan manlikna nipaakar ed sikato,” so impasakbay na Uliran 22:3.

Nayarin makatulong so pangilista no anto iray temporaryo tan manbayag a pansumpalan. Saray temporaryon resulta na pamili ed sakey a trabaho et nayarin say atagey a sueldo tan makapaliket a kimey. Balet kasin kabiangan ed manbayag iran pansumpalan so pakawalaan na trabaho ya anggapoy peteg ya iyaligwas? Nayari kasin diad saginonor et paskaren ka na satan ya onalis ed arum a pasen, ya arawi ed kakaarom odino pamilyam? Nayari kasin ipaarap ka na satan ed mauges odino agmakapaliket a tuloy a kaliberliber a sengegay pirmin pakadismayaan mo? Maalwar a konsideraen iray pankaabigan tan pankaugsan, insan desidien no dinan so nepeg ya iprayuridad.

Agmanggaganat

Nayarin saray inapuran desisyon so mainomay a magmaliw ya agmakabat a desisyon. Oniay impasakbay na Uliran 21:5: “Saray kaisipan na saray makuli arap ira lambengat ed inkadaakan; balet balang sakey a mangganat, mangganat lambengat a naukolan.” Singa bilang, saray mantintindek labat a tin-edyer so nepeg ya agmanggaganat ya onloob ed panangasawa. Ta no andi et naeksperiensya ra so inkapeteg na imbaga nen William Congreve, sakey a managsulat na drama a taga-Inglatera diad kagapo na koma-18 siglo: “No mangganat itayon mangasawa, nayarin magbabawi itayo a mabayag.”

Balet, say agpangganat et agmankabaliksan na pangipalpaleen. Saray arum a desisyon so importantin tuloy kanian makabat no gawaen la irayan  tampol no posible. Say agnakaukolan a pan-abala so balanglan pakaperdian tayo odino saray arum. Say pangipaleen ed desisyon et nayarin sakey a desisyon a mismo balet ta nayarin aliwan makabat a desisyon.

Magmaliw a Maawat ed Simbawa

Lapud anggapo so duaran situasyon ya eksakton manpareho, nayarin aliwan naynay a pareho so desisyon na duaran too sano nidunget ira ed pareho iran problema. Anggaman kuan, makatulong so pangamta ed no panon so impandesisyon na arum ed saray pamaakaran a mipadpara ed sikatayo. Tepetan ira no antoy nikuan da natan ed desisyon da. Alimbawa, diad pampili na sakey ya anapan, paisalaysay ed saramay akasali la ed satan ya anapan iray positibo tan negatibon aspekto na satan. Antoray aromog dan gunggona ed say pinili ra, tan antoray makapuy a nansumpalan odino posiblin pakapeligroan?

Oniay nipasakbay ed sikatayo: “Ed kaandian na simbawa, saray kanonotan nabagbag; balet dia ed karaklan na mananimbawa sikara so niletneg.” (Uliran 15:22) Siempre, sano labay tayo so pasimbawa tan makaaral ed eksperiensya na arum, nepeg a gawaen tayo itan tekep na sigpot a pamidbir a sikatayon mismo so unor a mandesisyon tan sikatayoy walaan na eebatan ed panggawa ed satan.​—Galacia 6:4, 5.

Tumboken so Nipasal a Maong a Konsiensia

Makatulong so konsiensia pian makapanggawa itayo na saray desisyon a mitunosan ed saray manunan prinsipyo a labay tayon pangitunosan ed bilay tayo. Parad sakey a Kristiano, kabaliksan na saya ya ipasal toy konsiensia to a mitunosan a mismo ed kanonotan na Dios. (Roma 2:14, 15) Oniay ibabaga ed sikatayo na Salitay Dios: “Dia ed saray amin a dalan mo sikato so bidbiren mo, et sikato itonton to so saray basbas mo.” (Uliran 3:6) Siempre, diad arum a pamaakaran, say duaran too​—a kada sakey et walaan na nipasal a maong a konsiensia​—so nayarin nawalaan na nandumaan a konklusyon kanian mandumaan iray desisyon da.

Balet, ipulisay na nipasal a maong a konsiensia so ontan a kawayangan, sano nalalanor iray kiwas a direktan kokondenaen na Salitay Dios. Alimbawa, say konsiensia ya agnipasal ed saray prinsipyo ed Biblia so nayarin mangiyabuloy ed laki tan bii a manubok no kasin makapanbagayan ira sakbay a mankasal diad panamong lambengat. Nayarin isipen da a makabat itan a desisyon da, ya ikakatunongan da a mangamper itan ed bengatbengat ya iloob da ed agmakabat a panangasawa. Nayarin ag-ira gogonigonen na konsiensia ra. Ingen, siopaman a mipara so panmoria to ed panmoria na Dios nipaakar ed sekso tan panangasawa so nepeg a mandeside sumpad satan a temporaryo tan imoral ya uksoyan.​—1 Corinto 6:18; 7:1, 2; Hebreos 13:4.

