Akapeea Koe Me Tuku i te Au Ikianga Pakari?

“E RIRO te tangata pakari i te akarongo, e e tupu te kite,” i na Solomona ei, te ariki o Iseraela i taito. Kua iki ana te maata anga ia tatou i tetai taime i te au ikianga pakari kore no te mea kua kopae tatou i te akarongo i te akoanga a tetai ke.​—Maseli 1:5.

Kua tukunaia teia au tuatua na Solomona i muri maira ki roto i te Pipiria, kapiti atu ki tetai o te ‘toru tausani maseli’ tei atuia e ia. (1 Ariki 4:32) Ka puapinga ainei tatou mei te kite anga e te akono anga i tana au tuatua pakari? Ae. Te tauturu maira ratou ia tatou “kia kite i te pakari, e te ako; ei akakite i te au tuatua kite; Kia ārikiia ta te pakari i apii mai, te tuatua-tika, e te tuatua-tau, e te apa kore.” (Maseli 1:2, 3) Ka uriuri ana tatou i nga aratakianga e rima tei akatumuia ki runga i te Pipiria te ka tauturu mai ia tatou i te tuku i te au ikianga pakari.

Akamanako Ana i te Au Tupuanga o te Tuatau Roa

Ka akatupu etai au ikianga i te au tupuanga maata. No reira, e tauta i te akataka na mua e eaa ra teia. Kia matakite e auraka e tuku i te au puapinga o te tuatau poto ua i te akamatapo ia koe mei te au tupuanga tau kore o te tuatau roa. “E kite mamao te tangata pakari i te kino, e kua pipini iora; te aere ua atura te kite kore, e mate atura,” i akamatakite mai ei a Maseli 22:3.

Penei ka riro ei tauturu i te tata ki runga i tetai pepa e eaa oki te au tupuanga o te tuatau poto ua e te tuatau roa. Te au tupuanga o te tuatau poto ua no te iki anga i tetai angaanga penei e meitaki te tutaki e te rekaia ra te angaanga. Inara ka kapiti mai ainei ki roto i te au tupuanga o te tuatau roa te rauka anga tetai angaanga ma te kore te tuatau tinamou ki mua? Penei ka umuumu ainei te reira ia koe kia neke ki tetai ngai ke, penei ka mamao atu mei toou au oa me kare te ngutuare tangata? Penei ka tuku atu ainei te reira ia koe ki roto i tetai ngai kino me kore kare e rekaia e ka tamanamanata maata ia koe? E akara meitaki i te au mea papu e te mea papu kore, e oti e iki e ko teea te mea puapinga maata.

E Akono kia Rava te Taime

Te au ikianga tei iki rapurapuia ka riro ia ei mea pakari kore. Te akamatakite maira a Maseli 21:5 e: “Te kimianga o te aronga maroiroi ra, tei runga ïa i te apinga maata: kareka ta te aronga rapurapu ua ra, tei te putaua ïa.” Ei akatauanga, ka tau te au mapu matemate i te inangaro kia akono kia rava te taime i mua ake ka iki ei i te pirianga akaipoipoanga. Me kare ra, penei ka kite atu ratou i te tika anga o te tuatua a te tangata tata nuku Engarani ko William Congreve o te 18 anere mataiti mua, tei tuatua e: “Ko te akaipoipo rapurapu ua, penei ka tataraara tatou i te tuatau noonoo ua.”

Inara, na te akono anga kia rava te taime, auraka kia manako tarevake ia e mea taroaroa ia. E  mea puapinga roa tetai au ikianga e te umuumu ra te tu pakari e kia ikiia te reira ma te tau. Me taroaroa puapinga koreia ka riro ei mea kino kia tatou uaorai me kore ki tetai ke. Ko te taroaroa puapinga kore i tetai ikianga penei e ikianga ia​—penei paa e mea pakari kore.

