Con Bo Por Tuma Decisionnan Sabi?

“UN HENDE sabi lo tende y lo aumenta su conocemento”, Salomon, Rei di Israel di antiguedad, a bisa. Mayoria di nos a yega di tuma decisionnan robes simplemente pa e echo cu nos no a haci caso di conseho di otro hende.—Proverbionan 1:5.

Despues e palabranan ei di Salomon a ser skirbi den Bijbel, hunto cu e resto di “tres mil proverbio” cu el a compone. (1 Reinan 4:32) Nos por beneficia for di su dichonan sabi door di siña conoce nan, y tuma nan na pecho? Si. Nan ta yuda nos ‘conoce sabiduria y instruccion, discerni e dichonan di comprondemento, ricibi instruccion den conducta prudente, husticia, huicio y rectitud.’ (Proverbionan 1:2, 3) Laga nos analisa cinco conseho basa riba Bijbel cu por yuda nos tuma decisionnan sabi.

Considera Consecuencianan Riba Termino Largo

Tin algun decision cu lo tin consecuencianan basta serio. Pesei purba determina di antemano kico esakinan lo por ta. Tene cuidou pa e beneficionan atractivo riba termino cortico no ciega bo pa e posibel consecuencianan desagradabel riba termino largo. Proverbionan 22:3 ta spierta: “Un hende prudente ta mira maldad y ta sconde, ma e simpelnan ta sigui bai, y ta haya castigo pa esei.”

Kisas lo ta util pa traha un lista di e consecuencianan tanto riba termino cortico como esnan riba termino largo. Por ta ora bo scohe un cierto trabou, e resultado riba termino cortico lo por ta cu bo ta haya un bon salario y un trabou agradabel. Pero ta posibel cu un di e consecuencianan riba termino largo por ta cu lo bo tin un trabou sin berdadero futuro? Of a lo largo kisas lo bo tin cu muda bai otro caminda, por ta leu for di amigonan y famianan? Of kisas lo bo por haya bo ta traha den un ambiente insaludabel of cu lo ta asina laf cu bo ta keda profundamente frustra? Wak kico ta e bentahanan y desbentahanan, anto caba dicidi cua factor ta mas importante.

Tuma Suficiente Tempo

Ora bo tuma decision den pura ta manera e dicho ta bisa: Sopi pura ta sali salu. Proverbionan 21:5 ta spierta: “E plannan di hende balente siguramente ta conduci na abundancia, ma tur esnan cu tin pura, siguramente ta resulta den pobresa.” Por ehempel, teenagernan cu ta locamente enamora mester tuma tempo prome cu nan dicidi di casa. Sino, nan lo por experencia e berdad di loke William Congreve, un dramaturgo Ingles cu a biba na principio di siglo 18, a bisa: “Esnan cu core casa tin hopi tempo despues pa lamenta.”

Sinembargo, nos no mester confundi tumamento di suficiente tempo pa dicidi cu pospone  tumamento di decision. Tin decision ta asina importante cu ta sabi pa tuma nan mas pronto posibel. Si nos tarda innecesariamente e por sali tanto nos como otro hende caro. Pospone un decision riba su mes kisas por ta un decision cu probablemente no ta dje sabi ei.

Keda Habri pa Conseho

Siendo cu no tin dos situacion identico, no ta semper dos persona cu problemanan similar lo tuma e mesun decision. Pero toch ta util pa tende ki decision otro hende a tuma den situacionnan similar. Puntra nan kico nan ta pensa awor di nan decision. Por ehempel, ora di scohe un ofishi, pidi esnan cu ya ta haci e trabou ei pa un tempo caba pa conta bo ambos banda di e medaya. Kico tawata e bentahanan y desbentahanan of posibel peligernan di e trabou aki?

“Pa falta di conseho plannan ta fracasa”, segun spiertamento biblico, “ma cu hopi consehero nan ta wordo logra.” (Proverbionan 15:22) Naturalmente, ora nos ta busca conseho y ta siña for di experencia di otro hende, nos mester ta plenamente conciente cu ta nos mes tin cu tuma e decision final y a la bes carga e responsabilidad pa e decision aki.—Galationan 6:4, 5.