No Panon a Mangapekta ed Arum Iray Desisyon Mo

Mabetbet a saray desisyon mo so nayarin mangapekta ed arum. Kanian agmon balot gagagalaen so manggawa na agmakabat​—maatiw ni ingen​—a desisyon a nayarin maneral ed mabli iran relasyon ed kakaarom tan kakanayon mo odino, manuna ed amin, ed Dios. Oniay ibabaga na Uliran 10:1: “Say makabat ya anak panliketen to so ama; balet say maatiw ya anak sikato so makapabelat ed ina to.”

Diad biek a dapag, bidbiren a no maminsan et nakaukolan so pampili na saray pikaaroan. Pian iyilustra, nayarin desidien mon ipulisay iray datin relihyoson panmoriam ya amtam a sumlang ed Kasulatan. Odino nayarin desidien moy manggawa na baleg a pananguman ed personalidad mo lapu ed pilalek mon itunos  so bilay mo ed saray totontonen na Dios ya inawat mo la natan. Nayarin say desisyon mo so agmamaliket ed kakaarom odino kakanayon mo, balet dinanman a desisyon a mamaliket ed Dios et sakey a makabat a desisyon.

Makabat a Gawaen so Sankabalgan a Desisyon

Agkabat na maslak a totoo a balang sakey natan so kaukolan a mandesisyon parad bilay odino patey. Ontan met a kipapasen so inarap na saray Israelita nensaman a nankampamento diad ketegan na Insipan a Dalin nen 1473 K.K.P. Bilang manangilaman na Dios, oniay inkuan nen Moises ed sikara: “Inyan ko ed arap mo so bilay tan say patey, say bendisyon tan say ayew, sikato so makasengeg a pilien mo so bilay ta pian manbilay ka, sika tan say kapolian mo; say panangaro ed Jehova a Dios mo, say pananumpal ed boses to tan say ipepeket ed sikato; ta sikato so bilay mo tan kinarukey na saray agew mo, ta pian makapanayam ka ed dalin ya insamba nen Jehova ed saray amam, a di Abraham, Isaac, tan Jacob, ya iter ed sikara.”​—Deuteronomio 30:19, 20.

Papaneknekan na propesiya tan kronolohiya na Biblia a manbibilay itayo la natan ed “maatap a panaon a mairap a pidenengan” tan “say kipapasen na sayan mundo so manguuman.” (2 Timoteo 3:1, NW; 1 Corinto 7:31, NW) Say nipasakbay a pananguman so mamantok ed kaderal na abulok a sistema na too, a salatan na balon mundo na inkatunong na Dios.

Magano tayo lan onloob ed satan a balon mundo. Kasin makaloob ka pian manggayaga ed andi-anggaan a bilay diad dalin ya uleyan na Panarian na Dios? Odino kasin napagit ka diad dalin sano naandi la so sistema nen Satanas? (Salmo 37:9-11; Uliran 2:21, 22) Sikan mismo so mandesisyon no anton kurang so tumboken mo natan, tan peteg a sakey itan a desisyon a nipaakar ed bilay odino patey. Kasin labay mo so patulongan pian makapanggawa ka na duga tan makabat a desisyon?

Say primeron nalalanor ed pandeside parad bilay et say panaral ed saray kakaukolanen na Dios. Maslak a relihyon so agsuston mangibabangat ed saratan a kakaukolanen. Saray lider da so mabetbet a mamapalingo ed saray totoo pian manisia ed katilaan tan manggawa na saray bengatlan agmakapaliket ed Dios. Agda nipapaliwawa iray nakaukolan parad panggawa na personal a desisyon a mandayew ed Dios “ed espiritu tan katuaan.” (Juan 4:24) Kanian maslak a totoo so agmandadayew ed ontan a paraan. Balet imanoen so inkuan nen Jesus: “Say ag-ontumbok ed siak sikatoy onsumpa ed siak; tan say agmikupkop ed siak, manbuyandak.”​—Mateo 12:30.

Malikeliket iray Tasi nen Jehova ya ontutulong ed totoo a makagamor na magmaong a pikakabat ed Salita na Dios. Sikaray regular a mangisisingbat na Biblia ed saray indibidual odino saray grupo diad oras tan pasen a kombeniente ed sikara. Saramay malabay a manganamot ed sayan probisyon so nepeg ya onasingger ed saray Tasi ed lugar da odino mansulat ed saray manangipalapag na Say Panag-Bantayan.