E Ariki Ua i te Akoanga

I te mea kare nga turanga e rua e aiteite ana, penei kare nga tangata e rua e tuku i te ikianga aiteite me aro atu i te au manamanata. Noatu rai, ka tauturu ua te akarongo e i akapeea tetai ke i te ikianga i te au mea te aite maira ki to tatou. E ui kia ratou e akapeea ratou i teianei i te tuku i ta ratou ikianga. Ei akaraanga, te iki anga i tetai angaanga, e ui ki te aronga te rave ra i teia angaanga kia akakite mai kia koe i te mea papu e te mea papu kore no te reira. Eaa ta ratou i kite mai e ko te au mea puapinga o ta ratou ikianga, e eaa te au mea kare i meitaki me kare te au mea kino?

“Kare e uruoaanga tuatua ra, kare tei akakoroia e tupu,” i akamatakiteia mai ei tatou, “kia maata ra te aronga kimi tuatua kua mou ïa.” (Maseli 15:22) E tika, i te kimi anga i te akoanga e te apii anga mei te tupuanga o tetai ke, ka tau tatou kia rave i te reira ma te marama pu tikai e na tatou te tika openga e te akamanako anga katoa i te apainga no te rave anga i te reira.​—Galatia 6:4, 5.

E Aru i te Akava Ngakau Tereni Meitakiia

Ka rauka i te akava ngakau i te tauturu ia tatou kia tuku i te au ikianga te rotai ra ki te au kaveinga te iki ra tatou no te akatano i to tatou oraanga. No tetai Kerititiano, te aiteanga o teia ko te tereni anga i te akava ngakau kia akaata i to te Atua au manako. (Roma 2:14, 15) Te akakite maira ta te Atua Tuatua kia tatou: “Auraka e akangaropoina iaia i toou katoa ra au aerenga; e nana e akakite kia koe i toou ra au arataa.” (Maseli 3:6) E tika, i roto i etai au ngai penei ka rauka i nga tangata e rua​—taki tai ma te akava ngakau tereniia​—te au manako tuketuke e ka tuku atu i te au ikianga tuke.

Inara, ka akakore tetai akava ngakau tereni meitakiia i te tu rangatira kia iki ua, me te maroia ra tetai au angaanga te akaapaia ra e te Tuatua a te Atua. Ei akaraanga, ko tetai akava ngakau kare i tereniia e te au kaveinga Pipiria penei ka tuku ua i tetai tane e tetai vaine kia tamata i to raua tu tau i mua ake ka akaipoipo ei na te noo kapipiti anga. Penei kua manako raua e kua tuku raua i te ikianga pakari, te manakoanga e ka arai te reira ia raua mei te rave rapurapu ua i tetai akaipoipoanga pakari kore. Penei kare to raua akava ngakau e tamanamanata ia raua. Inara, ko tetai e akono ra i to te Atua manako no runga i te ainga e te akaipoipoanga ka iki i te patoi atu i taua akanoonooanga tau kore e te poto ua.​—1 Korinetia 6:18; 7:1, 2; Ebera 13:4.

Akapeea Taau Au Ikianga i te Akakeuanga i Tetai Ke

E maata te taime, penei ka akakeu taau au ikianga i tetai ke. No reira auraka e tuku akakoro i tetai ikianga pakari kore​—noatu te neneva​—te ka akakino i te pirianga akaperepere ki te au oa e te au kopu tangata me kare, tei maata atu, ki te Atua. Te akakite maira a Maseli 10:1 e: “E tamaiti kite ra, e rekarekaanga ïa na te metua tane: kareka te tamaiti neneva ra, e aueanga ïa na tona metua vaine.”

I tetai tua, te kitea ra i tetai taime e ka anoanoia kia iki i rotopu i te au pirianga oa. Kia akatutu, penei ka iki koe i te kopae i te au manako akonoanga i mua ana taau i kite mai i teianei e kua tuke ki ta te au Tuatua Tapu. Me kare penei ka iki koe i te rave i te au tu taui ki toou tu tangata no te mea te inangaro ra koe i te akatanotano i toou oraanga kia tau ki te au  aratakianga tu-Atua taau i ariki i teianei. Penei kare taau ikianga e akamareka i etai au oa me kare te au kopu tangata, inara ko tetai au ikianga te ka akamareka i te Atua e ikianga pakari ia.