Haci Caso di un Consenshi Bon Entrena

Nos consenshi por yuda nos tuma decisionnan na harmonia cu e principionan basico cu nos ta scohe pa guia nos den bida. Pa un cristian, esaki ta nifica entrena e consenshi di tal manera cu e ta refleha e pensamentonan di Dios. (Romanonan 2:14, 15) E Palabra di Dios ta bisa nos: “Den tur bo camindanan reconoc’e, y e lo dirigi bo bereanan.” (Proverbionan 3:6) Naturalmente, den algun aspecto dos persona—cada un cu un consenshi bon entrena—kisas por yega na diferente conclusion y pesei tuma decisionnan distinto for di otro.

Sinembargo, ora ta trata di accionnan cu e Palabra di Dios ta condena directamente, un consenshi bon entrena lo no duna e persona libertad pa scohe. Por ehempel, un consenshi cu no a ser entrena pa principionan biblico por permiti un hende homber y hende mohe biba hunto gewoon sin casa pa nan wak si nan ta bai bon cu otro. Kisas nan ta pensa cu nan a tuma un decision sabi, rasonando cu esei lo por evita cu nan ta core casa y biba infelis. Por ta nan consenshi no ta condena nan. Sinembargo, cualkier hende cu tin e punto di bista di Dios tocante relacion sexual y matrimonio lo no bai di acuerdo cu un areglo temporal y inmoral asina.—1 Corintionan 6:18; 7:1, 2; Hebreonan 13:4.

Con Bo Decisionnan Ta Afecta Otro Hende

Hopi bes bo decisionnan por afecta otro hende. Pesei nunca no tuma un decision imprudente ni bobo deliberadamente, ya cu lo bo por pone bo relacion precioso cu bo amigonan y famianan of, mas importante ainda, bo relacion cu Dios na peliger. Proverbionan 10:1 ta bisa: “Un yiu sabi ta haci su tata contento, ma un yiu bobo ta un tristesa pa su mama.”

Di otro banda, tin bes ta necesario pa scohe entre amigonan. Por ehempel, kisas bo ta dicidi di rechasa puntonan di bista religioso cu bo tawatin anteriormente pero cu no ta na harmonia cu e Scritura. Of bo por dicidi di haci cambionan  grandi den bo personalidad pasobra bo kier biba na harmonia cu guia dibino cu bo a acepta awor. Bo decision kisas no ta agrada cierto amigo of famianan, pero cualkier decision cu ta agrada Dios ta un decision sabi.

Sea Sabi y Tuma e Decision Mas Importante

Maske hende en general no sa esei, tur hende awe tin cu dicidi entre bida y morto. E Israelitanan di antiguedad a enfrenta un situacion similar ora nan tawata net dilanti di e Tera Priminti na aña 1473 prome cu nos era. Como bosero di Dios, Moises a bisa nan: “Mi a pone bida y morto boso dilanti, e bendicion y e maldicion. Pesei, scohe bida pa bo biba, abo y bo desendientenan, door di stima SEÑOR bo Dios, door di obedece su bos y door di tene duro na dje; pasobra esaki ta bo bida y e largura di bo dianan, pa bo biba na e tera cu SEÑOR a hura na bo tatanan, na Abraham, Isaak y Yacob, pa duna nan.”—Deuteronomio 30:19, 20.

Profecia y cronologia biblico ta mustra cu nos ta biba den “temponan trabahoso” y cu “e esena di e mundo aki ta cambiando.” (2 Timoteo 3:1; 1 Corintionan 7:31, NW) E cambio predeci lo culmina den e destruccion di un sistema humano corupto, cu lo wordo remplasa pa Dios su mundo nobo di husticia.

E mundo nobo ei ta hopi serca. Lo bo drenta pa disfruta di bida eterno riba tera bou di e Reino di Dios? Of lo bo wordo elimina for di tera hunto cu e sistema di Satanas? (Salmo 37:9-11; Proverbionan 2:21, 22) E decision encuanto ki estilo di bida bo tin cu sigui awor ta un decision cu abo tin cu tuma. Si, e ta un decision cu ta un cuestion di bida of morto. Lo bo desea di haya yudansa pa bo tuma e decision corecto, un decision sabi?

Si bo scohe bida esei ta nifica cu na prome luga lo bo tin cu siña kico ta Dios su rekisitonan. Mayoria religion no a splica kico exactamente e rekisitonan aki ta. Hopi bes nan lidernan a pone nan hendenan kere falsedad y haci cosnan cu ta desagrada Dios. Nan a keda sin splica cu ta importante pa hende tuma un decision personal pa adora Dios “den spirito y berdad.” (Huan 4:24) Pa e motibo ei mayoria di hende no ta adora Dios di e manera ei. Pero tuma nota kico Hesus a bisa: “Esun cu no ta cu mi ta contra mi; y esun cu no ta recohe hunto cu mi ta plama.”—Mateo 12:30.