Siempre, arum so nayarin walaan la na manunan pikakabat ed saray kakaukolanen na Dios. Nayarin sikara ni ingen so kombinsido a say Biblia so katuaan tan napanmatalkan. Anggaman ontan, ipapaleen na pigara ed sikara so pandesisyon ya idedikay inkasikara ed Dios. Akin? Nayarin walaray rason.

Posibli kasi ya agda kabat so kaimportantian na pangidedikay inkasikara ed Dios? Oniay malinew ya imbaga nen Jesus: “Aliwan balang sakey a mankuan ed siak na, Katawan, Katawan, et onloob naani ed panariay tawen; noag ingen say mangunor na linawa nen Amak a wala ed tawen.” (Mateo 7:21) Aliwan magenap so basta pakawalaan na pikakabat ed Biblia; nakaukolan so ikiwas. Inletneg na inmunan Kristianon kongregasyon so padron. Oniay nabasa tayo nipaakar ed arum nen inmunan siglo: “Bangnen anisia la ra ed Felipe ya angipakabat na maong a balita na panarian na Dios tan ngaran nen Jesu-Kristo, nambinyag so saray lalaki tan bibii.” (Gawa 2:41; 8:12) Kanian, no masimoon ya inawat na sakey a too so Salita na Dios, anisia ed ibabaga na satan, tan manbibilay unong ed saray estandarte na Dios, anto ni so makaamper ed pakabautismoan to bilang simbolo na dedikasyon to? (Gawa 8:34-38) Siempre, pian naabobonan na Dios, nepeg a sikatoy mabulos tan malikeliket a manggawa ed sayan kundang.​—2 Corinto 9:7.

 Nayarin liknaen na arum a kulang ni so pikakabat da pian idedika so bilay da ed Dios. Balet, amin ya onggagapo ed sakey a balon kurso ed bilay et limitado so pikakabat to. Siopan propesyonal so mangibaga ya amta to la diad kagapo na karera to iray bengatlan amta to natan? Say kakaukolanen lambengat ed pandesidin manlingkor ed Dios et say pikakabat ed saray manunan bangat tan prinsipyo na Biblia, a tinekepan na masimoon a pilalek a manbilay unong ed saratan.

Kasin ipalpaleen na arum so desisyon da lapud natatakot ira ya ompan agda nasumpal itan? Say makatunongan a pampaga nipaakar ed isasaew et kabiangan ed dakel a sipanan na too. Nayarin moriaen na sakey a laki a mandedesisyon a mangasawa tan manpamilya a sikatoy agni kualipikado, balet say determinasyon tan gunaet to so mamaseseg ed sikato pian gawaen so anggaan na nayarian to. Ontan met, nayarin natatakot so sakey a kalangweran a balo nin awalaan na lisensia ed panagmaneho ompan naaksidente ed dalan​—nagkalalo la no kabat to ya ipaparungtal na estatistika a mas dakel a kalangweran a drayber so mabetbet a naaaksidente nen saray matakken la. Balet, sayan pikakabat so nayarin makagunggona, a mamakiwas ed sikaton man-alwar a maong ed panagmaneho. Seguradon say agpangala na lisensia so aliwan solusyon!

Mandesidi Parad Bilay!

Ipaparungtal na Biblia a say peles a sistema na politika, ekonomya, tan relihyon ed interon mundo tan saramay manusuporta ed satan so magano lan naandi diad dalin. Ingen, saray indibidual a makabat a mandedesisyon parad bilay tan onkikiwas unong ed satan so mansiansia. Bilang sentro na sosyedad na balon mundo, sikaray mibiang ed panggawa’d dalin a sakey a paraiso, unong ed datin ginetma na Dios. Kasin maliket ka a mibiang ed sayan magayagan kimey, diad panangidirehi na Dios?

No ontan, desidien so panaral ed Salita na Dios. Desidien ya amtaen iray kakaukolanen na Dios pian sikatoy napaliket. Desidien a kapeten iratan. Manuna ed amin, desidien a sumpalen so desisyon mo. Diad antikey a panangibaga, mandesidi parad bilay!

[Saray litrato ed pahina 4]

Agmanggaganat ed saray seryoson dedesisyonan

[Litrato ed pahina 5]

Magmaliw a maawat ed simbawa diad panagpili na karera

[Saray litrato ed pahina 7]

Saramay mandesidin manlingkor ed Dios natan so mibiang ed panggawa’d dalin a sakey a paraiso