E Tuku ma te Pakari i te Ikianga Maata Roa Atu

Kare e kiteaia e te tangata ravarai, te aro atu nei te katoatoa i teia tuatau no te tuku i te ikianga i rotopu i te ora e te mate. Kua kitea katoaia taua turanga aiteite e to Iseraela taito i te noo puakapa anga i te pae i te tapa o te Enua Taputouia i te 1473 M.T.N. Ei vaa tuatua no te Atua, kua akakite a Mose kia ratou: “Kua tuku au i te ora e te mate, i te meitaki e te kino, ki mua ia koe: e tenana, ka rave i te ora, kia ora koe e toou katoa uanga: Kia inangaro oki koe i to Atua ra ia Iehova, e kia akarongo koe i tona reo, e kia piri atu koe kiaia; ko toou ïa ora aia, e ko te roa ïa o toou ra puke rā; kia noo oki koe i te enua ta Iehova i taputou mai ki to ai metua ra, kia Aberahama, kia Isaaka, e kia Iakoba, e oronga no ratou ra.”​—Deuteronomi 30:19, 20.

Te akaari maira te totou e te akapapaanga Pipiria e te noo nei tatou ki roto i te “tuatau kikino tei ngata roa no te akono atu” e “te ngaro ke nei oki te tu o teianei ao.” (2 Timoteo 3:1, NW; 1 Korinetia 7:31) Ka taopenga te tauianga i totouia me akapueuia ta te tangata akatereanga o te au mea, te ka monoia e to te Atua ao ou tuatua tika.

Tei te tapa tatou o taua enua ou ra. Ka tomo atu ainei koe e rekareka ei i te ora mutu kore i te enua nei i raro ake i te Patireia o te Atua? Me kare ka akaateaia ainei koe mei te enua me takoreia ta Satani akatereanga? (Salamo 37:9-11; Maseli 2:21, 22) Te ikianga e ko teea aerenga te ka aruia i teianei naau ia e iki, e tikai e ikianga te o maira te ora me kore te mate. Ka ariki ainei koe i te tauturu i te tuku i te ikianga tau, te mea pakari ia?

Te ikianga no te ora te o maira i te apiianga na mua i ta te Atua au umuumuanga. Kua autu kore te au ekaretia e tuanga maata ia no te oronga tika atu i teia au umuumuanga. E maata te taime kua akavare to ratou au arataki i te au tangata kia irinaki i te au mea pikikaa e te rave anga i te au mea akamareka kore i te Atua. Kua manako kore ratou i te akamarama atu i te tumu no te tuku i te ikianga naau uaorai kia akamori i te Atua “ma te vaerua e te tuatua-mou ra.” (Ioane 4:24) No reira kare te maata anga o te tangata e pera ana. Inara ka akara ana i ta Iesu i tuatua: “Kare aia i ko nei iaku nei, ko toku ïa enemi, e te kore e akaputuputu katoa mai, kua akapueurikiriki ke ïa.”​—Mataio 12:30.

Te tauturu rekareka ra te Au Kite o Iehova i te tangata kia rauka te kite meitaki no te Tuatua a te Atua. E rave putuputu ana ratou i te au uriurianga Pipiria ki te au tangata tataki tai me kare te au pupu i tetai taime e te ngai tau kia ratou. Ko te aronga te inangaro ra i te akono i teia apinga ka tau kia aravei i te Au Kite i te reira ngai me kare e tata ki te aronga nenei o Te Punanga Tiaki.

E tika, penei kua kite ke ana etai no runga i ta te Atua e umuumu maira. Penei kua papu ia ratou i te tuatua mou e kua tau kia irinakiia te Pipiria. Noatu rai, kua tuku ke etai ia ratou i te tuku i te ikianga kia akatapu ia ratou uaorai ki te Atua. No teaa ra? Penei e maata ta ratou au tumu.