Cu goso Testigonan di Yehova ta yuda hende haya un miho comprondemento di e Palabra di Dios. Regularmente nan ta tene combersacionnan biblico cu hende individual of gruponan na e ora y luga cu ta cumbini e personanan aki. Esnan cu kier haci uzo di e areglo aki mester sea tuma contacto cu Testigonan di Yehova den nan area of skirbi e editornan di E Toren di Vigilancia.

Claro cu algun hende kisas ya tin un conocemento basico di loke Dios ta rekeri. Por ta nan ta asta combenci caba cu Bijbel ta berdad y confiabel. Pero toch algun di nan a pospone e decision pa dedica nan mes na Dios. Dicon? Por tin diferente motibo.

Acaso nan no ta conciente di e importancia pa haci esei? Hesus a bisa claramente: “No ta tur hende cu bisa mi: ‘Señor, Señor’, lo drenta e reino di shelo; ma esun cu haci e boluntad di mi Tata cu ta den shelo.” (Mateo 7:21) Conocemento di Bijbel so no ta suficiente; mester actua tambe. E congregacion cristian di prome a pone ehempel pa nos. Tocante algun cristian den prome siglo Bijbel ta bisa: “Ora nan a kere Felipe, kende tawata predica e bon nobo tocante di e reino di Dios y e nomber di Hesucristo, nan tawata wordo batisa, tanto homber como mohe.” (Echonan 2:41; 8:12) Pues si un hende acepta e Palabra di Dios cu henter su curason, kere loke e ta bisa y pone su bida na harmonia cu Dios su normanan, kico ta strob’e di batisa como simbolo di su dedicacion? (Echonan 8:34-38) Ta claro cu si un hende kier pa Dios acepta su dedicacion, e tin cu dal e paso aki boluntariamente y cu un curason gososo.—2 Corintionan 9:7.

Tin hende ta pensa cu nan no tin suficiente conocemento pa dedica nan bida na Dios. Pero  tur hende cu cuminsa cu algo nobo den bida tin conocemento limita. Cua profesional lo tribi di bisa cu na cuminsamento di su carera e tawata sa tur loke e sa awor? Pa un hende tuma e decision pa sirbi Dios, loke e tin mester ta simplemente un conocemento basico di siñansanan y principionan di Bijbel, acompaña pa un deseo sinsero pa biba na harmonia cu nan.

Tin algun hende ta tarda pa tuma nan decision door cu nan tin miedo cu nan lo no por cumpli cu ne? Den hopi compromiso cu hende ta haci, ta logico cu nan ta sinti nan mes precupa cu nan lo por faya. Un homber cu dicidi pa casa y cria un famia por sinti cu e no ta masha capas, pero door di haci un compromiso esei ta motiv’e pa e haci su maximo esfuerso. Di igual manera, un hoben cu a caba di haya su rijbewijs kisas tin miedo di causa un accidente, specialmente si e ta na haltura di cifranan cu ta indica cu chauffeurnan jong tin mas chens di haya accidente na comparacion cu chauffeurnan di mas tanto tempo. Sinembargo, e conocemento aki por ta beneficioso ya cu e ta motiv’e pa core cu mas cuidou. Keda sin busca rijbewijs di ningun manera lo no ta e solucion!

Dicidi pa Bida!

Bijbel ta mustra cu e actual sistema politico, economico y religioso rond mundo y esnan cu ta apoy’e pronto lo no existi riba tera mas. Sinembargo, hende individual cu sabiamente a dicidi pa bida y cu ta actua na harmonia cu e decision ei lo keda. Como nucleo di un sosiedad di mundo nobo, nan lo participa den haci e tera un paradijs, manera tawata Dios su proposito original. Abo lo participa den e trabou gososo aki bou di e direccion di Dios?

Si ta asina, tuma decision pa studia e Palabra di Dios. Tuma decision pa bo siña kico ta e rekisitonan pa agrada Dios. Anto dicidi pa cumpli cu nan y, mas importante ainda, pega na nan te na final. Cu poco palabra, dicidi pa bida!

[Plachinan na pagina 4]

Tuma suficiente tempo pa tuma decisionnan grandi

[Plachi na pagina 5]

Keda habri pa conseho ora di scohe un carera

[Plachinan na pagina 7]

Esnan cu dicidi pa sirbi Dios awor lo por yuda haci e tera un paradijs