Penei kare ratou i kite i te puapinga no te iki anga i te reira? Kua tuatua taka meitaki a Iesu: “Kare te aronga e tuatua mai iaku e, E te Atu, e te Atu, e ope katoatoa i te tae ki te basileia ra ki te ao; ko tei akono ra i te anoano o taku Metua i te ao ra.” (Mataio 7:21) Te kite Pipiria kare e rava ua; te umuumu katoaia ra te angaanga. Kua akanoo mai te putuputuanga Kerititiano i mua ana i te akaraanga. Ka tatau tatou no runga i etai i te anere mataiti mua: “Kia akarongo ra ratou ia Philipa i te tuatua anga i te tuatua meitaki o te basileia o te Atua, e te ingoa oki o Iesu Mesia, bapetizoia iora ratou, te tane ma te vaine katoa oki.” (Angaanga 2:41; 8:12) No reira, me kua ariki ua tetai tangata i te Tuatua a te Atua, te irinaki ra i ta reira e karanga ra, e kua akatanotano mai i tona oraanga kia tau ki te au turanga a te Atua, eaa te arai ra iaia mei te papetito anga ei akatutu i tona akatapuanga? (Angaanga 8:34-38) E tika, kia arikiia e te Atua, ka tau aia kia rave i teia takainga ma te puareinga e te ngakau rekareka.​—2 Korinetia 9:7.

 Penei te manako ra etai e kare e rava ana to ratou kite e kia akatapu i to ratou oraanga ki te Atua. Inara ko te katoatoa e akamata ra i tetai aerenga ou i roto i te oraanga e kite kotinga ua ia tona. Ko teea tangata kite ka tuatua e kua kite aia i te akamataanga i tana angaanga i tana i kite i teia tuatau? Te ikianga i te tavini i te Atua te umuumuia ra te kite no te au apiianga Pipiria e te au kaveinga, kapiti mai ma te anoano ngakau tae kia akono atu ma te tau.

Te taroaroa ra etai i ta ratou ikianga te mataku anga e penei ka autu kore ratou i te akono i te reira! Ko tetai manako tau no te autu kore anga te kapiti maira i te koreromotu a te tangata e manganui. Ko tetai tangata tei iki i te akaipoipo e te utuutu mai i tetai ngutuare tangata penei ka manako tau koreia, inara te rave anga i te koreromotu e akakeu anga ia nona kia rave i tei rauka iaia. Pera katoa, ko tetai tamaiti mapu e raitini akaoro ou tana penei te mataku ra i tetai u anga motoka​—koia tikai me kua kite aia e te akaari maira te maata o te numero e ka ngoie ua te aronga mapu i te akatupu i te u i te aronga mamaata. Inara, ka riro teia kite ei mea puapinga te akakeu anga iaia kia akaoro ma te matakite maata. Te tapupu anga kia kore e rauka te raitini kare ia e ko te pauanga!

E Iki no te Ora!

Te akaari maira te Pipiria e kare e roa atu ka ngaro ke te akatereanga poritiki, i te pae moni, e te akonoanga i te ao katoa e te aronga e turu atura i te reira mei teia enua nei. Inara, ko te au tangata tataki tai tei iki pakari no te ora e tei rave ma te tau ka vai uaia. Ei tumu anga no tetai taiate ao ou, ka rave atu ratou i te akariro anga i te enua ei parataito, mei tei akakoro mua ia e te Atua ra. Ka rekareka ainei koe, i raro ake i ta te Atua aratakianga i te kapiti atu ki roto i taua angaanga rekarekaia ra?

Me koia ia, e iki i te apii i te Tuatua a te Atua. E iki i te apii i te au umuumuanga tu-Atua no te akamareka anga i te Atua. E iki i te akono atu i te reira. Tei maata atu, e iki i te rave i taau ikianga e oti ua atu. Kia taiku poto uaia, e iki no te ora!

[Au Tutu i te kapi 4]

E akono kia rava te taime no te tuku i te au ikianga pakari

[Tutu i te kapi 5]

E ariu ua ki te akoanga no te ikianga i tetai angaanga

[Au Tutu i te kapi 7]

Te aronga i iki i te tavini i te Atua i teianei ka rave atu i te akariro anga i te enua ei parataito